ភ្នំពេញៈ គណៈកម្មការប្រឹក្សាការងារដែលមានភាគីមកពីសហជីព និយោជក និងក្រសួងការងារនឹងធ្វើការបោះឆ្នោតកំណត់ប្រាក់ឈ្នួលអប្បបរមាជូនកម្មករនិយោជិតផ្នែកវាយនភ័ណ្ឌកាត់ដេរ និងផលិតស្បែកជើងនៅចុងខែនេះបន្ទាប់ពីកិច្ចប្រជុំដែលពុំទាន់ទទួលបានលទ្ធផលថ្មីនៅឡើយ។
នៅក្នុងកិច្ចប្រជុំត្រីភាគីកាលពីម្សិលមិញភាគីទាំងបីមិនទាន់អាចស្វែងរកចំណុចរួមនៅឡើយទេខណៈដែលភាគីនិយោជកប្រកាន់យកតួលេខ ១៤៦,៣៧ ដុល្លារដែលខ្លួនធ្លាប់ដំឡើងរួចមក និងភាគីតំណាងសហជីពប្រកាន់យកជំហរ ១៧៧,៥៩ ដុល្លារដែលខ្លួនធ្លាប់ទម្លាក់តម្លៃ។
ក្រោយបញ្ចប់កិច្ចប្រជុំពេញមួយព្រឹកអ្នកនាំពាក្យក្រសួងការងារលោក ហេង សួរ ដែលបានចូលរួមក្នុងកិច្ចប្រជុំនេះថ្លែងថាបើទោះជាមិនទាន់មានលទ្ធផលជាវិជ្ជមានក្តីតែពួកគេមានការយោគយល់គ្នាច្រើន។
យ៉ាងណាក៏ដោយលោកថានៅពេលល្ងាចម្សិលមិញក្រសួងនឹងជួបប្រជុំដាច់ដោយឡែកជាមួយតំណាងសហជីព និងនិយោជកដើម្បីសម្របសម្រួលតួលេខឱ្យខិតជិតទៅរកគ្នាក្នុងការកំណត់ប្រាក់ឈ្នួលគោលរបស់កម្មករនៅឆ្នាំ ២០១៧។
លោកថា៖ «យើងនៅបន្តពន្យល់គ្នានឹងរកឃើញនូវដំណោះស្រាយមួយនៅថ្ងៃទី ២៨ ខាងមុខនេះតាមរយៈបោះឆ្នោតជ្រើសរើសយកតួលេខណាមួយប៉ុន្តែមុនជួបគ្នានោះខ្ញុំនឹងជួបជាមួយភាគីទាំងពីរបន្តិចដើម្បីសម្របសម្រួលក្រែងមានភាគីទាំងសងខាងគាត់អាចកែសម្រួលតួលេខ និងគោលជំហររបស់គាត់អ៊ីចឹងគម្លាតកាន់តែខិតជិតគ្នា»។
អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) លោក កាំង ម៉ូនីកា ថ្លែងថាជាបទពិសោធទោះបីជាក្នុងប្រទេសអភិវឌ្ឍន៍ក៏ដោយគឺពិបាកក្នុងការឯកភាពគ្នាទាំងស្រុងណាស់។
តែលោកបានបញ្ជាក់ថា៖ «អ្វីដែលចាប់អារម្មណ៍ខ្លាំងក្នុងការចរចាគឺមានភាពទន់ភ្លន់ និងមានភាពប្រែប្រួលច្រើនហើយខ្ញុំគិតថានេះជាវឌ្ឍនភាពមួយសំខាន់សម្រាប់ប្រទេសកម្ពុជាហើយការប្រែប្រួលអត្តចរិតការចរចាអាស្រ័យភាគីសងខាងមានរូបមន្តច្បាស់លាស់គឺមិនចេះតែនិយាយនោះទេ»។
យ៉ាងណាក៏ដោយលោកសង្កត់ធ្ងន់ថាមូលហេតុដែលភាគីរោងចក្រមិនអាចដំឡើងប្រាក់ឈ្នួលគោលជូនកម្មករទៅតាមការស្នើសុំរបស់សហជីពបានដោយសារផលិតភាពនៅកម្ពុជាបានទាបបើប្រៀបធៀបជាមួយប្រទេសមួយចំនួន។
លោកថា៖ «វៀតណាមប្រាក់ខែគោលតែ ១៥៧ ដុល្លារនេះនៅក្នុងតំបន់មានឧស្សាហកម្មច្រើនផងនៅតំបន់ផ្សេងទៀតមានត្រឹម ១៤០ និង ១១០ ដុល្លារទាបជាងកម្ពុជាហើយផលិតភាពគេខ្ពស់ជាងយើងហើយតម្លៃផ្សេងៗទៀតថ្លៃភ្លើងដឹកជញ្ចូនថោកអ៊ីចឹងមានហេតុផលអីដែលយើងមានលទ្ធភាពដាក់ប្រាក់ឈ្នួលខ្ពស់ជាងវៀតណាមដល់ទៅ ១៧៩ ដុល្លារ»។
ប្រធានសម្ព័ន្ធសហជីពកម្ពុជាលោកស្រី យ៉ាង សុភ័ណ្ឌ ថ្លែងថាសហជីពនៅតែរក្សាគោលជំហររបស់ខ្លួនទាមទារប្រាក់ឈ្នូលគោល ១៧៧ ដុល្លារដើម្បីផ្គត់ផ្គង់ការចំណាយប្រចាំថ្ងៃរបស់កម្មករ។ លោកស្រីថា៖ «កាលពីដើមយើងស្នើតួលេខ ១៧៩,៦០ ដុល្លារប៉ុន្តែយើងឃើញថានៅថ្ងៃកិច្ចប្រជុំបន្ទាប់យើងបានឯកភាពគ្នាចុះមកត្រឹម ១៧៧,៥៩ ដុល្លារចឹងខ្ញុំគិតថាតួលេខនេះយើងបានបញ្ចុះហើយ»។
បើតាមតំណាងត្រីភាគីពួកគេនឹងដាក់តួលេខប្រាក់ឈ្នួលដែលនឹងបោះឆ្នោតនៅថ្ងៃទី ២៨ ខែកញ្ញានេះទៅ LEC ដើម្បីសម្រេច និងផ្តល់តួលេខសមរម្យដល់គ្រប់ភាគី។
សូមបញ្ជាក់ថាដំបូងឡើយក្រសួងការងារបានស្នើដល់គ្រប់ភាគីឱ្យបន្ថែមប្រាក់ឈ្នួលអប្បបរមាដល់កម្មករឱ្យបាន ១៤៨,២០ ខណៈភាគី GMAC កំណត់ឱ្យតែ ១៤៤,២០ ដុល្លារចំណែកភាគីតំណាងសហជីពទាមទារដល់ ១៧៩,៦០ ដុល្លារក្នុងឆ្នាំ ២០១៧។ តែក្រោយពីមានកិច្ចប្រជុំច្រើនដងភាគី GMAC សម្រេចបន្ថែមប្រាក់ឈ្នួលដល់ ១៤៦,៣៧ ខណៈតំណាងសហជីពបញ្ចុះមកនៅត្រឹម ១៧៧,៥៩ ដុល្លារ។
តាមរបាយការណ៍របស់អង្គការពលកម្មអន្តរជាតិ (ILO) ដែលបានចេញផ្សាយកាលពីខែមីនា ឆ្នាំ ២០១៦ បានឱ្យដឹងថាកម្មករក្នុងវិស័យវាយនភ័ណ្ឌ និងស្បែកជើងនៅកម្ពុជាមានចំនួនជិត ៧០ ម៉ឺននាក់គិតត្រឹមខែធ្នូ ឆ្នាំ ២០១៥ ហើយប្រាក់ខែគោលកម្មករបច្ចុប្បន្នទទួលបាន ១៤០ ដុល្លារក្នុងមួយខែ៕
