The Phnom Penh Post Search

Search form

Logo of Phnom Penh Post newspaper Phnom Penh Post - ប្រធាន​អង្គការ​ផ្ទះ​ក្មេង​ច្រាន​ចោល​ការ​ចោទ​ពី​ម្ចាស់​ជំនួយ




ប្រធាន​អង្គការ​ផ្ទះ​ក្មេង​ច្រាន​ចោល​ការ​ចោទ​ពី​ម្ចាស់​ជំនួយ

ស្ត្រី​ជនបរទេស​ដែល​ជា​ម្ចាស់​ជំនួយ​ត្រូវ​បាន​សាកសួរ​ក្រោយពី​ដាក់​ពាក្យ​បណ្តឹង​។
ស្ត្រី​ជនបរទេស​ដែល​ជា​ម្ចាស់​ជំនួយ​ត្រូវ​បាន​សាកសួរ​ក្រោយពី​ដាក់​ពាក្យ​បណ្តឹង​។ រូបថត សហការី

ប្រធាន​អង្គការ​ផ្ទះ​ក្មេង​ច្រាន​ចោល​ការ​ចោទ​ពី​ម្ចាស់​ជំនួយ

ភ្នំពេញៈ ប្រធាន​អង្គការ​ផ្ទះ​របស់​ក្មេងៗ​នៃ​កម្ពុជា​បាន​ច្រាន​ចោល​ការ​ចោទប្រកាន់​ថា​បាន​វាយដំ​លើ​កុមារ​បង្អត់​អាហារ​កុមារ ​និង​រួមភេទ​ជាមួយ​សង្សារ​នៅ​មុខ​កុមារ ​និង​បាន​ចោទ​បក​ទៅ​ម្ចាស់​ជំនួយ​ប​រទេស​វិញ​ថា​ជា​អ្នក​បង្ក​ហេតុ​ប្រើ​ហិង្សា​លើ​រូប​គាត់​។

ស្ត្រី​ឈ្មោះ សយ ស្រីអន អាយុ​ ២៣ ​ឆ្នាំ ប្រធាន​អង្គការ​ផ្ទះ​របស់​ក្មេងៗ​នៃ​កម្ពុជា​បាន​ប្រាប់​ភ្នំពេញ​ប៉ុស្តិ៍​​តាម​ទូរស័ព្ទ​​ម្សិលមិញ​ដោយ​បដិសេធ​នូវ​បណ្តឹង​ទាំងនោះ​ខណៈ​រូប​នាង​កំពុង​​ត្រូវ​បាន​​ឃុំ​ខ្លួន​នៅ​អធិការដ្ឋាន​​នគរបាល​ខណ្ឌ​ច្បារអំពៅ​ដើម្បី​សាកសួរ​ជុំវិញ​បណ្តឹង​របស់​ម្ចាស់​ជំនួយ​លោកស្រី Chloe Flanagan​។

ស្រីអន ឲ្យ​ដឹង​ថា លោកស្រី Chloe ​ទៅ​វិញ​ទេ​ដែល​បាន​វាយ​ធ្វើ​បាប​ទៅលើ​គាត់​ដោយសារ​ខឹង​គាត់​មិន​អនុញ្ញាត​ឲ្យ​ស្នាក់នៅ​មណ្ឌល​អង្គការ​ពេល​លោកស្រី Chloe Flanagan និង​សង្សារ​មក​លេង​នៅ​កម្ពុជា​។ «ពួកគេ​មក​ផ្ទះ​យប់ៗ ហើយ​ស្រវឹង​ស្រា។ គាត់​ (ម្ចាស់​ជំនួយ​) ​បាន​វ៉ៃ​ធ្វើ​បាប​ខ្ញុំ​ដោយ​យក​សៀវភៅ​វាយ​ក្បាល​ខ្ញុំ​កាលពី​សប្តាហ៍​មុន​ហ្នឹង..​.​​ម្ចាស់​ជំនួយ​ហ្នឹង​មក​សុំ​ខ្ញុំ​ស្នាក់​នៅ​ខ្ញុំ​មិន​អនុញ្ញាត​ឲ្យ​ហើយ​មិន​បាន​ជម្រាប​ខ្ញុំ​មុន​ហើយ​គាត់​​ក៏​មក​តែ​ម្តង​។ អ៊ីចឹង​គាត់​អន់​ចិត្ត​ហើយ​ខឹង​នឹង​ខ្ញុំ»​។

ដោយសារ​រឿង​ហេតុ​នេះ​ស្រីអន​ក៏​ប្តឹង​ទៅ​នគរបាល​ប្រឆាំង​នឹង​ម្ចាស់​ជំនួយ​ប្រើ​ហិង្សា​លើ​ខ្លួន​ផង​ដែរ ​ប៉ុន្តែ​នាង​ថា​នគរបាល​មិន​ចាត់ការ​បែរ​ជា​មាន​បណ្តឹង​តប​ពី​ម្ចាស់​ជំនួយ​ចោទប្រកាន់​រូប​នាង​ទៅវិញ​។ ស្រីអន​និយាយ​ថា​​៖ «​ខ្ញុំ​ចង់​ឲ្យ​ច្បាប់​រក​យុត្តិធម៌​ឲ្យ​ខ្ញុំ​ផង​ព្រោះ​ខ្ញុំ​អត់​បាន​ប្រព្រឹត្ត​ដូច​អ្វី​គាត់​និយាយ​ហ្នឹង​ទេ​ព្រោះ​ក្នុង​នាម​ខ្ញុំ​ប្រធាន​អង្គការ​ម្នាក់​ខ្ញុំ​ជា​អ្នក​អប់រំ​ផ្តល់​គំរូ​ដល់​ក្មេង»។

សមត្ថកិច្ច​ដែល​មាន​ក្រសួង​សង្គមកិច្ច​ចូលរួម​បាន​ឃាត់​ខ្លួន​ ស្រីអន ​កាលពី​ថ្ងៃ​ទី​ ២៣ មិថុនា​ នៅ​ទីស្នាក់ការ​អង្គការ​ផ្ទះ​របស់​ក្មេងៗ​នៃ​កម្ពុជា និង​បាន​សង្គ្រោះ​កុមារ ៤ ​នាក់ អាយុ​ពី​ ៥ ទៅ​ ១០ ​ឆ្នាំ មាន​ម្នាក់​ខ្សោយ​បញ្ញា ដោយសារ​មាន​បណ្តឹង​ពី​លោកស្រី Chloe ប្តឹង​មន្ទីរ​សង្គមកិច្ច​រាជធានី​ថា ប្រធាន​អង្គការ​នេះ​បាន​បង្អត់​អាហារ​​កេ្មង ​ប្រើ​ហិង្សា​លើ​ក្មេង​ និង​ថែម​ទាំង​រួមភេទ​ជាមួយ​សង្សារ។

ប្រធាន​អង្គការ​នេះ​និយាយ​ថា ​នាង​មិន​បាន​យក​លុយ​ម្ចាស់​ជំនួយ​ទៅ​ចាយ​ផ្ទាល់​ខ្លួន​ឡើយ​ ហើយ​ម្ចាស់​ជំនួយ​នេះ​ឲ្យ​លុយ​ក្នុង​មួយ​ខែ​ប្រមាណ​ពី​​ ៣០០ ​ដុល្លារ ទៅ​ ៥០០ ​ដុល្លារ ​សម្រាប់​បង់​ថ្លៃ​ទឹក​ ភ្លើង​ ម្ហូប​អាហារ​ និង​ការ​ចំណាយ​ផ្សេងៗ​។

លោក ឯម ច័ន្ទមករា អគ្គលេខាធិការ​ក្រុម​ប្រឹក្សា​សកម្មភាព​ជនពិការ​ថ្លែង​ថា នគរបាល​ក៏​​បាន​ហៅ​ស្ត្រី​ម៉ែដោះ​ដែល​ជួយ​មើល​ថែ​ក្មេង​ដើម្បី​សាកសួរ​ពី​បញ្ហា​បណ្តឹង​នេះ​​​។ ​លោក​ថ្លែង​ថា៖ «នគរបាល​កំពុង​រៀបចំ​សំណុំ​រឿង និង​រំពឹង​ថា​ស្អែក ​(ថ្ងៃ​ព្រហស្បតិ៍​) នឹង​បញ្ជូន​ទៅ​តុលាការ​»​៕

អត្ថបទគួរចាប់អារម្មណ៍