.jpg)
ទីតាំងរោងដែលផ្ទុះកាំជ្រួច បណ្តាលឲ្យបុរសម្នាក់ស្លាប់ពីម្សិលមិញ។ រូបថត នគរបាល
ខេត្តតាកែវ: បុរសម្នាក់បានស្លាប់ដោយសារផ្ទុះកាំជ្រួចបណ្តាលឲ្យដាច់ក្បាលចេញពីខ្លួនពីម្សិលមិញនៅទីតាំងដីឡូត៍ ១ កន្លែងជិតផ្ទះស្នាក់របស់គាត់ក្នុងភូមិហនុមាន ឃុំក្រាំងធ្នង់ ស្រុកបាទី ខេត្តតាកែវ ដោយសមត្ថកិច្ចជំនាញសន្និដ្ឋានថា មកពីគាត់ផលិត កាំជ្រួចលាយរំសេវខុសបច្ចេកទេស។
លោក ឃុត ឡូ អធិការរងនគរបាលស្រុកបាទីបានប្រាប់ភ្នំពេញប៉ុស្ដិ៍ពីម្សិលមិញថា ជនរងគ្រោះឈ្មោះ កែវ ឈិន អាយុ ៥០ ឆ្នាំមានមុខរបរជាអ្នកធ្វើកាំជ្រួចលក់គ្រប់ធុន សម្រាប់បាញ់ក្នុងពិធីបុណ្យផ្សេងៗ។ ជនរងគ្រោះមានលំនៅក្នុងឃុំកណ្ដឹង ស្រុកបាទី ប៉ុន្ដែបានមកបើកកន្លែងផលិតកាំជ្រួចនៅឃុំក្រាំងធ្នង់ ស្រុកបាទីដែលជាកន្លែងកើតហេតុខាងលើ។
លោកបន្តថា ជនរងគ្រោះប្រកបមុខរបរនេះច្រើនឆ្នាំមកហើយដែលជាមុខរបរតពីដូនតារបស់គាត់។ កាលពីប៉ុន្មានឆ្នាំមុនក៏ធ្លាប់មានករណីផ្ទុះបែបនេះដែរ ប៉ុន្ដែមិនមានគ្រោះថ្នាក់ដល់អាយុជីវិតទេ ដោយគ្រាន់តែផ្ទុះ។ បន្ទាប់មក ជនរងគ្រោះបានមកសាងសង់រោងនៅក្នុងដីឡូត៍មួយដាច់ដោយឡែកពីផ្ទះ សម្រាប់ទុកធ្វើជាកន្លែងផលិតកាំជ្រួច។
អធិការរងនិយាយថា នៅថ្ងៃកើតហេតុនេះភរិយាជនរងគ្រោះបានទៅផ្សារ និងកូនៗបានទៅសាលារៀន រីឯជនរងគ្រោះបានសំងំធ្វើកាំជ្រួចនៅក្នុងរោងសិប្បកម្មដូចសព្វមួយដង។ ប៉ុន្ដែប្រមាណម៉ោង ៩ ព្រឹកថ្ងៃទី ១៣ ខែកុម្ភៈ ស្រាប់តែគេឮសំឡេងចេញពីរោងសិប្បកម្មផលិតកាំជ្រួចរបស់ជនរងគ្រោះ ដោយអ្នកភូមិបាននាំគ្នាទៅមើល ហើយក៏ឃើញជនរងគ្រោះស្លាប់ដោយដាច់ក្បាលចេញពីខ្លួនទៅហើយលោកបញ្ជាក់ថា ៖ «ក្រោយពេលមានការរាយការណ៍ពីអ្នកភូមិ សមត្ថកិច្ចជំនាញបានចុះទៅត្រួតពិនិត្យជាក់ស្ដែង ដោយយើងបានរកឃើញថា គឺជនរងគ្រោះបានលាយរំសេវខុសបច្ចេកទេស ទើបបណ្ដាលឲ្យផ្ទុះតែម្ដង។ ជនរងគ្រោះមានតែម្នាក់គាត់ហ្នឹងទេ អត់មានអ្នកផ្សេងនៅក្បែរហ្នឹងទេ គឺនៅធ្វើកាំជ្រួចតែម្នាក់ឯង។ នៅស្រុកបាទីយើងនេះ មានកន្លែងសិប្បកម្មផលិតកាំជ្រួចជាលក្ខណៈគ្រួសារប្រហែល ៣ កន្លែង តែពួកគាត់បានសុំច្បាប់ហើយ»។
លោក ឃុត ឡូ បន្ថែមថាអាជីវកម្មផលិតកាំជ្រួចនេះមិនមានច្បាប់ត្រឹមត្រូវទេ ដោយវាជាអាជីវកម្មលក្ខណៈគ្រួសារតូចមួយដែលគាត់បានចេះធ្វើបន្តពីឪពុកម្ដាយ។ កន្លងមកនេះអាជ្ញាធរធ្លាប់បានអប់រំ ណែនាំអំពីសុវត្ថិភាពជាចម្បង និងហាមមានមនុស្សក្មេង ចាស់ទៅក្បែររោងសិប្បកម្មផលិតកាំជ្រួចនោះ។
លោក នុត ភួង នាយប៉ុស្ដិ៍រដ្ឋបាលឃុំក្រាំងធ្នង់បានថ្លែងថា ជនរងគ្រោះបានស្លាប់ដោយការផ្ទុះកាំជ្រួច ក្រោយដែលរូបគាត់បានលាយរំសេវហើយ ញាត់ចូលក្នុងបំពង់កាំជ្រួច។ បន្ទាប់មកទៀតគាត់បានយកវត្ថុរឹងទៅបុកញាត់រំសេវឲ្យចូលក្នុងបំពង់នោះបានណែនល្អ ប៉ុន្ដែអំឡុងពេលបុករំសេវនោះក៏បណ្ដាលឲ្យផ្ទុះតែម្ដង។
លោកបន្តថា ជនរងគ្រោះបានប្រកបមុខរបរនេះជាយូរណាស់មកហើយ ប៉ុន្ដែនៅប៉ុន្មានចុងក្រោយនេះលោកបានធ្វើខុសបច្ចេកទេសម្ដង បណ្ដាលឲ្យឆេះផ្ទះ ហើយត្រូវបានមន្ត្រីជំនាញខេត្តតាកែវហៅទៅអប់រំណែនាំអំពីហានិភ័យសម្រាប់ខ្លួនគាត់ និងអ្នកដែលរស់នៅជុំវិញគាត់ ព្រមទាំងតម្រូវឲ្យគាត់សុំច្បាប់ធ្វើអាជីវកម្មផងដែរ។
លោកបញ្ជាក់ថា៖ «ជាការពិត គាត់រស់នៅឃុំកណ្ដឹង ប៉ុន្ដែគាត់មានដីឡូត៍ គាត់មួយនៅឃុំក្រាំងធ្នង់ដែលជិតផ្ទះគាត់ដែរ (គ្មានអ្នកភូមិនៅក្បែរ) រួចក៏បានសាងសង់រោងមួយ ដើម្បីផលិតកាំជ្រួចនេះ នៅពេលមានគេទិញកាំជ្រួចទៅបាញ់តាមពិធីបុណ្យសព ឬពិធីបុណ្យនានា គាត់ក៏ទៅធ្វើលក់ឲ្យគេដូចសព្វមួយដង។ ខ្ញុំអត់ច្បាស់ថា គាត់ធ្វើហ្នឹងមានច្បាប់ ឬអត់ទេ តែមន្ត្រីជំនាញខេត្តធ្លាប់ហៅគាត់ទៅព្រមានម្ដងដែរ»៕
