.jpg)
លោកនាយករដ្ឋមន្ត្រី ហ៊ុន សែន សម្រេចដកថ្លៃសេវាប្រមូលសំរាមចេញពីវិក្កយបត្រភ្លើង។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន សម្រេចដកថ្លៃសេវាប្រមូលសំរាមចេញពីវិក្កយបត្ររបស់អគ្គិសនីកម្ពុជាតាមសំណើរបស់ស្ថាប័នអគ្គិសនីដែលនឹងអនុវត្តចាប់ពីខែមករា ឆ្នាំ ២០២០ ខាងមុខដោយសារការបញ្ចូលគ្នាតែមួយក្នុងវិក្កយបត្រនេះបានបង្កការលំបាកដល់ប្រជាពលរដ្ឋនៅរាជធានីភ្នំពេញ។
ការសម្រេចដកថ្លៃសេវាប្រមូលសំរាមក្នុងវិក្កយបត្ររបស់អគ្គិសនីកម្ពុជាបានធ្វើឡើងនៅក្នុងថ្ងៃដែលលោក ហ៊ុន សែន សម្រេចបញ្ចប់កិច្ចសន្យាជាមួយក្រុមហ៊ុនប្រមូលសំរាម ស៊ិន ទ្រី ដែលជាក្រុមហ៊ុនផ្តាច់មុខមួយក្នុងការប្រមូលសំរាមក្នុងរាជធានីភ្នំពេញកាលពីថ្ងៃទី ២២ តុលា។ ក្រោយពីបញ្ចប់កិច្ចសន្យាជាមួយគ្នាការគ្រប់គ្រងលើការងារប្រមូលសំរាមនេះត្រូវបានប្រគល់ទៅឲ្យរដ្ឋជាអ្នកកាន់កាប់វិញរហូតឈានដល់មានការដាក់ឱ្យដេញថ្លៃជាថ្មីបានកើតឡើង។
លោកនាយករដ្ឋមន្ត្រី ហ៊ុន សែន បានសរសេរលើហ្វេសប៊ុករបស់លោកកាលពីយប់ថ្ងៃទី ២២ តុលា ថា៖ «ដោយក្តាប់បាននូវការលំបាករបស់បងប្អូនប្រជាពលរដ្ឋនៅរាជធានីភ្នំពេញអំពីការដាក់ថ្លៃសេវាប្រមូលសំរាមក្រុមហ៊ុន ស៊ិន ទ្រី ក្នុងវិក្កយបត្ររបស់អគ្គិសនីកម្ពុជាល្ងាចថ្ងៃ (អង្គារ) នេះខ្ញុំបានសម្រេចតាមសំណើរបស់អគ្គិសនីកម្ពុជាដោយដកថ្លៃសេវាប្រមូលសំរាមចេញពីវិក្កយបត្រថ្មីរបស់អគ្គិសនីកម្ពុជាចាប់ពីថ្ងៃទី ១ ខែ មករា ឆ្នាំ ២០២០ តទៅ»។
លោកក៏បានបញ្ជាក់ដែរថា៖ «យន្តការយកថ្លៃសេវាប្រមូលសំរាមទៅថ្ងៃមុខ នឹងត្រូវប្រើយន្តការផ្សេងជំនួសវិញដែលកិច្ចការនេះខ្ញុំបានប្រគល់ភារកិច្ចជូនឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ធ្វើការប្រជុំ និងដោះស្រាយ»។
លោក មាស សុខសេនសាន អ្នកនាំពាក្យរងក្រសួងសេដ្ឋកិច្ច និងហិរញ្ញវត្ថុ ប្រាប់ភ្នំពេញប៉ុស្តិ៍ពីម្សិលមិញថា បន្ទាប់ពីទទួលបានការសម្រេចនេះ ក្រសួងនឹងពិភាក្សាគ្នានៅថ្ងៃបន្ទាប់ដើម្បីពិនិត្យលើបញ្ហានេះ។ ប៉ុន្តែលោកមិនទាន់អាចបញ្ជាក់បានទេថា តើយន្តការយកថ្លៃសេវាប្រមូលសំរាមទៅថ្ងៃមុខនឹងត្រូវប្រើយន្តការអ្វីជំនួសវិញនោះទេ ដោយរង់ចាំការជួបពិភាក្សាជាមុនសិន។
លោកបញ្ជាក់ថា៖ «ដោយសារថ្ងៃនេះ (ម្សិលមិញ) ថ្ងៃឈប់សម្រាក ដូច្នេះមិនទាន់មានព័ត៌មានជាក់លាក់ដែរ ដែលថ្ងៃចូលធ្វើការវិញ យើងនឹងមានការប្រជុំពីបញ្ហានេះ»។
លោក កែវ រតនៈ អគ្គនាយកអគ្គិសនីកម្ពុជា (EDC) មិនអាចទាក់ទងបានទេពីម្សិលមិញព្រោះលោកមិនលើកទូរស័ព្ទ ចំណែកអ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ ក៏មិនអាចទាក់ទងបានដែរកាលពីម្សិលមិញ។
អ្នកស្រី អាណូន មានទីលំនៅក្នុងរាជធានីភ្នំពេញប្រាប់ភ្នំពេញប៉ុស្តិ៍ថា គ្រួសារអ្នកស្រីបានបង់សេវាកម្មនេះជាប្រចាំជាមួយនឹងសេវាអគ្គិសនីតម្លៃ ១ ដុល្លារ បន្ទាប់ពីទទួលបានវិក្កយបត្ររបស់អគ្គិសនីជារៀងរាល់ខែ។
អ្នកស្រីនិយាយថា៖ «សម្រាប់ខ្ញុំដូចជាអត់មានបញ្ហាអ្វីទេ។ ប៉ុន្តែបើសិនគេមិនឲ្យបង់តាមវិក្កយបត្រភ្លើងនេះអ៊ីចឹង ក៏ដូចជាអត់មានបញ្ហាអ្វីដែរ គ្រាន់តែខ្ញុំឃើញមានបញ្ហាខ្លះទាក់ទងនឹងសំរាម ហើយមានអ្នកខ្លះប្រាប់ថាផ្ទះគាត់ទុកចោលអត់មានសំរាមទេតែត្រូវបង់ប្រចាំខែដែរ។ តែបញ្ហាខ្លះយើងបង់ប្រចាំហើយតែខាងសំរាមនេះច្រើនថ្ងៃបានមកយក ហើយប្រមូលសំរាមមិនអស់ក៏មានដែរ»។
ទោះយ៉ាងណាអ្នកស្រីរំពឹងថាវិធានការនេះនឹងអាចធ្វើឲ្យការប្រមូលសំរាមក្នុងទីក្រុងមានភាពល្អប្រសើរជាងមុនទៅថ្ងៃមុខ។ ជាពិសេសការបង់កម្រៃសេវាកម្មក៏ដូចគ្នា ដែលអ្នកស្រីបារម្ភថាទៅថ្ងៃមុខអាចនឹងមានបញ្ហាឡើងថ្លៃសំរាម ឬក៏អាចមានភាពរញ៉េរញ៉ៃពាក់ព័ន្ធនឹងការបង់កម្រៃសេវាសំរាមនេះ បន្ទាប់ពីមានការបញ្ចប់កិច្ចសន្យាជាមួយក្រុមហ៊ុនសំរាម។
លោក ប៉ិច ពិសី នាយកកម្មវិធីជាន់ខ្ពស់នៃអង្គការតម្លាភាពកម្ពុជាបានលើកឡើងថា វិធានការនេះគឺជាការប្រសើរដែលរដ្ឋាភិបាលគួរមានវិធានការជាយូរមកហើយ។ ព្រោះថាការដាក់ថ្លៃសេវាប្រមូលសំរាមក្នុងវិក្កយបត្ររបស់អគ្គិសនីនេះបានតម្រូវឲ្យប្រជាពលរដ្ឋដែលមិនបានទទួលសេវាកម្មនេះសោះ ត្រូវបំពេញកាតព្វកិច្ចដែរទាំងដែលសេវានេះមិនបានផ្តល់ដល់ពួកគាត់។ ម្យ៉ាងទៀតការដាក់បញ្ចូលក្នុងវិក្កយបត្ររបស់អគ្គិសនីនេះក៏បង្កការលំបាកដល់ប្រជាពលរដ្ឋរួមទាំងអគ្គិសនីផ្ទាល់ជាដើម។
លោកបញ្ជាក់ថា៖ «ការដកនេះគឺជារឿងត្រឹមត្រូវហើយ បើគិតថាក្រុមហ៊ុនប្រមូលសំរាមនេះបានផ្តល់សេវាប្រមូលសំរាមឲ្យគាត់មាននីតិវិធីវិក្កយបត្រទៅតាមបច្ចេកទេសរបស់គេ។ ព្រមទាំងអាចឲ្យប្រជាពលរដ្ឋគាត់បានសួរដេញដោល និងមានគណនេយ្យភាព ខណៈពលរដ្ឋខ្លះសួរដេញដោលទៅបែរជាមានរឿងដល់ពួកគាត់ទៀត»។
ជាមួយគ្នានេះលោក ប៉ិច ពិសី ក៏រំពឹងថាការដាក់ដេញថ្លៃក្នុងការប្រមូលសំរាមក្នុងពេលខាងមុខនេះធ្វើឡើងដោយបើកចំហ និងតម្លាភាព ដើម្បីផ្តល់ឲ្យក្រុមហ៊ុនដែលមានសមត្ថភាពពិតប្រាកដទទួលបានសិទ្ធិគ្រប់គ្រង និងប្រមូលសំរាមដោយចៀសវាងការមានបាតុភាពមិនល្អបន្តកើតឡើងទៀតជុំវិញបញ្ហានេះ៕
