The Phnom Penh Post Search

Search form

Logo of Phnom Penh Post newspaper Phnom Penh Post - ប្រធាន​អង្គការ​ប្រើ​ហិង្សា​លើ​កុមារ​ត្រូវ​ឃាត់​ខ្លួន




ប្រធាន​អង្គការ​ប្រើ​ហិង្សា​លើ​កុមារ​ត្រូវ​ឃាត់​ខ្លួន

សមត្ថកិច្ច​កំពុង​សួរ​ចម្លើយ​ស្រ្តី​ប្រធាន​អង្គការ​កាលពី​ម្សិលមិញ​។
សមត្ថកិច្ច​កំពុង​សួរ​ចម្លើយ​ស្រ្តី​ប្រធាន​អង្គការ​កាលពី​ម្សិលមិញ​។ រូបថត សហការី

ប្រធាន​អង្គការ​ប្រើ​ហិង្សា​លើ​កុមារ​ត្រូវ​ឃាត់​ខ្លួន

ភ្នំពេញៈ កុមារ​ ៤ រូប​ត្រូវ​បាន​ជួយ​សង្គ្រោះ​ចំណែក​ស្ត្រី​ប្រធាន​អង្គការ «ផ្ទះ​របស់​ក្មេងៗ​នៃ​កម្ពុជា» ត្រូវ​បាន​សមត្ថកិច្ច​ឃាត់​ខ្លួន​កាលពី​ម្សិលមិញ​​តាម​បណ្តឹង​ពី​ម្ចាស់​ជំនួយ​ ដោយសារ​តែ​អង្គការ​នេះ​បង្ខាំង ប្រើ​ហិង្សា​ ប្រព្រឹត្ត​អំពើ​អនាចារ បង្ខំ​ឲ្យ​កុមារ​ធ្វើការ​ហួស​កម្លាំង ព្រមទាំង​បង្អត់​អាហារ​ពួកគេ​​។ នេះ​បើ​តាម​មន្ត្រី​ក្រសួង​សង្គមកិច្ច​ឲ្យ​ដឹង​កាលពី​ម្សិលមិញ។

ការ​ចុះ​ទៅ​​ជួយ​សង្គ្រោះ​ក្មេងៗ​ទាំង​បួន​នាក់​​អាយុ​ពី ៥ ​ដល់​ ១០ ​​​ឆ្នាំ (ស្រី​ម្នាក់) ក្នុង​នោះ​ម្នាក់​​ជា​កុមារ​ពិការ «ខ្សោយ​បញ្ញា» នៅក្នុង​មណ្ឌល​អង្គការ​នេះ​ស្ថិត​ក្នុង​សង្កាត់​ច្បារ​អំពៅ​ ២ ខណ្ឌ​ច្បារអំពៅ​បាន​ធ្វើ​ឡើង​មួយ​ថ្ងៃ​បន្ទាប់ពី​មន្ទីរ​សង្គមកិច្ច​រាជធានី​ភ្នំពេញ​បាន​ទទួល​បណ្តឹង​ពី​ម្ចាស់​ជំនួយ​​តែ​មួយ​គត់​គឺ លោកស្រី Chloe Flanagan ប្តឹង​ពី​កញ្ញា​ សយ ស្រីអន អាយុ ២៣ ​ឆ្នាំ​ និង​សង្សារ ថា​បាន​ប្រើ​ហិង្សា​​លើ​រាងកាយ​កុមារ។ នេះ​បើ​តាម​លោក ឯម ច័ន្ទមករា អគ្គលេខាធិការ​ក្រុម​ប្រឹក្សា​សកម្មភាព​ជនពិការ​នៃ​ក្រសួង​សង្គមកិច្ច និង​ពាក្យបណ្តឹង​ជា​ភាសា​អង់គ្លេស​ចុះ​ថ្ងៃ​ទី​ ២២ មិថុនា។

សមត្ថកិច្ច​ក៏​កំពុង​ស្រាវជ្រាវ​ស្វែងរក​ចាប់​ខ្លួន​​បុរស​ម្នាក់​ទៀត​ឈ្មោះ ស្រស់ អ៊ុង អាយុ​ ២៤ ​ឆ្នាំ​ជា​សង្សារ​របស់​ ស្រីអន ​សង្ស័យ​ញៀនថ្នាំ ដែល​បាន​រួម​គ្នា​ធ្វើ​បាប​កុមារ​ទាំងនេះ​ផង​ដែរ​។

លោក ច័ន្ទមករា​ថា៖ ​«ពួកគេ​ពាក់ព័ន្ធ​នឹង​ការ​បង្ខាំង​ក្មេង​ ប្រើ​ហិង្សា​វាយ​ធ្វើ​បាប​ បង្ខំ​ឲ្យ​លាង​បង្គន់ បោស​ផ្ទះ ហួស​កម្លាំង​។ មិន​តែ​ប៉ុណ្ណោះ​ថែម​ទាំង​ប្រព្រឹត្ត​អនាចារ​ជាមួយ​សង្សារ​ខ្លួន​ឲ្យ​​ក្មេងៗ​មើល​ទៀត​»។

លោក​បន្ត​ថា ម្ចាស់​ជំនួយ​បាន​ផ្តល់​ថវិកា​ក្នុង​មួយ​សប្តាហ៍​ប្រមាណ​ ៥០០ ដុល្លារ​ដើម្បី​ឲ្យ​ចិញ្ចឹម​ក្មេងៗ​ និង​​បញ្ជូន​ពួកគេ​ទៅ​រៀន ប៉ុន្តែ​ស្ត្រី​រូប​នេះ​ «បាន​ប្រើ​លុយ​ជំនួយ​មិន​ចំ​ទិសដៅ​» គឺ​មិន​យក​មក​បម្រើ​កុមារ​នៅ​អង្គការ​នោះ​ទេ។

បើ​តាម​បណ្តឹង​ពី​លោកស្រី Chloe Flanagan បាន​ចោទ​ប្រកាន់​បុរស​ដែល​សមត្ថកិច្ច​ស្វែងរក​ថា​បាន​«វាយ​បោក​ក្បាល​ក្មេង​ពិការ​ដែល​មាន​សតិ​មិន​ល្អ​ទៅ​នឹង​ជញ្ជាំង​ស៊ីម៉ងត៍​ក្នុង​មណ្ឌល​អង្គការ»។ ប

ណ្តឹង​​បាន​បន្ត​ថា​មាន​បញ្ហា​សុខភាព​មិន​ល្អ​ចំពោះ​ក្មេងៗ ដោយសារ​ពួកគេ​មិន​បាន​ដុស​សម្អាត​ធ្មេញ​គ្មាន​សាប៊ូ​កក់សក់​កន្លែង​គេង​រៀបចំ​មិន​ស្អាត​ជាដើម​។ បើ​តាម​​លោក ច័ន្ទមករា អង្គការ​​នេះ​បាន​បើក​កាលពី​ខែ​កក្កដា​ឆ្នាំ​ ២០១៤។

កុមារ​រងគ្រោះ​ទាំង​បួន​នាក់​ត្រូវ​បាន​បញ្ជូន​ទៅ​ស្នាក់នៅ​មណ្ឌល​អង្គការ​ ម្លប់​ឫស្សី បណ្តោះ​អាសន្ន​សិន៕

អត្ថបទគួរចាប់អារម្មណ៍