តាកែវៈ លោកនាយករដ្ឋមន្ត្រី ហ៊ុន សែន បញ្ជាក់ថាប្រាក់ឧបត្ថម្ភសម្រាប់គ្រួសារពលរដ្ឋក្រីក្រ និងងាយរងគ្រោះក្នុងអំឡុងជំងឺកូវីដ១៩ នឹងកើនដល់ ២៨ លានដុល្លារ ក្នុងខែកក្កដា នេះ បន្ទាប់ពីពលរដ្ឋក្រីក្រជាង ៥ ម៉ឺននាក់បន្ថែមទៀតត្រូវបានកំណត់។
លោកថ្លែងដូច្នេះក្នុងពេលលោកចុះទៅពិនិត្យការបង្កបង្កើនផលស្រូវ និងសំណេះសំណាលជាមួយប្រជាកសិករក្នុងស្រុកព្រៃកប្បាស ខេត្តតាកែវពីម្សិលមិញ។ លោកមានប្រសាសន៍ថា៖ «ម្សិលមិញ រដ្ឋមន្ត្រីក្រសួងសង្គមកិច្ច បានប្រកាសក្នុងខែ ៧ នេះយើងកើនពី ៥៦ ម៉ឺនគ្រួសារជាងដែលចំណាយ ២៤ លានទៅដល់ ៦១ ម៉ឺនគ្រួសារ និងត្រូវចំណាយ ២៨ លានដុល្លារ សម្រាប់ខែ ៧ ព្រោះយើងស្វែងរកឃើញគ្រួសារក្រីក្រថ្មីៗប្រមាណជា ៥ ម៉ឺនគ្រួសារបន្ថែមទៀត ហើយយើងនឹងបន្តរុករក បើកូវីដមិនទាន់ថមថយទេយើងត្រូវនៅបន្តកម្មវិធីសង្គមកិច្ចជំនួយសង្គម ប៉ុន្តែមិនមែនបានសេចក្ដីថា រដ្ឋចិញ្ចឹមរហូតទេ ហើយនេះក៏មិនមែនមានន័យថា រដ្ឋចិញ្ចឹមទាំងស្រុងទេ គឺជាការប៉ះប៉ូវ»។
កាលពីខែមិថុនារាជរដ្ឋាភិបាលបានឧបត្ថម្ភសាច់ប្រាក់ចំនួន ២៤ លានដុល្លារ ដល់គ្រួសារក្រីក្រចំនួនជាង ៥៦ ម៉ឺនគ្រួសារនៅទូទាំងប្រទេស។ លោក ហ៊ុន សែន ថ្លែងថាគ្រួសារខ្លះអាចទទួលបានប្រាក់ឧបត្ថម្ភរហូតដល់ទៅជាង ១០០ ដុល្លារក្នុង ១ ខែអាស្រ័យលើចំនួនសមាជិកគ្រួសារ។ កម្ពុជាមិនទុកឲ្យប្រជាជនណាម្នាក់ស្លាប់ដោយអត់បាយដែលរដ្ឋាភិបាលមិនបានដឹង និងដោះស្រាយនោះទេ។
លោកមានប្រសាសន៍ដូច្នេះថា៖ «អភិបាលស្រុកព្រៃកប្បាសត្រូវតែមើលឲ្យបានច្បាស់ចៅហ្វាយខេត្តទាំងអស់ ថ្ងៃនេះគ្រប់ចៅហ្វាយខេត្តទាំងអស់មើលឲ្យអស់ ក្រែងលោអ្នកក្រពិតប្រាកដវាអត់បាន ទៅបានអ្នកដែលមិនមែនអ្នកក្រ។ អាហ្នឹងហើយដែលគេហៅថា អយុត្តិធម៌នោះ។ អ៊ីចឹងត្រូវមើលឲ្យអស់កន្លែងហ្នឹង មើលឲ្យអស់»។
ក្រសួងផែនការកាលពីថ្ងៃទី ២០ ខែកក្កដាបានផ្សព្វផ្សាយនីតិវិធីនៃការកំណត់អត្តសញ្ញាណគ្រួសារក្រីក្រ ដើម្បីទទួលបានប្រាក់ឧបត្ថម្ភពីរាជរដ្ឋាភិបាលក្នុងកម្មវិធីជួយដល់ពលរដ្ឋក្រីក្រ និងងាយរងគ្រោះ។
ក្រសួងបញ្ជាក់ថា ការកំណត់អត្តសញ្ញាណគ្រួសារក្រីក្រធ្វើឡើងរៀងរាល់ ៣ ឆ្នាំម្ដងតាមរយៈការសម្ភាសដោយផ្អែកលើសូចនាកររួមមានស្ថានភាពផ្ទះ ទំហំដី លំនៅឋាន និងផលិតផលកសិកម្ម ប្រភពចំណូលចម្បងពីការដាំដុះ នេសាទ ឬសកម្មភាពផ្សេងទៀត ការចិញ្ចឹមសត្វ។ លទ្ធភាពដោះស្រាយស្បៀងចំនួនសមាជិករកចំណូលធៀបនឹងសមាជិកសរុប សម្ភារ និងឧបករណ៍ប្រើប្រាស់ មធ្យោយបាយធ្វើដំណើរ និងការវាយតម្លៃលើស្ថានភាពពិសេសនៃគ្រួសារ ក៏ជាសូចនាករសម្រាប់កំណត់ពីភាពក្រីក្រដែរ។
ក្រសួងផែនការបន្តថា ដើម្បីធានាតម្លាភាពក្នុងការអនុវត្តអត្តសញ្ញាណគ្រួសារក្រីក្រនៅតាមភូមិនីមួយៗ ក្រសួងបានបង្កើតក្រុមការងារតំណាងភូមិ ដែលមានសមាជិកពី ៥ ទៅ ៧ នាក់ ជ្រើសរើសចេញពីការបោះឆ្នោតរបស់អ្នកភូមិ។ ក្រុមតំណាងភូមិនេះនឹងជ្រើសរើសគ្រួសារដែលត្រូវសម្ភាស សុំការយល់ព្រមពីអ្នកភូមិ និងការទទួលស្គាល់ពីក្រុមប្រឹក្សាឃុំសង្កាត់។ គ្រួសារដែលមានបណ្ណក្រីក្រនឹងត្រូវឆ្លងកាត់នីតិវិធីកំណត់ម្ដងទៀតបន្ទាប់ពីរយៈពេល ៣ ឆ្នាំ។
ដោយសារតែរយៈពេល ៣ ឆ្នាំជារយៈពេលមួយយូរ ធ្វើឲ្យស្ថានភាពគ្រួសាក្រីក្រមានភាពប្រែប្រួលដោយកត្តាមួយចំនួនដូចជាការធ្វើចំណាកស្រុក ស្ថានភាពគ្រួសារមានភាពប្រសើរឡើង ឬមានចំនួនសមាជិកគ្រួសារមានច្រើនជាងមុនក៏ដូចជារៀបអាពាហ៍ពិពាហ៍។ ក្នុងករណីនេះក្រសួងមាននីតិវិធីថ្មី គឺឲ្យអ្នកដែលមានជីវភាពក្រីក្រដាក់ពាក្យស្នើសុំកំណត់អត្តសញ្ញាណគ្រួសារក្រីក្រ។
លោក ថេង បញ្ញាធន ប្រតិភូរាជរដ្ឋាភិបាលទទួលបន្ទុកអគ្គនាយកផែនការនៃក្រសួងផែនការបានថ្លែងកាលពីម្សិលមិញថា គិតត្រឹមថ្ងៃទី ១៥ ខែកក្កដា សរុបទាំងការកំណត់ជុំមុន និងជុំថ្មី ពលរដ្ឋក្រីក្រដែលត្រូវបានកំណត់អត្តសញ្ញាណមានចំនួន ៦១៣ ៥៦៤ គ្រួសារ។ បើគិតជាចំនួនមនុស្សគឺមានជាង ២,៨ លាននាក់ ដែលនឹងទទួលបានការឧបត្ថម្ភសាច់ប្រាក់នៅថ្ងៃទី ២៥ ខែកក្កដានេះ។
ស្របពេលជាមួយគ្នានេះដែរ ក្រសួងផែនការបានដកហូតបណ្ណក្រីក្រជាង ៦ ០០០ មកវិញ បន្ទាប់ពីក្រសួងរកឃើញថា អ្នកទាំងនោះមានជីវភាពប្រសើរឡើង ឆ្លងផុតកម្រិតនៃភាពក្រីក្រដែលក្រសួងកំណត់។ នេះបើតាមការបញ្ជាក់របស់លោក ថេង បញ្ញាធន៕