The Phnom Penh Post Search

Search form




Logo of Phnom Penh Post newspaper Phnom Penh Post - ប្រាក់ $៤ ពាន់​របស់​ជំទាវ មុន្នីកា កាកបាទ​ក្រហម​មិន​ទទួល​ព្រោះ​ជា​ប្រាក់​មិន​ស្អាត

ប្រាក់ $៤ ពាន់​របស់​ជំទាវ មុន្នីកា កាកបាទ​ក្រហម​មិន​ទទួល​ព្រោះ​ជា​ប្រាក់​មិន​ស្អាត

ជំទាវ សម មុន្នីកា ក្នុង​ពិធី​ទទួល​សំណង​ជំងឺ​ចិត្ត ៤ ពាន់​ដុល្លារ​ពី​ភាគី​តាក់ស៊ី។
ជំទាវ សម មុន្នីកា ក្នុង​ពិធី​ទទួល​សំណង​ជំងឺ​ចិត្ត ៤ ពាន់​ដុល្លារ​ពី​ភាគី​តាក់ស៊ី។ រូបថត សហការី

ប្រាក់ $៤ ពាន់​របស់​ជំទាវ មុន្នីកា កាកបាទ​ក្រហម​មិន​ទទួល​ព្រោះ​ជា​ប្រាក់​មិន​ស្អាត

ភ្នំពេញៈ កាកបាទ​ក្រហម​កម្ពុជា បាន​បដិសេធ​មិន​ទទួល​ប្រាក់​បរិច្ចាគ​សប្បុរស​ធម៌​ពី​លោក​ស្រី សម មុន្នីកា រដ្ឋ​លេខាធិការ​ក្រសួង​ទេសចរណ៍ ដោយ​សារ​ប្រាក់​នោះ​ជា​ប្រាក់​សំណង​ជំងឺ​ចិត្ត​ដែល​លោក​ស្រី​ទារ​បាន​ពី​អ្នក​រត់​ឡាន​តាក់ស៊ី​បង្ក​កំហុស​គ្រោះ​ថ្នាក់​ដោយ​អចេតនា​ម្នាក់ ប៉ុន្តែ ករណី​នេះ​លោក​ស្រី សម មុន្នីកា អះអាង​ថា រឿង​នេះ​ជា​រឿង​អយុត្តិធម៌​សម្រាប់​លោក​ស្រី​ទៅ​វិញ​ទេ។

ក្នុង​សេចក្តី​ជូន​ដំណឹង​ចុះ​ថ្ងៃ ទី១៣ ខែ​វិច្ឆិកា កាកបាទ​ក្រហម​កម្ពុជា បាន​បំភ្លឺ​ដល់​សាធារណជន​ថា កាកបាទ​ក្រហម​មិន​មាន​ទំនាក់​ទំនង​និង​មិន​ពាក់​ព័ន្ធ​នឹង​ថវិកា​របស់​លោក​ស្រី សម មុន្នីកា ព្រម​ទាំង​បដិសេធ​មិន​ទទួល​ប្រាក់​សប្បុរស​ធម៌​នោះ​ឡើយ។

អគ្គ​លេខាធិការ​កាកបាទ​ក្រហម​កម្ពុជា លោក​ស្រី ពុំ ចន្ទីនី បាន​បន្ថែម​ថា៖ «យើង​ដឹង​ថា លុយ​នោះ​មក​ពី​ណា កាកបាទ​ទាល់​តែ​លុយ​ស្អាត​សុទ្ធ​ចិត្ត​ទើប​យើង​យក លុយ​បែប​ហ្នឹង កាកបាទ​មិន​យក​ទេ»។

តាម​ការ​បញ្ជាក់​ពី​ភាគី​ពាក់​ព័ន្ធ​ក្នុង​ហេតុ​ការណ៍​គ្រោះ​ថ្នាក់​កាល​ពី​ព្រឹក​ថ្ងៃ ទី១៩ ខែ​តុលា អ្នក​បើកបរ​ឈ្មោះ ខឹម មករា បើក​រថយន្ត​តាក់ស៊ី សាំយ៉ុង ពណ៌​សម្បក​ឪឡឹក ស្លាក​លេខ ភ្នំពេញ 2AA-8934 ដឹក​អ្នក​ដំណើរ ១៥ នាក់ ចេញ​ពី​ចំណត​រថយន្ត​មុខ​ស្ថានីយ​រថភ្លើង​ភ្នំពេញ ឆ្ពោះ​ទៅ ខេត្ត​រតនគិរី។

ក្រោយ​ហេតុ​ការណ៍​អ្នក​ដំណើរ ១០ នាក់​សុខ​ចិត្ត​នាំ​គ្នា​ជិះ​រថយន្ត​ផ្សេង​បន្ត​ដំណើរ​ទៅ​មុខ ប៉ុន្តែ​អ្នក​ដំណើរ ៤​នាក់ មាន​ឋានៈ​ជា​លោក​ជំទាវ​មិន​សុខ​ចិត្ត ក៏​បាន​ដាក់​ពាក្យ​ប្តឹង​ទៅ​ឲ្យ​ប៉ូលិស​ឃាត់​រថយន្ត​ដើម្បី​ទាម​ទារ​សំណង​ជំងឺ​ចិត្ត​ម្នាក់ៗ​ទារ ១ ពាន់​ដុល្លារ​អាមេរិក។ ក្រោយ​ពី​រង​បណ្តឹង​នោះ​មាន​លិខិត​សុំទោស ២ ដែល​ផ្ញើ​ទៅ​ដើម​បណ្តឹង​ត្រូវ​បាន​ចែក​ចាយ​និង​បង្ហោះ​លើ​បណ្តាញ​ហ្វេសប៊ុក​សារភាព​ពី​កង្វះ​ខាត ការ​ត្រួត​ពិនិត្យ​បច្ចេកទេស។

តាម​រយៈ​ការ​បង្ហោះ​រឿង​នេះ លោក ផែង វណ្ណៈ និង​សប្បុរស​ជន​ជា​បន្ត​បន្ទាប់​មាន​ទាំង​មន្រ្តី​ជាន់​ខ្ពស់​រដ្ឋាភិបាល និង​សាច់​ញាតិ​នាយក​រដ្ឋ​មន្ត្រី ប្រិយមិត្ត​ក្នុង​ហ្វេសប៊ុក បាន​ឧបត្ថម្ភ​ប្រាក់​រហូត​បាន​គ្រប់ ៤ ពាន់​ដុល្លារ និង​បាន​ប្រគល់​ដល់​ផ្ទះ​ដល់​ដៃ​ដើម​បណ្តឹង លោក​ស្រី សម មុន្នីកា និង​លោក​ស្រី​ដើម​បណ្តឹង ៣ នាក់​ទៀត។

លោក ផែង វណ្ណៈ បញ្ជាក់​ថា៖ «គាត់​បាន​មក​រក​ខ្ញុំ ហើយ​ខ្ញុំ​កៀរ​គរ​រៃ​អង្គាស​នេះ​គឺ​ដោយ​សារ​តែ​ខ្ញុំ​អាណិត​គាត់​ជា​ជន​ក្រីក្រ មិន​មាន​ប្រាក់​សង​គេ»។

កាល​ពី​ម្សិល​មិញ​នេះ លោក​ស្រី គឹម សុវណ្ណា អនុ​ប្រធាន​មន្ទីរ​ទេសចរណ៍ រាជធានី​ភ្នំពេញ ស្រ្តី​ម្នាក់​ក្នុង​ចំណោម​ដើម​បណ្តឹង ៤​នាក់ បាន​បង្ហាញ​លិខិត​បំភ្លឺ​មួយ​អះអាង​ថា លោក​ស្រី​មិន​ជាប់​ពាក់​ព័ន្ធ​នឹង​ការ​ទារ​សំណង​ជំងឺ​ចិត្ត​នេះ​ឡើយ។ លោក​ស្រី​បន្ត​ថា៖ «នៅ​ថ្ងៃ​កើត​ហេតុ​នោះ​ខ្ញុំ​បាន​និយាយ​ថា ខ្ញុំ​មិន​ទាមទារ​សំណង​ទេ ហើយ​មក​ទល់​ពេល​នេះ ខ្ញុំ​ក៏​មិន​បាន​ទទួល​ប្រាក់​នោះ​ដែរ»។

ឆ្លើយ​តប​នឹង​រឿង​ទាំង​នេះ​រដ្ឋ​លេខាធិការ​ក្រសួង​ទេសចរណ៍ លោក​ស្រី សម មុន្នីកា បាន​ចាត់​ទុក​ថា រឿង​ដែល​កើត​ឡើង​ទាំង​អស់ គឺ​លោក​ស្រី​ជា​អ្នក​រង​គ្រោះ​និង​បាន​កំពុង​តែ​បាត់​បង់​កិត្តិយស។ លោក​ស្រី​រៀប​រាប់​ថា៖ «នៅ​ថ្ងៃ​នោះ​អ្នក​បើក​បរ​ឈ្មោះ ខឹម មករា មាន​អាយុ ២២​ឆ្នាំ មិន​មាន​ប័ណ្ណ​បើកបរ​ទេ បើក​ក្នុង​ល្បឿន ១២០ គីឡូម៉ែត្រ ក្នុង ១ ម៉ោង ដៃ​ម្ខាង​និយាយ​ទូរស័ព្ទ​ជាមួយ​សង្សារ ទោះ​បី​ណែនាំ​ឲ្យ​បើក​យឺត​ក៏​មិន​ស្តាប់ ក្រោយ​មក​ឆ្កែ​រត់​កាត់ ក៏​វេរ​ទប់​មិន​ជាប់​ធ្លាក់​ចូល​ទួល​ផ្លូវ​ម្ខាង ខ្ញុំ​ស្មាន​តែ​ខ្ញុំ​មិន​អាច​រស់​ផង​ទេ»។

លោក​ស្រី​បន្ត​ថា៖ «ក្រោយ​កើត​ហេតុ ប៉ូលិស​បាន​ឃាត់​ឡាន​ទុក។ ៣ ទៅ ៤ ថ្ងៃ​ក្រោយ​ខ្ញុំ​ទៅ​ពិនិត្យ​ពេទ្យ​ឃើញ​ស្រាំ​ឆ្អឹង​ជើង ទើប​ទាក់​ទង​ទៅ​ប៉ូលិស ម្យ៉ាង​មិន​ឃើញ​មាន​ធ្វើ​កំណត់​ហេតុ​សោះ។ ខ្ញុំ​ដឹង​ច្បាស់​ម្ចាស់​ឡាន គឺជា​ថៅកែ​ដ៏​មាន​ម្នាក់​ឈ្មោះ គឹម ពិសិដ្ឋ។ គេ​មិន​បាន​សួរ​នាំ​ខ្ញុំ​ទេ ទើប​ខ្ញុំ​សម្រេច​ចិត្ត​ដាក់​បណ្តឹង​ទារ​សំណង​ពី​ថៅកែ​ឡាន​នោះ។ ប៉ុន្តែ​ក្រោយ​មក​ឈ្មោះ ផែង វណ្ណៈ បែរ​ជា​កាឡៃ​ព័ត៌មាន​ផ្សព្វ​ផ្សាយ ធ្វើ​ឲ្យ​ខ្ញុំ​ខូច​កិត្តិ​យស​អស់​រលីង​តែ​ម្តង»។

ភ្នំពេញ ប៉ុស្តិ៍ មិន​អាច​សុំ​ការ​បំភ្លឺ​ពី​ឈ្មោះ គឹម ពិសិដ្ឋ និង​អ្នក​បើក​ឡាន ខឹម មករា បាន​ទេ ដោយ​ទូរស័ព្ទ​ត្រូវ​បាន​បិទ។ ប៉ុន្តែ លោក ផែង វណ្ណៈ អះអាង​ថា អ្នក​បើក​ឡាន​ត្រេកអរ​ជា​ខ្លាំង បន្ទាប់​ពី​មាន​ការ​ជួយ​ជ្រោម​ជ្រែង​ពី​អ្នក​លេង​ហ្វេសប៊ុក​និង​សប្បុរស​ជន​នានា។

ជុំវិញ​ថវិកា​បរិច្ចាគ​ដែល​កាកបាទ​ក្រហម​បដិសេធ​នោះ លោក​ស្រី សម មុន្នីកា ប្រាប់​ថា គាត់​មិន​សោក​ស្តាយ​ទេ​ហើយ​លុយ​ទាំង​នោះ លោក​ស្រី ក៏​បាន​បរិច្ចាគ​ទៅ​កាន់​មន្ទីរពេទ្យ​គន្ធបុប្ផា នៅ​ថ្ងៃ​ម្សិល​មិញ​នេះ ដោយ​មាន​លិខិត​ថ្លែង​អំណរគុណ​ត្រឹម​ត្រូវ។ លោក​ស្រី សម មុន្នីកា បន្ថែម​ថា៖ «ចំពោះ​ការ​បដិសេធ​មិន​ពាក់​ព័ន្ធ​របស់​លោក​ស្រី គឹម សុវណ្ណា វិញ​គឺ​ខ្ញុំ​មិន​ខ្វល់​នោះ​ទេ សំខាន់​ពេល​នេះ​កិត្តិយស​ខ្ញុំ បាន​ខូច​អស់​ហើយ។ ទាំង​នេះ​ជា​ការ​ពិត ដែល​ខ្ញុំ​ចង់​បក​ស្រាយ»។ លោក​ស្រី សម មុន្នីកា ត្រូវ​គេ​ស្គាល់​ថា ជា​ភរិយា​របស់​លោក ប៉ុល លឹម រដ្ឋ​លេខាធិការ​ក្រសួង​មហា​ផ្ទៃ។ ដោយ​ឡែក​ភាគី​ដើម​បណ្តឹង ២ នាក់​ទៀត​នៅ​មិន​ទាន់​កំណត់​អត្ត​សញ្ញាណ​បាន​ទេ​កាល​ពី​ម្សិល​មិញ៕

អត្ថបទគួរចាប់អារម្មណ៍