.jpg)
អណ្តូងទឹកស្អាតត្រូវបានផ្តល់ឲ្យពលរដ្ឋក្នុងខេត្តស្ទឹងត្រែងដោយមូលនិធិអណ្តូងទឹកស្អាតមាតាបិតាសម្តេចតេជោ។ រូប សហការី
ស្ទឹងត្រែងៈ គ្រួសារយោធិន និងពលរដ្ឋក្នុងសហគមន៍ក្រីក្រប្រមាណ ៤០០ គ្រួសារ នៅស្រុកសេសាន និងស្រុកសៀមប៉ាង ខេត្តស្ទឹងត្រែងបានទទួលអណ្តូងទឹកស្អាតចំនួន ២០ បន្ថែមទៀតពីក្រុមការងារនៃ «មូលនិធិអណ្តូងទឹកស្អាត មាតាបិតាសម្តេចតេជោ និងសម្តេចកិត្តិព្រឹទ្ធបណ្ឌិត» ខណៈពលរដ្ឋទាំងនោះកំពុងប្រឈមនឹងកង្វះទឹកស្អាតប្រើប្រាស់។
លោក សុវណ្ណ ពិសេដ្ឋ អភិបាលស្រុកសេសានប្រាប់ភ្នំពេញប៉ុស្តិ៍ពីម្សិលមិញថា ប្រជាពលរដ្ឋក្នុងឃុំក្បាលរមាស កំពុងជួបប្រឈមបញ្ហាកង្វះទឹកស្អាតសម្រាប់ប្រើប្រាស់ក្នុងជីវភាពប្រចាំថ្ងៃ ដោយសារទឹកនៅតាមប្រព័ន្ធដងអូរ និងស្រះត្រពាំងមួយចំនួននៅក្នុងឃុំបានគោករីងជាបណ្ដើរៗក្នុងរដូវប្រាំងនេះ។
ដោយប្រឈមនឹងបញ្ហានេះក្រុមការងារនៃ «មូលនិធិអណ្តូងទឹកស្អាត មាតាបិតាសម្តេចតេជោ និងសម្តេចកិត្តិព្រឹទ្ធបណ្ឌិត» ដែលដឹកនាំដោយលោកស្រី ពេជ ចន្ទមុន្នី ហ៊ុន ម៉ាណែត បានចុះមកជួយអន្តរាគមន៍ សាងសង់ អណ្ដូងទឹកស្អាត [អណ្ដូងស្នប់] ដល់ប្រជាពលរដ្ឋនៅទូទាំងឃុំ ក្បាលរមាសចំនួន ១០ អណ្ដូងដើម្បីបានទឹកស្អាតប្រើប្រាស់។
លោក ពិសេដ្ឋ ថ្លែងថាកាលពីថ្ងៃទី ២៩ ខែកុម្ភៈ លោកស្រី ពេជ ចន្ទមុន្នី ហ៊ុន ម៉ាណែត និងក្រុមការងារនៃ «មូលនិធិអណ្ដូងទឹកស្អាតមាតាបិតាសម្តេចតេជោ និង សម្តេចកិត្តិព្រឹទ្ធបណ្ឌិត» បានចុះមកសម្ពោធដាក់ឲ្យប្រើប្រាស់នូវអណ្ដូងចំនួន ៥ នៅភូមិក្បាលរមាសថ្មីនៃឃុំក្បាលរមាស។ ការដាក់ឲ្យប្រើប្រាស់អណ្តូងទាំងនេះនៅទីតាំងផ្នែកខាងលើនៃខ្នងទំនប់វារីអគ្គិសនីសេសានក្រោម ២ ដើម្បីឆ្លើយតបភាពចាំបាច់របស់ប្រជាពលរដ្ឋប្រមាណជាង ១០០ គ្រួសារស្មើនឹង ១០០ ខ្នងផ្ទះ។
លោកបញ្ជាក់ថា៖ «អំណោយជាអណ្ដូងទឹកស្អាតទាំងនេះគឺជាផ្នែកមួយនៃការរួមចំណែកដោះស្រាយបញ្ហាកង្វះទឹកស្អាតជូនប្រជាពលរដ្ឋក្នុងតំបន់ដាច់ស្រយាល និងងាយរងគ្រោះដោយភាពរាំងស្ងួត»។
ជាមួយគ្នានេះតំណាងប្រជាពលរដ្ឋក្នុងសហគមន៍ភូមិក្បាលរមាសថ្មី អ្នកស្រី យ៉ៅ សុង អាយុ ៤៧ ឆ្នាំប្រាប់ភ្នំពេញប៉ុស្តិ៍ថា អណ្ដូងទឹកស្អាតថ្មីនេះបានផ្ដល់សារប្រយោជន៍ជាច្រើនដល់អ្នកភូមិរបស់ពួកគាត់ក្នុងការប្រកបរបរកសិកម្ម និងការធ្វើអាជីវកម្មផ្សេងៗទៀត។
អ្នកស្រីថ្លែងថា៖ «កាលពីមុនទទួលបានអំណោយអណ្ដូងទឹកស្អាតនេះ អ្នកភូមិយើងភាគច្រើនបាននាំគ្នាទៅដងទឹកអូរ ហើយដឹកយកមកប្រើប្រាស់ និងដាំស្ល។ អូរ ដែលមាននៅសេសសល់ទឹកនារដូវប្រាំងនេះមានចម្ងាយឆ្ងាយពីភូមិប្រមាណ ២-៣ គីឡូម៉ែត្រ ហើយទឹកមិនថ្លាល្អដូចជាទឹកអណ្ដូងនាពេលនេះទេ»។
ចំណែកលោក ផាត់ យុត្ត អភិបាលស្រុកសៀមប៉ាងបានប្រាប់ភ្នំពេញប៉ុស្តិ៍ថា បច្ចុប្បន្ន ប្រជាពលរដ្ឋនៅឃុំព្រែកមាស ឃុំស្រែសំបូរ និង ឃុំសន្តិភាពកំពុងប្រឈមបញ្ហាកង្វះទឹកស្អាតប្រើប្រាស់ក្នុងជីវភាពប្រចាំថ្ងៃ។ ព្រោះភូមិសាស្ត្រនៃឃុំទាំង ៣ ខាងលើនេះជាតំបន់ខ្ពង់រាប មិនសម្បូរប្រព័ន្ធប្រឡាយ ឬអាងបិទទឹក ដូចជា តំបន់ទំនាបកណ្ដាលនោះទេ។
លោក យុត្ត អះអាងថា អាជ្ញាធរមានគម្រោងសាងសង់អណ្ដូងទឹកស្អាតរហូតដល់ ៣០ អណ្ដូង ដើម្បីដោះស្រាយបញ្ហាកង្វះទឹកស្អាតប្រើប្រាស់ជូនដល់ប្រជាពលរដ្ឋក្នុងឃុំទាំង ៣ ខាងលើនេះឲ្យបានមុនដំណាច់ឆ្នាំ ២០២០ នេះ។ លោកអភិបាលបាននិយាយថា នៅពេលនេះអាជ្ញាធរកំពុងកៀរគរមូលនិធិពីសប្បុរសជន វិស័យឯកជន និងអង្គការក្រៅរដ្ឋាភិបាលនានាជាដៃគូ ដើម្បីសាងសង់អណ្ដូងទឹកស្អាតបន្ថែមទៀត។
លោក ផាត់ យុត្ត បញ្ជាក់ថា៖ «នៅពេលនេះក្រុមការងារមូលនិធិអណ្ដូងទឹកស្អាតមាតាបិតាសម្តេចតេជោ និងសម្តេចកិត្តិព្រឹទ្ធបណ្ឌិតបានផ្ដល់ជូនអណ្ដូងចំនួន ១០ ក្នុងនោះអណ្ដូងចំនួន ៦ បានសាងសង់រួចរាល់ជាស្ថាពរ និង បានដាក់ឲ្យប្រើប្រាស់ហើយអណ្ដូងមួយចំនួនទៀតកំពុងដំណើរការសាងសង់ និងរកមូលនិធិមកបន្ថែម»។
សូមបញ្ជាក់ផងដែរថា គិតចាប់តាំងពីឆ្នាំ ២០១៣ មកដល់ឆ្នាំ ២០២០ នេះ «មូលនិធិអណ្តូងទឹកស្អាតមាតាបិតាសម្តេចតេជោ និងសម្តេចកិត្តិព្រឹទ្ធបណ្ឌិត» បានដោះស្រាយបញ្ហាទឹកស្អាតជូនប្រជាពលរដ្ឋរាប់ពាន់គ្រួសារនៅទូទាំងប្រទេសតាមរយៈការធ្វើអណ្តូងទឹកស្អាតបានចំនួនជាង ៨០០ អណ្តូង។ ក្នុងនោះអណ្ដូងប្រមាណ ៦០០ អណ្ដូងត្រូវបានសាងសង់រួចរាល់ និងបានដាក់ឲ្យដំណើរការប្រើប្រាស់ជាផ្លូវការ៕
