.jpg)
លោក ជា ហ៊ាន (មុខ) នៅទីតាំងវិវាទដី ១ កន្លែងថ្មីៗនេះ។ រូបថត សហការី
កំពង់ស្ពឺ: ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (CANCIPO) កំពុងរៀបចំបណ្ដឹងប្ដឹងមន្ត្រីក្រុមប្រឹក្សាឃុំត្រពាំងជោរម្នាក់ទៅសាលាដំបូងខេត្តកំពង់ស្ពឺ ករណីញុះញង់ពលរដ្ឋជាង ១០០ នាក់ ឲ្យតវ៉ារំលោភយកដីរបស់ពលរដ្ឋ ១៦ គ្រួសារផ្សេងទៀតនៅភូមិស្រែកិន ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។
លោក ជា ហ៊ាន ប្រធានអង្គការ ACNCIPO បានឲ្យដឹងកាលពីម្សិលមិញថា លោកកំពុងរៀបចំពាក្យបណ្ដឹងមួយប្ដឹងលោក សន សឹម ជំទប់ទី ១ ឃុំត្រពាំងជោរ ស្រុកឱរ៉ាល់ ជុំវិញការនៅពីក្រោយខ្នង និងញុះញង់ឲ្យពលរដ្ឋជាង ១០០ នាក់តវ៉ារំលោភយកដីចំនួន ១២០ ហិកតា ដែលជារបស់ពលរដ្ឋចំនួន ១៦ គ្រួសារផ្សេងទៀតនៅឃុំត្រពាំងជោរ ស្រុកឱរ៉ាល់។
លោកបានបន្តថា ដីព្រៃចំនួន ១២០ ហិកតានេះ ជាដីដែលឆ្វៀលចេញពីដីព្រៃដែនជម្រកសត្វព្រៃភ្នំឱរ៉ាល់សម្រាប់ចែកជូនពលរដ្ឋចំនួន ១៦ គ្រួសារ ដែលរងផលប៉ះពាល់ជាមួយក្រុមហ៊ុនស្ករស (ភ្នំពេញស៊ូហ្គ័រ)។ ប៉ុន្ដែដីនេះមិនទាន់មានការប្រើប្រាស់ដាំដំណាំ ឬអាស្រ័យផលទេ ដោយកំពុងមានព្រៃរបោះតូចៗដុះនៅលើដីនោះ។
លោក ជា ហ៊ាន បានបញ្ជាក់ថា៖ «បងប្អូនពលរដ្ឋ ១០០ នាក់ សុំឲ្យខ្ញុំដកខ្លួនថយចេញពីការចាប់រានទន្ទ្រានដីព្រៃដែលមន្ត្រីជំនាញកាត់ចែកពលរដ្ឋ ១៦ គ្រួសារ។ ខ្ញុំបានពន្យល់បងប្អូនដែលមកតវ៉ាការពារដីនេះថា ប្រសិនបើគេចាប់ខ្លួន គឺគេមិនមែនចាប់អ្នកនៅក្រោយខ្នងទេ គឺចាប់បងប្អូនហ្នឹងហើយដែលបានប្រព្រឹត្តបទល្មើសជាក់ស្តែង។ អ៊ីចឹងឈប់តវ៉ាទៅប្រគល់ដីហ្នឹងឲ្យគេវិញទៅ»។
លោក គិន ផល្លា អាយុ ៤៥ ឆ្នាំតំណាងពលរដ្ឋចំនួន ១៦ គ្រួសាររស់នៅភូមិស្រែកិន ឃុំត្រពាំងជោរ បានថ្លែងថា លោកពិតជាមានការភ្ញាក់ផ្អើលយ៉ាងខ្លាំងនៅពេលឃើញពលរដ្ឋចំនួនជាង ១០០ នាក់ផ្សេងទៀតមកតវ៉ាទាមទារដីរបស់ពួកលោកខណៈរាជរដ្ឋាភិបាលបានកាត់ឆ្វៀលពីតំបន់អភិរក្សភ្នំឱរ៉ាល់ប្រគល់ឲ្យពលរដ្ឋចំនួន ១៦ គ្រួសារតាំងពីឆ្នាំ ២០១៣ មកនោះ។
លោកបន្តថា ដីព្រៃចំនួន ១២០ ហិកតាត្រូវបានអាជ្ញាធរពាក់ព័ន្ធកាត់ចែកពលរដ្ឋជាថ្នូរនឹងការដោះដូរដីដែលមានផលប៉ះពាល់ជាមួយក្រុមហ៊ុនភ្នំពេញស៊ូហ្គ័រ ប៉ុន្ដែដីនេះត្រូវទុកនៅទំនេរ ដោយពុំទាន់អាស្រ័យផលអ្វីទេ។ កាលពីថ្ងៃទី ១៧ ខែមីនា ពលរដ្ឋចំនួន ១៦ គ្រួសារបាននាំគ្នាទៅធ្វើរបងព័ទ្ធដីនោះក៏ស្រាប់តែមានពលរដ្ឋជាង ១០០ នាក់មកតវ៉ា ហើយអះអាងថាជាដីរបស់ពួកគាត់។
លោកបញ្ជាក់ថា៖ «ដីពួកខ្ញុំនេះមានការដឹងឮពីអាជ្ញាធរមូលដ្ឋាន អាជ្ញាធរខេត្ត និងមានឯកសារបញ្ជាក់សម្គាល់ក្បាលដីច្បាស់លាស់ តែគ្រាន់តែដីហ្នឹងពួកខ្ញុំមិនទាន់បានអាស្រ័យផល ដោយសារមានព្រៃឈើតូចៗពិបាកភ្ជួររាស់ ទាល់តែជួលត្រាក់ទ័រគេមកជួយភ្ជួរ ទើបអាចអាស្រ័យផលបាន»។
លោក អ៊ឹម សន មេភូមិស្រែកិន ឃុំត្រពាំងជោរបានថ្លែងពីម្សិលមិញថា ដី ១២០ ហិកតានេះពិតជារបស់ពលរដ្ឋ ១៦ គ្រួសារនោះមែនដោយអាជ្ញាធរស្រុក និងខេត្តបានសម្រេចកាត់ឆ្វៀលចេញពីដែនជម្រកសត្វព្រៃភ្នំឱរ៉ាល់ដើម្បីចែកជូនពួកគាត់ ព្រោះពួកគាត់ជាអ្នករងគ្រោះជាមួយក្រុមហ៊ុនស្ករស។
លោកបន្តថា លោកបានទទួលដំណឹងពីការតវ៉ាទាមទារនេះដែរ ដោយពលរដ្ឋទាំងជាង ១០០ នាក់នេះមានមួយចំនួនមកពីខេត្តព្រៃវែង ស្វាយរៀង កំពង់ចាម បាត់ដំបង និងជាអ្នករស់នៅក្នុងមូលដ្ឋាននោះមួយចំនួនទៀត។ ពួកគាត់ជាអ្នកចំណាកស្រុកដែលមកប្រកបការងារនៅតំបន់នោះ។
លោកបញ្ជាក់ថា៖ «ខ្ញុំមិនទាន់ដឹងត្រូវដោះស្រាយយ៉ាងណាទេ រង់ចាំថ្នាក់លើគេចាត់ចែងទៅ ខ្ញុំមន្ត្រីតូចតាចទុកលទ្ធភាពឲ្យថ្នាក់លើ ព្រោះបើខ្ញុំចេញមុខដោះស្រាយក៏ភាគីទាំងសងខាងមិនស្ដាប់សម្ដីខ្ញុំដែរ។ អ៊ីចឹងខ្ញុំគ្រាន់តែដឹងប៉ុណ្ណឹង ហើយរឿងអ្នកណានៅពីក្រោយខ្នងការតវ៉ានេះ ខ្ញុំអត់ដឹងទេ»។
លោក សន សឹម ជំទប់ទី ១ ឃុំត្រពាំងជោរដែលរងការចោទប្រកាន់ថា នៅពីក្រោយការតវ៉ា និងញុះញង់ឲ្យពលរដ្ឋរំលោភយកដីនោះមិនអាចទាក់ទងសុំការបញ្ជាក់ពីករណីនេះបានទេកាលពីម្សិលមិញ។
លោក ទេព ណែម មេឃុំត្រពាំងជោរបានប្រាប់ភ្នំពេញ-ប៉ុស្ដិ៍ពីម្សិលមិញថា លោកទទួលបានដំណឹងពីការតវ៉ានេះដែរ ប៉ុន្ដែលោកមិនបានទៅដល់ទីតាំងដីនោះទេ ព្រោះលោកជាប់រវល់ប្រជុំនៅសាលាស្រុកឱរ៉ាល់។
ដីទាំងនោះពិតជាដីរបស់ពលរដ្ឋ ១៦ គ្រួសារដែលរងផលប៉ះពាល់ពីក្រុមហ៊ុនស្ករសមែន។
លោកបន្តថាលោក សន សឹម ជំទប់ទី ១ ឃុំត្រពាំងជោរពិតជាអ្នកពាក់ព័ន្ធការតវ៉ានេះ ព្រោះកន្លងមកមានការចរចាគ្នាលួចទិញ-លក់ដីនៅតំបន់ខាងលើនេះ ប៉ុន្ដែលោកមិនបានចាប់អារម្មណ៍ថា ជាដីរបស់ពលរដ្ឋ ១៦ គ្រួសារនេះទេ។ លោក សន សឹម ប្រហែលជាអ្នកញុះញង់ពីក្រោយខ្នងឲ្យមានការតវ៉ាបែបនេះ។
លោកបញ្ជាក់ថា៖ «រឿងរបស់លោក សន សឹម ឲ្យគាត់ដោះស្រាយខ្លួនគាត់ទៅខ្ញុំអត់ដឹងទេ បើមានអ្នកណាគេចង់ប្ដឹងឲ្យគេប្ដឹងទៅព្រោះគាត់ហ្នឹងជាប់ពាក់ព័ន្ធរឿងដីហ្នឹងហើយ ខ្ញុំអត់មានកាន់ជើងមន្ត្រីខិលខូចអ៊ីចឹងទេ»។
លោក មួង ធី អភិបាលស្រុកឱរ៉ាល់មិនអាចស្វែងរកប្រភពដើម្បីសុំការបញ្ជាក់ពីករណីនេះបានទេកាលពីម្សិលមិញ។
រីឯលោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺក៏មិនទាន់អាចទាក់ទងសុំការបញ្ជាក់ពីករណីនេះបានដែរ ដោយសារទូរស័ព្ទរបស់លោកមិនមានអ្នកទទួលកាលពី-ម្សិលមិញ៕
