The Phnom Penh Post Search

Search form




Logo of Phnom Penh Post newspaper Phnom Penh Post - ប្រធាន​រដ្ឋសភា​មិន​ព្រម​ឲ្យ​កោះ​ហៅ​លោក ស ខេង ចូល​បំភ្លឺ​ពី​ឃាតកម្ម​លោក កែម ឡី




ប្រធាន​រដ្ឋសភា​មិន​ព្រម​ឲ្យ​កោះ​ហៅ​លោក ស ខេង ចូល​បំភ្លឺ​ពី​ឃាតកម្ម​លោក កែម ឡី

Content image - Phnom Penh Post
ហ្វូង​មនុស្ស​ក្នុង​ពេល​ចូលរួម​សែង​សព​លោក កែម ឡី ចេញ​ពី​កន្លែង​កើត​ឃាតកម្ម។ ផា លីណា

ប្រធាន​រដ្ឋសភា​មិន​ព្រម​ឲ្យ​កោះ​ហៅ​លោក ស ខេង ចូល​បំភ្លឺ​ពី​ឃាតកម្ម​លោក កែម ឡី

ភ្នំពេញៈ ប្រធាន​រដ្ឋសភា​កម្ពុជា​ច្រាន​ចោល​សំណើ​របស់​តំណាងរាស្ត្រ​គណបក្ស​ប្រឆាំង​ចំពោះ​ការ​ស្នើ​ឲ្យ​កោះ​ហៅ​ឧបនាយក​រដ្ឋមន្ត្រី ស ខេង ចូល​បំភ្លឺ​នៅ​រដ្ឋសភា​ពី​ករណី​ឃាតកម្ម​លើ​អ្នក​វិភាគ​នយោបាយ​លោក​ កែម ឡី ​ដោយ​សំអាង​ថា​រឿង​នេះ​ធ្លាក់​ទៅ​ក្នុង​សមត្ថកិច្ច​របស់​តុលាការ​យូរ​មក​ហើយ​ជា​អ្វី​ដែល​ធ្វើ​ឲ្យ​ម្ចាស់​សំណើ​សម្ដែង​ការ​សោកស្ដាយ​ខណៈ​អ្នក​វិភាគ​ក៏​បាន​មើល​ឃើញ​ពី​ភាព​ឆ្គាំឆ្គង​ និង​ខ្វះ​ឯករាជ្យភាព​របស់​ស្ថាប័ន​នីតិប្បញ្ញត្តិ​ផង​ដែរ។

នៅក្នុង​សេចក្តី​ប្រកាស​មួយ​ចេញ​ផ្សាយ​កាលពី​ម្សិលមិញ​ដោយ​អ្នក​នាំពាក្យ​រដ្ឋសភា​លោក ឡេង ប៉េងឡុង បាន​បញ្ជាក់​ថា​ប្រធាន​រដ្ឋសភា​លោក​ ហេង សំរិន​ បាន​សម្រេច​មិន​បញ្ជូន​លិខិត​​របស់​តំណាងរាស្ត្រ​គណបក្ស​សង្គ្រោះជាតិ​លោក​អេង ឆៃអ៊ាង ជា​ប្រធាន​គណៈកម្មការ​ទី ១ នៃ​រដ្ឋសភា​ដែល​បាន​កោះ​ហៅ​លោក ស ខេង ​ឧបនាយករដ្ឋមន្ត្រី​ និង​ជា​រដ្ឋមន្ត្រី​ក្រសួង​មហាផ្ទៃ​ឲ្យ​ចូល​បំភ្លឺ​ទាក់ទង​ទៅ​នឹង​ឃាតកម្ម​លើ​អ្នក​វិភាគ​នយោបាយ​លោក​ កែម ឡី នោះ​ទេ។

ក្នុង​សេចក្តី​ប្រកាស​នោះ​បាន​បញ្ជាក់​ថា៖ «សម្តេច...ហេង ​សំរិន ​ប្រធាន​រដ្ឋសភា​បាន​សម្រេច​មិន​បញ្ទូន​លិខិត​នេះ​ទៅ​រដ្ឋាភិបាល​ដើម្បី​អញ្ជើញ​សម្តេច​ក្រឡា​ហោម​ [លោក​ ស ខេង] ​មក​បំភ្លឺ​ទេ​ដោយ​ហេតុ​ថា​ករណី​លោក កែម​ ឡី​ នេះ​បាន​ធ្លាក់​ទៅ​ក្នុង​សមត្ថកិច្ច​តុលាការ​តាំង​ពី​ដំណាក់កាល​ដំបូង​ និង​តាំងពី​យូរ​មក​ហើយ ហើយ​ទាំង​រដ្ឋសភា​ និង​រាជរដ្ឋាភិបាល​សុទ្ធ​តែ​ពុំ​មាន​សិទ្ធិ​អ្វី​ជ្រៀតជ្រែក​ចូល​កិច្ចការ​របស់​តុលាការ​ឡើយ»​។

លោក អេង ឆៃអ៊ាង បាន​ផ្ញើ​លិខិត​មួយ​ចុះ​ថ្ងៃ​ទី​ ២១ ខែ​ធ្នូ​ទៅ​រដ្ឋាភិបាល​តាមរយៈ​ប្រធាន​រដ្ឋសភា​ដោយ​ស្នើ​អញ្ជើញ​រដ្ឋមន្ត្រី​ក្រសួង​មហាផ្ទៃ​លោក​ ស ខេង ចូល​បំភ្លឺ​នៅឯ​គណៈកម្មការ​ទី ១ ​នៃ​រដ្ឋសភា​ជុំវិញ​ករណី​ឃាតកម្ម​លើ​អ្នក​វិភាគ​នយោបាយ​លោក កែម ឡី។

ម្ចាស់​លិខិត​លោក អេង ឆៃអ៊ាង បាន​សម្តែង​ការ​សោកស្តាយ​ដែល​លោក​ ហេង សំរិន​បាន​ច្រាន​ចោល​លិខិត​របស់​លោក​ដោយ​បាន​និយាយ​ថា​ជា​ប្រធាន​រដ្ឋសភា​មិន​គួរ​ច្រាន​ចោល​លិខិត​ណា​មួយ​ដែល​បាន​ស្នើ​ឲ្យ​កោះ​ហៅ​មន្ត្រី​រដ្ឋាភិបាល​ដើម្បី​ចូល​មក​បំភ្លឺ​នោះ​ទេ។ ​លោក​បាន​អះអាង​ថា​មាន​តែ​រដ្ឋាភិបាល​តែ​មួយ​គត់​ដែល​គួរ​បដិសេធ​ឬ​ក៏​អត់​។

លោក​ អេង ​ឆៃអ៊ាង ​ថ្លែង​ថា៖ «ករណី​បែប​នេះ​វា​មិនមែន​រដ្ឋសភា​ខ្លួនឯង​ជា​អ្នក​ឆ្លើយ​នោះ​ទេ។​ រាជរដ្ឋាភិបាល​គឺជា​អ្នក​ឆ្លើយ​ពីព្រោះ​រដ្ឋសភា​បើ​យោង​តាម​បទ​បញ្ជា​ផ្ទៃក្នុង​ និង​រដ្ឋធម្មនុញ្ញ​គឺជា​អង្គនីតិប្បញ្ញត្តិ​ដើម្បី​ឃ្លាំ​មើល​ការងារ​របស់​រដ្ឋាភិបាល​ និង​មាន​សិទ្ធិ​​តាំង​សំណួរ​ និង​កោះ​ហៅ​តំណាង​រាជរដ្ឋាភិបាល​ដើម្បី​បំភ្លឺ​លើ​ផ្នែក​ណាមួយ​។ ខ្ញុំ​ពិត​ជា​មាន​ការ​សោកស្តាយ​ណាស់​ដែល​រដ្ឋសភា​មិន​គួរ​ដើរ​តួនាទី​ដូច​នេះ​ទេ»​។

អ្នក​វិភាគ​នយោបាយ​លោក​ មាស នី បាន​ថ្លែង​ថា​ការ​សម្រេច​របស់​ប្រធាន​រដ្ឋសភា​លោក​ ហេង សំរិន បែប​នេះ​មាន​ន័យ​ថា​សភា​ព្យាយាម​ការពារ​រដ្ឋាភិបាល​ហើយ​វា​ធ្វើ​ឲ្យ​ប៉ះពាល់​ដល់​ឯករាជ្យភាព​របស់​អង្គនីតិប្បញ្ញត្តិ​។

លោក​ មាស នី ​ថ្លែង​ថា៖ «ដូច្នេះ​​ប្រសិន​បើ​សភា​បាន​ច្រាន​ចោល​ដោយ​ខ្លួនឯង​វា​មើល​ទៅ​ឆ្គង​ខ្លាំង​ណាស់​ហើយ​បាត់បង់​ឯករាជ្យភាព​របស់ [សភា]។ វា​ហាក់​ដូចជា​សភា​​ខ្លួនឯង​ហ៊ាន​ឆ្លើយ​ជំនួស​ឲ្យ​រដ្ឋមន្ត្រី​ក្រសួង​មហាផ្ទៃ។ ខ្ញុំ​គិត​ថា​វា​គឺជា​ចេតនា​នយោបាយ​ដើម្បី​ការពារ​រដ្ឋាភិបាល»។

ឃាតកម្ម​ទៅ​លើ​លោក កែម ឡី រហូត​មក​ទល់​ពេល​នេះ​មាន​រយៈពេល​ជាង ៥ ខែ​ហើយ​តែ​នៅ​មិន​ទាន់​មាន​ពន្លឺ​យុត្តិធម៌​នៅ​ឡើយ​​ទេ​ថ្វីបើ​ភ្លាមៗ​សមត្ថកិច្ច​បាន​ធ្វើការ​​ឃាត់​ខ្លួន​ជនសង្ស័យ​ឈ្មោះ​ ជួប សម្លាប់ ដែល​ក្រោយ​មក​​ត្រូវ​បាន​គេ​រកឃើញ​អត្តញ្ញាណ​ដែល​មាន​​ឈ្មោះ ថា អឿត អាង ក្ដី៕ NS

អត្ថបទគួរចាប់អារម្មណ៍