ភ្នំពេញៈ ប្រធានាធិបតីស្រីលង្កា លោក ម៉ៃទ្រីប៉ាឡា ស្រ៊ីសេនា (Maithripala Sirisena) នឹងមកបំពេញទស្សនកិច្ចនៅកម្ពុជា ៤ ថ្ងៃ ចាប់ពីថ្ងៃទី ៧ ដល់ទី ១០ ខែសីហា តាមការអញ្ជើញរបស់ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
សេចក្តីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិ កាលពីថ្ងៃអង្គារ បានបញ្ជាក់ថា៖ «ទស្សនកិច្ចលើកដំបូងមកកាន់កម្ពុជារបស់ឯកឧត្តម ម៉ៃទ្រីប៉ាឡា ស្រ៊ីសេនា នៅពេលនេះនឹងរួមចំណែកយ៉ាងសំខាន់ដល់ការពង្រឹងចំណងមិត្តភាព និងពង្រីកកិច្ចសហប្រតិបត្តិការនៅក្នុងវិស័យសេដ្ឋកិច្ច ពាណិជ្ជកម្ម និងវប្បធម៌ រវាងកម្ពុជា និងស្រីលង្កា»។
យោងតាមសេចក្តីប្រកាសព័ត៌មានដដែលនេះបានឱ្យដឹងថា លោក ម៉ៃទ្រីប៉ាឡា ស្រ៊ីសេនា នឹងចូលគាល់ព្រះករុណា ព្រះមហាក្សត្រនៃព្រះរាជាណាចក្រកម្ពុជា នៅក្នុងព្រះបរមរាជវាំង។ លោកប្រធានាធិបតី រូបនេះក៏នឹងជួបប្រជុំទ្វេភាគី ជាមួយលោកនាយករដ្ឋមន្ត្រី ហ៊ុន សែន ហើយកិច្ចសហប្រតិបត្តិការទ្វេភាគីនៅក្នុងវិស័យជាច្រើននឹងត្រូវលើកយកមកពិភាក្សាដើម្បីពង្រឹងថែមទៀតនូវចំណងមិត្តភាពរវាងប្រទេសទាំង ២ ដែលបានចងភ្ជាប់គ្នាយ៉ាងជ្រាលជ្រៅតាមរយៈព្រះពុទ្ធសាសនា។
សេចក្តីប្រកាសព័ត៌មាន បញ្ជាក់ថា៖ «ថ្នាក់ដឹកនាំទាំង ២ ក៏នឹងធ្វើការផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាការព្រួយបារម្ភ និងផលប្រយោជន៍រួមផងដែរ»។
លោក ហ៊ុន សែន និងលោក ម៉ៃទ្រីប៉ាឡា ស្រ៊ីសេនា នឹងចុះហត្ថលេខាលើឯកសារកិច្ចសហប្រតិបត្តិការមួយចំនួនផងដែរ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា និងជាអ្នកវិភាគបញ្ហានយោបាយ បានឲ្យដឹងថា ទស្សនកិច្ចនេះ គឺជាចំណុចចាប់ផ្តើមដ៏ល្អមួយនៃទំនាក់ទំនងរវាងប្រទេសទាំង ២ ។ កន្លងមក ការផ្លាស់ប្តូរទស្សនកិច្ចរវាងកម្ពុជា និងស្រីលង្កាក្នុងកម្រិតថ្នាក់ជាតិ មិនសូវមានជាធំដុំនោះទេ គឺមានម្តងក្នុងឆ្នាំ ២០០៦ ដែលនាយករដ្ឋមន្ត្រីស្រីលង្កាមកបំពេញទស្សនកិច្ចនៅកម្ពុជា។ ចាប់តាំងពីនោះមក មិនឃើញមានដំណើរទស្សនកិច្ចទៀតទេ។ ប្រធានាធិបតីស្រីលង្កាកាលពីមុន ក៏មិនដែលមកបំពេញទស្សនកិច្ចនៅកម្ពុជាដែរ ហើយមេដឹកនាំកម្ពុជាក៏មិនដែលធ្វើទស្សនកិច្ចទៅកាន់ប្រទេសនេះដែរ។
លោក គិន ភា បញ្ជាក់ថា៖ «យើងអាចនិយាយថាជាចំណុចលេចធ្លោនៃទំនាក់ទំនងរវាងប្រទេសទាំង ២ ហ្នឹងក្នុងក្របខ័ណ្ឌនៃបរិបទថ្មី។ ទាក់ទងជាមួយនឹងទំហំពាណិជ្ជកម្មរវាងប្រទេសទាំង ២ យើងមើលទៅ វាអត់មានអីជាដុំកំភួនទេ។ ក៏ប៉ុន្តែ គ្រាន់តែលក្ខណៈដូចគ្នាហ្នឹងត្រង់ប្រទេសយើងទាំង ២ ហ្នឹង វាមានការកាន់ព្រះពុទ្ធសាសនាដូចគ្នា» ។
តែលោកថា វាអាចជាសញ្ញាមួយល្អក្នុងក្របខ័ណ្ឌកិច្ចសហប្រតិបត្តិការ និងការផ្តោតការគាំទ្រឱ្យគ្នាទៅវិញទៅមកក្នុងកិច្ចការតំបន់ និងអន្តរជាតិ ព្រោះប្រទេសទាំង ២ ស្ថិតនៅក្នុងស្ថានភាពនយោបាយ និងសេដ្ឋកិច្ចប្រហាក់ហែលគ្នា និងអាចជួយគ្នាទៅវិញទៅមកក្នុងករណីចាំបាច់។
លោក មាស នី អ្នកវិភាគនយោបាយ បានឲ្យដឹងដែរថាបំណងសំខាន់គឺគ្រាន់តែការរឹតចំណងការទូតធម្មតាតាមរយៈការអញ្ជើញរបស់ព្រះករុណាព្រះមហាក្សត្រនៃព្រះរាជាណាចក្រកម្ពុជា។ ទិដ្ឋភាពមួយទៀតឃើញថា សព្វថ្ងៃនេះប្រទេស ស្រីលង្កា ក៏កំពុងទទួលរងការរិះគន់ជាបន្តបន្ទាប់ពីបស្ចិមប្រទេសទាក់ទងនឹងឥទ្ធិពលប្រទេស ចិន ដែរ ។
លោកថា៖ «យើងមើលចរន្តនៃការប្រាស្រ័យទាក់ទងគ្នារវាងប្រទេសមួយចំនួន ដូចជា កម្ពុជា-ស្រីលង្កា ហើយនឹងកម្ពុជាជាមួយនឹងប្រទេស តួកគី ដែលសុទ្ធតែជាប្រទេសកំពុងតែទទួលរងនូវការរិះគន់ពីបស្ចិមប្រទេសទាក់ទិននឹងភូមិសាស្ត្រនយោបាយក្នុងតំបន់» ៕