The Phnom Penh Post Search

Search form




Logo of Phnom Penh Post newspaper Phnom Penh Post - ប្រឡង​បាក់ឌុប​ឆ្នាំ​នេះ​ល្អ​ជាង​ឆ្នាំ​មុន​អ្នក​ជាប់​និទ្ទេស​ A មាន ១០៨ រូប

ប្រឡង​បាក់ឌុប​ឆ្នាំ​នេះ​ល្អ​ជាង​ឆ្នាំ​មុន​អ្នក​ជាប់​និទ្ទេស​ A មាន ១០៨ រូប

សិស្សៗ​រក​មើល​ឈ្មោះ​របស់​ខ្លួន​នៅក្នុង​បញ្ជី​ឈ្មោះ​នៃ​លទ្ធផល​ប្រឡង​ទុតិយភូមិ​ដែល​ចេញ​កាលពី​ថ្ងៃ​សៅរ៍​នៅ​រាជធានី​ភ្នំពេញ​។
សិស្សៗ​រក​មើល​ឈ្មោះ​របស់​ខ្លួន​នៅក្នុង​បញ្ជី​ឈ្មោះ​នៃ​លទ្ធផល​ប្រឡង​ទុតិយភូមិ​ដែល​ចេញ​កាលពី​ថ្ងៃ​សៅរ៍​នៅ​រាជធានី​ភ្នំពេញ​។ រូបថត សហការី

ប្រឡង​បាក់ឌុប​ឆ្នាំ​នេះ​ល្អ​ជាង​ឆ្នាំ​មុន​អ្នក​ជាប់​និទ្ទេស​ A មាន ១០៨ រូប

ភ្នំពេញៈ លទ្ធផល​ប្រឡង​បាក់ឌុប​ឆ្នាំ ២០១៥ មាន​ភាព​ប្រសើរ​ជាង​ឆ្នាំ​មុន​ខណៈ​ដែល​បេក្ខជន​ជាប់​មាន​ប្រមាណ ៥៥ ភាគរយ​ហើយ​ក្នុង​នោះ​និទ្ទេស A មាន​ដល់​ទៅ ១០៨ នាក់​បើ​ធៀប​នឹង​លទ្ធផល​ឆ្នាំ ២០១៤ ការ​ប្រឡង​លើក​ទី ១ ដែល​បេក្ខជន​ជាប់​មាន​ប្រមាណ​តែ ២៥ ​ភាគរយ​ហើយ​និទ្ទេស A មាន​ត្រឹម​តែ ១១ នាក់​ប៉ុណ្ណោះ​។

តាម​សេចក្តី​ប្រកាស​ព័ត៌មាន​​របស់​ក្រសួង​អប់រំ យុវជន និង​កីឡា​ចេញ​ផ្សាយ​ថ្ងៃ​ទី ១២ ខែ​កញ្ញា ឆ្នាំ ២០១៥ បេក្ខជន​ប្រឡង​ជាប់​បាក់ឌុប​មាន​ចំនួន ៤៦ ៥៦០ នាក់​ត្រូវ​ជា ៥៥,៨៨ ភាគរយ​នៃ​បេក្ខជន​វត្តមាន​សរុប ៨៣ ៣២៥ នាក់​ហើយ​ក្នុង​នោះ​និទ្ទេស A មាន ១០៨ នាក់ B មាន ១០៨៥ នាក់ C មាន ៣២៩២ នាក់ D មាន ៦០៩៣ និង​និទ្ទេស E មាន ៣៥ ៩៨២ នាក់។

រដ្ឋមន្ត្រី​ក្រសួង​អប់រំ​លោក ហង់ ជួនណារ៉ុន បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​​ថា​លទ្ធផល​ប្រឡង​បាក់ឌុប​ឆ្នាំ​ ២០១៥ នេះ​គឺ​បង្ហាញ​ពី​ដំណើរ​វិវត្តន៍​កាន់តែ​វិជ្ជមាន​នៃ​កំណែទម្រង់​ប្រព័ន្ធ​អប់រំ​ដោយ​តាមរយៈ​កិច្ចសហការ​ប្រកប​ដោយ​តម្លាភាព​របស់​គ្រូបង្រៀន​អ្នក​សង្កេតការណ៍ និង​ការ​ខិតខំ​ប្រឹងប្រែង​របស់​សិស្សានុសិស្ស​ផង​ដែរ។

លោក​បាន​ថ្លែង​ថា៖ «យើង​ឃើញ​ថា​ដំណើរការ​សំណេរ​​ប្រព្រឹត្ត​ទៅ​បាន​ល្អ​សិស្ស​មាន​ទំនុក​ចិត្ត​លើ​ខ្លួន​ឯង​ហើយ​ការ​ធ្វើ​កំណែ​គឺ​ឈរ​លើ​គោលការណ៍​សម្ងាត់​ដែល​សូម្បីតែ​អ្នក​កែ​ក៏​មិន​ដឹង​ថា​កែ​សិស្ស​ណា​ឡើយ​អ៊ីចឹង​ការងារ​នេះ​គឺ​មាន​តម្លាភាព និង​ច្បាស់លាស់»។

ចំណែក​ប្រធាន​អង្គភាព​ប្រឆាំង​អំពើ​ពុករលួយ​លោក ឱម យ៉ិនទៀង ក៏​បាន​បង្ហាញ​នូវ​សុទិដ្ឋិនិយម​ខ្ពស់​ចំពោះ​ដំណើរការ​រៀបចំ និង​លទ្ធផល​ប្រឡង​បាក់ឌុប​ឆ្នាំ​នេះ។

លោក​គិត​ថា៖ «លទ្ធផល​ឆ្នាំ​នេះ​បញ្ជាក់​យ៉ាង​ច្បាស់​ពី​ការ​កែទម្រង់​របស់​ឯកឧត្តម ហង់ ជួនណារ៉ុន គឺ​ពិតជា​មាន​គុណភាព​បើ​យើង​ធៀប​ឆ្នាំ​ទៅ​គឺ​លទ្ធផល​មួយ​ទៅ​ជា​ពីរ​សូម្បីតែ​សិស្ស​ក៏​ជឿជាក់​លើ​ការ​កែទម្រង់​នេះ​លែង​ជឿ​លើ​អំណាច​អ្នក​ណា លែង​ជឿ​លើ​លុយ ឬ​ការ​ផ្សង​សំណាង​ដោយ​ផ្អែក​លើ​ការ​ប្រឹងប្រែង​រៀនសូត្រ​វិញ»។

សិស្ស​កំពុង​ពិនិត្យ​រក​មើល​ឈ្មោះ​របស់​ខ្លួន​នៅ​វិទ្យាល័យ​មួយ​ក្នុង​រាជធានី​ភ្នំពេញ​។
សិស្ស​កំពុង​ពិនិត្យ​រក​មើល​ឈ្មោះ​របស់​ខ្លួន​នៅ​វិទ្យាល័យ​មួយ​ក្នុង​រាជធានី​ភ្នំពេញ​។ រូបថត សហការី

ក្នុង​កំណែទម្រង់​ប្រព័ន្ធ​អប់រំ​លើក​ដំបូង​ឆ្នាំ ២០១៤ ការ​រឹតបន្តឹង​ដំណើរការ​ប្រឡង​បាក់ឌុប​បាន​ធ្វើឲ្យ​បេក្ខជន​ប្រមាណ ៧៥ ភាគរយ​ប្រឡង​ធ្លាក់​ចំណែក​ការ​ប្រឡង​លើក​ទី ២ មាន​សិស្ស​ចំនួន ១៧,៩៤ ភាគរយ​ប៉ុណ្ណោះ​ដែល​បាន​ប្រឡង​ជាប់​ក្នុង​ចំណោម​បេក្ខជន​ដែល​ប្រឡង​សរុប​ជាង ៦ ម៉ឺន ៨ ពាន់​នាក់។ ជាមួយ​គ្នា​នោះ​សិស្ស​និទ្ទេស A ដែល​មាន​ចំនួន​​ត្រឹម​តែ ១១ រូប​ក៏​បាន​ទទួល​នូវ​ឱកាស​ចូល​ជួប​ជាមួយ​លោក​នាយករដ្ឋមន្ត្រី ហ៊ុន សែន និង​ទទួល​បាន​កាដូ​លើក​ទឹកចិត្ត​ដូចជា ម៉ូតូ កុំព្យូទ័រ និង​ប្រាក់ ព្រម​ទាំង​ការ​ឧបត្តម្ភ​ផ្សេង​ទៀត​ពី​សប្បុរសជន​ផង​ដែរ។

យ៉ាង​ណា​ក្តី​លោក ហង់ ជួនណារ៉ុន បាន​ឲ្យ​ដឹង​ថា​សម្រាប់​ឆ្នាំ​នេះ​ដែរ​សិស្ស​និទ្ទេស A មាន​ដល់​ទៅ ១០៨ រូប​គឺ​មិន​ទាន់​ដឹង​ថា​នឹង​មាន​ការ​លើក​ទឹកចិត្ត​ពី​លោក​នាយករដ្ឋមន្ត្រី ហ៊ុន សែន ឬ​សប្បុរជន​យ៉ាង​​ណា​នោះ​ទេ។

បេក្ខជន ម៉ាន កូតា អាយុ ១៧ ឆ្នាំ ជា​សិស្ស​វិទ្យាល័យ​បាក់ទូក​ដែល​ទទួល​និទ្ទេស A ពិន្ទុ ១០០ ពេញ និង​ខ្ពស់​ជាង​គេ​បាន​បង្ហាញ​នូវ​ភាព​រីករាយ​ទន្ទឹម​នឹង​ក្តី​ភ្ញាក់​ផ្អើល​ចំពោះ​លទ្ធផល​នេះ។

កូតា បាន​និយាយ​ថា៖ «វា​ជា​លទ្ធផល​ដែល​ហួស​ពី​ការ​រំពឹង​ទុក​របស់​ខ្ញុំ ខ្ញុំ​បាន​ទទួល​ដំណឹង​ពី​អាហារូបករណ៍​ខ្លះ​ដែរ តែ​មិន​ទាន់​ដឹង​ថា​ខ្ញុំ​នឹង​ទទួល​បាន​អំណោយ​ពិសេស​អ្វី​នៅ​ឡើយ​ទេ។ សារ​របស់​ខ្ញុំ​ទៅ​អ្នក​ប្រឡង​ឆ្នាំ​ក្រោយៗ​គឺ​ត្រូវ​ប្រឹងប្រែង​រៀន​ពី​ថ្នាក់​ទាប​កុំ​ចាំ​ឲ្យ​ហួស​ពេល​ព្រោះ​បើ​យើង​ប្រឹង​តែ​ថ្នាក់​ទី ១២ សំណួរ​ប្រែ​ប្រួល​បន្តិច​គឺ​ធ្វើ​មិន​ចេញ​នោះ​ទេ​សំខាន់​គឺ​ត្រូវ​ពង្រឹង​ពី​ថ្នាក់​ក្រោម​មក»។

សម្រាប់​បេក្ខនារី ពេជ្រ សុវណ្ណរ័ត្ន អាយុ​ ១៩ ឆ្នាំ ជា​សិស្ស​វិទ្យាល័យ​ច្បារអំពៅ​ដែល​មិន​បាន​ប្រឡង​ជាប់​បាន​និយាយ​ថា​នាង​មាន​ការ​តូចចិត្ត​នឹង​ខ្លួនឯង​ជា​ខ្លាំង​ដែល​មិន​មាន​សមត្ថភាព​គ្រប់គ្រាន់​ដើម្បី​ប្រឡង​ជាប់​ដូច​អ្នកដទៃ​។ សុវណ្ណរ័ត្ន​ថា៖ «ខ្ញុំ​អត់​ទាន់​ដឹង​ថា​ត្រូវ​ធ្វើ​យ៉ាង​ណា​ទេ​ខ្ញុំ​ពិបាក​ចិត្ត​ខ្ញុំ​ខំ​រៀន​ច្រើន​ណាស់​ដែរ​តែ​នៅ​តែ​ប្រឡង​មិន​ជាប់​ខ្ញុំ​អស់​សង្ឃឹម​ខ្ញុំ​មិន​ដឹង​ថា​ត្រូវ​រៀន​​បន្ត​ទៀត ឬ​យ៉ាង​ណា​ទេ​តែ​បើ​រៀន​ទៀត​ខ្ញុំ​នឹង​ព្យាយាម​ឲ្យ​ច្រើន​ជាង​នេះ​»។

ផ្ទុយ​ពី​ការ​យល់​ឃើញ​របស់​រដ្ឋមន្ត្រី​ក្រសួង​អប់រំ​ប្រធាន​ស្តីទី​សមាគម​គ្រូបង្រៀន​កម្ពុជា​ឯករាជ្យ​លោកស្រី ឆាយ យ៉ាវី បាន​វាយតម្លៃ​កំណែទម្រង់​នៃ​លទ្ធផល​ប្រឡង​ឆ្នាំ ២០១៥ នេះ​គឺ​នៅតែ​មាន​កម្រិត​ទាប​ដោយ​ហេតុ​ថា​សិស្ស​ទទួល​បាន​និទ្ទេស E មាន​ដល់​ទៅ​ជាង ៣ ម៉ឺន ៥ ពាន់​នាក់។

លោកស្រី​ថា៖ «ដូច​ការ​ប្រកាស​របស់​ក្រសួង​វិញ្ញ​គឺ​ធូរ​ជាង​ឆ្នាំ​មុន​ហើយ​ជាក់ស្តែង​ក្រសួង​បាន​ចេញ​សំណួរ​ខុស​បច្ចេកទេស​ដែល​ត្រូវ​ផ្តល់​ពិន្ទុ​ដល់​សិស្ស​សម្រាប់​មុខវិជ្ជា​នោះ។ ខ្ញុំ​គិត​ថា​ដូច​ការ​វាយតម្លៃ​របស់​ក្រសួង​មុន​ដឹង​លទ្ធផល​គឺ​ជាង ៥០ ភាគរយ​ហើយ​លទ្ធផល​ចេញ​មក​គឺ​ជាង ៥០ ភាគរយ​អ៊ីចឹង​ដូចជា​ការ​កំណត់​មុន​ទៅ​ហើយ»។

លោកស្រី យ៉ាវី ក៏​បាន​រិះគន់​ចំពោះ​យន្តការ​របស់​រដ្ឋាភិបាល​ដែល​បាន​ឆ្លើយតប​ខុស​គ្នា​ចំពោះ​ម្ចាស់​ជ័យលាភី​មេដាយ​មាស​កីឡា​តេក្វាន់ដូ កញ្ញា ស៊ន សៀវម៉ី កាលពី​ឆ្នាំ ២០១៤ ដែល​ត្រូវ​បាន​កំណត់​ឲ្យ​ជាប់​ដោយ​ស្វ័យប្រវត្តិ​ដោយឡែក​តែ​បេក្ខជន​ដែល​ជា​សមាជិក​ក្រុម​កីឡា​បាល់ទាត់​ជម្រើស​ជាតិ ៥ នាក់ និង​ស្ត្រី​ឈឺ​ពោះ​ជិត​ឆ្លង​ទន្លេ​មិន​ត្រូវ​បាន​ក្រសួង​អនុញ្ញាត​ឲ្យ​ប្រឡង​ឡើង​វិញ​នោះ​ទេ។

បញ្ហា​នេះ ​លោក ហង់ ជួនណារ៉ុន បាន​ឲ្យ​ដឹង​ថា ​រហូត​មក​ទល់​ពេល​នេះ​លោក​មិន​ទទួល​បាន​ការ​ស្នើសុំ​ណា​មួយ​​ពី​បេក្ខជន​ទាំងនោះ​ទេ​ហើយ​ការ​ស្នើ​នេះ​ទៀត​សោត​គឺ​ទាមទារ​ការ​ពិចារណា​លម្អិត​មុន​នឹង​សម្រេច​ដោយសារ​តែ​ដំណើរការ​ប្រឡង​ឡើង​វិញ​ត្រូវ​ចំណាយ​ពេល​គិតគូរ​ច្រើន។

លោក​ថា៖ «នេះ​ជា​ការ​ប្រឡង​ថ្នាក់ជាតិ​អ៊ីចឹង​ទាល់​តែ​រៀបចំ​ចំណាយ​ពេល។ ខ្ញុំ​មិន​បាន​ស្គាល់​ឈ្មោះ​ពួកគាត់​ទេ​រហូត​មក​ទល់​ពេល​នេះ​គឺ​គ្មាន​ការ​ស្នើសុំ​ពី​ពួកគេ​ឡើយ​ករណី​បែប​នេះ​អ្នក​ទទួល​បន្ទុក​របស់​ពួកគេ​គួរ​តែ​ជា​អ្នក​ទទួល​ខុសត្រូវ»។

សម្រាប់​ស្ត្រី​ឈឺ​ពោះ​ឆ្លង​ទន្លេ​ពេល​ប្រឡង​បាក់ឌុប​ដែល​មាន​ស្វាមី​ជា​សែស្រឡាយ​រាជវង្ស​គឺ​អ្នកអង្គម្ចាស់ ស៊ីសុវត្ថិ ឫទ្ធីរ៉ាវង្ស បាន​មាន​បន្ទូល​ថា​ភរិយា​ឈ្មោះ ពេជ្រ សំអាត បាន​ប្រឡង​ធ្លាក់​ហើយ​អ្នកអង្គម្ចាស់​ក៏​មិន​មាន​ការ​អាក់អន់​ស្រពន់​ចិត្ត​ចំពោះ​លទ្ធផល​នេះ​ដែរ​។

អ្នកអង្គម្ចាស់​មាន​បន្ទូល​ថា៖ «នឹង​បន្ត​ឲ្យ​គាត់​ប្រឡង​ម្តង​ទៀត​យើង​អត់​មាន​ខកចិត្ត​អី​ទេ​យើង​ត្រូវ​ទទួល​ស្គាល់​ខ្លួនឯង​យើង​មិន​ចង់​បាន​ការ​រៀបចំ​ពិសេស​អី​ទេ​ត្រូវ​ធ្វើ​តាម​គោលការណ៍ និង​ច្បាប់​កំណត់​កុំ​ផ្តោត​លើ​ហេតុផល​អ៊ីចឹង​អី»។

តាម​ការ​ជូន​ដំណឹង​របស់​ក្រសួង​អប់រំ​បេក្ខជន​មាតាបិតា​អាណាព្យាបាល​អ្នក​ពាក់ព័ន្ធ​ដែល​មិន​ពេញ​ចិត្ត​នឹង​លទ្ធផល​នៃ​ការ​ប្រឡង​មាន​សិទ្ធិ​ប្តឹង​តវ៉ា​ក្នុង​រយៈពេល ៣០ ថ្ងៃ​ចាប់ពី​ថ្ងៃ​ប្រកាស​លទ្ធផល​ប្រឡង។ អ្នក​ប្តឹង​តវ៉ា​ត្រូវ​សរសេរ​ជា​លាយលក្ខណ៍​អក្សរ​ត្រឹមត្រូវ​មាន​ភ័ស្តុតាង​មាន​ឈ្មោះ​ មុខរបរ មាន​អាស័យដ្ឋាន​ច្បាស់លាស់ និង​មាន​ការ​ទទួល​ខុសត្រូវ​ចំពោះ​មុខ​ច្បាប់​ជា​ធរមាន។ ក្នុង​ករណី​មាន​ពាក្យ​បណ្តឹង និង​ពិនិត្យ​ឃើញ​ថា​ការ​ប្រឡង​មាន​ភាព​មិន​ប្រក្រតី​លើ​កិច្ចការ​របស់​បេក្ខជន និង​លើ​ការ​អនុវត្ត​ភារកិច្ច​របស់​គណៈមេប្រយោគ និង​គណៈកម្មការ​ផ្សេងៗ​ទៀត​ក្រសួង​អប់រំ​ត្រូវ​បង្កើត​គណៈកម្មការ​កោសល្យ​វិច័យ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។