The Phnom Penh Post Search

Search form




Logo of Phnom Penh Post newspaper Phnom Penh Post - ប្រាក់​ខែ​មន្ត្រី​រាជការ​នឹង​ឡើង ៤០ % ចាប់​ពី​ខែ​កញ្ញា




ប្រាក់​ខែ​មន្ត្រី​រាជការ​នឹង​ឡើង ៤០ % ចាប់​ពី​ខែ​កញ្ញា

ប្រាក់​ខែ​មន្ត្រី​រាជការ​នឹង​ឡើង ៤០ % ចាប់​ពី​ខែ​កញ្ញា

ភ្នំពេញៈ ខណៈ​ដែល​ប្រទេស កំពុង​រង់​ចាំ​លទ្ធផល​ជា​ផ្លូវ​ការ​នៃ​ការ​បោះឆ្នោត​គណបក្ស​ប្រជាជន ដែល​បាន​បន្ត​គ្រប់​គ្រង​រដ្ឋាភិបាល កាល​ពី​ម្សិលមិញ បាន​ប្រកាស​ថា មន្រ្តី​រាជការ​ប្រហែល ៩ ម៉ឺន​នាក់ នឹង​ទទួល​បាន​ការ​ដំឡើង​ប្រាក់​ខែ ៤០ ភាគរយ ដែល​ចាប់​ផ្តើម​ពី​ថ្ងៃ​ទី១ ខែ​កញ្ញា ត​ទៅ។

ផ្តោត​លើ​បញ្ហា​សំខាន់​មុន​ពេល​បោះឆ្នោត ក្រសួង​សេដ្ឋកិច្ច បាន​ប្រកាស​ថា មន្រ្តី​រាជការ​ថ្នាក់​ទាប រួម​ទាំង​គ្រូ​បង្រៀន ទាហាន និង​នគរបាល នឹង​ទទួល​បាន​ប្រាក់​បៀវត្សរ៍​អប្បបរមា ៨០ ដុល្លារ​ក្នុង​មួយ​ខែ។

សេចក្តី​ថ្លែង​ការណ៍​បាន​សរសេរ​ថា៖ «រាជ​រដ្ឋាភិបាល បាន​សម្រេច​បង្កើន​បៀវត្សរ៍​មូលដ្ឋាន​អប្បបរមា​របស់​មន្រ្តី​រាជការ​ស៊ីវិល​នៃ​ក្រប​ខ័ណ្ឌ ឃ ក្រប​ខ័ណ្ឌ គ ឋានន្តរ ស័ក្តិ​ទី ៣ និង​ក្រប​ខ័ណ្ឌ គ ឋានន្តរ​ស័ក្តិ​ទី ២ ឲ្យ​ឡើង​ដល់ ៣២០០០០ រៀល។ ដូច្នេះ បៀវត្សរ៍​អប្បបរមា​សរុប​ប្រចាំ​ខែ​កម្រិត​អប្បបរមា​ដែល​រួម​បញ្ចូល​នូវ​បៀវត្សរ៍​មូលដ្ឋាន និង​ប្រាក់​បំណាច់​ផ្សេងៗ នា​ពេល​បច្ចុប្បន្ន ដែល​មាន​ចំនួន ២៤៤ ៤០០ រៀល នឹង​ត្រូវ​បាន​បង្កើន​ឲ្យ​ឡើង​ដល់ ៣៤៤ ០០០ រៀល»។

សេចក្តី​ថ្លែង​ការណ៍​បាន​ឲ្យ​ដឹង​ទៀត​ថា លោក​នាយក​រដ្ឋ​មន្រ្តី ហ៊ុន សែន បាន​ចុះ​ហត្ថលេខា​លើ​អនុក្រឹត្យ កាល​ពី​ថ្ងៃ​អង្គារ បន្ទាប់​ពី​បាន​សន្ទនា​ជាមួយ​ប្រជាជន​ក្នុង​ខេត្ត កណ្តាល កាល​ពី​សប្តាហ៍​មុន ហើយ​របាយ​ការណ៍​ពី​ក្រសួង​បាន​បន្ថែម​ទៀត​ថា នឹង​មាន​ការ​បង្កើន​ប្រាក់​បៀវត្សរ៍​បន្ថែម​ទៀត។

នៅ​មុន​ការ​បោះឆ្នោត​ថ្ងៃ​ទី ២៨ ខែ កក្កដា បញ្ហា​ប្រាក់​ឈ្នួល ត្រូវ​បាន​លើក​ឡើង ដោយ​គណបក្ស​ប្រជាជន ដែល​កាន់​អំណាច និង​គណបក្ស​សង្គ្រោះ​ជាតិ ដែល​ជា​គណបក្ស​ប្រឆាំង។

លោក យឹម សុវណ្ណ តំណាង​រាស្រ្ត​គណបក្ស​សង្គ្រោះ​ជាតិ បាន​ថ្លែង​កាល​ពី​ម្សិលមិញ​ថា លោក​ស្វាគមន៍​ការ​បង្កើន​ប្រាក់​បៀវត្សរ៍ មន្ត្រី​រាជការ​។ លោក​បាន​បញ្ជាក់​ថា៖ «ក្នុង​គោល​នយោបាយ​បោះឆ្នោត​របស់​យើង យើង​ចង់​បង្កើន​ប្រាក់​ខែ​ឲ្យ​ឡើង​ដល់ ២៥០ ដុល្លារ​សម្រាប់​មន្រ្តី​រាជការ»។

លោក រ៉ុង ឈុន ប្រធាន​សមាគម​គ្រូ​បង្រៀន​កម្ពុជា​ឯករាជ ដែល​ជា​អ្នក​គាំទ្រ​គណបក្ស​សង្គ្រោះ​ជាតិ ក៏​បាន​ស្វាគមន៍​ការ​បង្កើន​ប្រាក់​ខែ​នេះ​ដែរ ប៉ុន្តែ​លោក​បាន​ចោទ​សួរ អំពី​ពេល​វេលា​នៃ​ការ​ដំឡើង​នេះ។

លោក​បន្ត​ថា៖ «វា​ល្អ​ដែល​យើង​ឃើញ​ការ​បង្កើន​ប្រាក់​បៀវត្សរ៍ ប៉ុន្តែ​វា​ចម្លែក​ក្នុង​ការ​ដោះស្រាយ​បញ្ហា​នេះ​ក្នុង​អំឡុង​រយៈ​ពេល​អន្តរកាល​រវាង [អាណតិ្ត] រដ្ឋាភិបាល»។

លោក សុក សំអឿន នាយក​ក្រុម​អ្នក​ច្បាប់​ការពារ​សិទិ្ធ​កម្ពុជា បាន​ថ្លែង​ថា ការ​កំណត់​ពេល​នៃ​ការ​ដំឡើង​ប្រាក់​ខែ​នេះ អាច​ជា​រឿង​មិន​ធម្មតា។ លោក​បន្ត​ថា៖ «រដ្ឋាភិបាល​មាន​បទ​ពិសោធ​ក្នុង​ការ​ជាប់​គាំង​នយោបាយ​កន្លង​មក​លើក​មុន ពួកគេ​បាន​រក្សា​ស្ថានការណ៍​នៅ​ដដែល​។ លើក​នេះ គណបក្ស​ប្រឆាំង​បាន​អះអាង​ថា គេ​នឹង​បង្កើន​ប្រាក់​បៀវត្សរ៍ [ឥឡូវ​នេះ] គណបក្ស​កាន់​អំណាច​ចាប់​ផ្តើម​ធ្វើ​ដូច​គ្នា»។

លោក មឿន តុលា ប្រធាន​កម្មវិធី​សិទ្ធិ​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ បាន​ថ្លែង​ថា ការ​កំណត់​ពេល​ដំឡើង​ប្រាក់​ខែ​នេះ ពុំ​មែន​ជា​រឿង​គាប់​ជួន​នោះ​ទេ គឺ​បាន​ធ្វើ​ឡើង បន្ទាប់​ពី​គណបក្ស​ប្រជាជន​បាត់បង់​ការ​គាំទ្រ​យ៉ាង​ខ្លាំង និង​ខណៈ​ពេល​មាន​ការ​គំរាម​ធ្វើ​មហា​បាតុកម្ម​ប្រសិន​បើ​គេ​មិន​ប្រគល់​ជ័យជម្នះ​ទៅ​ឲ្យ​គណបក្ស​សង្គ្រោះ​ជាតិ​ទេ​នោះ។​

លោក​បាន​បន្ត​ថា៖ «ខ្ញុំ​ជឿ​ជាក់​ថា មន្ត្រី​រាជការ រាប់​ទាំង​ទាហាន បាន​បោះឆ្នោត​ឲ្យ​គណបក្ស​សង្គ្រោះ​ជាតិ​។ គណបក្ស​ប្រជាជន យល់​ដឹង​អំពី​ករណី​នោះ។ គណបក្ស​សង្គ្រោះ​ជាតិ​បាន​អំពាវនាវ​ឲ្យ​ធ្វើ​មហា​បាតុកម្ម​ហើយ​រដ្ឋាភិបាល​ព្រួយ​បារម្ភ​ថា ពួកគេ​នឹង​ចូល​រួម​ធ្វើ​បាតុកម្ម»។

លោក តុលា បាន​បន្ថែម​ថា ការ​បាត់បង់​ការ​គាំទ្រ​យ៉ាង​ច្រើន របស់​គណបក្ស​កាន់​អំណាច គឺ បាត់​រហូត​ដល់ ២២ អាសនៈ យោង​តាម​តួលេខ​ផ្ទាល់​របស់​គណបក្ស​នេះ បាន​លុប​ចោល​នូវ​ជំនឿ​ថា អ្នក​រាល់​គ្នា​ជា​មន្រ្តី​រាជការ​បាន​បោះឆ្នោត​ឲ្យ​គណបក្ស​សង្គ្រោះ​ជាតិ បើ​ទោះ​បី​ជា​ពួកគេ​គឺជា​សមាជិក​របស់​គណបក្ស​ប្រជាជន​ក៏​ដោយ។

មុន​ពេល​បោះឆ្នោត គណបក្ស​សង្គ្រោះ​ជាតិ បាន​សន្យា​បង្កើន​ប្រាក់​បៀវត្សរ៍​រហូត​ដល់​យ៉ាង​តិច ២៥០ ដុល្លារ ដល់​មន្ត្រី​រាជការ​ប្រសិន​បើ​ខ្លួន​ទទួល​បាន​ជ័យជម្នះ​ដឹក​នាំ​រដ្ឋាភិបាល។

កាល​ពី​ខែ​តុលា​ឆ្នាំ​មុន រដ្ឋាភិបាល​បាន​ប្រកាស​បង្កើន ២០ ភាគរយ​រាល់​ឆ្នាំ ដល់​មន្រ្តី​រាជការ។

យោង​តាម​តួលេខ​របស់​គណបក្ស​ប្រឆាំង ដែល​បាន​ប្រកាស​កាល​ពី​ឆ្នាំ​មុន មន្រ្តី​រាជការ លើក​លែង​ទាហាន ទទួល​បាន​ប្រាក់​ខែ​ជា​មធ្យម ៤៨ ដុល្លារ បូក​រួម​ទាំង​ប្រាក់​ឧបត្ថម្ភ និង​ប្រាក់​បន្ថែម​ផ្សេងៗ​ទៀត។

មន្រ្តី​រដ្ឋាភិបាល​ម្នាក់ បាន​ប្រាប់ ភ្នំពេញ ប៉ុស្តិ៍ ក្នុង​លក្ខខណ្ឌ​មិន​បញ្ចេញ​ឈ្មោះ​ថា ការ​បង្កើន​ប្រាក់​បៀវត្សរ៍​នេះ គឺ​ធ្វើ​ឡើង បន្ទាប់​ពី​មាន​ការ​ប្រជែង​យ៉ាង​ខ្លាំង ពី​គណបក្ស​សង្គ្រោះ​ជាតិ។ លោក​ថ្លែង​ថា៖ «ប៉ុន្តែ​ប្រាក់​បៀវត្សរ៍​ខ្ញុំ ១៥០ ដុល្លារ​រួច​ហើយ ហើយ​នេះ មាន​ផល​លើ​ថ្នាក់​ក្រោម។ ដូច្នេះ ខ្ញុំ​សង្ឃឹម​ថា​នឹង​បង្កើន​ថែម​ទៀត»៕ TK

អត្ថបទគួរចាប់អារម្មណ៍

  • ភ្នំពេញៈ ប្រទេស​ កាតា បាន​ចុះ​អនុស្សរណៈ​ជាមួយ​ក្រសួង​អប់រំ យុវជន និង​កីឡា​លើ​គម្រោង​អភិវឌ្ឍន៍​ដើម្បី​កុមារ​ដំណាក់កាល​ទី​២ ដោយ​ផ្ដល់​មូលនិធិ​ជា​ថវិកា​ជាង​ ១៣ ​លាន​ដុល្លារ​អាមេរិក ដើម្បី​រួមចំណែក​ពង្រឹង​វិស័យ​អប់រំ​កម្ពុជា​ដោយ​ផ្ដោតលើ​កុមារ​ងាយ​រងគ្រោះ​ក្នុង​ការសិក្សា​នៅ​កម្រិត​បឋមសិក្សា ស្របតាម​គោលដៅ​អភិវឌ្ឍន៍​ប្រកប​ដោយ​ចីរភាព​ឆ្នាំ​ ២០៣០​។

  • ភ្នំពេញៈ ក្រុមហ៊ុន Asiatic Group (Holdings) Ltd ដែលមាន​មូលដ្ឋាន​នៅ​ប្រទេស​សិង្ហបុរី​កំពុង​ស្វែងរក​ការទាមទារ​ទឹកប្រាក់​ចំនួន​ ១៤,៤ ​លាន​ដុល្លារ​ ពី​ក្រុមហ៊ុនតំបន់​សេដ្ឋកិច្ច​ពិសេស​ភ្នំពេញ (PPSP) ​ដែល​ចុះបញ្ជី​នៅ​ក្រុមហ៊ុន​ផ្សារមូលបត្រ​កម្ពុជា (CSX) ចំពោះ​ការចោទប្រកាន់​ដែល​ថា​បាន​រំលោភ​លើ​កិច្ចព្រមព្រៀង​វិនិយោគ​រួម (JV) នៃ​រោងចក្រ​ថាមពល​មួយ​។

  • ភ្នំពេញៈ មន្ត្រី​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​អះអាង​ថា កម្ពុជា និង​សិង្ហបុរី​បាន​ប្តេជ្ញា​បន្ត​កិច្ចសហការ​គ្នា​ឱ្យ​កាន់តែ​រឹងមាំ​ថែមទៀត ក្នុង​ការពង្រីក​លើ​វិស័យ​ការងារ និង​បណ្តុះបណ្តាល​ធនធាន​មនុស្ស​របស់​កម្ពុជា​ជាពិសេស​នៅក្នុង​បរិបទ​នៃ​ជំងឺ​​កូវីដ ​១៩​។

  • ភ្នំពេញ៖ ត្រឹមតែ​រយៈពេល ​១០ ​ខែ​ ភោជនីយដ្ឋាន ​Uncle Fu បាន​ធ្វើ​ឱ្យ​ភ្ញៀវ​​ចម្រុះ​ជាតិ​សាសន៍​ជាប់​ចិត្ត​នឹង​រសជាតិ​​ម្ហូប​ម៉ាឡេស៊ី​ និង​សិង្ហបុរី​។

  • កំពតៈ រោងចក្រ​ផលិត​ឥដ្ឋ​ដ៏ធំ​មួយ​ក្នុង​ខេត្តកំពត ដែល​មាន​ទុនវិនិយោគ ៩ ​លាន​ដុល្លារ​ជា​ការវិនិយោគ​រួមគ្នា​រវាង​វិនិយោគិន​ក្នុងស្រុក និង​វិនិយោគិន​មកពី​ប្រទេស​ចិន​បាន​សម្ពោធ​បើក​ដំណើរការ​ជា​ផ្លូវការ​ហើយ​កាលពី​ថ្ងៃអាទិត្យ ដោយ​អាចមាន​សមត្ថភាព​ផលិត​ឥដ្ឋ​បាន​ប្រមាណ ៨០ ​ម៉ឺន​ដុំ​ក្នុង​ ១ ​ថ្ងៃ​។

  • ភ្នំពេញៈ អគ្គស្នងការរង​នគរបាល​ជាតិ លោក ស ថេត ជំរុញ​ឱ្យ កងកម្លាំង​ប្រដាប់អាវុធ និង​មន្ត្រីរាជការ​ត្រូវ​ធ្វើជា​គំរូ​ដ៏ល្អ​សម្រាប់​ប្រជាពលរដ្ឋ​ទូទៅ​ក្នុង​ការគោរព​ច្បាប់​ចរាចរណ៍​នៅលើ​ដងផ្លូវ ដោយ​លោក​ប្រាប់​ឱ្យ​មន្ត្រី​នគរបាល​ចរាចរណ៍​កុំ​ភ័យខ្លាច​ក្នុង​ការអនុវត្ត​ច្បាប់​លើ​មន្ត្រី​ជាន់ខ្ពស់​ណា​ដែល​ប្រព្រឹត្ត​ខុស ខណៈ​ការបើកបរ​ល្មើសច្បាប់​នៅតែ​ជា​បញ្ហា​សម្រាប់​កម្ពុជា​។