កំពង់ស្ពឺៈ ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន ដាក់លិខិតទៅលោក ស ខេង រដ្ឋមន្ត្រីក្រសួងមហាផ្ទៃថ្ងៃនេះសុំឲ្យជួយអន្តរាគមន៍ទៅរដ្ឋបាលខេត្តកំពង់ស្ពឺដកហូតដីជាង ១៥០ ហិកតា ពីក្រុមឈ្មួញទុកជាសម្បត្តិរដ្ឋវិញ។ លោកថា មានឈ្មួញលួចលក់ដីព្រៃដែនជម្រកសត្វព្រៃភ្នំឱរ៉ាល់។
លោក ជា ហ៊ាន ប្រាប់ភ្នំពេញប៉ុស្ដិ៍ពីម្សិលមិញថា លោកកំពុងរៀបចំសរសេរលិខិត ១ ច្បាប់ដាក់ទៅលោក ស ខេង រដ្ឋមន្ត្រីក្រសួងមហាផ្ទៃនៅថ្ងៃទី ២២ ខែកញ្ញា នេះ ស្នើសុំជួយអន្តរាគមន៍ទៅរដ្ឋបាលខេត្តកំពង់ស្ពឺ ដើម្បីដកហូតដីព្រៃដែនជម្រកសត្វព្រៃភ្នំឱរ៉ាល់ជាង ១៥០ ហិកតា ពីលោកស្រី សៀង សាម៉េន ទុកជា សម្បត្តិរដ្ឋវិញ។ ទីតាំងដីព្រៃនេះស្ថិតនៅភូមិស្រែកិន ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ។
លោកបន្តថា លោកស្រី សៀង សាម៉េន បានឃុបឃិតគ្នាជាមួយអាជ្ញាធរលួចលក់ដីព្រៃដែនជម្រកសត្វព្រៃភ្នំឱរ៉ាល់កាលពី ២ សប្ដាហ៍កន្លងទៅនេះ បន្ទាប់ពីលោកស្រីបានដឹកនាំបក្ខពួកឈូសឆាយ រំលោភយកកាលពីឆ្នាំ ២០១៨។ ប៉ុន្ដែកាលនោះលោកបានប្ដឹងទៅរដ្ឋបាលខេត្តកំពង់ស្ពឺឲ្យដកហូតដីនេះម្ដងរួចមកហើយ។ ស្រាប់តែថ្មីៗនេះ លោកស្រីបានលួចលក់ដីទំហំ ១៥០ ហិកតា ទៅឲ្យឈ្មួញផ្សេងទៀតដោយមិនគោរពតាមដីកាដកហូតរបស់រដ្ឋបាលខេត្តកំពង់ស្ពឺ។
លោក ជា ហ៊ាន បញ្ជាក់ថា៖ «ខ្ញុំសូមស្នើឲ្យក្រសួងមហាផ្ទៃ និងភាគីពាក់ព័ន្ធបើកការស៊ើបអង្កេតអ្នកនៅពីក្រោយខ្នងការលក់ដីព្រៃក្នុងតំបន់អភិរក្សនៅភូមិស្រែកិននេះ។ ពោលគឺខ្ញុំសុំប្ដឹងឲ្យមោឃភាពរាល់លិខិតកាន់កាប់ និងទិញលក់ដីព្រៃតំបន់នោះដោយខុសច្បាប់ទាំងអស់ ហើយដីព្រៃនេះត្រូវរក្សាទុកជាសម្បត្តិរបស់រដ្ឋដដែល និងសុំឲ្យដាំដើមឈើឡើងវិញ។ រីឯជនល្មើសត្រូវតែផ្ដន្ទាទោសតាមច្បាប់ស្ដីពីតំបន់ការពារធម្មជាតិ»។
មេឃុំត្រពាំងជោរលោក ទេព ណែម ថ្លែងពីម្សិលមិញថា លោកបានឃើញលិខិតទិញ-លក់ និងផ្ទេរកម្មសិទ្ធិដីធ្លីនេះដែលមានចុះហត្ថលេខាទទួលពីមេភូមិស្រែកិនលោក អ៊ឹម សន ប៉ុន្ដែលោកមិនបានចុះហត្ថលេខាទទួលស្គាល់ ឬអនុញ្ញាតឲ្យមានការទិញលក់ទេ ដោយទុកលិខិតនោះនៅរដ្ឋបាលឃុំត្រពាំងជោរនៅឡើយ។ ព្រោះដីតំបន់នេះការពារដោយព្រះរាជក្រឹត្យ និងមានដីកាដកហូតពីរដ្ឋបាលខេត្តកំពង់ស្ពឺទៀតផង។
លោកបញ្ជាក់ថា៖ «ខ្ញុំមិនបានអនុញ្ញាតឲ្យទិញលក់ទេ ព្រោះជាដីរដ្ឋដែលការពារដោយព្រះរាជក្រឹត្យ និងមានដីកាដកហូតពីខេត្តទៀត។ អ៊ីចឹងខ្ញុំអត់ហ៊ានស៊ីញេទិញលក់ដីអីទេ ឥឡូវលិខិត ហ្នឹង ខ្ញុំបានបង្កកទុកចោលនៅសាលាឃុំត្រពាំងជោហើយ មិនមានការទិញលក់អ្វីទៀតទេ»។
លោក អ៊ឹម សន មេភូមិស្រែកិននិយាយពីម្សិលមិញថា លោកធ្លាប់បានដឹងពីការទិញលក់ដីព្រៃតំបន់ភ្នំឱរ៉ាល់កាលពីឆ្នាំ ២០១៨ មែន ប៉ុន្ដែថ្មីៗនេះលោកមិនបានចុះហត្ថលេខាឲ្យលោកស្រី សៀង សាម៉េន ទៀតទេ។ ពោលគឺថ្មីៗនេះលោកមិនបានចុះហត្ថលេខាទិញលក់ដីនៅតំបន់នេះទេ។
លោកថា៖ «កាលពីឆ្នាំ ២០១៨ កន្លងមកខ្ញុំធ្លាប់ដឹងអ៊ីចឹងមែន គឺគេនាំគ្នាទិញលក់ដីហ្នឹង តែឥឡូវនេះអត់មានទេ។ ខ្ញុំអត់ហ៊ានស៊ីញេទេ ព្រោះការពារដោយព្រះរាជក្រឹត្យទុកជាតំបន់ការពាររបស់រដ្ឋជាយូរឆ្នាំហើយ»។
លោកស្រី សៀង សាម៉េន ត្រូវជា ភរិយា លោក អ៊ូ សំរេចចេស្ដា ដែលត្រូវបានគេស្គាល់ថា ជាមន្ត្រីយោធាមិនអាចទាក់ទងសុំការបំភ្លឺបាននៅឡើយទេពីម្សិលមិញ។
តាមដីកាស្ដីពីការបដិសេធ និងដកហូតដីព្រៃជាង ១៥០ ហិកតា នៅដែនជម្រកសត្វព្រៃភ្នំឱរ៉ាល់របស់រដ្ឋបាលខេត្តកំពង់ស្ពឺចុះថ្ងៃទី ២៦ តុលា ឆ្នាំ ២០១៨ បានប្រកាសបដិសេធ និងដកហូតដីព្រៃឈើដែលបានកាប់រាន ដុត ឈូសឆាយ និងហ៊ុមព័ទ្ធកាន់កាប់ ដើម្បីវាតយកដីធ្វើជាកម្មសិទ្ធិសរុបជាង ១៥០ ហិកតា នៅទីតាំងខាងលើនេះ។ បទប្បញ្ញត្តិទាំងឡាយណាដែលមានខ្លឹមសារផ្ទុយនឹងដីកានេះត្រូវទុកជានិរាករណ៍៕