ភ្នំពេញៈ ប្រធានគណៈកម្មាធិការជាតិរៀបចំការបោះឆ្នោត( គ.ជ.ប) បានប្រកាសថា ទោះសង្គមស៊ីវិលមិនចូលរួមសង្កេតការណ៍បោះឆ្នោត ហើយអ្នកទៅបោះឆ្នោតមានតិចជាង ៥០ ភាគរយក៏លទ្ធផលនៅតែទទួលយកបានតាមច្បាប់កំណត់ ខណៈអ្នកវិភាគយល់ឃើញផ្ទុយពីនេះ។
លោក ស៊ិក ប៊ុនហុក ប្រធាន (គ.ជ.ប) បានថ្លែងដូចនេះកាលពីព្រឹកម្សិលមិញក្នុងកិច្ចប្រជុំជាមួយភាគីពាក់ព័ន្ធនៅស្នាក់ការ គ.ជ.ប ក្នុងក្រសួងមហាផ្ទៃ ដើម្បីផ្សព្វផ្សាយពីដំណើរការរៀបចំការបោះឆ្នោតជ្រើសតាំងតំណាងរាស្ត្រ។
ដោយលើកយកមាត្រា ១០ នៃច្បាប់បោះឆ្នោតមកសំអាងលោក ប៊ុនហុក បានថ្លែងថា៖ «សហគមន៍ ឬអង្គការក្រៅរដ្ឋាភិបាលអាចបញ្ជូនតំណាងរបស់ខ្លួនឲ្យមកសង្កេតការណ៍បោះឆ្នោត ខ្លួនឯងអាចតើ។ ពាក្យអាចនេះបានន័យថា បញ្ជូនមកក៏បានមិនបញ្ជូនមកក៏បាន។ មិនមែនឯងមិនបញ្ជូនមកអាចទៅមិនរួចឯណា? វាអត់មាន។ ច្បាប់មិនបានចែងថាត្រូវតែមានអ្នកសង្កេតការណ៍នោះទេ»។
ទន្ទឹមនឹងនេះលោកក៏បានរិះគន់ពីបំណងអាក្រក់របស់អង្គការក្រៅរដ្ឋាភិបាលមួយចំនួនផងដែរ។
លោកបានបញ្ជាក់ថា៖ «ម្យ៉ាងទៀតក្នុងចំណោមអង្គការក្រៅរដ្ឋាភិបាលក៏មានអ្នកមានបំណងល្អ អ្នកមានបំណងអាក្រក់ បើពួកអាក្រក់គេមិនចូលរួមទេ តែក៏មានអង្គការក្រៅរដ្ឋាភិបាលល្អគេចូលរួមដែរ។ បើអ៊ីចឹងកុំចាត់ទុកថាខ្លួនឯងហ្នឹងពិសេស»។
ចំពោះចំនួនមនុស្សចេញទៅបោះឆ្នោតវិញលោកថ្លែងថា មិនថា នៅកម្ពុជា ឬនៅទ្វីបអឺរ៉ុបទេ មិនមានច្បាប់ណាដែលចែងថា អ្នកទៅបោះឆ្នោតតិចធ្វើឲ្យលទ្ធផលមិនអាចទទួលយកបាននោះទេ។
លោកថា៖ «គ្មានទេពីព្រោះរដ្ឋធម្មនុញ្ញអត់បានចែងអំពីចំនួនភាគរយរឿងទៅចូលរួមហ្នឹងទេ។ នៅក្នុងរដ្ឋធម្មនុញ្ញគេឆ្លើយគឺវាគ្មានឥទ្ធិពលអីដែលពាក់ព័ន្ធនឹងការមិនចូលរួមការបោះឆ្នោតនោះទេ ទាំងការជ្រើសរើសប្រធានាធិបតីរបស់បារាំង ទាំងការបោះឆ្នោតទាំងអស់ គេអត់មានគិតពីរឿងការចូលរួមនោះទេ សុទ្ធតែទទួលយកបានទាំងអស់»។
ជាមួយគ្នានេះលោកក៏បានអំពាវនាវឲ្យពលរដ្ឋចេញទៅបោះឆ្នោតដោយបានថ្លែងថា៖ «អត្រានៃការចូលរួមបោះឆ្នោត ទោះជាមិនដល់ ៣០ ភាគរយក៏ដោយ អត់មានសិទ្ធិបដិសេធទេ។ អ៊ីចឹងច្បាប់ស្រុកយើង ទាំងរដ្ឋធម្មនុញ្ញមិនមានចែងពាក់ព័ន្ធនឹងរឿងហ្នឹងទេ ហើយខ្មែរក៏មិនទម្លាប់មិនចូលរួមបោះឆ្នោតទេ...គេតែងតែទៅចូលរួមការបោះឆ្នោតទាំងនៅថ្នាក់ឃុំទាំងនៅថ្នាក់ជាតិដើម្បីជ្រើសរើសអ្នកដឹកនាំប្រទេសទាំងនៅមូលដ្ឋាន»។
ប្រធាន គ.ជ.ប អះអាងថាលោកបម្រើការដោយអព្យាក្រឹតគឺធ្វើយ៉ាងណាឲ្យអ្នកមានសិទ្ធិបោះឆ្នោតមានឈ្មោះក្នុងបញ្ជីត្រឹមត្រូវ ហើយសំឡេងឆ្នោតពួកគេត្រូវបានរាប់ដោយយុត្តិធម៌បំផុត។
ទោះយ៉ាងណាលោកបានឆ្លៀតរិះគន់លើអតីតគណបក្សសង្គ្រោះជាតិដែលត្រូវបានតុលាការកំពូលរំលាយដោយសារការឃុបឃិតជាមួយបរទេស។
លោក ស៊ិក ប៊ុនហុក ថ្លែងថា៖ «គ្មានអ្នកណាមួយមកនាំឲ្យ NEC ថាទាល់តែប្រឆាំងភាគច្រើនចូលរួមបានស្របច្បាប់គ្មានទេ យកមកច្បាប់ណានិយាយរបៀបហ្នឹង ហើយគេសរសេរទៀត គណបក្សហ្នឹងគេរំលាយទៅតាមសាលដីកាតុលាការកំពូលទៅទៀត គ្មានជាគណបក្សនយោបាយផងឲ្យទៅទទួលមកចុះឈ្មោះបោះឆ្នោតកើត? ហេតុអីបានគេរំលាយ? បើខ្លួនអត់បានប្រព្រឹត្តល្មើសច្បាប់ក្រមព្រហ្មទណ្ឌទេធ្វើម៉េចគេរំលាយយើង? ហេតុតែគេរំលាយមកពីយើងល្មើសច្បាប់។ អត់ត្រូវជាមួយរដ្ឋធម្មនុញ្ញគេឲ្យខិតខំប្រើសិទ្ធិរបស់យើងដើម្បីធានាសិទ្ធិយើង ឲ្យគោរពច្បាប់ តែអត់គោរពច្បាប់ទៅឃុបឃិតជាមួយបរទេស»។
លោកបន្តថា៖ «បើរដ្ឋធម្មនុញ្ញឲ្យអ៊ំធ្វើរបៀបហ្នឹង ឲ្យឯករាជ្យ អព្យាក្រឹត កុំឲ្យប្រកាន់បក្ខពួកឲ្យអ៊ុំទៅប្រកាន់អ្នកណាកើត? មិនមែនអ៊ំចេញពី CPP ត្រូវតែលម្អៀងទៅ CPP លួចសន្លឹកឆ្នោតសម្រាប់ CPP ឯណាកើត?»។
លោកបានរិះគន់មន្ត្រីបក្សបក្សប្រឆាំងដោយមិនលើកចំឈ្មោះថា៖ ««ដើរមើលងាយជាតិសាសន៍គ្នាឯងហ្នឹង ស្មានតែទៅជាតិសាសន៍គេ គេសរសើរថា អូ អានេះចេះមើលងាយជាតិសាសន៍គ្នាវា វាស្រឡាញ់អញជាងជាតិសាសន៍វា។ ដេកទៅ»។ លោកបន្តថា៖ «ចំណេញស្អីហ្នឹង ចំណេញស្អី?...» ។
ទោះយ៉ាងណាលោកបណ្ឌិត ឡៅ ម៉ុងហៃ អ្នកវិភាគនយោបាយបានហៅ ការរិះគន់គណបក្សនយោបាយពីសំណាក់ប្រធាន គ.ជ.ប ថាកំពុងបង្ហាញពីការបាត់បង់អព្យាក្រឹតភាពផ្នែកនយោបាយ ហើយជាលទ្ធផលធ្វើឲ្យបាត់បង់ភាពគួរឲ្យជឿជាក់បានរបស់លោក និងរបស់ស្ថាប័ន គ.ជ.ប។
ចំពោះការឃ្លាំមើលការបោះឆ្នោតលោក ម៉ុង ហៃ យល់ថាប្រសិនបើអ្នកសង្កេតការណ៍បោះឆ្នោតឯករាជ្យមិនមានវត្តមានទេ ការបោះឆ្នោតនឹងខ្វះភាពស្របច្បាប់៖ «ការបោះឆ្នោតបែបនេះខ្វះភាពស្របច្បាប់ ហើយលទ្ធផលនៃការបោះឆ្នោតមិនគួរឲ្យជឿជាក់បាន»។
ស្រដៀងគ្នានេះលោក ហង្ស វិទូ អ្នកវិភាគម្នាក់ទៀតយល់ថាការបោះឆ្នោតដែលគ្មានអ្នកសង្កេតការណ៍ឯករាជ្យ ធ្វើឲ្យការបោះឆ្នោតមិនប្រព្រឹត្តទៅដោយត្រឹមត្រូវ សេរី និងយុត្តិធម៌។ ប៉ុន្តែលោកលើកទឹកចិត្តឲ្យអង្គការទាំងនោះចូលរួមសង្កេតការណ៍។
លោកថ្លែងថា៖ «អង្គការសង្គមស៊ីវិលដូចជាខុមហ្វ្រែល និងអង្គការផ្សេងទៀតដែលធ្វើការទាក់ទងនឹងការបោះឆ្នោត គួរតែបញ្ជូនក្រុមការងារទៅស៊ើបអង្កេតក្នុងការបោះឆ្នោត»។
លោកយល់ថាអ្នកនយោបាយខ្មែរក៏ដូចជា គណបក្សប្រជាជនកម្ពុជាមិនខ្វល់រឿងឈ្នះដោយកិត្តិយស ឬដោយការប្រកួតប្រជែងទេសំខាន់គឺជ័យជម្នះជារឿងទី ១ ដែលត្រូវធ្វើ។ «កន្លងមកគណបក្សប្រជាជនកម្ពុជា ជាពិសេសអ្នកនយោបាយខ្មែរទាំងអស់គាត់មិនសូវជាខ្វល់ឈ្នះដោយយុត្តិធម៌ ឬមិនយុត្តិធម៌ទេ។ ភាគច្រើនអ្នកនយោបាយខ្មែរយកឈ្នះសិនចាំគិតទៀត។ ពេលក្រោយទៅអ្នកណាទទួលស្គាល់ ឬមិនទទួលស្គាល់គាត់មិនសូវខ្វល់ទេ។ មិនត្រឹមតែសម័យតេជោ ហ៊ុន សែន ទេ តាំងពីសម័យមុនៗ ខ្មែរយើងអស់ទឹកអស់ដីគឺដោយសាររឿងអត់ខ្វល់ហ្នឹងហើយ គឺឈ្លោះគ្នាហែកហួរគ្នាអ៊ីចឹងទៅដើម្បីឈ្នះ-ចាញ់ រហូតដល់ទៅកាប់ចាក់គ្នា ឬកាត់ទឹកកាត់ដីឲ្យគេ។ គ្រាន់តែរឿងរំលាយគណបក្សមួយ និងរឿងបោះឆ្នោត វាជារឿងតូចតាចទេ»៕