ព្រះសីហនុៈ លោកនាយករដ្ឋមន្ត្រី ហ៊ុន សែន បានអនុញ្ញាតឱ្យប្រើថវិកាជាតិបម្រុង ១០០ លានដុល្លារអាមេរិកដើម្បីជួសជុសផ្លូវ ២២ ខ្សែ ផ្លូវក្រវាត់ក្រុងមួយចំនួន និងស្ថាបនាផ្លូវក្នុងខេត្តព្រះសីហនុ ខណៈរដ្ឋមន្ត្រីក្រសួងសាធារណការបញ្ជាក់ថា ការដោះស្រាយបញ្ហាផ្លូវ និងទឹកកខ្វក់ក្នុងក្រុងព្រះសីហនុ គឺត្រូវការលុយរាប់រយលានបន្ថែមទៀត។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានប្រាប់ក្រុមអ្នកសារព័ត៌មានកាលពីថ្ងៃព្រហស្បតិ៍សប្ដាហ៍មុនថា ការប្រឹងប្រែងអភិវឌ្ឍទីក្រុងសីហនុឱ្យក្លាយជាទីក្រុងគជ់ដើម្បីអាចទាក់ទាញភ្ញៀវទេសចរបានច្រើននោះ គឺការចំណាយថវិកា ១០០ លានដុល្លារ មិនទាន់គ្រប់គ្រាន់នៅឡើយទេ។ ដើម្បីឆ្លើយតបនឹងតម្រូវការស្ថាបនាផ្លូវឱ្យបានខ្វាត់ខ្វែងក្នុងក្រុងព្រះសីហនុគឺកម្ពុជាត្រូវការជំនួយអត់សំណងរបស់ភាគីចិនរាប់រយលានដុល្លារផ្សេងទៀតជាពិសេសដើម្បីដោះស្រាយបញ្ហាទឹកកខ្វក់។
លោកថា៖ «សម្ដេចអគ្គមហាសេនាបតីតេជោ ហ៊ុន សែន ឱ្យយកថវិកាបម្រុង១០០ លានដុល្លារ ឱ្យមកស្ដារផ្លូវ ២២ ខ្សែ និងផ្លូវវាងមួយចំនួននៅក្រុងព្រះសីហនុដើម្បីធ្វើម៉េចស្ដារមុខមាត់ផ្លូវឡើងវិញនៅ (ក្រុង) ព្រះសីហនុ ដោយសារផ្លូវខូចខាតច្រើន។ ប៉ុន្តែការខូចខាតនេះ ដោយសារយើងត្រូវដឹកទំនិញកសាងច្រើននៅក្រុងព្រះសីហនុដូចជា អគារនេះឯង ព្រោះការអភិវឌ្ឍនេះលឿនណាស់ហើយមិនអាចគ្មានការដឹកជញ្ជូនទំនិញនេះទេ»។
លោកបន្តថា៖ «ក្រៅពីនោះក៏ត្រូវរៀបចំស្នើសុំថវិកាជាជំនួយអត់សំណងពីមិត្តចិននៃយើង (រាប់រយលានដុល្លារ) (ដើម្បីចំណាយ) ធ្វើប្រព័ន្ធចម្រោះទឹកកខ្វក់ ធ្វើប្រព័ន្ធរំដោះទឹកភ្លៀង និងការដាក់លូបន្ថែមទៀត បើមិនអ៊ីចឹងនឹងធ្វើឱ្យលិចលង់ក្រុងព្រះសីហនុថែមទៀត»។
កាលពីដើមខែសីហាកន្លងមកនេះ នៅទូទាំងក្រុងព្រះសីហនុបានរងការជន់លិចយ៉ាងខ្លាំងដោយសារជំនន់ទឹកភ្លៀង និងបានធ្វើឱ្យខូចខាតផ្លូវមួយចំនួនព្រមទាំងបណ្ដាលឱ្យកម្មករសំណង់ ២ នាក់ប្ដីប្រពន្ធ និងមេការជនជាតិចិនម្នាក់បានស្លាប់ដោយសារទឹកហូរបាក់រលំរបងការដ្ឋានមួយកន្លែង។
ការសម្រេចប្រើប្រាស់ថវិកា ១០០ លានដុល្លារ របស់លោក ហ៊ុន សែន គឺបានធ្វើឡើងក្នុងកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី ៣០ ខែ សីហា។
កាលពីថ្ងៃទី ៤ កញ្ញា លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថបានដឹកនាំកិច្ចប្រជុំអន្តរក្រសួងស្ថាប័នមួយចំនួនស្ដីពី «ការធ្វើអាទិភាវូបនីយកម្មក្នុងការជួសជុល និងសាងសង់ផ្លូវថ្នល់ក្នុងខេត្តព្រះសីហនុ» ដើម្បីរៀបចំយន្តការនៃការងារជួសជុល និងស្ថាបនាផ្លូវរួមទាំងប្រព័ន្ធរំដោះទឹក និងប្រព័ន្ធទឹកកខ្វក់ក្នុងខេត្តព្រះសីហនុ។
យ៉ាងណាក្ដីលោក វ៉ាស៊ឹម សុរិយា មន្ត្រីនាំពាក្យក្រសួងសាធារណការបានថ្លែងកាលពីម្សិលមិញថា លោកមិនទាន់ដឹងអំពីការចាប់ផ្ដើមការជួសជុលផ្លូវក្នុងខេត្តព្រះសីហនុនៅឡើយទេ។ រីឯលោក អ៊ឹង សុខឡេង អភិបាលក្រុងព្រះសីហនុក៏មិនបានដឹងច្បាស់ដូចគ្នាដែរ ដោយលោកថាជាគម្រោងចាត់ចែងដោយថ្នាក់ខេត្ត។
ក៏ប៉ុន្តែលោក គួច ចំរើន អភិបាលខេត្តព្រះសីហនុបានប្រាប់ភ្នំពេញប៉ុស្ដិ៍យ៉ាងខ្លីកាលពីម្សិលមិញថា គម្រោងជួសជុលនេះនឹងចាប់ផ្ដើមនៅក្រោយរដូវវស្សា។ លោកថា៖ «នៅពេលរាំងទឹកភ្លៀង»។
លោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានលើកឡើងថា បច្ចុប្បន្នផ្លូវស្ទើរទាំងអស់ក្នុងក្រុងព្រះសីហនុកំពុងរងការខូចខាតដែលបង្កឡើងពីរថយន្តធំៗដឹកទំនិញ និងគ្រោះធម្មជាតិ។
លោកថា៖ «សង្ឃឹមថា ថវិកានេះនឹងយកមកកសាងតាមគម្រោងដែលបានកំណត់ហើយមានទាំងគុណភាពដែលអាចទទួលយកបាន»។
អ្នករិះគន់ជាច្រើនតែងលើកឡើងថា ការសម្រុកវិនិយោគខ្លាំងដោយជនជាតិចិន បានធ្វើឱ្យក្រុងព្រះសីហនុដែលធ្លាប់មានឆ្នេរ និងទឹកសមុទ្រស្រស់ស្អាតក្លាយជាទីក្រុងសម្បូរសំរាមមានទឹកកខ្វក់ហូរចូលសមុទ្រ និងជាទីក្រុងបាត់បង់សណ្ដាប់ធ្នាប់ជាដើម។
ប៉ុន្តែអាជ្ញាធរខេត្តធ្លាប់បានបញ្ជាក់ថា ការកកស្ទះចរាចរណ៍ និងជន់លិចទឹកមួយចំណែកក៏បង្កឡើងពីពលរដ្ឋខ្មែរដែរ ដូចជា ការសង់ខ្ទមរស់នៅលើចិញ្ចើមផ្លូវ និងការរំលោភដីចំណីអូរធម្មជាតិ និងប្រឡាយជាដើម៕