ភ្នំពេញៈ ប្រមុខការពារជាតិកម្ពុជាលោក ទៀ បាញ់ រំឭកដល់សិក្ខាកាមយោធាទាំងអស់ដែលកំពុងបន្តការសិក្សានៅឯក្រៅប្រទេសឲ្យយកចិត្តទុកដាក់ថែរក្សាសុខភាព ដើម្បីចៀសឆ្ងាយពីជំងឺឆ្លង បន្ទាប់ពីមានសេចក្តីរាយការណ៍មកថា សិក្ខាកាមខ្មែរចំនួន ៣ នាក់បានឆ្លងជំងឺកូវីដ១៩ នៅប្រទេសរុស្ស៊ី អំឡុងពេលពួកគេកំពុងបំពេញការសិក្សានៅប្រទេសនោះ។
ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិលោក ទៀ បាញ់ ថ្លែងក្នុងទំព័រហ្វេសប៊ុករបស់លោកនៅថ្ងៃចន្ទថា៖ «សូមក្មួយៗ សិស្ស និស្សិត ដែលកំពុងសិក្សានៅតាមបណ្តាប្រទេសនានាថែទាំសុខភាព អនាម័យឱ្យបានល្អនិងរក្សាគម្លាតសង្គម (Social Distancing)។ ព្រមទាំងអនុវត្តនូវវិធានការការពារឱ្យបានខ្ជាប់ខ្ជួនក្នុងគ្រាដែលមានការរីករាលដាលនៃមេរោគ COVID-19»។
លិខិត ១ ច្បាប់របស់ស្ថានឯកអគ្គរាជទូតកម្ពុជាប្រចាំប្រទេសរុស្ស៊ីផ្ញើមកកាន់នាយកដ្ឋានទាក់ទងអន្តរជាតិនៃក្រសួងការពារជាតិកាលពីថ្ងៃ ១៩ មេសា ឲ្យដឹងថា កាលពីថ្ងៃទី ១៨ មេសា សិក្ខាកាមយោធាកម្ពុជាចំនួន ៣ នាក់ បានឆ្លងជំងឺកូវីដ ១៩ បន្ទាប់ពីបានបញ្ជូនទៅពិនិត្យសុខភាពនៅមន្ទីរពេទ្យក្រុងក៏បានរកឃើញលទ្ធផលវិជ្ជមាន។
លិខិតបញ្ជាក់ថា៖ «មូលហេតុនៃការឆ្លងនេះគឺដោយសារមានការឆ្លងពីបណ្តាសិក្ខាកាមយោធាជនបរទេសដទៃទៀតដែលសិក្សាឆ្នាំជាមួយគ្នា និងស្នាក់នៅជាន់ជាមួយគ្នា។ បច្ចុប្បន្នសិក្ខាកាមយោធាកម្ពុជា ៣ រូប ត្រូវបានខាងសាលាបញ្ជូនទៅមន្ទីរពេទ្យព្យាបាលជំងឺកូវីដ ១៩ និងកំពុងតាមដានសុខភាពបន្តទៀត»។
លោក ប៉ែន ពិសិដ្ឋ នាយការិយាល័យអនុព័ន្ធយោធាប្រចាំស្ថានទូតកម្ពុជានៅទីក្រុងម៉ូស្គូបញ្ជាក់ក្នុងលិខិតថា សិក្ខាកាមចំនួន ៣ រូបនោះកំពុងសិក្សាឆ្នាំទី ៣ ជំនាញវេជ្ជសាស្ត្រទូទៅនៅសាកលវិទ្យាល័យវេជ្ជសាស្ត្រយោធាប្រទេស រុស្ស៊ី។
លោកបញ្ជាក់ថា៖ «យោងតាមការរាយការណ៍ពីប្រធានក្រុមប្រចាំសាលាផ្ទាល់ គឺស្ថានភាពជំងឺរបស់សិក្ខាកាមយោធាទាំង ៣ រូប នៅមិនទាន់មានសភាពធ្ងន់ធ្ងរទេ ដោយសារតែពួកគាត់បានរាយការណ៍ពីសុខភាព និងស្ថានភាពជំងឺរបស់ខ្លួនទៅកាន់ក្រុមគ្រូពេទ្យ ដើម្បីពិនិត្យរកមើលជំងឺកូវីដ ១៩ បានទាន់ពេលវេលា»។
លោក ទោ ផាត ប្រធាននាយកដ្ឋានទាក់ទងអន្តរជាតិបានបង្វែរសំណួរឲ្យទៅសួរអ្នកនាំពាក្យក្រសួងការពារជាតិដោយគ្រាន់តែបញ្ជាក់យ៉ាងខ្លីថា លោកបានដាក់របាយការណ៍ជូនរដ្ឋមន្ត្រីរួចរាល់អស់ហើយជុំវិញករណីនេះ។ លោក ឈុំ សុជាត អ្នកនាំពាក្យក្រសួងការពារជាតិមិនអាចទាក់ទងដើម្បីសុំអត្ថាធិប្បាយបានទេពីម្សិលមិញ៕