ភ្នំពេញៈ ប្រធានរដ្ឋសភានៃព្រះរាជាណាចក្រកម្ពុជាលោក ហេង សំរិន នៅរសៀលថ្ងៃទី ១១ ខែមករា ឆ្នាំ ២០២០ ខាងមុខនេះនឹងដឹកនាំគណៈប្រតិភូជាន់ខ្ពស់សភាកម្ពុជាទៅចូលរួមកិច្ចប្រជុំប្រចាំឆ្នាំលើកទី ២៨ នៃវេទិកាសភាអាស៊ីប៉ាស៊ីហ្វិកហៅកាត់ថា APPF នៅទីក្រុងកង់បេរ៉ា ប្រទេស អូស្ត្រាលី។ នេះបើតាមលោក ឡេង ប៉េងឡុង អគ្គលេខាធិការដ្ឋានរដ្ឋសភាកាលពីថ្ងៃពុធ។
លោក ប៉េងឡុង បានឲ្យដឹងថា កិច្ចប្រជុំប្រចាំឆ្នាំលើកទី ២៨ របស់ APPF នេះនឹងប្រព្រឹត្តទៅក្នុងរយៈពេល ៣ ថ្ងៃគិតចាប់ពីថ្ងៃទី ១៣ ដល់ថ្ងៃទី ១៥ ខែ មករា ឆ្នាំ ២០២០ ខាងមុខនេះ។ លោកបានបន្តថា លោក ឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាព្រមទាំងគណៈប្រតិភូជាន់ខ្ពស់សភាកម្ពុជាមួយចំនួនទៀតនឹងអញ្ជើញចូលរួមអមដំណើរលោក ហេង សំរិន ទៅចូលរួមក្នុងកិច្ចប្រជុំនោះ តបតាមការអញ្ជើញរបស់ប្រធានស្ថាប័ននីតិប្បញ្ញត្តិប្រទេសអូស្ត្រាលី។
លោកបានបញ្ជាក់ថា៖ «សម្តេចអគ្គមហាពញាចក្រី ហេង សំរិន នឹង អញ្ជើញឡើងថ្លែងសុន្ទរកថាក្នុងពិធីបើកកិច្ចប្រជុំជាផ្លូវការក្នុងនាមសម្តេចធ្លាប់ធ្វើជាប្រធាន APPF លើកទី ២៧ កាលពីដើមឆ្នាំ ២០១៩ នៅពេលដែលសភាប្រទេសកម្ពុជាធ្វើជាម្ចាស់ផ្ទះកិច្ចប្រជុំប្រចាំឆ្នាំ APPF។ ជាមួយគ្នានេះសម្តេចក៏នឹងអញ្ជើញឡើងថ្លែងបទអន្តរាគមន៍ចែករំលែកបទពិសោធពីការដឹកនាំ និងការរៀបចំកិច្ចប្រជុំ APPF លើកទី ២៧ នៅក្នុងកិច្ចប្រជុំគណៈកម្មាធិការប្រតិបត្តិផងដែរ»។
បើតាមលោក ប៉េងឡុង ក្នុងអំឡុងពេលចូលរួមកិច្ចប្រជុំនេះលោក ហេង សំរិន គ្រោងជួបពិភាក្សាការងារទ្វេភាគីជាមួយសមភាគីប្រធានរដ្ឋសភាប្រទេសអូស្រា្តលី និងទទួលជួបសវនាការជាមួយថ្នាក់ដឹកនាំសភាប្រទេសជាមិត្តមួយចំនួនទៀតក្នុងការពង្រឹងពង្រីកចំណងមិត្តភាពកិច្ចសហប្រតិបត្តិការវិស័យការទូតសភាកម្ពុជានៅលើឆាកអន្តរជាតិទាំងក្របខ័ណ្ឌពហុភាគី និងទ្វេភាគី។
ចំណែកសមាជិកគណៈប្រតិភូដទៃទៀតនឹងចូលរួមកិច្ចប្រជុំតាមគណៈកម្មាធិការជាច្រើនរបស់ APPF ដែលមានដូចជា គណៈកម្មាធិការនយោបាយ និងសន្តិសុខ គណៈកម្មាធិការសេដ្ឋកិច្ច គណៈកម្មាធិការសមាជិកសភាស្ត្រី និងគណៈកម្មាធិការប្រកាសរួមនឹងគណៈកម្មាធិការសហប្រតិបត្តិការតំបន់ជាដើម។
លោក ប៉េង ឡុង បានបន្តថា គណៈប្រតិភូជាន់ខ្ពស់សភាកម្ពុជានឹងធ្វើមាតុភូមិនិវត្តន៍មកប្រទេសកម្ពុជាវិញនៅថ្ងៃទី ១៧ ខែ មករា ឆ្នាំ ២០២០។
វេទិកាសភាអាស៊ីប៉ាស៊ីហ្វិក “The Asia Pacific Parliamentary Forum” ផ្តួចផ្តើមបង្កើតឡើងដោយអតីតនាយករដ្ឋមន្ត្រីជប៉ុនគឺលោក Yasuhiro Nakasone ក្នុងឆ្នាំ ១៩៩៣ ក្នុងគោលបំណងប្រមូលផ្តុំសភាក្នុងតំបន់អាស៊ីប៉ាស៊ីហ្វិកជួបប្រជុំប្រចាំឆ្នាំដើម្បីដោះស្រាយបញ្ហារួម ជំរុញសុខសន្តិភាព និងការអភិវឌ្ឍប្រកបដោយចីរភាពក្នុងតំបន់ និងសកលលោក។
អង្គការសភាមួយនេះមានសមាជិក ២៧ ប្រទេសរួមមាន អូស្រា្តលី កម្ពុជា ចិន ជប៉ុន សាធារណរដ្ឋកូរ៉េ ម៉ុងហ្គោលី សហព័ន្ធរុស្ស៊ី ឥណ្ឌូនេស៊ី ឡាវម៉ាឡេស៊ី ហ្វីលីពីន សិង្ហបុរី ថៃ វៀតណាម ហ្វ៊ីជី មីក្រូណេស៊ី នូវែលសេឡង់ ប៉ាពូអាស៊ីនូវែលហ្គីណេ ប្រជុំកោះម៉ារសល កាណាដា ស៊ីលី កូឡុំប៊ី ម៉ិកស៊ិក ប៉េរូ សហរដ្ឋអាមេរិក អេក្វាឌ័រ កូស្តារីកា។
សូមបញ្ជាក់ថាសភានៃព្រះរាជាណាចក្រកម្ពុជាបានចូលជាសមាជិកនៃវេទិកាសភាអាស៊ីប៉ាស៊ីហ្វិកនៅក្នុងឆ្នាំ ១៩៩៥ និងបានធ្វើម្ចាស់ផ្ទះរៀបចំកិច្ចប្រជុំប្រចាំឆ្នាំ APPF លើកទី ២៧ កាលពីខែមករា ឆ្នាំ ២០១៩ នៅខេត្តសៀមរាប ៕