The Phnom Penh Post Search

Search form

Logo of Phnom Penh Post newspaper Phnom Penh Post - ប្រាក់​ខែ​កម្មករ​ឡើង​ដល់​ $៧៥ ​ប៉ុន្តែ​សហ​ជី​ព​ឯក​រាជ្យ​មិន​​ទាន់​យល់​ស្រប​ទេ




ប្រាក់​ខែ​កម្មករ​ឡើង​ដល់​ $៧៥ ​ប៉ុន្តែ​សហ​ជី​ព​ឯក​រាជ្យ​មិន​​ទាន់​យល់​ស្រប​ទេ

ប្រាក់​ខែ​កម្មករ​ឡើង​ដល់​ $៧៥ ​ប៉ុន្តែ​សហ​ជី​ព​ឯក​រាជ្យ​មិន​​ទាន់​យល់​ស្រប​ទេ

ភ្នំ​ពេញៈ ​កម្មករ​​ កម្មការិនី​​ ក្នុង​វិស័យ​កាត់​ដេរ​សម្លៀ​ក​បំពាក់​​ និង​ស្បែក​ជើង​​ នឹង​ទទួល​បាន​ប្រាក់​ឈ្នួល​​​​អប្ប​បរមា​​​​​ចំនួន​​៧៥ ​ដុល្លារ​ក្នុង​មួយ​​​ខែ​​ ​​​​ដោយ​ចាប់​ផ្តើម​អនុវត្ត​​ពី​ខែ​ឧសភា​ខាង​មុខនេះ​តទៅ​។ នេះ​​បើ​យោង​តាម​​សេចក្តី​​ប្រកាស​ព័ត៌​មាន​​​​​របស់​ក្រសួង​សង្គម​កិច្ច​ កាល​​ពី​ម្សិលមិញ​​។

​ការ​ដំឡើង​​​ដែល​​មន្រ្តី​ក្រសួង​ កាល​ពី​ដំបូង​ យល់​ស្របថា​​ ​គួរ​តែ​១២ ​ដុល្លារ​ និង​​​បន្ថែម​ ​២ ​ដុល្លារ​​​​ទៀត ​បន្ទាប់​​ពី​​មាន​​អន្ត​រាគមន៍​ផ្ទាល់​​ពី​លោក​នាយករដ្ឋ​មន្រ្តី ហ៊ុន សែន ​ប៉ុន្តែ​នៅ​តែ​​​មិន​​សមស្រប​​ សម្រាប់​​​​​សហជីព​​ឯក​រាជ្យ​​ដែល​គំរាម​​ធ្វើ​កូដ​កម្ម​ឡើយ​​​ ដោយ​ថ្លែង​​ថា ​​ការ​បន្ថែម​ចំនួន​១៤​ដុល្លារ ​នឹង​​ជួយ​​បាន​តិច​តួច​ប៉ុណ្ណោះ​សម្រាប់​កម្មករ​ និង​​កម្មការិនី ក្នុង​ការ​រំដោះ​ពួ​ក​​គេ​ ចេញ​ពី​ភាពក្រី​ក្រ​។

សេចក្តី​ប្រកាស​ព័ត៌​មាន​មួយ ​ដែល​​ចុះ​ហត្ថលេ​ខា​​ ដោយ​​លោក អ៊ិត សំហេង រដ្ឋ​មន្រ្តីក្រសួង​សង្គម​កិ​ច្ច​​បា​ន​ឲ្យ​ដឹង​ថា​៖ «​​​​ប្រាក់​ឈ្នួល​​អប្បបរមា​​​​នេះ ​នឹង​​ចូល​ជា​ធ​រមាន​​នៅ​ថ្ងៃ​ទី​​០១ ឧសភា ​២០១៣​ ​និង​​​ចាប់​​បើក​ប្រាក់​ឈ្នួល​​​នៅ​ចុង​​ខែ​ឧសភា ​ឬ​ដើម​ខែ​មិថុនា ឆ្នាំ​ ២០១៣​។ សេចក្តី​ប្រកាស​ព័ត៌មាន​​នេះ​បន្ត​ថា​៖​«​​គណៈ​កម្មការ​ប្រឹក្សា​ការ​ងារ​ កោះ​ប្រជុំ​នៅ​ថ្ងៃ​ទី​ ២៩ ខែ​មីនា ឆ្នាំ​២០១៣​ ដើម្បី​បំពេញ​​​នីតិវិធី​តាម​គោល​ការណ៍​​នៃ​ច្បាប់​ស្តីពី​ការ​ងារ​»។ ​​បើ​យោង​តាម​សេចក្តី​ប្រកាស​ព័ត៌​មាន​នេះ ​ប្រាក់​ឈ្នួល​អប្បបរមា​ថ្មី​គឺ​៨០ ដុល្លារ ​ដោយ​សារ​ការ​​បូក​​បញ្ចូល​​​ប្រាក់​​​ថែ​ទាំ​សុខ​ភាពចំនួន​​៥​ដុល្លារ​​ ​​ដែល​មាន​ស្រាប់​។

​លោក វង្ស សុវណ្ណ អគ្គ​លេខា​ធិការ​​នៃ​​គណៈ​កម្មាធិការ​​ដោះ​ស្រាយ​​​កូដ​កម្ម បាតុកម្មគ្រប់​​មុខ​សញ្ញា​នៃ​ក្រសួង​សង្គម​កិច្ច​ ​បាន​បញ្ជាក់​ថា​៖ «​​សេចក្តី​សម្រេច​នេះ ​គឺ​ចុង​​ក្រោយ​ ​ហើយ​​​ភាគី​ពាក់​ព័ន្ធ​​នឹង​ជួប​ប្រជុំ​គ្នា​នៅ​ថ្ងៃ​សុក្រ​សប្តា​ហ៍​ក្រោយ ​​​នៅ​គណៈ​កម្មការ​ប្រឹក្សា​ការងារ​»។

រដ្ឋា​​ភិបាលក៏​យល់​ព្រម​ផង​ដែរ​​​ ឲ្យ​បង្កើត​​​ក្រុម​ការ​ងារ​​ចម្រុះ​ត្រី​ភាគី ​​និងដៃ​គូរ​ពាក់​ព័ន្ធ​ ដើម្បី​បន្ត​ការ​សិក្សា​​ស្រាវ​​ជ្រាវ​ អំពី​បញ្ហា​ប្រាក់​ឈ្នួល​អប្បបរមា​សម​ស្រប​ សម្រាប់​​កម្មករ​និយោជិត​​ ក្នុង​រយៈ​ពេល​​១​ឆ្នាំ​​ម្តង​ ឬ​តាម​​ពេល​វេលា​ចំាចាច់​​ ដើម្បី​ពិនិត្យ​ពិភាក្សា ​​អំពី​ប្រាក់ឈ្នួល​អប្បបរមា​សម​ស្រប​ សម្រាប់​កម្មករ​​និយោជិត។ ​នេះ​បើ​តាម​សេចក្តី ប្រកាស​ព័ត៌​មាន​។ ​សេចក្តី​ប្រកាស​ព័ត៌​មាន​ដែល​ធ្វើ​ឡើង​​បន្ទាប់​ពី​​ការ​ចរចា​​​​ប្រាក់​ឈ្នួល​អប្បបរមា​នេះ ​ជាប់​គាំង​​​រវាង​សមាគម​រោង​ចក្រ​កាត់​ដេរ​នៅ​កម្ពុជា និង​​សហជីព​​បាន​ធ្វើ​ឲ្យ​ភាគី​ទាំង​ពីរ​ភ្ញាក់​ផ្អើល​។

លោក ខេន លូ អគ្គលេខា​ធិការ​ សមា​គម​រោងចក្រ​កាត់​ដេរ​នៅ​កម្ពុជា​ ​ដែល​ប្រកាន់​ជំហរ​​ផ្តល់​ឲ្យ​តែ​ ៧០ ​​ដុល្លារ​​​ក្នុង​ការ​អំឡុង​ការ​ចរចា​ជា​មួយ​សហជីព​​ថ្លែង​ថា​​​៖ «​​យើង​មាន​ការ​ភ្ញាក់​ផ្អើល​។ ​យើង​ដឹង​ព័ត៌​មាន​នេះ​នៅ​ព្រឹក​នេះ​»។

«​វា​មិន​​មែន​ជា​សំណួរ​ថា​តើ​សមា​ជិ​ក​​​​របស់​យើង ​អាច​​​​​ផ្តល់​ឲ្យ​ឬ​មិន​ផ្តល់​ឲ្យ​នោះ​ទេ ប៉ុន្តែ​វា​ជា​សំណួរ​​​ថា​​ តើ​សមាជិក​របស់​យើង​ចំនួន​ប៉ុន្មា​ន​​​ ដែល​អាច​នៅ​តស៊ូ​រស់​បាន​»​។​

ប៉ុន្តែ​យ៉ាង​ណា​ក៏​ដោយ លោក រ៉ុង ឈុន ប្រធាន​សហភាព​សហជីព​កម្ពុជា ដែល​ជា​សហជីព​មួយ​ ក្នុង​ចំណោមសហជីពដែល​​​មិន​ព្រម​ទទួល​យក​ក្រោម​​១០០​ ដុល្លារ​ ​​ថ្លែង​ថា​ ​លោក​នឹង​សហភាព​​សហជីព​ចំនួន​​​បួន​​ទៀត​​ មិន​អាច​ទទួល​យក​​ប្រាក់​ឈ្នួល​ចំនួន ​៧៥​ ដុល្លារ​​នេះ​​បាន​ទេ​ ​ហើយ​នឹង​​ធ្វើ​កូដ​កម្ម​ធំ​មួយ​​​​ នា​ពេល​ខាង​មុខ​ឆាប់​ៗ​នេះ​។

លោក​បន្ត​ថា​៖ «​ខ្ញុំ​មិន​ស្វាគមន៍​សេចក្តី​សម្រេច​នេះ​ទាល់​តែ​សោះ​​ ពី​ព្រោះ​វា​ជា​ចំនួន​តិច​តួច​ពេក​ សម្រាប់​កម្មករ​​និយោជិត​»។ ​

សេចក្តី​ថ្លែង​ការណ៍​មួយ​ ពីក្រុម​​សហជីព​ចំនួន​ ៥​​ ​ក្នុង​នោះ​ក៏មាន​​​សហជីព​សេរី​កម្មករ ​និង​ ស៊ី​ខៅ​ឌូ​ ផង​ដែរ​​​ បាន​ឲ្យ​ដឹង​ថា​ ពួក​គេ​នឹង​បន្ត​​ធ្វើ​ការ​តស៊ូ​ឲ្យ​ទទួល​ប្រាក់​ឈ្នួល​ខ្ពស់​ជាង​នេះ​។ ​សេចក្តី​ថ្លែង​​នេះ​បន្ត​ថា​៖ «​​​ការ​ដំឡើង​ប្រាក់​ឈ្នួល​គឺ​សំខាន់​​​ណា​ស់​​សម្រាប់​ ការ​កាត់​បន្ថយ​ហានិភ័យ​នៃ​ការ​ដួល​សន្លប់​ ​និង​កូដ​កម្ម​។ ​យើ​ង​នឹង​​​មិន​បោះ​បង់​ការ​ទាម​ទារ​របស់​យើង​ទេ ​​រហូត​ទាល់​តែ​​​ប្រាក់​ឈ្នួល​​​ចំនួន​១០០​ដុល្លារ​ ក្នុង​មួយ​ខែ​​​​ត្រូវ​ប្រគល់​ឲ្យ​​​កម្មករ​»។​

ឧស្សាហកម្ម​កាត់​ដេរ​កម្ពុជា​​​ជួល​​​កម្មករ​និយោជិត​​ជាង​៤០​ម៉ឺន​នាក់​​ ហើយ​ភាគ​ច្រើន​នាំ​ចេញ​ទៅ​អាមេរិក​និង​អឺរ៉ុប​។ ​បើ​តាម​អង្គការ​ពល​កម្ម​អន្តរ​ជាតិ (ILO) ​បាន​ឲ្យ​ដឹង​ថា​ ប្រាក់​ឈ្នួល​អប្បបរមា​​​ក្នុង​វិស័យ​កាត់​ដេរ​គឺ​មាន​ចំនួន​៤៥​ ដុល្លារ​​ក្នុង​ឆ្នាំ​២០០០ និង ​៥០ ​ដុល្លារ​ក្នុង​២០០៧ ​និង​ ៦១ ​ដុល្លារ​ ក្នុង​២០១០ ហើយ​ប្រាក់​​អត្ថ​ប្រយោ​ជ​ន៍​ផ្សេង​ៗ​បាន​ឡើង​​​ពី​៥​ដុល្លារ​រហូត​​ដល់​២២​​ដុល្លារ​ចាប់​តាំង​ពី​២០០០​។

លោក Dave Welsh អ្នក​​គ្រប់​គ្រង​ប្រចាំ​ប្រទេស​នៃ​មជ្ឈមណ្ឌល​អាមេរិក​ដើម្បី​សាមគ្គីភាពការ​ងារ​អន្តរជាតិ(ACILS)បាន​ថ្លែង​​ប្រាក់​​ឈ្នួល​ចំនួន​​ ៧៥​ ដុល្លារ​នេះ​គឺ​​វា​ទាបជាង​ប្រាក់​ឈ្នួល​រស់​នៅ​សមរម្យ​​ឆ្ងាយ​ណាស់​ ​ប៉ុន្តែ​ការ​ប្តេជ្ញា​របស់​រដ្ឋា​ភិបាល ​ក្នុង​ការ​ពិនិត្យ​​​វាយ​តម្លៃ​ដំឡើង​ប្រាក់​ឈ្នួល​​អប្បបរមា​ប្រចាំ​ឆ្នាំ​នេះ​គឺ​ជា​សញ្ញា​វិជ្ជ​មាន​មួយ​៕ PS

អត្ថបទគួរចាប់អារម្មណ៍