The Phnom Penh Post Search

Search form

Logo of Phnom Penh Post newspaper Phnom Penh Post - ប្រាក់​ឈ្នួល​អប្បបរមា​របស់​កម្មករ​ នឹង​ត្រូវ​សម្រេច​នៅ​ក្នុង​ថ្ងៃ​នេះ

ប្រាក់​ឈ្នួល​អប្បបរមា​របស់​កម្មករ​ នឹង​ត្រូវ​សម្រេច​នៅ​ក្នុង​ថ្ងៃ​នេះ

Content image - Phnom Penh Post
លោក ហេង សួរ អគ្គនាយក​នៃ​អគ្គនាយកដ្ឋាន​រដ្ឋបាល និង​ហិរញ្ញវត្ថុ​នៃ​ក្រសួង​ការងារ​ផ្ដល់​បទសម្ភាស​ដល់​អ្នក​សារព័ត៌មាន​ពី​ម្សិលមិញ​​​។ ហុង មិនា

ប្រាក់​ឈ្នួល​អប្បបរមា​របស់​កម្មករ​ នឹង​ត្រូវ​សម្រេច​នៅ​ក្នុង​ថ្ងៃ​នេះ

ភ្នំពេញៈ គណៈកម្មការ​ប្រឹក្សា​ការងារ​នឹង​សម្រេច​ប្រាក់​ឈ្នួល​អប្បបរមា​របស់​កម្មករ​នៅ​ថ្ងៃ​នេះ​បន្ទាប់​ពី​ក្រុម​ការងារ​បច្ចេកទេស​ត្រី​ភាគី​ដែល​ធ្វើការ​ពាក់ព័ន្ធ​នឹង​វិស័យ​កាត់ដេរ​សម្រេច​យក​តួលេខ​ថ្មី​នៃ​ការ​កំណត់​ប្រាក់​ឈ្នួល​អប្បបរមា​ផ្នែក​វាយនភ័ណ្ឌ​កាត់ដេរ និង​ផលិត​​ស្បែក​ជើង​សម្រាប់​ឆ្នាំ​ ២០១៧ ​បាន​ដាក់​សំណើ​ជូន​កាលពី​ម្សិលមិញ​បន្ទាប់ពី​ភាគី​ទាំង​បី​នោះ​មិន​ទាន់​រក​ចំណុច​រួម​បាន។

ក្រោយពី​បញ្ចប់​កិច្ចប្រជុំ​ជាង ៦ ម៉ោង​រវាង​ក្រសួង​ការងារ និយោជក និង​តំណាង​សហជីព​កាលពី​ម្សិលមិញ​ភាគី​ទាំង​បី​មិន​ទាន់​រក​ចំណុច​រួម​នោះ​ទេ​បើ​ទោះ​បី​ជា​ភាគី​និយោជក​ព្រម​បន្ថែម​លើ​តួលេខ​ចាស់​ខណៈ​ភាគី​តំណាង​សហជីព​ព្រម​បញ្ចុះ​តួលេខ​ច្រើន​ក្តី។

ក្នុង​កិច្ចប្រជុំ​នោះ​ភាគី​និយោជក​បាន​បន្ថែម​លើ​តួលេខ​ចាស់​ពី ១៤៦,៣៧ ដល់ ១៤៧ ដុល្លារ​ខណៈ​តំណាង​សហជីព​ព្រម​បញ្ចុះ​ពី ១៧៧,៥៩ មក​នៅ​ត្រឹម​ ១៧១ ​ដុល្លារ​តែ​ភាគី​ក្រសួង​ការងារ​នៅ​រក្សា​តួលេខ​របស់​ខ្លួន​ដោយ​មិន​មាន​ការ​កែប្រែ​ឡើយ​គឺ ១៤៨,២០ ​ដុល្លារ។ ​

យ៉ាង​ណា​ក៏ដោយ​ភាគី​ទាំង​បី​ព្រមព្រៀង​គ្នា​ដាក់​ទៅ​គណៈកម្មការ​ប្រឹក្សា​ការងារ​ដើម្បី​សម្រេច​ហើយ​នឹង​ប្រកាស​លទ្ធផល​នៅ​ថ្ងៃ​នេះ​។

ជា​​រួម​តួលេខ​ប្រាក់​ឈ្នួល​គោល​កម្មករ​ដែល​បាន​ដាក់​ទៅ​គណៈកម្មការ​ប្រឹក្សា​ការងារ​ដើម្បី​សម្រេច​ចុងក្រោយ​​​រួមមាន​ក្រសួង​ការងារ​ស្នើ ១៤៨ ​ដុល្លារ និយោជក​ស្នើ ១៤៧ ដុល្លារ និង​តំណាង​សហជីព​ស្នើ​​ ១៧១ ដុល្លារ​។

អគ្គនាយក​នៃ​អគ្គនាយកដ្ឋាន​រដ្ឋបាល​ និង​ហិរញ្ញវត្ថុ​នៃ​ក្រសួង​ការងារ​លោក ហេង សួរ ថ្លែង​ប្រាប់​ក្រោយ​បញ្ចប់​កិច្ចប្រជុំ​ថា​បើ​ទោះ​ជា​មិន​ទាន់​បាន​ឯកភាព​គ្នា​ជា​ឯកច្ឆន្ទ​ក្នុង​ការ​កំណត់​ប្រាក់​ឈ្នួល​តែ​ទទួល​បាន​ផលវិជ្ជមាន​ច្រើន។

លោក​ថា៖ «ប៉ុន្តែ​អ្វី​ដែល​ជា​វឌ្ឍនភាព​នៃ​ការ​​ចរចា​ប្រាក់​ឈ្នួល​លើក​នេះ​គឺ​ថា​ទាំង​ភាគី​សហជីព និយោជក​មាន​ការ​យល់​គ្នា​ច្រើន​ហើយ​អ្វី​ដែល​យើង​សាទរ​គឺ​ភាគី​សហជីព​ឯកភាព​គ្នា​នៅ​ផ្ទៃក្នុង​ដើម្បី​សម្រេច​រើស​យក​តួលេខ​ ១៧១ ដុល្លារ​រីឯ​ភាគី​និយោជក​ព្រម​ដំឡើង​ជា​បន្តបន្ទាប់​ពី​ ១៤០ ​ដុល្លារ​រហូត​ដល់​ ១៤៧ ​ដុល្លារ​ដើម្បី​ដាក់​ជូន​ទៅ​គណៈកម្មការ​ប្រឹក្សា​ការងារ​ប្រជុំ​សម្រេច​ចុងក្រោយ»។

លោក​បន្ថែម​ថា​នេះ​ជា​តួលេខ​វិជ្ជមាន​មួយ​ដែល​ក្រសួង​បាន​​សម្រប​សម្រួល​ភាគី​ទាំង​សង​ខាង​ឱ្យ​ខិត​ជិត​មក​រក​តួលេខ​ដែល​អាច​ទទួល​យក​បាន។

បើ​តាម​លោក ហេង សួរ​គណៈកម្មការ​ប្រឹក្សា​ការងារ​នឹង​ពិនិត្យ​សម្រេច​តួលេខ​ចុងក្រោយ​នៅ​ថ្ងៃ​នេះ​នៅ​វេលា​ម៉ោង ២ និង ៣០ នាទី​រសៀល។

ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា​ហៅ​កាត់​ថា ស៊ីខាវឌូ លោក អាត់ ធន់ ទទួល​ស្គាល់​ថា​​កិច្ចប្រជុំ​លើក​នេះ​មាន​លក្ខណៈ​យោគយល់​គ្នា​ច្រើន​តែ​តួលេខ​ដែល​ផ្តល់​ដោយ​ភាគី​និយោជក​ចុង​ក្រោយ​មិន​ទាន់​​ស្រប​​តាម​ការ​ចង់​បាន​របស់​សហជីព​ឡើយ។

Content image - Phnom Penh Post
លោក អាត់ ធន់ ប្រធាន​សហជីព​ស៊ីខាវឌូ​ផ្ដល់​បទសម្ភាស​ដល់​កាសែត​កាលពី​ម្សិលមិញ។ ហុង មិនា

លោក​ថា៖ «ក្រោយ​ពី​​ការ​ពិភាក្សា​គឺ​សំឡេង​ភាគច្រើន​យើង​ចង់​បាន​ ១៧៧ ដដែល​តែ​ក្រោយ​មក​យើង​បាន​ជជែក​ទៀត​ថា​តួលេខ​នេះ​នៅ​ដដែល​អ៊ីចឹង​បាន​មាន​ការ​បន្ថយ​មក​នៅ​ត្រឹម ១៧១ ដុល្លារ​ដោយ​យោង​ទៅ​លើ​និយោជក​គេ​បាន​ដំឡើង​ថែម​ទៀត​តែ​នេះ​មិន​ទាន់​សម្រេច​យក​ទេ​ព្រោះ​ក្រុម​ប្រឹក្សា​ការងារ​នឹង​មាន​តួលេខ​ថ្មី​ទៀត​ហើយ»។

យ៉ាង​ណា​ក៏ដោយ​លោក​សម្តែង​ការ​សប្បាយ​ចិត្ត​នៅពេល​ដែល​​តំណាង​សហជីព​បាន​សម្រេច​យក​តួលេខ​តែ​មួយ​រួម​គ្នា​ដែល​ផ្ទុយ​ពី​លើក​មុន​សហជីព​ផ្តល់​តួលេខ​ពីរ​ដាក់​ទៅ​ថ្នាក់​លើ​ដើម្បី​សម្រេច។

ចំណែក​ប្រធាន​សហព័ន្ធ​សហជីព​ខ្មែរ​លោក ជួន មុំថុល បង្ហាញ​សុទិដ្ឋិនិយម​ថា​ប្រាក់​ឈ្នួល​គោល​របស់​កម្មករ​ឆ្នាំ ២០១៧ នឹង​អាច​ទទួល​បាន​ជិត ១៦០ ដុល្លារ។

លោក​ថា៖ «ខ្ញុំ​គិត​ថា​បើ​គេ (គណៈកម្មការ​ប្រឹក្សា​ការងារ​ឡើង​មិន​ហួស​ពី ១០ ភាគរយ​ទេ​មាន​ន័យ​ថា​ដំឡើង​ដល់​ជាង​ ១៥០ ​ដុល្លារ​ប្រហែល​ ១៦០ ​ដុល្លារ​ចុះ​ក្រោម»។

ក្រោយ​បញ្ចប់​កិច្ចប្រជុំ​ភាគី​និយោជក និង​តំណាង​សហជីព​បាន​សំណូមពរ​រួម​គ្នា​ដល់​រដ្ឋាភិបាល​ជួយ​ផ្តល់​ការ​បណ្តុះបណ្តាល​បង្កើន​ផលិតភាព និង​ជំនាញ​ដល់​កម្មករ​និយោជិត​ពង្រឹង​ការ​អនុវត្ត​ច្បាប់​ស្តីពី​ការងារ​ធ្វើ​ឱ្យ​ប្រសើរ​នូវ​ហេដ្ឋារចនាសម្ព័ន្ធ​ដឹក​ជញ្ជូន​សាធារណៈ និង​ធ្វើ​ឱ្យ​ប្រសើរ​ឡើង​នូវ​ប្រព័ន្ធ​ឡូជីស្ទីក និង​កាត់​បន្ថយ​តម្លៃ​អគ្គិសនី។

ភាគី​និយោជក​ក៏​បាន​​សំណូមពរ​ដាច់​ដោយ​ឡែក​ដល់​រដ្ឋាភិបាល​ឱ្យ​លុប​បំបាត់​ចោល​កម្រៃ​គ្រប់គ្រង​ការ​នាំចេញ​លើក​លែង​ពី​ការ​ត្រួត​ពិនិត្យ​ពី​ស្ថាប័ន​កាំកុងត្រូល និង​ប្រើប្រាស់​ប្រាក់​រៀល​ជា​គោលនៅ​ក្នុង​ទីផ្សារ​ខណៈ​ដែល​ភាគី​សហជីព​ស្នើ​ដល់​រដ្ឋាភិបាល​ឱ្យ​គ្រប់គ្រង​តម្លៃ​ទំនិញ​ប្រើប្រាស់​ប្រចាំ​ថ្ងៃ​មិន​ឱ្យ​ឡើង​ថ្លៃ​ខ្ពស់​ពង្រីក​ការ​តបណ្តាញ​អគ្គិសនី និង​ទឹក​ស្អាត​ទៅ​ដល់​បណ្តា​ខេត្ត ក្រុង នៅ​ទូទាំង​ប្រទេស​ដែល​ជា​តំបន់​មាន​ផ្ទះ​ជួល​របស់​កម្មករ​និយោជិត។

តាម​របាយការណ៍​អង្គការ​ពលកម្ម​អន្តរជាតិ​ (ILO) ដែល​ចេញ​ផ្សាយ​កាលពី​ខែ​មីនា​ ឆ្នាំ ២០១៦ បាន​ឱ្យ​ដឹង​ថា​កម្មករ​ក្នុង​វិស័យ​​វាយនភ័ណ្ឌ និង​ស្បែកជើង​នៅ​កម្ពុជា​មាន​ជិត ៧០ ម៉ឺន​នាក់​គិត​ត្រឹម​ខែ​ធ្នូ​ឆ្នាំ ២០១៥ ហើយ​​ប្រាក់​ខែ​គោល​កម្មករ​បច្ចុប្បន្ន​ទទួល​បាន ១៤០ ដុល្លារ​ក្នុង​មួយ​ខែ។

ទោះ​យ៉ាង​ណា​តំណាង​និយោជក​លោកEnjoy Hoបាន​​សម្ដែង​​ការ​ «​ភ័យ​ខ្លាច​»​​ថា​រដ្ឋាភិបាល​​​យក​ចិត្ត​ទុក​ដាក់​សំណើ​របស់​សហជីព​​ហើយ​​ដំឡើង​ប្រាក់​ឈ្នួល​​​​លើស​​ពី​ការ​រំពឹង​ទុក​។

លោក Ho ដែល​ជា​សមាជិក​គណៈកម្មាធិការ​ប្រតិបត្តិ​សមាគម​​រោងចក្រ​កាត់ដេរ​នៅ​កម្ពុជា​បាន​​ថ្លែង​ថា​៖ «​នៅ​កម្ពុជា​ការ​ដំឡើង​ប្រាក់​ឈ្នួល​អប្បបរមា​​គឺ​​មាន​លក្ខណៈ​នយោបាយ​»៕

អត្ថបទគួរចាប់អារម្មណ៍