ភ្នំពេញៈ អ្នកបើករថយន្ត និងបកប្រែភាសាចិនម្នាក់ ត្រូវក្រុមចោរប្លន់បាញ់សម្លាប់ក្នុងរថយន្តខណៈជនរងគ្រោះដឹកថៅកែចិន ចេញពីកាស៊ីណូណាហ្គា នៅរាជធានីភ្នំពេញ ហើយត្រូវចោរស្ទាក់បាញ់ប្លន់យកលុយអស់១ម៉ឺន៨ពាន់ដុល្លារ កាលពីវេលាទៀបភ្លឺថ្ងៃទី៩ ខែធ្នូ នៅក្បែរផ្សារសំណង់១២ ក្នុងខណ្ឌទួលគោក។
លោក ហួត ចាន់យ៉ារ៉ាន់ អធិការនគរបាលខណ្ឌទួលគោកកាលពីម្សិលមិញបានប្រាប់ថាឃាតកបាញ់សម្លាប់អ្នកបើករថយន្តនិងអ្នកបកប្រែឲ្យថៅកែចិន កាលពីទៀបភ្លឺថ្ងៃទី៩នោះ នៅមិនទាន់ចាប់ខ្លួនបាននៅឡើយទេ។
លោកថ្លែងថា៖«កម្លាំងសមត្ថកិច្ចកំពុងតែស្រាវជ្រាវនិងស្វែងរកចាប់ខ្លួនជនល្មើស»។
លោក ស៊ុន ប៊ុនរី នាយនគរបាលប៉ុស្តិ៍សង្កាត់ទឹកល្អក់៣ ពីម្សិលមិញប្រាប់ថា ហេតុការណ៍ប្លន់បាញ់សម្លាប់នេះបានកើតឡើងម៉ោងជាង៣ទៀបភ្លឺ ថ្ងៃទី៩ ខែធ្នូ ហើយបើតាមការបំភ្លឺពីសាក្សីថា ជនរងគ្រោះបើករថយន្តចេញពីកាស៊ីណូណាហ្គា។ លោកថា ជនរងគ្រោះ និងថៅកែជនជាតិចិន បានបើករថយន្តម៉ាកឡិចស៊ីស RX-300 ពណ៌ខ្មៅពាក់ស្លាកលេខភ្នំពេញ 2I-3658 ហើយមកដល់មុខផ្ទះ លេខ៧B របស់ជនរងគ្រោះនៅផ្លូវ២៦៥ ភូមិ១៣ សង្កាត់ទឹកល្អក់ទី៣ ខណ្ឌទួលគោក ក្បែរផ្សារសំណង់១២ក៏ត្រូវជនសង្ស័យធ្វើសកម្មភាពប្លន់និងបាញ់សម្លាប់តែម្តង។
លោកនាយប៉ុស្តិ៍បានប្រាប់ទៅតាមការរៀបរាប់របស់សាក្សីថាលោក ហ៊ូ ជិនចាំង ភេទប្រុស អាយុ ២៧ឆ្នាំ មានមុខរបរ ជាអ្នកបកប្រែភាសាចិន និងជាអ្នកបើករថយន្តផង បានបើករថយន្តដឹកថៅកែរបស់ខ្លួនឈ្មោះ ឈិន ជីនពីង ភេទប្រុស អាយុជាង៤០ឆ្នាំចេញពីកាស៊ីណូណាហ្គា។ពេលមកដល់មុខផ្ទះស្រាប់តែមានជនសង្ស័យ២នាក់ ជិះម៉ូតូ ម៉ាកសេ១២៥ ស៊េរី២០០៩មិនចាំស្លាកលេខ ដកកាំភ្លើងបាញ់មួយគ្រាប់សំដៅជនរងគ្រោះនិងដណ្តើមប្លន់យកលុយពីថៅកែចំនួន១៨ ០០០ដុល្លារ និងជិះគេចខ្លួនដោយសុវត្ថិភាព។
លោកប្រាប់ថា ៖ «អ្នកបកប្រែនិងជាអ្នកបើករថយន្តនោះត្រូវចោរបាញ់ចំបំពង់ក១គ្រាប់ស្លាប់ភ្លាមៗនៅកន្លែងកើតហេតុតែថៅ កែចិនមិនរងរបួសទេ»៕
