The Phnom Penh Post Search

Search form




Logo of Phnom Penh Post newspaper Phnom Penh Post - ប្រឡង​​ឆ្នាំ​នេះ​ចំណាយ​ថវិកា​តិច​ជាង​ឆ្នាំ​មុន

ប្រឡង​​ឆ្នាំ​នេះ​ចំណាយ​ថវិកា​តិច​ជាង​ឆ្នាំ​មុន

ការ​ត្រួតពិនិត្យ​សិស្ស​ចូល​ប្រឡង​បាក់ឌុប​នៅ​វិទ្យាល័យ​ស៊ីសុវត្ថិ​កាលពី​ឆ្នាំ​មុន​។
ការ​ត្រួតពិនិត្យ​សិស្ស​ចូល​ប្រឡង​បាក់ឌុប​នៅ​វិទ្យាល័យ​ស៊ីសុវត្ថិ​កាលពី​ឆ្នាំ​មុន​។ ផា លីណា

ប្រឡង​​ឆ្នាំ​នេះ​ចំណាយ​ថវិកា​តិច​ជាង​ឆ្នាំ​មុន

ភ្នំពេញៈ ក្រសួង​អប់រំ យុវជន និង​កីឡា​គ្រោង​ចំណាយ​​ថវិកា​ប្រមាណ​ ២,៨ លាន​​ដុល្លារ​សម្រាប់​​ដំណើរការ​រៀបចំ​ការ​ប្រឡង​បាក់ឌុប ឆ្នាំ ២០១៥ តិច​ជាង​ឆ្នាំ​មុន​ដែល​ចំណាយ​អស់​ជាង ៣ លាន​ដុល្លារ​ខណៈ​ដែល​បេក្ខជន​ចុះ​ឈ្មោះ​ប្រឡង​ក៏​មាន​តិច​ជាង​ឆ្នាំ​មុន​ដែរ​។

កញ្ចប់​ថវិកា​របស់​ក្រសួង​អប់រំ​ប្រមាណ ២ លាន ៨ សែន​ដុល្លារ​នេះ​នឹង​ត្រូវ​ចំណាយ​ទៅលើ​សម្ភារ​រដ្ឋបាល​នានា​រួមមាន​ឯកសារ​ប្រឡង​ក្រដាស​សរសេរ ប៊ិក​ប្រើប្រាស់ និង​ធុង​សោ​ដាក់​វិញ្ញាសា​សម្រាប់​ដំណើរការ​ប្រឡង​រួម​នឹង​ចំណាយ​លើ​មន្ត្រី​បេសកកម្ម​អប់រំ​សម្រាប់​មុន​ពេល​អំឡុង​ពេល និង​ក្រោយ​ថ្ងៃ​ប្រឡង។ នេះ​បើ​តាម​អ្នក​នាំពាក្យ​ក្រសួង​អប់រំ លោក រស់ សាលីន ដោយ​ផ្អែកលើ​លទ្ធផល​កិច្ចប្រជុំ​របស់​ក្រសួង​ដែល​ទើប​សម្រេច​នៅ​ដើម​ខែ​កក្កដា​នេះ។

លោក សាលីន ឲ្យ​ដឹង​ថា​ ការ​ប្រឡង​សញ្ញាបត្រ​មធ្យមសិក្សា​ទុតិយភូមិ​ចំណេះដឹង​ទូទៅ និង​បំពេញ​វិជ្ជា​ក្នុង​ឆ្នាំ ២០១៥ ដែល​ប្រព្រឹត្ត​ទៅ​នៅ​ថ្ងៃ​ទី ២៤ ខែ​សីហា ឆ្នាំ​ ២០១៥​ ខាង​មុខ​មាន​បេក្ខជន​ចុះឈ្មោះ​ប្រឡង​សរុប ៨៨៤៨៨ ​​នាក់ គិត​ទាំង​បេក្ខជន​ប្រឡង​ធ្លាក់​ឆ្នាំ​មុន ប៉ុន្តែ​តួលេខ​នេះ​នៅតែ​តិច​ជាង​ឆ្នាំ ២០១៤ ដែល​មាន​ដល់​ទៅ ៩១៣៧៣ ​នាក់។

លោក​បន្ត​ថា៖ «ឆ្នាំ​នេះ​សិស្ស​ឡើង​ពី​ថ្នាក់​ទី ១១ មក​ទី ១២ មាន​តិច​ជាង​ឆ្នាំ​មុន​ហើយ​សម្រាប់​សិស្ស​ធ្លាក់​ឆ្នាំ​ទៅ​ប្រមាណ ១ ម៉ឺន ៥ ពាន់​នាក់​ចូល​រៀន​បរិញ្ញាបត្រ​រង ១ ​ម៉ឺន​ ៧ ពាន់​នាក់​រៀន​ជំនាញ​វិជ្ជាជីវៈ ក្រៅពី​នោះ ១ ម៉ឺន ១ ពាន់​នាក់​ចូល​រៀន​ឡើង​វិញ​តែ​ក្នុង​នោះ​មាន​តែ ៥ ពាន់​នាក់​ប៉ុណ្ណោះ​ដែល​បាន​ចុះ​ឈ្មោះ​ប្រឡង​ម្តង​ទៀត​អ្នក​ខ្លះ​ទៀត​ប្រហែល​ជា​គេ​រក​បាន​ការងារ​ធ្វើ​ ឬ​មាន​ជម្រើស​ផ្សេង​ទៀត»។

បើ​តាម​លោក រស់ សាលីន សម្រាប់​ឆ្នាំ ២០១៥ នេះ​ទាំង​ថ្នាក់​វិទ្យាសាស្ត្រ និង​ថ្នាក់​វិទ្យាសាស្ត្រ​សង្គម មណ្ឌល​ប្រឡង​សរុប​មាន ១៤៩ ចែក​ចេញ​ជា ៣៥៧៦ បន្ទប់​នៅ​រាជធានី​ខេត្ត​ទាំង ២៥ ហើយ​តាម​គម្រោង​នៅ​ថ្ងៃ​ទី ៤ សីហា​ខាង​មុខ​ក្រសួង​នឹង​ចាប់ផ្តើម​រៀបចំ​ប្រអប់​វិញ្ញាសា​ថតចម្លង​ឈ្មោះ​មណ្ឌល ថ្ងៃ​ទី ១៥ ដល់​ទី ២០ រៀបចំ​វិញ្ញាសា និង​ណែនាំ​ដល់​អនុរក្ស និង​អ្នក​សង្កេតការណ៍​ថ្ងៃ​ទី​ ២១ ប្រជុំ​ណែនាំ​ដល់​មណ្ឌល​ប្រឡង ថ្ងៃ​ទី ២២ បិទ​ត្រកូល​បេក្ខជន​ប្រឡង​តាម​មណ្ឌល ថ្ងៃ​ទី ២៣ បិទ​ឈ្មោះ​តាម​បន្ទប់​ប្រឡង និង​ថ្ងៃ​ទី ២៤ ចាប់ផ្តើម​ការ​ប្រឡង។ ជាមួយ​គ្នា​នេះ​ក្រសួង​ពុំ​មាន​គោលការណ៍​រៀបចំ​ការ​ប្រឡង​លើក​ទី ២ ដូច​ឆ្នាំ​មុន​ឡើយ។

ក្រោយពី​ការ​ធ្វើ​កំណែទម្រង់​​ប្រព័ន្ធ​អប់រំ​ដែល​រៀបចំ​ដោយ​លោក ហង់ ជួនណារ៉ុន រដ្ឋមន្ត្រី​ក្រសួង​អប់រំ ការ​ប្រឡង​បាក់ឌុប​លើក​ទី ១ នៅ​ឆ្នាំ ២០១៤ មាន​បេក្ខជន​ប្រឡង​ជាប់​មាន​ចំនួន ២៣១២៦ នាក់ ប៉ុណ្ណោះ​ស្មើ​នឹង​ប្រមាណ ២៥ ​ភាគរយ​នៃ​បេក្ខជន​ចូលរួម​ហើយ​សិស្ស​ជាប់​និទ្ទេស A មាន​ត្រឹម​តែ​ ១១ នាក់​ប៉ុណ្ណោះ។ ចំណែក​ការ​ប្រឡង​លើក​ទី ២ មាន​សិស្ស​ជាប់​ចំនួន ១៧,៩៤ ​ភាគរយ​ក្នុង​ចំណោម​បេក្ខជន​ដែល​ប្រឡង​សរុប​ជាង ៦ ម៉ឺន ៨ ពាន់​នាក់។

សម្រាប់​ដំណើរការ​ពង្រឹង​វិស័យ​អប់រំ​តាមរយៈ​ការ​រឹតបន្តឹង​ដំណើរការ​ប្រឡង​នេះ​មិន​ខុស​ពី​ឆ្នាំ​មុន​ទេ​ដោយ​អង្គភាព​ប្រឆាំង​អំពើ​ពុករលួយ​ក៏​នឹង​រួមចំណែក​ក្នុង​ការ​ដាក់​ពង្រាយ​អ្នក​សង្កេតការណ៍​ស្ម័គ្រចិត្ត​ដើម្បី​ឃ្លាំមើល​ភាព​មិន​ប្រក្រតី​នៃ​ដំណើរការ​ប្រឡង​ផង​ដែរ។

ក្នុង​ពិធី​ចុះហត្ថលេខា​លើ​អនុស្សរណៈ​នៃ​ការ​យោគយល់​ជាមួយ​នឹង​សហភាព​សហព័ន្ធ​យុវជន​កម្ពុជា​នៅ​ថ្ងៃ​ទី ១៥ ខែ​កក្កដា​ ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ថ្លែង​ថា​សម្រាប់​ឆ្នាំ​នេះ​អ្នក​ដែល​ចូលរួម​សង្កេតការណ៍​ប្រឡង​បាក់ឌុប​ត្រូវ​តែ​បញ្ជាក់​ពី​ភាព​ស្អាតស្អំ​ចៀសវាង​នូវ​ទំនាស់​ផលប្រយោជន៍​ទើប​អាច​ទទួល​បាន​សិទ្ធិ​ក្នុង​ការ​ចូលរួម​សង្កេតការណ៍​បាន​។ «អ្នក​សង្កេតការណ៍​ត្រូវ​បញ្ជាក់​ពី​ទំនាស់​ផលប្រយោជន៍​ឧទាហរណ៍​ខ្ញុំ​ជា​យុវជន​ខ្ញុំ​ត្រូវ​សង្កេតការណ៍​នៅ​សាលា​ទួលទំពូង ២ ត្រូវ​បញ្ជាក់​ច្បាស់​ថា​សាលា​ទួលទំពូង​ ២ ​នោះ​គ្មាន​បងប្អូន​ខ្ញុំ​ប្រឡង​នៅ​ទីហ្នឹង​ទេ​បើ​មាន​ប្រឡង​នៅ​ហ្នឹង​ត្រូវតែ​ដូរ​ទៅ​សង្កេតការណ៍​នៅ​មណ្ឌល​ផ្សេងៗ»។

លោក សន ជ័យ តំណាង​បណ្តាញ​គណនេយ្យភាព​សង្គម​អាស៊ី​បូព៌ា និង​អាស៊ី​ប៉ាស៊ីហ្វិក​ប្រចាំ​កម្ពុជា​ដែល​បាន​តាមដាន​ដំណើរការ​ប្រឡង និង​តួនាទី​អ្នក​សង្កេតការណ៍​មាន​សុទិដ្ឋិនិយម​ចំពោះ​វិធានការ​រដ្ឋបាល និង​ការ​រឹតបន្តឹង​ដំណើរការ​ប្រឡង​បាក់ឌុប​ដែល​រៀបចំ​ឡើង​ដោយ​ក្រសួង​អប់រំ​ក្នុង​កំណែទម្រង់​ថ្មី។

«យើង​គាំទ្រ​វិធានការ​រឹតបន្តឹង​ទាំងអស់​តែ​ការ​ដាក់​ទោសទណ្ឌ​ហាក់​ដូចជា​ជ្រុល​ពេក...ក្នុង​ដំណើរការ​ប្រឡង​នេះ​ខ្ញុំ​គិត​ថា​អង្គភាព​ប្រឆាំង​អំពើ​ពុករលួយ​គប្បី​ផ្តោត​លើ​ការ​ដោះស្រាយ​បណ្តឹង​អំពើ​ពុករលួយ​ផ្សេងៗ​ជាច្រើន​ដែល​ខ្លួន​ទទួល​បាន​មិន​ទាន់​ដោះស្រាយ​ចប់​ជា​ជាង​ចំណាយ​ពេល​ចាប់​កំហុស​ខ្លាំង​លើ​រឿង​នេះ»៕

អត្ថបទគួរចាប់អារម្មណ៍