ភ្នំពេញៈ អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្ដ និងជាប្រធានរដ្ឋនៃសាធារណរដ្ឋសង្គមនិយមវៀតណាម លោក ង្វៀង ហ្វ៊ូជុង (Nguyen Phu Trong) នឹងដឹកនាំគណៈប្រតិភូជាន់ខ្ពស់មកបំពេញទស្សនកិច្ចផ្លូវរដ្ឋនៅកម្ពុជាចាប់ពីថ្ងៃទី ២៥ ដល់ថ្ងៃទី ២៦ ខែកុម្ភៈ ឆ្នាំ ២០១៩ ជាការឆ្លើយតបតាមការអញ្ជើញពីព្រះមហាក្សត្រកម្ពុជា ព្រះបាទសម្ដេចព្រះបរមនាថ នរោត្តម សីហមុនី។ នេះបើតាមសេចក្ដីប្រកាសព័ត៌មានក្រសួងការបរទេសកម្ពុជាកាលពីថ្ងៃទី ២០ ខែកុម្ភៈ។
តាមសេចក្ដីប្រកាសព័ត៌មាន ក្នុងដំណើរទស្សនកិច្ចរយៈពេល ២ ថ្ងៃនេះ លោក ង្វៀង ហ្វ៊ូជុង នឹងចូលគាល់ព្រះករុណាព្រះបាទសម្ដេចព្រះបរមនាថ នរោត្តម សីហមុនី និងសម្ដេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរមុននឹងចូលទៅថ្វាយបង្គំសម្ដេចព្រះមហាសង្ឃរាជទាំង ២ គណៈនៃព្រះរាជាណាចក្រកម្ពុជា។ ក្រៅពីនោះលោកក៏នឹងជួបជាមួយលោក សាយ ឈុំ ប្រធានព្រឹទ្ធសភា លោក ហេង សំរិន ប្រធានរដ្ឋសភា និងចូលរួមជាមួយលោកនាយករដ្ឋមន្ត្រី ហ៊ុន សែន ក្នុងពិធីចុះហត្ថលេខាលើឯកសារមួយចំនួនផងដែរ។
លោក ផៃ ស៊ីផាន មន្ត្រីនាំពាក្យរាជរដ្ឋាភិបាលកម្ពុជាបានចាត់ទុកទស្សនកិច្ចរបស់ថ្នាក់ដឹកនាំកំពូលវៀតណាមនេះថាជាការបង្ហាញពីភាពវិជ្ជមានលើកិច្ចសហការគ្រប់វិស័យរវាងកម្ពុជា-វៀតណាម ជាពិសេសគឺការរក្សាស្ថិរភាព និងសន្ដិភាពតាមព្រំដែន ខណៈការបោះបង្គោលព្រំដែននៃប្រទេសទាំង ២ ជិតបញ្ចប់។
លោកថា៖ «មានភាពវិជ្ជមានយើងរក្សាបានកិច្ចសហការ និងការថែរក្សាសន្ដិភាពរវាងប្រទេសទាំង ២ ហើយយើងបានរក្សាបានសន្ដិភាពនៅតាមព្រំដែន»។
ទោះជាយ៉ាងណា លោក មាស នី អ្នកសិក្សាស្រាវជ្រាវសង្គមបានកត់សម្គាល់ថា មួយរយៈពេលចុងក្រោយនេះមានរូបភាពបង្ហាញច្បាស់ថាប្រទេស វៀតណាម ហាក់មានឥទ្ធិពលលើកម្ពុជា ក្រោយពីមានការបង្កើតឱ្យមានស្ដូបមិត្តភាពកម្ពុជា-វៀតណាម នៅតាមខេត្តក្រុងរបស់កម្ពុជាដែលលោកយល់ថាជាការបង្ហាញនូវការដឹងគុណខ្លាំងពេកលើវៀតណាម។
លោក មាស នី បារម្ភថា ការបង្ហាញពីភាពដឹងគុណខ្លាំងបែបនេះអាចធ្វើឱ្យកម្ពុជាមានគ្រោះថ្នាក់ដោយសារធ្វើឱ្យមានលំហូរជនជាតិវៀតណាមខុសច្បាប់បន្ថែមទៀតដែលហាក់មិនខុសពីប្រវត្តិសាស្ត្រក្នុងសម័យព្រះបាទ ជ័យជេដ្ឋាទី ២ ដែលកាលនោះ ព្រះអង្គដឹងគុណវៀតណាមខ្លាំងពេកហើយបានអនុញ្ញាតឱ្យជនជាតិវៀតណាមចូលមកតាំងលំនៅលើទឹកដីកម្ពុជាក្រោមបណ្ដោះអាសន្ន ប៉ុន្តែក្រោយមកពលរដ្ឋវៀតណាមក៏ទទួលសិទ្ធិស្របច្បាប់ និងកំពុងរស់នៅនិងកាន់កាប់ដល់សព្វថ្ងៃ។
លោកថា៖ «សម្រាប់កម្ពុជា ខ្ញុំគិតថាគឺអាស្រ័យលើសមត្ថភាពរបស់អ្នកដឹកនាំ ប្រសិនបើអ្នកដឹកនាំមានសមត្ថភាពធ្វើឱ្យសេដ្ឋកិច្ចរឹងមាំ ហើយជាអ្នកដឹកនាំមិនរណប និងមិនដឹងគុណគេខ្លាំងពេក អាហ្នឹងយើងអាចបន្សាបឥទ្ធិពលនោះបាន»។
ខុសពីលោក មាស នី លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាលើកឡើងថា កម្ពុជា-វៀតណាម គឺជាទំនាក់ទំនងធម្មតា ហើយថា ការពង្រឹងនិងពង្រីកទំនាក់ទំនងក្នុងនាមជាប្រទេសមានព្រំដែនជាប់គ្នាគឺមានសារៈសំខាន់បំផុតទាំងទៅលើនយោបាយ សន្ដិសុខ និងការដោះដូរពាណិជ្ជកម្ម។
លោក គិន ភា បន្តថា ថ្វីដ្បិតរឿងរ៉ាវប្រវត្តិសាស្ដ្រកំពុងធ្វើឱ្យពលរដ្ឋកម្ពុជាមួយចំនួនបារម្ភពីអធិបតេយ្យក្ដី ប៉ុន្តែការសាងសង់ស្ដូបអនុស្សាវរីយ៍កម្ពុជា-វៀតណាម នៅកម្ពុជាគ្រាន់តែជាការចងចាំប្រវត្តិសាស្ដ្រប៉ុណ្ណោះមិនមែនបង្ហាញពីការដឹងគុណខ្លាំងពេកឡើយ ព្រោះភាគីទាំង ២ តែងជួយគ្នាទៅវិញទៅមក ហើយតាមសច្ចភាពប្រវត្តិសាស្ដ្រប្រទេស វៀតណាម អាចបង្រួបបង្រួមគ្នាបានក៏ដោយសារមានការជួយពីកម្ពុជាផងដែរ។
លោកថា៖ «ក្នុងបរិបទសង្គ្រាមឥណ្ឌូចិនដែលវៀតណាមប្រឆាំងសហរដ្ឋអាមេរិកយើងឃើញថាកាលដែលវៀតណាមអាចរំដោះប្រទេសរបស់ខ្លួនបង្រួបបង្រួមប្រទេសរបស់ខ្លួនបាន ប្រសិនបើគ្មានការជួយពីកម្ពុជាទេវៀតណាមក៏អត់អាចបង្រួបបង្រួមប្រទេសបានដែរ អាហ្នឹងជាសច្ចភាពប្រវត្តិសាស្ដ្រដែលវៀតណាមក៏ត្រូវដឹងគុណកម្ពុជាវិញដែរ ហើយកម្ពុជាត្រូវទទួលស្គាល់ថាវត្តមានកងទ័ពវៀតណាមនៅកម្ពុជាក្នុងឆ្នាំ ១៩៧៨-១៩៧៩ ដែលឈានដល់ការរំលំរបបខ្មែរក្រហមប្រល័យពូជសាសន៍អាហ្នឹងគឺជាការជួយគ្នាទៅវិញទៅមក»។
លោក គិន ភា បញ្ជាក់ថា ពិភពលោកបច្ចុប្បន្នស្ថិតក្នុងសកលភាវូបនីយកម្មដែលគ្រប់ប្រទេសតែងអាស្រ័យគ្នា ដូច្នោះមិនគួរដេកឱបប្រវត្តិសាស្ដ្រហើយបង្កើតការឈឺចាប់នាំឱ្យស្អប់ជាតិសាសន៍ណាមួយឡើយ។
ផ្ទុយទៅវិញគួរតែខំប្រឹងពង្រឹងទំនាក់ទំនងពាណិជ្ជកម្ម និងធ្វើយ៉ាងម៉េចឱ្យមានការស្ងប់ស្ងាត់តាមព្រំដែនទើបប្រសើរជាង។
រីឯលោក ផៃ ស៊ីផាន ក៏បានបញ្ជាក់ដែរថា កម្ពុជាមិនអាចលុបចោលប្រវត្តិសាស្ដ្រដែលកងទ័ពវៀតណាមចូលរួមជាមួយកងទ័ពរណសិរ្សសង្គ្រោះជាតិ របស់លោក ហេង សំរិន និងលោក ហ៊ុន សែន ដើម្បីរំដោះប្រទេសជាតិបានឡើយ ហើយកម្ពុជាក៏ត្រូវបានគេទទួលស្គាល់ថាមិនបានស្ថិតក្រោមឥទ្ធិពលរបស់ប្រទេសវៀតណាមឡើយ។
លោកថា៖ «ព្រោះយើងមានរដ្ឋសភារបស់យើងច្បាស់លាស់ យើងមានតុលាការរបស់យើង យើងមានព្រះមហាក្សត្ររបស់យើងដែលស្ថិតនៅក្រោមនីតិរដ្ឋរបស់យើង ហើយដោយសារកម្ពុជាមានគណបក្សប្រឆាំង យើងមិនមានឯកបក្សឯណា»។
ដោយឡែកកាលពីថ្ងៃ ២០ កុម្ភៈទីភ្នាក់ងារសារព័ត៌មានវៀតណាមក៏បានចុះផ្សាយដែរថាទំនាក់ទំនងការទូតរវាងកម្ពុជា-វៀតណាម ដែលបង្កើតឡើងកាលពីថ្ងៃទី ២៤ ខែមេសា ឆ្នាំ ១៩៦៧ តែងធ្វើឱ្យថ្នាក់ដឹកនាំជាន់ខ្ពស់ប្រទេសទាំង ២ ធ្វើទស្សនកិច្ចទៅវិញទៅមករួមទាំងផ្លាស់ប្ដូរទស្សនកិច្ចថ្នាក់រដ្ឋមន្ត្រី និងវិស័យឯកជនផងដែរ។ សារព័ត៌មាននេះបន្ថែមថា លោក ង្វៀង ហ្វ៊ូជុង នឹងទៅទស្សនកិច្ចនៅឡាវ នាថ្ងៃទី ២៤-២៥ មុនមកដល់កម្ពុជា៕