.jpg)
ការិយាល័យប្រៃសណីយ៍កម្ពុជា។ រូបថត Cambodia Post
ភ្នំពេញៈ ប្រៃសណីយ៍កម្ពុជាកាលពីថ្ងៃទី ១៨ ខែមេសា បានជូនដំណឹងដល់អតិថិជនស្ដីពីការផ្អាកទទួលបញ្ញើផ្ញើទៅគ្រប់ប្រទេសទាំងអស់ដោយសារតែបញ្ហាជំងឺកូវីដ ១៩ ដែលជាហេតុធ្វើឱ្យមធ្យោបាយដឹកជញ្ជូនតាមផ្លូវអាកាសអាក់ខានស្ទើរតែទាំងស្រុង និងមិនទាន់បានកំណត់ពេលថានឹងបើកទទួលបញ្ញើឡើងវិញនៅពេលណានោះទេ។
សេចក្ដីជូនដំណឹងបានឲ្យដឹងថា ការផ្អាកទទួលបញ្ញើនេះដោយសារបញ្ហាជំងឺកូវីដ ១៩ ដែលបណ្តាលឱ្យមធ្យោបាយដឹកជញ្ជូនតាមផ្លូវអាកាសអាក់ខានស្ទើរតែទាំងស្រុង ក៏ប៉ុន្តែបានបញ្ជាក់ក្នុងខ្លឹមសារថា ការបើកទទួលផ្ញើបញ្ញើឡើងវិញនឹងជូនដំណឹងនៅពេលខាងមុខ។
បន្ថែមពីលើសេចក្ដីជូនដំណឹងនេះលោក អោក បូរ៉ា អគ្គនាយកប្រៃសណីយ៍កម្ពុជាបានថ្លែងកាលពីម្សិលមិញថា៖ «ដោយបញ្ហាកូវីដបានធ្វើឱ្យជើងហោះហើរតាមរយៈ Thai airway, Dragon Air, Malay Air, ANA air ត្រូវបានផ្អាកទាំងស្រុងរហូតដល់ថ្ងៃ ៣០ មេសា ទើបគេជូនដំណឹងជាថ្មីហើយមិនទាន់ប្រាកដប្រជាថាបើកដំណើរការឡើងវិញពេលណាទេ។ បញ្ញើរបស់ប្រៃសណីយ៍កម្ពុជាទៅតាមជើងហោះហើរទាំង ៤ ខាងលើ»។
លោកបានបញ្ជាក់ថា៖ «ការផ្អាកនេះចំពោះតែបញ្ញើទៅអន្តរជាតិតាមជើងហោះហើរប៉ុណ្ណោះ។ ចំណែកសេវាកម្មក្នុងប្រទេសយើងបន្តបើកធម្មតា ដូចជាសេវាផ្ទេរប្រាក់អីក៏យើងបើកធម្មតាដែរ។ ការផ្អាកនេះសម្រាប់តែបញ្ញើទៅអន្តរជាតិទេដែលយើងអត់មានជើងហោះហើរព្រោះគ្រប់ជើងហោះហើរទាំងអស់គេបិទអស់ហើយយើងមិនអាចដាក់បញ្ញើទៅបានទេ»។
បើតាមប្រៃសណីយ៍កម្ពុជា បច្ចុប្បន្ននេះខ្លួនមានគោលដៅ និងបេសកកម្មផ្អែកលើការអនុវត្តការងារដោយស្វ័យភាពលើរដ្ឋបាលអាជីកម្ម និងហិរញ្ញវត្ថុដោយមានក្រុមប្រឹក្សាភិបាលជាអ្នកដឹកនាំស្របតាមគោលនយោបាយរបស់រាជរដ្ឋាភិបាល។ គោលបំណងនេះគឺជួយជំរុញកំណើនសេដ្ឋកិច្ចសង្គមរួមចំណែកកាត់បន្ថយភាពក្រីក្រ និងលើកកម្ពស់ជីវភាពនិយោជិតដោយបានបន្តការអនុវត្តកម្មវិធីកំណែទម្រង់ស៊ីជម្រៅទាំងផ្នែករចនាសម្ព័ន្ធរដ្ឋបាល និងហិរញ្ញវត្ថុ។
ក្រៅពីនេះប្រៃសណីយ៍កម្ពុជាមានគោលដៅ បម្រើសេវាកម្ម អាជីវកម្មប្រៃសណីយ៍ក្នុង និងក្រៅប្រទេសដោយមិនប្រកាន់ពូជសាសន៍ ពណ៌សម្បុរ និន្នាការនយោបាយ និងសាសនាដោយមានបេសកកម្ម និងភារកិច្ចបម្រើសេវាទទួលប្រមូល ដឹកជញ្ជូន និងបែងចែករាល់បញ្ញើសំបុត្រគ្រប់ប្រភេទ។ បញ្ញើប្រៃសណីយ៍ភណ្ឌ និងបញ្ញើឆាប់រហ័សក្នុង និងក្រៅប្រទេស។ បម្រើសេវាទទួល និងបែងចែកវិក្កយបត្ររបស់ស្ថាប័នរដ្ឋ ក្រុមហ៊ុន និងអង្គការនានាតាមកិច្ចព្រមព្រៀង។ លក់តែមប្រិ៍ប្រៃសណីយ៍ក្នុង និងក្រៅប្រទេស។ លក់សម្ភារផលិតផលផ្សេងៗសម្រាប់បម្រើវិស័យប្រៃសណីយ៍ និងទូរគមនាគមន៍។ បម្រើសេវាហិរញ្ញវត្ថុប្រៃសណីយ៍។
ទាក់ទិននឹងការហោះហើរតាមយន្តហោះកាលពីថ្ងៃ ១៦ មេសា លោក ស៊ីន ចាន់សិរីវត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលធ្លាប់បានថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋលេខាធិការដ្ឋានអាកាសចរស៊ីវិល» ថាចាប់ពីខែកុម្ភៈដល់ពាក់កណ្ដាលខែមេសា ភ្ញៀវទេចរធ្វើដំណើរតាមយន្តហោះបានធ្លាក់ចុះជាង ៩០ ភាគរយ ដោយសារតែបញ្ហាជំងឺកូវីដ១៩នេះ។
លោកថា៖ «ចំពោះស្ថានភាពអាកាសចរណ៍ក្នុងស្រុកយើងនៅមិនទាន់បានវិភាគនោះទេព្រោះវាកំពុងស្ថិតក្នុងពេលអន្តរកាល។ ខ្ញុំបានទំនាក់ទំនងជាមួយក្រុមហ៊ុនអាកាសចរណ៍នានាហើយគាត់ថាមិនទាន់មានព័ត៌មានជាក់លាក់ទេ។ ប៉ុន្ដែយើងអាចប៉ាន់ស្មានបាននូវទំហំនៃការថយចុះចំនួនអ្នកដំណើរចាប់ពីខែកុម្ភៈដល់ត្រឹមពាក់កណ្ដាលខែមេសា»៕
