កំពង់ស្ពឺៈ ប្រធានអង្គការអភិរក្សធនធានធម្មជាតិ និង សត្វព្រៃ លោក ជា ហ៊ាន នៅព្រឹកថ្ងៃទី ១៥ សីហានេះ បានចូលបំភ្លឺនៅតុលាការខេត្ត កំពង់ស្ពឺ ជុំវិញបណ្ដឹងចោទប្រកាន់របស់អ្នកស្រី សៀង សាម៉េន ពីបទ «បរិហារកេរ្តិ៍ និង រារាំងដំណើការឈូសឆាយពង្រាបដីកម្មសិទ្ធិឯកជនស្របច្បាប់»តាមដីកាកោះរបស់លោកព្រះរាជអាជ្ញារង តុង រតនា ។ នេះបើតាមលោក ឡោ គីម ហ្គិច មេធាវីការពារលោក ជាហ៊ាន។
លោក ហ្គិច បានថ្លែងថា កាលពីដើមខែមិថុនា កូនក្ដីរបស់លោក គឺ លោក ជា ហ៊ាន រួមជាមួយមន្ត្រីឧទ្យានុរក្សដែនជម្រកសត្វព្រៃភ្នំឱរ៉ាល់បានចុះទៅទប់ស្កាត់សកម្មភាពឈូសឆាយដីព្រៃរបស់ក្រុមការងារអ្នកស្រី សៀង សាម៉េន នៅចំណុច ថ្មបាំង ស្ថិតក្នុងភូមិ ស្រែកិន ឃុំ ត្រពាំងជោរ ស្រុកឱរ៉ាល់ ខេត្តកំពង់ស្ពឺ ដោយសំអាងថា ដីព្រៃក្នុងតំបន់នោះស្ថិតក្នុងតំបន់ដែនជម្រកសត្វព្រៃ ភ្នំឱរ៉ាល់ ហើយថាសកម្មភាពឈូសឆាយនោះជាអំពើល្មើសច្បាប់។
ប៉ុន្តែ អ្នកស្រី សៀង សាម៉េន ដែលជាម្ចាស់បណ្ដឹងបានអះអាងថា ជាដីរបស់គាត់ដែលបានទិញពីពលរដ្ឋក្នុងតំបន់នោះដោយមានការទទួលស្គាល់ពីអាជ្ញាធរភូមិឃុំយ៉ាងត្រឹមត្រូវ។
លោក ហ្គិច បានបញ្ជាក់ថា៖«ចំពោះករណីនេះកូនក្ដីខ្ញុំ បានចូលបំភ្លឺតុលាការ និងបានភ្ជាប់ជាមួយវត្ថុតាងមួយចំនួនដល់តុលាការរួចហើយ»។
បើតាមការអះអាងរបស់លោក ហ្គិច ឯកសារដែលជាវត្ថុតាងទាំងនោះសុទ្ធតែបង្ហាញថា ទីតាំងដែលកូនក្ដីរបស់លោក គឺ លោក ជា ហ៊ាន និង ក្រុមការងារបានចុះធ្វើការហាមឃាត់នោះ ពិតជាដីព្រៃដែលស្ថិតក្នុងតំបន់ដែនជម្រកសត្វព្រៃភ្នំឱរ៉ាល់ដែលស្ថិតក្រោមការគ្រប់គ្រងរបស់ក្រសួងបរិស្ថានមិនមែនជាដីចម្ការដូចអ្វីដែលអ្នកស្រី សៀង សាម៉េន ម្ចាស់បណ្ដឹង ក្នុងសំណុំរឿងនេះ អះអាងនោះទេ។
ជាមួយគ្នានេះផងដែរ លោក ជា ហ៊ាន ដែលរងបណ្ដឹងចោទប្រកាន់ពីបទបរិហារកេរ្តិ៍និងរារាំងដល់ការឈូសឆាយដីដើម្បីដាំដុះផលដំណាំក្នុងចម្ការឯកជនស្របច្បាប់របស់អ្នកស្រី សៀង សាម៉េន នោះបានថ្លែងបន្ទរថា៖ «ខ្ញុំរីករាយក្នុងការចូលបំភ្លឺដល់តុលាការព្រោះខ្ញុំមានភ័ស្ដុតាងគ្រប់គ្រាន់នៅក្នុងការតតាំងនៅក្នុងរឿងក្ដីនេះ»។
ទោះជាបែបណាក្ដី នៅក្នុងសំណុំរឿងនេះ តំណាងអយ្យការសាលាដំបូងខេត្តកំពង់ស្ពឺ លោក តុង រតនា បានអះអាងថា លោកកំពុងអនុវត្តនីតិវិធីក្នុងការស៊ើបសួរដល់ភាគីពាក់ព័ន្ធមួយចំនួនទៀតមុនពេលសម្រេចថានឹងត្រូវបញ្ជូនសំណុំរឿងនេះ ទៅឲ្យចៅក្រមស៊ើបសួរបន្តស៊ើបក្ដីនេះឬមួយត្រូវបង្វែរសំណុំរឿងទៅឲ្យគណកម្មការដោះស្រាយវិវាទដីធ្លីខេត្តជាអ្នកដោះស្រាយខណៈម្ចាស់បណ្ដឹងក្នុងសំណុំរឿងនេះគឺលោកស្រី សៀង សាម៉េន បានបញ្ជាក់ច្បាស់នៅក្នុងបណ្ដឹងរបស់ខ្លួនថាដីនោះគាត់បានទិញពីពលរដ្ឋនិងមានការទទួលស្គាល់ពីអាជ្ញាធរភូមិ ឃុំ ហើយគាត់ត្រូវការអភិវឌ្ឍដីនោះដើម្បីដាំដុះដំណាំហូបផ្លែសម្រាប់បង្កើនប្រាក់ចំណូលគ្រួសារ។
គួរបញ្ជាក់ថា កាលពីថ្ងៃទី១០ ខែកក្កដា ឆ្នាំ២០១៨ ក្រុមអធិការកិច្ចក្រសួងបរិស្ថាននិងមន្ទីរបរិស្ថានខេត្តកំពង់ស្ពឺបានសម្រេចដកហូតដីព្រៃទំហំ២០ហិកតានៅចំណុចភូមិស្រែកិន ឃុំត្រពាំងជោរ ស្រុកឱរ៉ាល់ ដែលបុគ្គលឈ្មោះ គុល វិចិត្រ បានកាប់រានទន្ទ្រានកាន់កាប់ដោយខុសច្បាប់កាលពីកន្លងទៅថ្មីៗនេះមកទុកជាសម្បត្តិរដ្ឋវិញ។ជាមួយគ្នានេះក្រសួងបានព្រមានចាត់វិធានការច្បាប់យ៉ាងតឹងរ៉ឹងបំផុតដល់បុគ្គលទាំងឡាយណាដែលបានកាប់ទន្ទ្រាន កាន់កាប់ និងទិញ លក់ដីព្រៃ ដោយខុសច្បាប់ក្នុងតំបន់ដែនជម្រកសត្វព្រៃទាំងអស់នៅទូទាំងព្រះរាជាណាចក្រកម្ពុជាដោយគ្មានការលើកលែង៕