The Phnom Penh Post Search

Search form




Logo of Phnom Penh Post newspaper Phnom Penh Post - ប្រធាន​សភា​ព្រមាន​តំណាង​រាស្ត្រ​បក្ស​ប្រឆាំង​ដែល​ប្រើ​វេទិកា​អំពាវនាវ​ឲ្យ​ដោះ​លែង​សកម្ម​ជន​បឹងកក់

ប្រធាន​សភា​ព្រមាន​តំណាង​រាស្ត្រ​បក្ស​ប្រឆាំង​ដែល​ប្រើ​វេទិកា​អំពាវនាវ​ឲ្យ​ដោះ​លែង​សកម្ម​ជន​បឹងកក់

ប្រធាន​សភា​លោក ហេង សំរិន ដឹក​នាំ​កិច្ច​ប្រជុំ​ពិភាក្សា​សេចក្តី​ព្រាង​ច្បាប់​ចរាចរណ៍​ផ្លូវ​គោក។
ប្រធាន​សភា​លោក ហេង សំរិន ដឹក​នាំ​កិច្ច​ប្រជុំ​ពិភាក្សា​សេចក្តី​ព្រាង​ច្បាប់​ចរាចរណ៍​ផ្លូវ​គោក។ ហុង មិនា

ប្រធាន​សភា​ព្រមាន​តំណាង​រាស្ត្រ​បក្ស​ប្រឆាំង​ដែល​ប្រើ​វេទិកា​អំពាវនាវ​ឲ្យ​ដោះ​លែង​សកម្ម​ជន​បឹងកក់

ភ្នំពេញៈ ប្រធាន​រដ្ឋសភា លោក ហេង សំរិន កាល​ពី​ថ្ងៃ​ពុធ​ម្សិល​មិញ​នេះ បាន​ព្រមាន​សមាជិក​សភា​ស្ត្រី​មួយ​រូប មក​ពី​គណបក្ស​សង្គ្រោះ​ជាតិ ដែល​បាន​ប្រើ​វេទិកា​ពិភាក្សា​សេចក្តី​ព្រាង​ច្បាប់​របស់​សភា ដោយ​បញ្ចេញ​ទស្សនៈ​និង​អំពាវនាវ​រក​កិច្ច​អន្តរាគមន៍​ដោះលែង​ក្រុម​ស្ត្រី​សកម្មជន​ដីធ្លី ១១ នាក់​ដែល​ត្រូវ​បាន​ចោទ​ប្រកាន់​ដាក់​ពន្ធនាគារ ពី​បទ​បង្ក​ការ​កក​ស្ទះ​ចរាចរណ៍។

ក្នុង​ដំណើរ​ការ​បន្ត​ពិភាក្សា​ពាក់​ព័ន្ធ​នឹង​សេចក្តី​ព្រាង​ច្បាប់​ស្តីពី​ចរាចរណ៍​ផ្លូវ​គោក នៅ​មន្ទីរ​រដ្ឋសភា​កាល​ពី​ម្សិល​មិញ​នេះ ខណៈ​ដែល​តំណាង​រាស្ត្រ​មណ្ឌល​ភ្នំពេញ​របស់​គណបក្ស​សង្គ្រោះ​ជាតិ លោក​ស្រី លី ស្រីវីណា បាន​ថ្លែង​ទាក់​ទិន​នឹង​ស្ថានភាព​យ៉ាប់​យ៉ឺន​នៃ​ចរាចរណ៍​នៅ​ក្នុង ប្រទេស​កម្ពុជា លោក​ស្រី ក៏​បាន​អំពាវនាវ​ដោយ​ផ្ទាល់​ទៅ​កាន់​ប្រធាន​រដ្ឋសភា​និង​ភាគី​ពាក់ព័ន្ធ ដែល​មាន​សាលា​រាជធានី​ភ្នំពេញ ហើយ​និង​សាលា​ដំបូង​រាជធានី​ភ្នំពេញ ឲ្យ​ពិចារណា​ឡើង​វិញ ក្នុង​ការ​អន្តរាគមន៍​ជួយ​ដល់​ក្រុម​ស្ត្រី​បឹងកក់​ចំនួន ១១ រូប ដែល​បច្ចុប្បន្ន​នេះ​កំពុង​ជាប់​ឃុំ​នៅ​ពន្ធនាគារ​ព្រៃ​ស ពាក់ព័ន្ធ​នឹង​បញ្ហា​បង្ក​ការ​កក​ស្ទះ​ចរាចរណ៍។

នៅ​ស្រប​ពេល​នឹង​ការ​អំពាវ​នាវ​ភ្លាមៗ​នោះ​ប្រធាន​រដ្ឋសភា លោក ហេង សំរិន បាន​គោះ​ញញួរ​និង​មាន​ប្រសាសន៍​ព្រមាន​ទៅ​កាន់​លោក​ស្រី លី ស្រីវីណា ផ្ទាល់​ថា៖ «លោក​ជំទាវ និយាយ​វែង​ឆ្ងាយ​ចាក​ពី​ប្រធាន​បទ​ហើយ កិច្ច​ការងារ​នេះ​ទុក​ឲ្យ​តុលាការ»។

កាល​ពី​ថ្ងៃ ទី១០ និង ១១ ខែ​វិច្ឆិកា ស្ត្រី​ជម្លោះ​ដីធ្លី ១០ នាក់ ដែល​ជា​ញឹក​ញាប់​បាន​ចេញ​មុខ​តវ៉ា​ទាមទារ​ដំណោះ​ស្រាយ​បញ្ហា​ដីធ្លី ត្រូវ​បាន​តុលាការ​កាត់​ទោស​ជាប់​ពន្ធនាគារ​ម្នាក់ ១​ឆ្នាំ និង​ពិន័យ​ជា​ប្រាក់​ម្នាក់ ២ លាន​រៀល បន្ទាប់​ពី​ពួក​គេ បាន​តវ៉ា​បិទ​ផ្លូវ​ព្រះមុនីវង្ស រក​អន្តរាគមន៍​រំដោះ​ទឹក​ស្អុយ ដែល​ជន់​លិច​ផ្ទះ​នៅ​បឹងកក់។ ចំណែក​ព្រះ​សង្ឃ ១ អង្គ​ត្រូវ​បាន​កាត់​ទោស​ដូច​គ្នា​ខណៈ​និមន្ត​មក​មើល​ការ​តវ៉ា​នៅ​មុខ​តុលាការ​ភ្នំពេញ។

អ្នក​តំណាង​រាស្ត្រ​គណបក្ស​សង្គ្រោះ​ជាតិ លោក​ស្រី លី ស្រីវីណា បាន​ឲ្យ​ដឹង​ថា មូល​ហេតុ​នៃ​ការ​ស្នើ​នេះ ព្រោះ​លោក​ស្រី​យល់​ឃើញ​ថា បើ​ទោះ​ជា​តាម​ច្បាប់​ចាស់​ឬ​ច្បាប់​ថ្មី​ក្តី​ក៏​ដោយ ការ​អនុវត្ត​ទោស​បែប​នេះ​ទៅ​លើ​ស្ត្រី​ទាំង​នោះ គឺ​មិន​សមរម្យ​នោះ​ទេ ព្រោះ​ទង្វើ​របស់​ពួក​គេ មិន​ខុស​ច្បាប់​នោះ​ទេ។

លោក​ស្រី​ថា ការ​លើក​គ្រែ​ដាក់​លើ​ផ្លូវ​នេះ ដោយ​សារ​ស្ត្រី​ទាំង​នោះ មិន​មាន​ទីតាំង​ទុក​ដាក់ និង​រស់​នៅ ពីព្រោះ​ទឹក​ជន់​លិច​អស់ ហើយ មេរោគ​ក្នុង​ទឹក​កខ្វក់​នោះ​បាន​និង​កំពុង​បង្ក​ការ​ភ័យ​ខ្លាច​ដល់​ពួក​គេ ហើយ​និង​កូនៗ​តូច​របស់​ពួក​គេ។

លោក​ស្រី​បាន​គូស​បញ្ជាក់​ថា៖ «សាលា​ក្រុង​បាន​ចោទ​ប្រកាន់​ថា ធ្វើ​ឲ្យ​កក​ស្ទះ​ចរាចរណ៍ បើ​តាម​យោបល់​ខ្ញុំ អ្នក​ដែល​ធ្វើ​ឲ្យ​កក​ស្ទះ​ចរាចរណ៍​ក្នុង​រាជធានី​ភ្នំពេញ បើ​ចាប់​ដាក់​គុក​វិញ អត់​មាន​គុក​ដាក់​ទេ ព្រោះ​មាន​ច្រើន​ណាស់ មិន​មែន​ចៃដន្យ មាន​តែ​ពួក​គាត់​នឹង​ទេ។ គួរ​តែ​អនុគ្រោះ​ដល់​ពួក​គេ គាត់​អត់​កន្លែង​រស់​នៅ​ហើយ​ចាប់​ពួក​គាត់​ដាក់​គុក ក្នុង​នោះ មាន​ស្ត្រី​អាយុ ៧០​ឆ្នាំ និង​ស្ត្រី​ដែល​មាន​បន្ទុក​កូន​ដល់​ទៅ ៧ នាក់​គ្មាន​ទីពឹង​នៅ​ក្រៅ​គុក ដូច្នេះ​ហើយ បាន​ខ្ញុំ​សុំ​ជា​សាធារណៈ​ឲ្យ​លោក ប៉ា សុជាតិវង្ស លើក​លែង​ការ​ចោទ​ប្រកាន់ ដើម្បី​ឲ្យ​ពួក​គាត់​ប្តឹង​ឧទ្ធរណ៍​ទៅ គាត់​អាច​ឆាប់​បាន​ចេញ​មក​វិញ»។

ក្នុង​ជំនួប​ឆ្លើយ​បំភ្លឺ​មុខ​គណកម្មការ​ទីមួយ​របស់​សភា​កាល​ពី​សប្តាហ៍​មុន លោក ប៉ា សុជាតិវង្ស អភិបាល​រាជធានី​ភ្នំពេញ បាន​តប​នឹង​សំណើ​របស់​ប្រធាន​គណៈកម្មការ​នេះ គឺ​លោក អេង ឆៃអ៊ាង ដែល​បាន​ស្នើ​កិច្ច​អន្តរាគមន៍​របស់​លោក ទៅ​តុលាការ​ដោះលែង ក្រុម​ស្ត្រី​ទាំង​នោះ ដោយ​អះអាង​ថា នោះ​ជា​កិច្ចការ​របស់​តុលាការ ហើយ​លោក​មិន​អាច​លូក​លាន់​បាន​ឡើយ។

ក្នុង​កិច្ច​ប្រជុំ​សភា​កាល​ពី​ម្សិល​មិញ​នេះ តំណាង​រាស្ត្រ គណបក្ស​ទាំង​ពីរ បាន​បញ្ចេញ​មតិ​និង​សំណើ​ជុំវិញ​ស្ថានភាព​ចរាចរណ៍ ដោយ​ស្នើ​ឲ្យ​រដ្ឋ​មន្ត្រី​ក្រសួង​សាធារណ​ការ និង​ដឹក​ជញ្ជូន ពិចារណា​លើ​ការ​រៀបចំ​ដី​ចំណី​ផ្លូវ​សម្រាប់​អ្នក​ថ្មើរ​ជើង និង​ចំណត​តាម​ទីសាធារណៈ ដែល​បង្ក​ការ​កក​ស្ទះ ពិនិត្យ​ឡើង​វិញ​នូវ​សមត្ថភាព​របស់​អ្នក​បើក​បរ ការ​ប្រើ​ប្រាស់​ស្លាក​លេខ​របស់​មន្ត្រី​យោធា មន្ត្រី​នគរបាល និង​ការ​កំណត់​ពី​កម្រិត​នៃ​ជាតិ​អាល់កុល​របស់​អ្នក​បើក​បរ...ដើម្បី​ធានា​សុវត្ថិភាព​ចរាចរណ៍ និង​បង្ការ​ការ​គ្រោះ​ថ្នាក់​ផង​ដែរ។

ឆ្លើយ​តប​នឹង​រឿង​នេះ លោក ត្រាំ អ៊ីវតឹក រដ្ឋ​មន្ត្រី​ក្រសួង​សាធារណ​ការ និង​ដឹក​ជញ្ជូន បាន​ឲ្យ​ដឹង​ថា លោក​នឹង​សហការ​ជាមួយ​ក្រសួង​មហាផ្ទៃ ដោយ​ពង្រឹង​ការ​ត្រួត​ពិនិត្យ និង​ចាត់​វិធានការ​ជា​ថ្មី​ទៅ​លើ​ទង្វើ​ខុស​ឆ្គង ឆ្លើយ​តប​នឹង​សំណើ​ទាំង​នេះ។

លោក​មាន​ប្រសាសន៍​ថា៖ «យើង​ក៏​នឹង​ពិចារណា​ចំពោះ​ការ​ផាក​ពិន័យ​លើ​កម្រិត​នៃ​ការ​បើក​បរ​ផ្ទុយ​នឹង​ច្បាប់​ចរាចរណ៍ ជា​ពិសេស​ទៅ​លើ​ក្រុម​អ្នក​រត់​ម៉ូតូ​ឌុប ដោយ​ផ្អែក​លើ​កត្តា​ចំណូល​និង​ជីវភាព​ពួក​គាត់ ប៉ុន្តែ​ធ្វើ​ម៉េច​ឲ្យ​ពួក​គាត់​គោរព​ច្បាប់​ចរាចរណ៍»។

ទោះ​ជា​យ៉ាង​ណា​ក៏​ដោយ កាល​ពី​ម្សិល​មិញ​រដ្ឋសភា បាន​អនុម័ត​បន្ថែម​លើ​ជំពូក​ចំនួន ២ ថែម​ទៀត គឺ​ជំនួប ទី៣ និង ទី៤ នៃ​សេចក្តី​ព្រាង​ច្បាប់​ស្តីពី​ចរាចរណ៍​ផ្លូវ​គោក​នេះ ហើយ​សម្រេច​ពិភាក្សា​អនុម័ត​បន្ត​នៅ​ព្រឹក​ថ្ងៃ​ព្រហស្បតិ៍​នេះ។

សេចក្តី​ព្រាង​ច្បាប់​ស្តីពី​ចរាចរណ៍​ផ្លូវ​គោក​ថ្មី​នេះ មាន ១២ ជំពូក និង ៩២ មាត្រា៕

អត្ថបទគួរចាប់អារម្មណ៍