.jpg)
សាលារៀនមួយកន្លែងក្នុងខេត្តបន្ទាយមានជ័យត្រូវបានធ្វើជាមជ្ឈមណ្ឌលចត្តាឡីស័ក។ រូបថត សហការី
ភ្នំពេញៈ ក្រសួងអប់រំ យុវជន និងកីឡា គាំទ្រដោយប្រទេសស៊ុយអែត និងអង្គការយូនីសេហ្វរួមគ្នាការពារការអប់រំសម្រាប់កុមារ ដោយការផ្តល់ជូនជាសៀវភៅសិក្សាក្នុងមុខវិជ្ជាគោល ដើម្បីកុំឱ្យសិស្សានុសិស្សបោះបង់ការសិក្សាចោល ក្នុងអំឡុងពេលដែលសាលារៀនរបស់ពួកគេត្រូវបានប្រើប្រាស់ជាមជ្ឈមណ្ឌលចត្តាឡីស័កហើយមិនទាន់អាចចូលសិក្សាបាននៅឡើយ។
សេចក្តីប្រកាសព័ត៌មានរួមរបស់ស្ថាប័នទាំង ៣ ចុះថ្ងៃទី ២៤ កុម្ភៈ បានឱ្យដឹងថា ទោះជាបវេសនកាលឆ្នាំសិក្សាថ្មីត្រូវបានចាប់ផ្តើមកាលពីថ្ងៃទី ១១ ខែ មករា ឆ្នាំ ២០២១ ក៏ដោយ ក៏មានសាលាបឋមសិក្សាចំនួន ១៣ អនុវិទ្យាល័យចំនួន ១៨ និងវិទ្យាល័យចំនួន ១៩ ដែលមានទីតាំងនៅក្នុងខេត្តបាត់ដំបង បន្ទាយមានជ័យ និងឧត្តរមានជ័យ ពុំអាចបើកដំណើរការព្រមគ្នាជាមួយនឹងសាលារៀនដទៃទៀតឡើយ។
ស្ថាប័នទាំង ៣ នេះបានបន្តថា កត្តាដែលសាលារៀនទាំងនេះមិនទាន់អាចបើកដំណើរការបាន ព្រោះសាលារៀនទាំងនោះកំពុងត្រូវបានប្រើប្រាស់ជាមជ្ឈមណ្ឌលចត្តាឡីស័ក សម្រាប់ពលករចំណាកស្រុកកម្ពុជា ដែលបានវិលត្រឡប់ពីប្រទេសថៃ ដើម្បីជាកិច្ចខិតខំប្រឹងប្រែងបន្តរបស់រាជរដ្ឋាភិបាលកម្ពុជាក្នុងការទប់ស្កាត់ការចម្លងជំងឺកូវីដ ១៩។
ជាមួយនឹងបញ្ហានេះ ក្រសួងអប់រំ យុវជន និងកីឡាបានធ្វើការវាយតម្លៃរហ័សមួយលើតម្រូវការរបស់សិស្សានុសិស្សដែលរងផលប៉ះពាល់ពីបញ្ហានេះ ហើយបានរកឃើញថា ការខ្វះសៀវភៅសិក្សាគឺជាបញ្ហាប្រឈមធំជាងគេបំផុតមួយ ដែលសិស្សានុសិស្សកំពុងជួបប្រទះ ជាពិសេសសិស្សដែលត្រូវរៀនពីចម្ងាយនៅតាមផ្ទះ ឬដែលត្រូវទៅរៀននៅសាលាមួយទៀតនៅក្បែរសាលារៀនខ្លួន។
ដើម្បីឆ្លើយតបចំពោះតម្រូវការនេះ យូនីសេហ្វ ដោយមានការគាំទ្រថវិកាពីប្រទេសស៊ុយអែតបានទិញសៀវភៅសិក្សាមុខវិជ្ជាគោលសម្រាប់ចែកជូនសិស្សនៅក្នុងសាលាបឋមសិក្សា អនុវិទ្យាល័យ និងវិទ្យាល័យចំនួន ៥០ ចាប់ពីថ្នាក់ទី ១ ដល់ថ្នាក់ទី ១២។ ជាសរុប សៀវភៅសិក្សាចំនួន ៣៥ ០៥៥ ក្បាលត្រូវបានចែកជូនទៅដល់សាលារៀននៅតំបន់ភាគឦសាន ដែលបានជួយដល់សិស្សប្រមាណ ៣២ ៤៨៦ នាក់ ឱ្យអាចបន្តការសិក្សារបស់ពួកគេបាន។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានមានប្រសាសន៍ថា ក្រសួងអប់រំ ស្វាគមន៍ចំពោះការគាំទ្របន្ថែមពីយូនីសេហ្វ និងប្រទេសស៊ុយអែត សម្រាប់សាលារៀន និងសិស្សានុសិស្សដែលរងផលប៉ះពាល់ក្នុងខេត្តនានានៅជាប់ព្រំដែន។
លោករដ្ឋមន្ត្រីបានថ្លែងបន្តថា ទោះបីជាព្រះរាជាណាចក្រកម្ពុជាកំពុងជួបប្រទះការលំបាកពីការឆ្លងរាលដាលជាសកលនៃជំងឺកូវីដ ១៩ ក៏ដោយ ក៏ក្រសួងអប់រំ យុវជន និងកីឡាត្រូវប្រឹងប្រែងឱ្យអស់លទ្ធភាព ដើម្បីឱ្យសិស្សអាចនៅតែបន្តការសិក្សាបាន និងធានាថា ពួកគេមានសុវត្ថិភាពពីជំងឺនេះ។
លោករដ្ឋមន្ត្រីបញ្ជាក់ថា៖ «ដូច្នេះ ហើយបានជាការផ្ដល់សៀវភៅសិក្សានៅពេលនេះដល់សិស្សដែលរងផលប៉ះពាល់ គឺជាអន្តរាគមន៍ចំពោះមុខដ៏មានសារៈសំខាន់ដើម្បីជួយឱ្យពួកគេនៅតែបន្តការសិក្សាបាន»។
លោក ប៊ីយ៉ន ហ៊ែហ្កម៉ាឃ ឯកអគ្គរាជទូតប្រទេសស៊ុយអែត ប្រចាំព្រះរាជាណាចក្រកម្ពុជាបានថ្លែងថា ការអប់រំ គឺជាសិទ្ធិមនុស្សមូលដ្ឋានដ៏សំខាន់ ប៉ុន្តែការរាតត្បាតនៃជំងឺកូវីដ ១៩ បានបន្តបង្អាក់ដល់ការសិក្សារបស់កុមារកម្ពុជារាប់ពាន់នាក់។
លោកបានថ្លែងថា៖ «ប្រទេសស៊ុយអែតមានសេចក្ដីសោមនស្សរីករាយ ដែលអាចចូលរួមជួយដល់ការឆ្លើយតបជាបន្ទាន់ដ៏មានសារៈសំខាន់នេះ ដើម្បីធានាថា កុមារី និងកុមារាដែលរស់នៅក្នុងខេត្តរងផលប៉ះពាល់ផ្ទាល់ពីជំងឺកូវីដ ១៩ អាចទទួលបានធនធានសិក្សាគ្រប់គ្រាន់ ដើម្បីបន្តការសិក្សារបស់ពួកគេ»។
លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជាបាននិយាយថា៖ «តម្រូវការចាំបាច់ដើម្បីឆ្លើយតបនឹងជំងឺកូវីដ ១៩ បានធ្វើឱ្យមានការអាក់ខានដល់ការរៀនសូត្រ ប៉ុន្តែវាមានសារៈសំខាន់ណាស់ដែលយើងត្រូវគិតគូរសាជាថ្មីនូវការអប់រំ ដែលសមស្របទៅនឹងស្ថានភាពផ្លាស់ប្តូរទាំងនេះ។ កុមារគ្រប់រូបត្រូវតែមានសិទ្ធិទទួលបានការអប់រំ ហើយគ្រប់គ្នាត្រូវរួមគ្នាបំពេញនូវសិទ្ធិនោះឱ្យពួកគេ»។
លោកស្រីបញ្ជាក់ថា៖ «ខ្ញុំសូមលើកទឹកចិត្តដល់រាជរដ្ឋាភិបាលកម្ពុជាឱ្យពិនិត្យនូវជម្រើសដទៃទៀតក្នុងការគាំទ្រដល់ការវិលត្រឡប់ប្រកបដោយសុវត្ថិភាពរបស់កម្មករចំណាកស្រុកដោយចាត់ទុកការប្រើប្រាស់សាលារៀន ជាមជ្ឈមណ្ឌលធ្វើចត្តាឡីស័កគួរតែជាជម្រើសចុងក្រោយ ដើម្បីកាត់បន្ថយនូវផលប៉ះពាល់ចេញពីការបិទសាលារៀនទាំងនោះ»។
នៅក្នុងឆ្នាំ ២០២០ ការអប់រំរបស់កុមារត្រូវបានរងប៉ះពាល់យ៉ាងខ្លាំងពីមេរោគរាតត្បាតនេះ ហើយជាលទ្ធផលមានសាលារៀនជាច្រើនត្រូវបានបិទទ្វារ។ ដូច្នេះ យូនីសេហ្វ កំពុងធ្វើការតស៊ូមតិឱ្យបន្តការអប់រំនៅជុំវិញពិភពលោក និងកសាងទ្បើងវិញ និងគិតគូរសាជាថ្មីនូវប្រព័ន្ធអប់រំមួយដែលផ្តល់អត្ថប្រយោជន៍ដល់កុមារទាំងអស់ និងមានភាពធន់ទៅនឹងវិបត្តិនានានៅថ្ងៃអនាគត៕
