ភ្នំពេញៈ ប្រព័ន្ធផ្សព្វផ្សាយក្នុងស្រុកបានវាយប្រហារទៅលើមន្ត្រីតាមដានការបោះឆ្នោតលោក គល់ បញ្ញា តាមរយៈការចេញផ្សាយលិខិតអនាមិកមួយ ទៅការីនិពន្ធដោយចោទប្រកាន់ថាលោក បញ្ញា ប៉ុនប៉ងបង្កចលាចលក្នុងអំឡុងការបោះឆ្នោតឆ្នាំ ២០១៣ និង ២០១៧ និងកំពុងប៉ុនប៉ងបង្កចលាចលម្តងទៀតនៅពេលលោកនិយាយទៅវិទ្យុអាស៊ីសេរីកាលពីសប្តាហ៍មុនអំពីបញ្ហាភាពស្របច្បាប់សម្រាប់ការបោះឆ្នោតនៅក្នុងខែកក្កដាខាងមុខ។
លោក បញ្ញា ដែលដឹកនាំអង្គការ ខុមហ្វ្រែល ដែលជាអង្គការឃ្លាំមើលការបោះឆ្នោត និងជាប្រធានអង្គការ Anfrel ដែលជាអង្គការថ្នាក់តំបន់បានថ្លែងទៅកាន់វិទ្យុអាស៊ីសេរីកាលពីយប់ថ្ងៃសុក្រដោយអះអាងថា ការបោះឆ្នោតជាតិខែកក្កដាខាងមុខ ខ្វះភាពយុត្តិធម៌ ហើយថាអង្គការអន្តរជាតិដូចជា ក្រុមប្រឹក្សាសិទ្ធិមនុស្សអង្គការសហប្រជាជាតិ និងសហភាពអន្តរសភាបានថ្លែងថា វាត្រូវការឲ្យមានការចូលរួមពីគណបក្សសង្គ្រោះជាតិដើម្បីឲ្យមានការបោះឆ្នោតស្របច្បាប់។
ខណៈមិនបំភ្លឺថាតើអង្គការណាដែលលោកកំពុងតំណាងលោក បញ្ញា ថ្លែងថា ការប្តេជ្ញាចិត្តមួយនឹងត្រូវការធ្វើឲ្យមាននា ២-៣ សប្តាហ៍ខាងមុខអំពីថាតើត្រូវបញ្ជូនអ្នកតាមដានការបោះឆ្នោតឬអត់។ «យើងនឹងមើលថាតើមានការប្រកួតប្រជែងដោយយុត្តិធម៌ឬអត់ ហើយថាដំណើរការនេះធានានូវការប្រកួតប្រជែង។ យើងនឹងមើលហើយសម្រេចលើបញ្ហានេះ»។
សារព័ត៌មាន Fresh News និង Swift News បានចេញផ្សាយលិខិតមួយពី «ប៉ូល ពានរិន (Pol Peanrin)» ដោយអះអាងថាលោក បញ្ញា កំពុងព្យាយាមបន្ទុចបង្អាក់ការបោះឆ្នោតនាពេលខាងមុខហើយការជ្រើសរើសយកគាត់ទៅក្នុងក្រុមប្រឹក្សាភិបាលនៃអង្គការ Anfrel គឺជាការផ្តល់រង្វាន់ចំពោះការបន្ទុចបង្អាក់ដំណើរការបោះឆ្នោតនាពេលកន្លងមក។
លិខិតបន្តថា៖ «Anfrel នឹងប្រារព្ធកិច្ចប្រជុំមួយនៅទីក្រុងបាងកកនាខែមេសា ដើម្បីរៀបចំគម្រោងអគតិមួយ ដើម្បីធ្វើឲ្យប៉ះពាល់ការបោះឆ្នោតនៅកម្ពុជា ហើយលោក បញ្ញា នឹងព្យាយាមធ្វើឲ្យមានការផ្លាស់ប្តូរចំពោះគណៈកម្មាធិការជាតិរៀបចំការបោះឆ្នោតបច្ចុប្បន្ន»។
លោក បញ្ញា និងអង្គការ Anfrel មិនអាចទាក់ទងសុំអត្ថាធិប្បាយបានទេកាលពីម្សិលមិញ។
លោក កន សាវ៉ាង មន្ត្រីសម្របសម្រួលផ្នែកតាមដានរបស់អង្គការខុមហ្វ្រែល មិនបានធ្វើអត្ថាធិប្បាយអំពីការលើកឡើងរបស់លោក បញ្ញា ទេ ដោយថ្លែងថា ការលើកឡើងនោះជាមតិផ្ទាល់ខ្លួនរបស់លោក ប៉ុន្តែបានច្រានចោលការចោទប្រកាន់ថាអង្គការបានប្រព្រឹត្តខុសតាមរយៈការតាមដានការបោះឆ្នោតកន្លងមក។ លោកថ្លែងថា៖ «ជាលក្ខណៈបច្ចេកទេសប្រសិនបើអ្នកឃើញអ្វីមួយមិនស្របទៅនឹងសិទ្ធិ និងសេរីភាព តើយើងត្រូវតែនិយាយថាយល់ស្របៗ? នោះមិនអាចទៅរួចទេ»។
លោក សុខ ឥសាន អ្នកនាំពាក្យគណបក្សប្រជាជនថ្លែងថា លោក បញ្ញា លម្អៀងទៅរកគណបក្សប្រឆាំងបង្កើតឲ្យមានអង្គការសម្ព័ន្ធតាមដានការបោះឆ្នោតឈ្មោះ «បន្ទប់ស្ថានការណ៍» ដើម្បីគាំទ្រគណបក្សសង្គ្រោះជាតិ។ សម្ព័ន្ធនេះត្រូវបានរិះគន់យ៉ាងខ្លាំងនាពេលកន្លងមកចំពោះការរិះគន់គណៈកម្មាធិការជាតិរៀបចំការបោះឆ្នោត និងនីតិវិធីបោះឆ្នោតដែលប្រើប្រាស់ក្នុងអំឡុងការបោះឆ្នោតឆ្នាំ ២០១៣៕ PS