.jpg)
លោក វ៉ា គឹមហុង, លោក ទៀ បាញ់ និងលោក ហ៊ុន ម៉ាណែត ពីម្សិលមិញ។ ហ៊ាន រង្សី
ភ្នំពេញៈ ប្រមុខការពារជាតិលោក ទៀ បាញ់ ព្រមានថានឹងមិនលើកលែងបានឡើយ ចំពោះបុគ្គលមួយចំនួនដែលបានចោទប្រកាន់មកលើរាជរដ្ឋាភិបាលថា បានផលិត និងបោះពុម្ពផែនទីខ្នាត ១/២៥០០០ នេះដែលជាការធ្វើឱ្យបាត់បង់ទឹកដី។
ក្នុងពិធីប្រគល់ និងទទួលផែនទីឋានលេខាព្រំដែនគោក កម្ពុជា-វៀតណាម ខ្នាត ១/២៥០០០ ឲ្យក្រសួងស្ថាប័នពាក់ព័ន្ធចំនួន ៣៥ យកទៅប្រើប្រាស់ពីម្សិលមិញនៅវិមានសន្តិភាព ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់ លើកឡើងថា រាជរដ្ឋាភិបាលបានបំពេញកិច្ចការនេះបានល្អបំផុតជាប្រវត្តិសាស្ត្រមិនដែលមានសម្រាប់ប្រទេសកម្ពុជា ដោយសារការធ្វើបាននូវផែនទីខ្នាត ១/២៥០០០ នេះដែលជាជោគជ័យមួយដ៏ធំសម្រាប់ជាឯកសារជាតិរបស់កម្ពុជា។
លោកថ្លែងថា៖ «ខ្ញុំមិនអាចអត់ឱនឲ្យបានទេចំពោះអ្នកមួយចំនួនចោទប្រកាន់ថា ការផលិត និងបោះពុម្ពផែនទីខ្នាត ១/២៥០០០ នេះជាការធ្វើឲ្យបាត់ស្រុក បាត់ប្រទេសបាត់ទឹកដីជាដើមនេះ។ វាជាជោគជ័យរបស់ប្រទេសយើងដែលយើងបានធ្វើដោយលំបាក»។
លោកថា៖ «ដោយសារយើងសម្រេចបានលុះត្រាតែមានការឯកភាពពីប្រទេសជិតខាងយើងផងដែរ។ មានការពិបាកណាស់ ប៉ុន្តែបែរជាមានជនអគតិមួយចំនួនមកចោទប្រកាន់យើង ដោយគ្មានមូលដ្ឋានច្បាស់លាស់»។
លោកបន្ថែមថា ចំពោះអ្នកដែលធ្វើប្រជាភិថុត អ្នកដែលនិយាយគ្មានមូលដ្ឋាន គ្មានការពិតទាក់ទងនឹងការបោះពុម្ពផែនទីខ្នាត ១/២៥០០០ នេះនឹងត្រូវចាត់វិធានការទៅតាមផ្លូវច្បាប់។
គណៈកម្មាធិការកិច្ចការព្រំដែនកម្ពុជាកាលពីថ្ងៃទី ១ សីហា បានជួបពិភាក្សាការងារជាមួយភាគីវៀតណាម នៅច្រកទ្វារព្រំដែនអន្តរជាតិម៉ុកបៃ ខេត្តតៃនិញ។ ភាគីទាំង ២ បានប្រគល់ និងទទួលផែនទីឋានលេខាព្រំដែនគោកខ្នាត ១/២៥០០០ ដែលបានកំណត់ព្រំដែន ៨៤% ដែលកម្ពុជា និងវៀតណាមបានឯកភាពគ្នា។
ការរៀបចំប្រគល់ និងទទួលផែនទីនេះបានធ្វើឡើងបន្ទាប់ពីលោក ហ៊ុន សែន នាយករដ្ឋមន្ត្រីនៃកម្ពុជា និងលោក ង្វៀន សួនហ៊្វុកនាយករដ្ឋមន្ត្រីវៀតណាម ចុះហត្ថលេខាទទួលស្គាល់បង្គោលព្រំដែនប្រទេសទាំង ២ ដែលសម្រេចបានចំនួន ៨៤ ភាគរយកាលពីថ្ងៃទី ៥ ខែតុលា ឆ្នាំ ២០១៩។
ការយកផែនទីខ្នាត ១/២៥០០០ ទៅតម្កល់នៅអង្គការសហប្រជាជាតិលោក ទៀ បាញ់ មិនទាន់អាចកំណត់បានថានៅពេលណានៅឡើយទេ។ ប៉ុន្តែលោកថា សម្រាប់ទាំងអស់គ្នាត្រូវដឹង និងប្រើប្រាស់ផែនទីនេះដែលជាផែនទីពិតប្រាកដ មិនដែលមានពីមុនមកទេ។
លោក ទៀ បាញ់ ថា៖ «យើងបានបោះបង្គោលសម្គាល់យ៉ាងជាក់លាក់ដែលយើងមិនដែលធ្វើបានទេពីមុនមក។ ប៉ុន្តែពេលនេះយើងធ្វើបាន ហើយយើងមានមោទនភាព ខ្លាំងណាស់ដែលបានបោះពុម្ព និងប្រគល់ទៅតាមក្រសួងស្ថាប័នសម្រាប់ប្រើប្រាស់»។
ចំពោះកិច្ចការនៅសេសសល់ចំនួន ១៦% ទៀតទើបបញ្ចប់ក្នុងការបោះបង្គោលព្រំដែនកម្ពុជា និងវៀតណាម លោក ទៀ បាញ់ ថ្លែងថា បំណងរបស់ប្រទេសកម្ពុជា គឺចង់បញ្ចប់ឱ្យបានឆាប់ៗ។ ប៉ុន្តែកម្ពុជាមិនអាចធ្វើបានតែម្នាក់ឯងនោះទេ គឺត្រូវមានការចរចា ពិភាក្សាគ្នាជាមួយភាគីវៀតណាមរហូតប្រទេសទាំង ២ ឯកភាពគ្នាទើបអាចបញ្ចប់បាន។
លោកប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងពីម្សិលមិញថា រដ្ឋធម្មនុញ្ញនៃព្រះរាជាណាចក្រកម្ពុជាត្រង់មាត្រា ៣៥ បានចែងពីការការពារ និងការផ្តល់ឱកាសឱ្យពលរដ្ឋសម្តែងមតិចូលរួមក្នុងសកម្មភាពសេដ្ឋកិច្ចសង្គម នយោបាយក៏ដូចជាផ្តល់នូវមតិត្រឡប់ទៅវិញចំពោះកិច្ចការរបស់សមត្ថកិច្ចក៏ដូចជារដ្ឋាភិបាល។
លោកថ្លែងថា៖ «ខ្ញុំយល់ថា ទាក់ទងនឹងរឿងព្រំដែននេះប្រជាពលរដ្ឋគ្រប់រូបមានសិទ្ធិក្នុងការសួរនាំ បញ្ចេញមតិ ការយល់ឃើញ និងការបារម្ភរបស់គាត់ក្នុងទិដ្ឋភាពណាមួយដែលគាត់មើលឃើញ។ ចំណាត់ការដោយការដាក់ទោសទណ្ឌ ឬការព្រមានបំបិទសិទ្ធិសេរីភាពប្រជាពលរដ្ឋ អាជ្ញាធរមានសមត្ថកិច្ចមិនគួរយកមកប្រើទេតែអ្វីដែលគួរធ្វើគឺការផ្តល់ព័ត៌មានឱ្យប្រជាពលរដ្ឋបានគ្រប់ជ្រុងជ្រោយ ទាន់ពេលវេលា ដោះស្រាយប្រកបដោយតម្លាភាព និងភាពត្រឹមត្រូវដែលអាចឱ្យប្រជាពលរដ្ឋអាចទទួលយកបានជាដំណោះស្រាយដែលល្អបំផុត»។
កាលពីថ្ងៃទី ២៥ សីហា លោកនាយករដ្ឋមន្ត្រី ហ៊ុន សែន បានបញ្ជាលោកទេសរដ្ឋមន្ត្រី វ៉ា គឹមហុង ប្រធានគណៈកម្មាធិការកិច្ចការព្រំដែនឱ្យចុះទៅជួបប្រជាពលរដ្ឋដែលអះអាងថា បាត់ដីនៅខេត្តត្បូងឃ្មុំនៅតាមបណ្ដោយព្រំដែនកម្ពុជា-វៀតណាមដោយលោកប្រាប់ឲ្យបើកចំហចំពោះព័ត៌មានជុំវិញបញ្ហាបោះបង្គោលព្រំដែន។ លោក វ៉ា គឹមហុង ប្រាប់ ពីម្សិលមិញថាលោកនឹងចុះជួបពលរដ្ឋនៅក្នុងខេត្តនោះ ប៉ុន្តែមុននឹងចុះទៅលោកស្នើឱ្យអភិបាលខេត្តត្បូងឃ្មុំស្រង់ស្ថិតិពិតប្រាកដពីចំនួនប្រជាពលរដ្ឋដែលបានបាត់បង់ដីធ្លីរបស់ពួកគាត់។
កាលពីចុងខែមុនចូលដើមខែសីហានេះ អាជ្ញាធរបានចាប់ខ្លួនលោក រ៉ុង ឈុន ប្រធានសហភាពសហជីពកម្ពុជា និងជាតំណាងក្រុមប្រឹក្សាឃ្លាំមើលកម្ពុជា ដាក់ពន្ធនាគារបណ្ដោះអាសន្នដោយចោទពីបទញុះញង់។
ការចាប់ខ្លួននេះធ្វើឡើងបន្ទាប់ពីលោកបានចុះទៅជួបពលរដ្ឋនៅឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ដែលពលរដ្ឋអះអាងថា កម្ពុជាបាត់ដីទៅវៀតណាម។ ប៉ុន្តែគណៈកម្មាធិការចម្រុះកិច្ចការព្រំដែនច្រានចោលការលើកឡើងនេះ ហើយចាត់ទុកជាការញុះញង់ និងបំភាន់សាធារណមតិជាតិ និងអន្តរជាតិ៕
