The Phnom Penh Post Search

Search form




Logo of Phnom Penh Post newspaper Phnom Penh Post - ប្រធាន​មន្ទីរ​រ៉ែ​មាន​សិទ្ធិ​ផ្តល់​អាជ្ញាប័ណ្ណ​ខ្នាត​តូច

ប្រធាន​មន្ទីរ​រ៉ែ​មាន​សិទ្ធិ​ផ្តល់​អាជ្ញាប័ណ្ណ​ខ្នាត​តូច

ពលរដ្ឋ​នៅក្នុង​ខេត្ត​ព្រះវិហារ​រក​រ៉ែ​មាស​ជា​លក្ខណៈ​គ្រួសារ។
ពលរដ្ឋ​នៅក្នុង​ខេត្ត​ព្រះវិហារ​រក​រ៉ែ​មាស​ជា​លក្ខណៈ​គ្រួសារ។ ហេង ជីវ័ន

ប្រធាន​មន្ទីរ​រ៉ែ​មាន​សិទ្ធិ​ផ្តល់​អាជ្ញាប័ណ្ណ​ខ្នាត​តូច

ភ្នំពេញៈ ក្រសួង​រ៉ែ និង​ថាមពល បាន​សម្រេច​ប្រគល់​សិទ្ធិ​អំណាច​ទៅ​ឲ្យ​ប្រធាន​មន្ទីរ​រ៉ែ និង​ថាមពល​ទាំង ២៥​ រាជធានី ខេត្ត ​ក្នុង​ការពិនិត្យ សម្រេច និង​ផ្តល់​នូវ​អាជ្ញាប័ណ្ណ​សិប្បកម្ម​ធនធាន​រ៉ែ ដែល​ជា​ប្រភេទ​អាជីវកម្ម​ខ្នាត​តូច​ទៅ​ឲ្យ​អាជីវករ​ដើម្បី​រៀបចំ​ការគ្រប់គ្រង​ឲ្យ​បាន​កាន់តែ​ប្រសើរ។

ថ្លែង​ក្នុង​កិច្ចប្រជុំ​ស្តីពី វិធានការ ដើម្បី​ពង្រឹង​ការអនុវត្ត​ច្បាប់​​ស្តីពី​ការគ្រប់គ្រង​ និង​ការធ្វើ​អាជីវកម្ម​ធនធាន​រ៉ែ ​កាលពី​ម្សិលមិញ​នេះ រដ្ឋលេខាធិការ​ក្រសួង​រ៉ែ និង​ថាមពល លោក ឌិត ទីណា បាន​ឲ្យ​ដឹង​ថា ការសម្រេច​ប្រគល់​សិទ្ធិ​អំណាច​នេះ បាន​ធ្វើ​ឡើង​តាមរយៈ​សេចក្តី​ប្រកាស​របស់​ក្រសួង ចុះ​ថ្ងៃ​ទី​ ៣ ខែ​មេសា​នេះ​ ដែល​សំដៅ​ចំពោះ​អាជីវកម្ម​ធនធាន​រ៉ែ ដែល​មាន​លក្ខណៈ​ជា​សិប្បកម្ម ឬ​អាជីវកម្ម​ខ្នាត​តូច​ ដែល​ប្រើប្រាស់​ទុនវិនិយោគ​តិច​បំផុត ប្រើប្រាស់​ឧបករណ៍​សម្ភារ​សាមញ្ញ ដែល​មាន​នៅក្នុង​មូលដ្ឋាន លើ​ទំហំ​ផ្ទៃដី​មិន​លើស​ពី ១ ​ហិកតា និង​ក្នុង​ជម្រៅ​មិន​លើស​ពី ៥ ​ម៉ែត្រ​ ចំពោះ​ប្រភេទ​អណ្តូង​រ៉ែ​បើក ឬ​ជម្រៅ​មិន​លើស​ពី ២០ ​ម៉ែត្រ​ សម្រាប់​អណ្តូង​រ៉ែ​ក្រោម​ដី។

លោក​ថា៖ «បើ​យើង​ទាមទារ​ឲ្យ​សិប្បកម្ម​តូច​មួយ មក​សុំ​ច្បាប់​នៅ​ក្រសួង​ដែរ គឺ​នីតិវិធី​នឹង​វែង ហើយ​គ្មាន​ប្រសិទ្ធភាព​ទេ យើង​គិត​ថា ថ្នាក់​ខេត្ត និង​ស្រុក គឺ​មាន​លទ្ធភាព​គ្រប់គ្រាន់​ក្នុង​ការពិនិត្យ​ហើយ អ៊ីចឹង​បាន​ជា​យើង​នឹង​រៀបចំ​កិច្ចប្រជុំ ក៏ដូចជា​សិក្ខាសាលា​ដើម្បី​បង្ហាត់​បង្ហាញពី​នីតិវិធី និង​បច្ចេកទេស​នៃ​ការគ្រប់គ្រង​អាជីវកម្ម​នេះ ជាមួយ​នឹង​វិធានការ​ទប់ស្កាត់​ផលប៉ះពាល់​ និង​ការការពារ​បរិស្ថាន​»​។

ចំណែក​លោក ម៉េង សក្តិធារ៉ា រដ្ឋលេខាធិការ​ក្រសួង​ធនធាន​រ៉ែ និង​ថាមពល បាន​ឲ្យ​ដឹង​ថា ការ​ផ្ទេរ​សិទ្ធិ​នេះ នាំឲ្យ​ប្រធាន​មន្ទីរ​រ៉ែ និង​ថាមពល​ទាំងអស់ អាច​ចុះ​អង្កេត ពិនិត្យ និង​វាយតម្លៃ​ដល់​ទីកន្លែង​ស្នើសុំ​ធ្វើ​សិប្បកម្ម​ធនធាន​រ៉ែ ក្នុង​រយៈពេល ១០ ​ថ្ងៃ​យ៉ាងយូរ ក្រោយពី​បាន​ចុះបញ្ជី​ទទួល​ពាក្យ​ស្នើសុំ​អាជ្ញាប័ណ្ណ​សិប្បកម្ម​​រ៉ែ ​ដោយ​ភ្ជាប់​នូវ​ការសន្និដ្ឋាន​​ច្បាស់លាស់​ពី​ទិដ្ឋភាព​បរិស្ថាន សង្គម សេដ្ឋកិច្ច និង​បច្ចេកទេស សម្រាប់​ជា​មូលដ្ឋាន​​ក្នុង​ការសម្រេច​ផ្តល់​អាជ្ញាប័ណ្ណ​សិប្បកម្ម​ធនធាន​រ៉ែ​នេះ។

លោក​ថា៖ «ក្នុង​ការងារ​នេះ ប្រធាន​មន្ទីរ​នីមួយៗ ក៏​មាន​កាតព្វកិច្ច​ដាក់​នូវ​លិខិត​ស្នើសុំ​អាជ្ញាប័ណ្ណ​សិប្បកម្ម​រ៉ែ នេះ មក​កាន់​គណៈ​អភិបាល​រាជធានី ខេត្ត​សាមី ដើម្បី​ស្នើសុំ​ឯកភាព​ជា​គោលការណ៍​ក្នុង​ការចេញ​អាជ្ញាប័ណ្ណ​នេះ ទៅ​អ្នក​ស្នើ​ក្នុង​រយៈពេល ៣ ថ្ងៃ តែ​បើ​គ្មាន​ការឯកភាព គឺ​មន្ទីរ​ត្រូវ​ធ្វើ​របាយការណ៍​មក​កាន់​ក្រសួង​ដើម្បី​សម្រេច​លើ​រឿង​នេះ»។

យ៉ាង​ណា​ក៏ដោយ ក្រោយ​កិច្ច​ណែនាំ​ពី​នីតិវិធី និង​ការងារ​បច្ចេកទេស​នៃ​ការផ្តល់​អាជ្ញាប័ណ្ណ​សិប្បកម្ម​ខ្នាត​តូច​នេះ​ប្រធាន​​មន្ទីរ​រ៉ែ និង​ថាមពល ក៏​ដូចជា​គណៈអភិបាល​ខេត្ត រងខេត្ត និង​ស្រុក​មួយ​ចំនួន ក៏​បាន​​ឡើង​ថ្លែង​សម្ដែង​នូវ​ការគាំទ្រ ពាក់ព័ន្ធ​នឹង​នីតិវិធី​នៃ​ការគ្រប់គ្រង ការសម្របសម្រួល​ការងារ​នេះ ហើយ​ខ្លះ ក៏​បាន​លើក​​ឡើង​ជា​សំណូមពរ ដើម្បី​បង្កើន​នូវ​ភាពងាយស្រួល​ក្នុង​ការគ្រប់គ្រង​ការងារ​នេះ។

អភិបាលរង​នៃ​គណៈអភិបាល​ខេត្ត​ព្រះសីហនុ លោក ហេង សំអាត បាន​ឲ្យ​ដឹង​ថា ក្នុង​ដែន​សមត្ថកិច្ច​របស់​លោក​កន្លងមក អាជ្ញា​ធរមាន​ផលវិបាក​ក្នុង​ការកំណត់ និង​បង្ក្រាប​នូវ​ការជីក​រក​រ៉ែ​ខ្សាច់​យ៉ាង​អនាធិបតេយ្យ ដោយសារ​តែ​មិន​មាន​​កិច្ចសហការ​ត្រឹមត្រូវ​ក្នុង​មូលដ្ឋាន​នេះ។

លោក​បាន​ស្នើ​ថា៖ «ខ្ញុំ​ស្នើឲ្យ​ក្រសួង​ដាក់​នូវ​លក្ខខណ្ឌ​ក្នុង​សៀវភៅ​បន្ទុក​របស់​ក្រុមហ៊ុន ដើម្បី​កំណត់​ឲ្យ​ច្បាស់​ពី​អាជីវកម្ម កម្រិត ទំហំ និង​បរិស្ថាន​ជាដើម ព្រោះ​ក្នុង​ខេត្ត​ព្រះសីហនុ​នេះ ដី​គឺជា​តំបន់​ខ្ពង់រាប ការដឹកជញ្ជូន គឺ​សមត្ថកិច្ច​តាម​មិនទាន់»។

តាមរយៈ​លិខិត​ប្រគល់​សិទ្ធិ​ដែល​ចុះ​ហត្ថលេខា​ដោយ​រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម ចុះ​ថ្ងៃ​ទី ១១ ខែ​មីនា បាន​ឲ្យ​ដឹង​ថា ប្រធាន​មន្ទីររ៉ែ និង​ថាមពល ក៏​មាន​តួនាទី​ជា​តំណាង​ក្រសួង​ក្នុង ការដោះស្រាយ​បញ្ហា​ពាក់ព័ន្ធ​នឹង​ការអនុវត្ត​ច្បាប់​ស្តីពី​ការគ្រប់គ្រង និង​ការធ្វើ​អាជីវកម្ម​ធនធាន​រ៉ែ ក្នុង​ដែន​សមត្ថកិច្ច​របស់​ខ្លួន​នៅ​ចំពោះ​មុខ​បុគ្គល​ពាក់ព័ន្ធ អាជ្ញាធរ​មាន​សមត្ថកិច្ច និង​សាលា​ជម្រះ​ក្តី​គ្រប់​ជាន់​ថ្នាក់។ ជាមួយ​គ្នា​នេះ ប្រធាន​មន្ទីរ ក៏​ត្រូវ​ដើរតួ​ជា​តំណាង​ក្នុង​អាណត្តិ​ក្នុង​ការទាមទារ ដំណើរ​ការ​រឿងក្តី ការដក និង​ការដាក់​ពាក្យបណ្តឹង ការផ្សះផ្សា និង​ការប្តឹង តវ៉ា​នានា ដើម្បី​ការពារ​សិទ្ធិ និង​ផលប្រយោជន៍​ស្រប​ច្បាប់៕

អត្ថបទគួរចាប់អារម្មណ៍