.jpg)
ប្រធានអង្គការសុខភាពពិភពលោក (WHO) លោក ត្រេដូស អាដហាណូម ហ្គីប្រ៊ីយេស៊ុស។ AFP
ភ្នំពេញៈ ប្រធានអង្គការសុខភាពពិភពលោក (WHO) លោក ត្រេដូស អាដហាណូម ហ្គីប្រ៊ីយេស៊ុស បានផ្ញើលិខិតមួយមកលោក ហ៊ុន សែន ដើម្បីអរគុណដែលបានអនុវត្តតាមការណែនាំរបស់ WHO និងកោតសរសើរកិច្ចប្រឹងប្រែងរបស់កម្ពុជាក្នុងការប្រយុទ្ធប្រឆាំងនឹងជំងឺកូវីដ ១៩។
ការផ្ញើលិខិតនេះស្របពេលដែលកម្ពុជាកំពុងព្យាយាមទប់ស្កាត់កុំឱ្យមានរលកទី ២ នៃការឆ្លងជំងឺកូវីដ ១៩។ លិខិតរបស់ប្រធាន WHO ដែលក្រសួងការបរទេសយកមកផ្សព្វផ្សាយនៅថ្ងៃព្រហស្បតិ៍ម្សិលមិញបានបញ្ជាក់ថា លោក ត្រេដូស អាដហាណូម ហ្គីប្រ៊ីយេស៊ុស បានថ្លែងអំណរគុណចំពោះការបង្ហាញសមានចិត្ត ការគាំទ្រ និងការប្ដេជ្ញាចិត្តរបស់លោក ហ៊ុន សែន កាលពីថ្ងៃទី ២០ ខែមេសា ក្នុងការបន្តអនុវត្តតាមការអំពាវនាវរបស់ WHO ដើម្បីចូលរួមក្នុងកិច្ចខិតខំប្រឹងប្រែងជាសកលកាត់បន្ថយទំហំនៃផលប៉ះពាល់ និងការបញ្ឈប់ការរាតត្បាតនៃជំងឺកូវីដ ១៩។
លិខិតសរសេរថា៖ «ខ្ញុំមានសេចក្ដីសោមនស្សរីករាយដែលរាជរដ្ឋាភិបាលកម្ពុជាបានចាត់វិធានការយ៉ាងម៉ឺងម៉ាត់ក្នុងការប្រតិបត្តិផែនការយុទ្ធសាស្ដ្រប្រុងប្រៀបទុកមុន និងផែនការឆ្លើយតបនឹងជំងឺកូវីដ១៩ជាសកលរបស់អង្គការសុខភាពពិភពលោក។ ខ្ញុំសូមឆ្លៀតឱកាសនេះ ធ្វើការកោតសរសើរ កិច្ចខិតខំរបស់រាជរដ្ឋាភិបាលកម្ពុជាក្នុងការទប់ស្កាត់ជំងឺរាតត្បាតជាពិសេសកោតសរសើរចំពោះបុគ្គលិកសុខភាពសាធារណៈនៅជួរមុខដែលកំពុងប្រយុទ្ធនឹងជំងឺកូវីដ១៩»។
លោក ត្រេដូស ក៏បានបង្ហាញការគាំទ្រចំពោះភាពដឹកនាំនយោបាយការចូលរួម និងតួនាទីរបស់លោក ហ៊ុន សែន ដោយបញ្ជាក់ថា អង្គការសុខភាពពិភពលោកកម្រិតសកល តំបន់ និងជាតិបានត្រៀមខ្លួនរួចជាស្រេច ដើម្បីបន្តការងារជាមួយរដ្ឋាភិបាល និងដៃគូធំៗនានាក្នុងការប្រយុទ្ធប្រឆាំងនឹងជំងឺកូវីដ ១៩។ ប្រធាន WHO រូបនេះបញ្ជាក់ទៀតថា ការចូលរួម និងសាមគ្គីគ្នានឹងទទួលបានជោគជ័យលើជំងឺរាតត្បាតមួយនេះ។
ជំងឺកូវីដ ១៩ បានផ្ទុះឡើងលើកដំបូងនៅក្នុងប្រទេសចិនកាលពីខែធ្នូ ឆ្នាំ ២០១៩ និងបានរាលដាលដល់ប្រទេសនៅទូទាំងពិភពលោកចំនួន ២១៧ ប្រទេសខណៈកម្ពុជាបានរកឃើញជំងឺនេះលើកដំបូងកាលពីខែកុម្ភៈ។ គិតមកដល់ពេលនេះកម្ពុជាបានរាយការណ៍មានអ្នកឆ្លងជំងឺនេះចំនួន ១២៤ នាក់ ក្នុងនោះ ១២២ នាក់ ត្រូវបានព្យាបាលជាសះស្បើយ ខណៈនៅសល់ ២ នាក់ទៀត គឺជាករណីថ្មីដែលទើបរកឃើញនៅថ្ងៃទី ២១ និងថ្ងៃទី ២២ ខែឧសភា។
ក្រសួងសុខាភិបាលកម្ពុជាបញ្ជាក់ថា ថ្វីដ្បិតមានចំនួនអ្នកឆ្លងជំងឺកូវីដ ១៩ ជាង ៩៨% ត្រូវបានព្យាបាលជាសះស្បើយឡើងវិញ និងពុំមានអ្នកស្លាប់ ហើយករណីភាគច្រើនលើសលប់គឺបាននាំចូលពីក្រៅប្រទេស ប៉ុន្តែកម្ពុជាត្រូវតែបន្តប្រកាន់យកការប្រុងប្រយ័ត្នជាប់ជានិច្ច ចំពោះការប្រឈមនឹងរលកទី ២ នៃការចម្លងជាពិសេសគឺការចម្លងនៅក្នុងសហគមន៍។
កាលពីថ្ងៃម្សិលមិញទំព័រហ្វេសប៊ុកលោក ហ៊ុន សែន បានលើកឡើងថា ដើម្បីចៀសវាងកើតមានវិប្បដិសារី កម្ពុជាមិនត្រូវធ្វេសប្រហែស និងមើលស្រាលស្ថានភាពបច្ចុប្បន្ន ដោយសារមានអ្នកឆ្លងតិចតួចនៅក្នុងប្រទេសឡើយ ហើយត្រូវតែបង្កើនការយកចិត្តទុកដាក់ខ្ពស់ក្នុងការត្រៀមទប់ស្កាត់គ្រប់ពេលវេលា ចំពោះការកើតមានរលកទី ២ នៃជំងឺកូវីដ ១៩។ លោក ហ៊ុន សែន បន្តអំពាវនាវឱ្យរួមគ្នាទប់ស្កាត់ការឆ្លងរាតត្បាតជំងឺឆ្លងនេះនៅទូទាំងប្រទេស ដោយស្ដាប់តាមសេចក្ដីណែនាំរបស់ក្រសួងសុខាភិបាលហើយដើម្បីការពារមនុស្សជាទីស្រឡាញ់នៅក្នុងគ្រួសារគឺពលរដ្ឋម្នាក់ៗត្រូវតែរក្សាអនាម័យរៀងៗខ្លួន។
ទំព័រហ្វេសប៊ុកលោកនាយករដ្ឋមន្ត្រីសរសេរថា៖ «មកទល់ពេលនេះមិនទាន់មានថ្នាំព្យាបាលកូវីដ១៩នៅឡើយទេ។ ដូច្នេះបងប្អូនប្រជាពលរដ្ឋត្រូវតែពាក់ម៉ាស់ហើយត្រូវដុសលាងសម្អាតដៃជាប្រចាំដោយទឹកអាល់កុល ឬជែលសម្លាប់មេរោគ។ ត្រូវខ្ទប់មាត់ជាមួយក្រមា ឬម៉ាស់ ឬខ្ទប់ដោយដៃនៅពេលក្អក ឬកណ្តាស់ ជាពិសេសនៅក្នុងចំណោមក្រុមមនុស្សច្រើន ឬទីប្រជុំជននានាដូចជាទីផ្សារ ភោជនីយដ្ឋាន និងទីកន្លែងធ្វើការជាដើម»។
ដើម្បីការពារកុំឱ្យមានរលកទី ២ នៃការឆ្លងនេះគឺរដ្ឋាភិបាលបានចាប់ផ្ដើមឱ្យអ្នកដំណើរទាំងអស់ទាំងពលរដ្ឋខ្មែរ និងបរទេសដែលទើបវិលត្រឡប់ពីក្រៅប្រទេសត្រូវបញ្ជូនទៅមណ្ឌលរង់ចាំបន្ទាប់ពីចុះពីលើយន្តហោះភ្លាម ដើម្បីយកសំណាកទៅធ្វើតេស្ដ និងរង់ចាំលទ្ធផលពីវិទ្យាស្ថានប៉ាស្ទ័រ។
ក្រសួងសុខាភិបាលបញ្ជាក់ថា ក្នុងករណីរកឃើញអ្នកដំណើរណាម្នាក់ឆ្លងជំងឺនេះ គឺអ្នករួមដំណើរជាមួយផ្សេងទៀតត្រូវបញ្ជូនទៅធ្វើចត្តាឡីស័កនៅតាមទីតាំងដែលកំណត់ដោយរដ្ឋាភិបាលហើយចំពោះជើងហោះហើរដែលរកមិនឃើញមានអ្នកឆ្លងគឺអ្នកដំណើរទាំងអស់ត្រូវអនុញ្ញាតឱ្យធ្វើចត្តាឡីស័កនៅតាមផ្ទះ។ ពីថ្ងៃម្សិលមិញភ្នំពេញប៉ុស្ដិ៍មិនអាចសុំការបញ្ជាក់បន្ថែមពីលោកស្រី ឱ វណ្ណឌីន និងលោកស្រី យក់ សម្បត្តិ ដែលជាអ្នកនាំពាក្យក្រសួងសុខាភិបាលបានទេដោយសារលេខទូរស័ព្ទជាប់រវល់៕
