.jpg)
គ្រូពេទ្យ កំពុងពិនិត្យអ្នកជំងឺនៅក្នុងពិធីដាក់ឲ្យដំណើរការប្រព័ន្ធមន្ទីរពេទ្យឌីជីថល នៅមន្ទីរពេទ្យព្រះអង្គឌួង កាលពីថ្ងៃម្សិលមិញ។ សហការី
ភ្នំពេញៈ ក្រសួងសុខាភិបាល ដាក់ដំណើរការប្រព័ន្ធមន្ទីរពេទ្យឌីជីថល ជាលើកដំបូង ឈ្មោះថា «ពេទ្យយើង» ជាផ្លូវការពីម្សិលមិញ នៅក្នុងទីតាំងមន្ទីរពេទ្យព្រះអង្គឌួង បន្ទាប់ពីទទួលបានជោគជ័យនូវការដាក់ឲ្យដំណើរការសាកល្បងរយៈពេលមួយខែកន្លងមក ដែលជំហានបន្ទាប់ទៀតនោះ នឹងត្រូវអនុវត្តនៅមន្ទីរពេទ្យមិត្តភាពខ្មែរ-សូវៀត មុននឹងឈានទៅបំពាក់បច្ចេកវិទ្យានេះទូទាំងប្រទេស។
លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល ថ្លែងក្នុងពេលចុះពិនិត្យប្រព័ន្ធមន្ទីរពេទ្យឌីជីថលនៅមន្ទីរពេទ្យព្រះអង្គឌួង ពីម្សិលមិញថា ក្រសួងកំពុងអភិវឌ្ឍន៍ និងគ្រប់គ្រងមន្ទីរពេទ្យ ដោយប្រើប្រាស់ប្រព័ន្ធអេឡិចត្រូនិក តាមរយៈប្រព័ន្ធមន្ទីរពេទ្យឌីជីថលថ្មីនេះទូទាំងប្រទេស។
លោកបញ្ជាក់ថា៖ «ឥឡូវយើងធ្វើពេទ្យ[អង្គឌួង]នេះជាគំរូមួយសិន ដោយសារតែមន្ទីរពេទ្យនេះ ងាយស្រួល ព្រោះមានបច្ចេកវិទ្យាអេឡិចត្រូនិករួចហើយ ដូច្នេះការដំឡើងប្រព័ន្ធមន្ទីរពេទ្យឌីជីថលនេះ គឺរឹតតែងាយ ស្រួលទៀត។ យើងនឹងពង្រីកទៅកាន់មន្ទីរពេទ្យផ្សេងៗទៀត ហើយបើយើងធ្វើបានគ្រប់មន្ទីរពេទ្យទាំងអស់ ដែលយើងហៅថា ប្រព័ន្ធត្រួតពិនិត្យអេឡិចត្រូនិកទូទាំងប្រទេសនេះ គឺវាកាន់តែងាយស្រួលថែមទៀត»។
លោកបន្ថែមថា៖ «ដូច្នេះយើងកំពុងពិគ្រោះគ្នា ជាមួយអ្នកជំនាញ ចង់ឲ្យពេទ្យណាជាជំហានបន្ទាប់ ដែលងាយស្រួល និងគ្រូពេទ្យធ្លាប់ប្រើប្រាស់គ្រឿងអេឡិចត្រូនិករួចហើយ ហើយកំពុងពិចារណា ចំពោះមន្ទីរពេទ្យមិត្តភាពខ្មែរ-សូវៀត បន្ទាប់មកបន្តពង្រីកទៅបណ្តាខេត្តទូទាំងប្រទេសទៀត»។
លោក ម៉ម ប៊ុនហេង ក៏បានអះអាងដែរថា ក្រសួងកំពុងពិចារណាលើកញ្ចប់ថវិការបស់រដ្ឋ និងរៀបចំផែនការថវិកា ដើម្បីដាក់ជូនរដ្ឋាភិបាល ដើម្បីអនុម័តថវិកាសម្រាប់បម្រើឲ្យវិស័យនេះ ទូទាំងប្រទេស និងជាដំណាក់កាល តាមដែលអាចធ្វើទៅបាន។
លោកថា មុននឹងឈានទៅដំណើរការប្រព័ន្ធនេះទូទាំងប្រទេស គឺត្រូវបណ្តុះបណ្តាលដល់បុគ្គលិកពេទ្យជាមុនសិន ពីរបៀបប្រើប្រាស់បច្ចេកវិទ្យា ឱ្យស្របទៅតាមស្តង់ដាតែ ១ នៅគ្រប់មន្ទីរពេទ្យទាំងអស់។
លោកថ្លែងថា៖ «ដើម្បីផ្ដល់ភាពងាយស្រួលដល់អ្នកជំងឺ យើងធ្វើកាត ឬបណ្ណសុខភាពជូនពួកគាត់ ដោយកាន់តែកាត ឬបណ្ណនេះទៅជាមួយ ទោះទៅមន្ទីរពេទ្យណាក៏ដោយ មន្ទីរពេទ្យនឹងដឹងពីប្រវត្ដិនៃជំងឺរបស់អ្នក ជំងឺម្នាក់ៗ។ ដូច្នេះពេលគាត់មកពិនិត្យលើកក្រោយ យើងនឹងដឹងពីប្រវត្ដិអ្នកជំងឺ ងាយស្រួលតាមដានថា អ្នកជំងឺ ឈឺអ្វី។ កាលបរិច្ឆេទមកពេទ្យពេលណា បញ្ជូនទៅកន្លែងណា ម៉ោងប៉ុន្មាន ផ្តល់ឱសថអ្វីខ្លះ ដែលនេះជាភាពងាយស្រួលមួយ ដល់គ្រូពេទ្យ ក្នុងការពិនិត្យព្យាបាលអ្នកជំងឺ បានលឿនរហ័ស និងមានគុណភាព។ តែពេលនេះ បណ្ណសុខភាពនេះ យើងប្រើបានតែនៅពេទ្យព្រះអង្គឌួងតែប៉ុណ្ណោះ»។
លោកម៉ម ប៊ុនហេង ចូលរួមសម្ពោធប្រព័ន្ធមន្ទីរពេទ្យឌីជីថល ម្សិលមិញ។ គីម ម៉ារីតា
លោកស្រី ប៉ុង លីមសាន ស្ថាបនិក និងជានាយិកាប្រតិបត្តិនៃក្រុមហ៊ុន ហ្វឺស វីម៉ិនថេច អេស៊ា (First Womentech Asia Co., LTD) ដែលបង្កើតប្រព័ន្ធមន្ទីរពេទ្យឌីជីថល «ពេទ្យយើង» បានប្រាប់ថា ប្រព័ន្ធគ្រប់គ្រងពេទ្យឌីជីថលនិងទំនើបជាប្រព័ន្ធឌីជីថលមួយដែលមានកម្មវិធីគ្រប់គ្រងមន្ទីរពេទ្យគ្រប់កម្រិតទាំងមន្ទីរពេទ្យឯកជន និងរដ្ឋ។ គឺគ្រប់គ្រងតាម Online និង Offline (All in one plate form) លើប្រតិបត្តិការទាំងមូលរបស់មន្ទីរពេទ្យ ដូចជា EMR (កំណត់ត្រាអ្នកជំងឺ) Para Clinic គ្រប់គ្រងស្ដុកឱសថកាលបរិច្ឆេទប្រើប្រាស់ថ្នាំ។ ចរន្តប្រើប្រាស់ឱសថ កាលបរិច្ឆេទជួបពេទ្យ កញ្ចប់សេវាព្យាបាល ធានារ៉ាប់រង របាយការណ៍ពិនិត្យសុខភាព គណនេយ្យលំហូរសាច់ប្រាក់ និងធនធានមនុស្ស។
លោកស្រីបន្តថា មុននឹងដាក់ឲ្យដំណើរការនៅក្នុងមន្ទីរពេទ្យព្រះអង្គឌួងនេះ គឺវាត្រូវបានដាក់ឲ្យដំណើរការ និងគ្រប់គ្រងដោយជោគជ័យនៅតាមមន្ទីរពេទ្យឯកជនជិត ១០០ កន្លែងមកហើយ។
ចំពោះគម្រោងដែលក្រសួងសុខាភិបាលប្រកាសប្រតិបត្តិប្រព័ន្ធនេះទូទាំងប្រទេស គឺជារឿងប្រសើរ ដោយអះអាងថាលោកស្រីបានត្រៀមខ្លួនជាស្រេចដើម្បីសហការ។
លោកស្រីបញ្ជាក់ថា៖ «ខ្ញុំចង់ឲ្យម៉ូដែលពេទ្យទាំងអស់ យកគំរូតាមពេទ្យព្រះអង្គឌួង ហើយ system របស់យើងគឺបានបង្កើតរួចជាស្រេចហើយ សម្រាប់ដំណើរការនៅតាមមន្ទីរពេទ្យទូទាំងប្រទេស និងគ្រប់កម្រិត។ អ្វីដែលសំខាន់ឲ្យមន្ទីរពេទ្យនោះអាចប្រើប្រាស់ប្រព័ន្ធនេះបានគឺគាត់ត្រូវមានឯកភាពគ្នា និងសហការគ្នាផ្ទៃក្នុង នោះនឹងអាចធ្វើទៅបាន បើទោះជាស្ថាប័នតូចក៏ដោយ ធំក៏ដោយ»។
លោក លូ លីឃាង នាយកមន្ទីរពេទ្យព្រះអង្គឌួង លើកឡើងថា បន្ទាប់ពីមន្ទីរពេទ្យព្រះអង្គឌួង ប្រើប្រាស់នូវប្រព័ន្ធគ្រប់គ្រងបែបឌីជីថលនេះ បានធ្វើឲ្យការគ្រប់គ្រងទិន្នន័យសុខភាពរបស់អ្នកជំងឺ កាន់តែងាយស្រួល រហ័ស និងច្បាស់លាស់។
លោកបន្តថា ក្នុងរយៈពេល ១ ខែ ចាប់តាំងពីដាក់ដំណើរការសាកល្បង រហូតដល់ប្រកាសជាផ្លូវការនេះ មន្ទីរពេទ្យបានទទួលពិនិត្យអ្នកជំងឺរាប់ពាន់នាក់ និងផ្តល់បណ្ណសុខភាពជូនដល់អ្នកជំងឺជិត ២ ពាន់កាត។
លោកថ្លែងថា៖ «ប្រព័ន្ធហ្នឹង ចែកព័ត៌មានគ្នាហ្មង យើងចែកទៅកាន់គ្រប់ផ្នែក ត្រូវតែដឹងបញ្ហារបស់អ្នកជំងឺ ឲ្យតែនៅក្នុងមន្ទីរពេទ្យព្រះអង្គឌួង គឺភ្ជាប់ទាំងអស់ មិនថាផ្នែកច្រមុះ បំពង់ក ត្រចៀក ភ្នែក ធ្មេញ និងរោគស្ត្រី ក៏យើងដឹងប្រវត្តិ។ វាងាយស្រួលតាំងពីគ្រប់គ្រងរដ្ឋបាល ហិរញ្ញវត្ថុ បច្ចេកទេសបានទាំងអស់»។
អ្នកស្រី ហាក់ លាងហៃ អាយុ ៣៦ ឆ្នាំ អ្នកជំងឺម្នាក់មកពីខេត្តកណ្តាល ដែលទើបទទួលកាតពីមន្ទីរពេទ្យ បង្ហាញអារម្មណ៍របស់ខ្លួនថា៖ «លឿនអ៊ីចឹង យើងអរ មកពេទ្យខ្លាចតែយូរៗពេក ព្រោះធ្លាប់តែយូរ ដល់មកដល់លឿនអ៊ីចឹង ខ្ញុំសប្បាយចិត្ត មិនហត់នឹងរង់ចាំយូរ ខាតពេលវេលា ខាតការងារ។ បើពេទ្យផ្សេងលឿនអ៊ីចឹងដែរ មិនដឹងល្អយ៉ាងណា»។
អ្នកស្រីឃ្លាំង យឿន អាយុ ៥២ ឆ្នាំ អ្នកជំងឺមកពីខេត្តតាកែវ និយាយដែរថា៖ «ខ្ញុំឃើញថា នៅពេលប្រើប្រព័ន្ធនេះ សេវាអីលឿន ហើយពេទ្យគេរាក់ទាក់ទៀត»៕
