.jpg)
ទិដ្ឋភាពពលរដ្ឋលេងកម្សាន្តនៅទឹកជ្រោះភ្នំត្បែង ខេត្តព្រះវិហារ ឆ្នាំ ២០១៩។ ហុង មិនា
ភ្នំពេញៈ ក្រសួងទេសចរណ៍កំពុងរៀបចំ «សៀវភៅផែនការអភិវឌ្ឍន៍ផែនទី បង្ហាញផ្លូវទេសចរណ៍ភាគពាយព្យ ឧត្តរ និងតំបន់ជុំវិញបឹងទន្លេសាប» ដើម្បីពង្រឹង និងពង្រីកទំនាក់ទំនងខេត្តក្នុងតំបន់ និងផ្សព្វផ្សាយពីសក្តានុពលទេសចរណ៍ ជាពិសេសតភ្ជាប់ខ្សែក្រវាត់តែមួយលើវិស័យទេសចរណ៍រវាងខេត្តចំនួន ៩ ក្នុងតំបន់ទាំងនេះ។
លោក ម៉ែន ភារម្យ ប្រធាននាយកដ្ឋានផែនការអភិវឌ្ឍន៍ទេសចរណ៍នៃក្រសួងទេសចរណ៍ប្រាប់ភ្នំពេញប៉ុស្ដិ៍កាលពីថ្ងៃទី ៣ មិថុនា ថាក្រុមការងារក្រសួងទេសចរណ៍បានរៀបចំតាក់តែង «សៀវភៅផែនការអភិវឌ្ឍន៍ ផែនទីបង្ហាញផ្លូវទេសចរណ៍ ភាគពាយព្យ ឧត្តរ និងតំបន់ជុំវិញបឹងទន្លេសាប» ជាង ១ ឆ្នាំមកហើយ និងគ្រោងបញ្ចប់នៅខែមិថុនានេះ រួចដាក់ទៅរដ្ឋមន្ដ្រីក្រសួងទេសចរណ៍ដើម្បីពិនិត្យ អនុម័តដាក់ឲ្យប្រើប្រាស់ជាផ្លូវការ។
លោកថ្លែងថា កាលពីថ្ងៃទី ២ មិថុនា ក្រសួងទេសចរណ៍តាមរយៈមន្ទីរទេសចរណ៍ខេត្តបន្ទាយមានជ័យបានរៀបចំកិច្ចប្រជុំចុងក្រោយដើម្បីពិនិត្យលើ «សៀវភៅផែនការអភិវឌ្ឍន៍ផែនទីបង្ហាញផ្លូវទេសចរណ៍ ភាគពាយព្យ ឧត្តរ និងតំបន់ជុំវិញបឹងទន្លេសាប» ជាមួយតំណាងមកពីខេត្ដចំនួន ៩ នៃតំបន់ភាគពាយព្យ ឧត្តរ និងតំបន់ជុំវិញបឹងទន្លេសាប។ ខេត្ដទាំង ៩ នោះរួមមាន ខេត្តព្រះវិហារ ឧត្តរមានជ័យ បន្ទាយមានជ័យ ប៉ៃលិន កំពង់ធំ សៀមរាប បាត់ដំបង ពោធិ៍សាត់ និងខេត្តកំពង់ឆ្នាំង។
លោក ភារម្យ ថ្លែងថា៖ «កិច្ចប្រជុំកាលពីថ្ងៃអង្គារកន្លងទៅនេះ យើងបានប្រជុំគ្នាដើម្បីយកធាតុចូលចុងក្រោយដើម្បីដាក់នៅក្នុងសៀវភៅរបស់យើង ត្រៀមដាក់ទៅសុំការឆ្លងពីឯកឧត្ដមរដ្ឋមន្ដ្រីក្រសួងទេសចរណ៍ [ថោង ខុន]។ គោលដៅនៃការរៀបចំសៀវភៅនេះគឺជាផែនទីបង្ហាញដល់ភ្ញៀវទេសចរជាតិ អន្តរជាតិ ពេលដែលចង់មកលេងកម្សាន្តនៅតំបន់ទេសចរណ៍សក្តានុពលតាមតំបន់ខាងលើគាត់អាចឃើញនៅក្នុងសៀវភៅនេះ គឺមានគោលដៅទេសចរណ៍ធំៗទាំងអស់»។
លោកបន្តថាក្រោយបញ្ចប់វិបត្ដិកូវីដ១៩ ក្រសួងទេសចរណ៍មានគោលបំណងណែនាំដល់ទេសចរជាតិ អន្តរជាតិពីគោលដៅទេសចរណ៍ថ្មីនៅខេត្តតាមតំបន់ទន្លេសាបតែម្ដង។ ក្នុងនោះ [ភ្ញៀវ] ទេសចរអាចទស្សនាគោលដៅទេសចរណ៍ ៣ ដែលសំខាន់គឺទេសចរណ៍បែបវប្បធម៌ ធម្មជាតិ និងកសិទេសចរណ៍។
លោកបញ្ជាក់ថា៖ «សៀវភៅនេះក៏ជាស្ពានមួយសម្រាប់ការវិនិយោគ ដែលសៀវភៅនេះបានបង្ហាញពីតំបន់សក្តានុពលទេសចរណ៍សំខាន់ៗដែលពួកគាត់អាចចាប់ឱកាសទៅវិនិយោគបាន»។
លោក តុប សុភ័ក អ្នកនាំពាក្យក្រសួងទេសចរណ៍បានបញ្ជាក់ពីថ្ងៃទី ៣ មិថុនា ដែរថា តាមរយៈសៀវភៅផែនការអភិវឌ្ឍន៍ផែនទីបង្ហាញផ្លូវទេសចរណ៍គឺកាន់តែជំរុញឲ្យខេត្តបន្ទាយមានជ័យ និងខេត្តជុំវិញតំបន់ខាងលើក្លាយទៅជាសក្តានុពលថ្មីបន្ថែមទៀតស្របតាមទស្សនទានមាសស មាសបៃតង និងមាស ផលិតកម្មស្រូវ។
លោកថ្លែងថា៖ «ការអភិវឌ្ឍវិស័យទេសចរណ៍ប្រកបដោយបរិយាប័ន្ន គឺរួមចំណែកយ៉ាងសំខាន់ដល់ការអភិរក្សសម្បត្តិវប្បធម៌ធម្មជាតិប្រវត្តិសាស្ត្រ ព្រមទាំងរក្សាការពារ និងទប់ស្កាត់បម្រែបម្រួលអាកាសធាតុនៅកម្ពុជាផងដែរ។ និយាយជារួមផែនការអភិវឌ្ឍន៍ផែនទីបង្ហាញផ្លូវទេសរចរណ៍ពាយព្យ ឧត្តរ និងខេត្តជុំវិញបឹងទន្លេសាបគឺពិតជាកាលានុវត្តភាពថ្មី សម្រាប់វិស័យទេសចរណ៍សម្រាប់ជាផលប្រយោជន៍រួមទាំងអ្នកទេសចរ និងវិនិយោគក្នុងវិស័យទេសចរណ៍ ដើម្បីជាប្រទីបនៃផ្នត់គំនិតថ្មីៗក្នុងការរៀបចំជាកញ្ចប់ខ្សែទស្សនកិច្ចរួម និងបង្កលក្ខណៈងាយស្រួលដល់អ្នកទេសចរក្នុងគោលបំណងកម្សាន្តតាមបណ្តាតំបន់ទាំងនេះនាពេលអនាគត»។
លោក ឈឿន សេរីវុធ ប្រធានមន្ទីរទេសចរណ៍ ខេត្តបន្ទាយមានជ័យបានឲ្យដឹងថា តាមរយៈការរៀបចំសៀវភៅផែនការអភិវឌ្ឍន៍ផែនទីបង្ហាញផ្លូវទេសចរណ៍ខាងលើនេះបានរឹតបន្តឹងទំនាក់ទំនងខេត្ដនៅតំបន់ខាងលើឲ្យសហការគ្នាក្នុងការពង្រីកសក្តានុពលទេសចរណ៍តាមតំបន់របស់ខ្លួនបានប្រសើរឡើង និងមានភាពសម្បូរបែប។
លោកថ្លែងថា៖ «ខេត្តទាំង ៩ ក្នុងតំបន់ជុំវិញបឹងទន្លេសាបនឹងសហការគ្នារៀបចំតំបន់ទេសចរណ៍ជាខ្សែតែមួយតែម្ដង។ តាមរយៈផែនការអភិវឌ្ឍន៍ ផែនទីបង្ហាញផ្លូវទេសចរណ៍នេះខេត្ដនីមួយៗនឹងបន្តពិភាក្សារៀបប៉ូលទេសចរណ៍ប្លែកៗពីគ្នាដើម្បីឲ្យទេសចរជាតិ អន្តរជាតិមកលេងកម្សាន្ត»៕
