ភ្នំពេញៈ មន្ត្រីនគរបាលបានអះអាងពីម្សិលមិញថា មានបុរស ៣ នាក់ បានរងរបួសធ្ងន់-ស្រាល ដោយសារការផ្ទុះឆេះស្ថានីយប្រេងឥន្ធនៈ ១ កន្លែង នៅខណ្ឌច្បារអំពៅរាជធានីភ្នំពេញកាលពីយប់ថ្ងៃអង្គារ។ ក៏ប៉ុន្តែមូលហេតុនៅមិនទាន់ដឹងទេ ខណៈសមត្ថកិច្ចជំនាញកំពុងបន្តស្រាវជ្រាវនៅឡើយ។
លោក ឱ ស៊ីលីហូវ នាយនគរបាលប៉ុស្តិ៍សង្កាត់និរោធបានប្រាប់ភ្នំពេញប៉ុស្តិ៍ថា ហេតុការណ៍នេះបានកើតនៅម៉ោង ៧:៣០ នាទីយប់ថ្ងៃអង្គារនៅស្ថានីយប្រេងតេលា ឈ្មោះ សម្បត្តិ មានហេង នៅតាមផ្លូវជាតិលេខ ១ ក្នុងភូមិបឹងឈូក សង្កាត់និរោធ ខណ្ឌច្បារអំពៅរាជធានីភ្នំពេញ។
លោកបានបន្តថា ឧប្បតិ្តហេតុនោះបានបណ្ដាលឲ្យបុរសជាកម្មករ ៣ នាក់រួមមាន ឈ្មោះ ស្រ៊ួច ញៀន អាយុ ១៨ ឆ្នាំ, ភួង បូរ៉ា អាយុ ១៧ ឆ្នាំ និងឈ្មោះ ស៊ន ស៊ីថា អាយុ ៣១ ឆ្នាំ បានរបួសធ្ងន់-ស្រាល និងត្រូវបានគេដឹកជញ្ជូនទៅមន្ទីរពេទ្យភ្លាមៗដើម្បីជួយសង្គ្រោះជីវិត។
លោក ស៊ី លីហូវ បានបញ្ជាក់ថា៖ «មកទល់ពេលនេះស្ថានភាពរបស់ជនរងគ្រោះឈ្មោះ ស្រ៊ួច ញៀន និង ភួង បូរ៉ា កំពុងស្ថិតក្រោមការសង្គ្រោះបន្ទាន់នៅមន្ទីរពេទ្យកាល់ម៉ែត តែឈ្មោះ ស៊ន ស៊ីណា ដែលរងរបួសស្រាល និងកំពុងសម្រាកនៅមន្ទីរពេទ្យ ព្រះកុសុមៈ បានធូរស្រាលបន្តិចហើយ»។
លោកបានបន្តថា ចំពោះមូលហេតុបើគិតត្រឹមព្រឹកថ្ងៃពុធ [ម្សិលមិញ] នេះក្រុមមន្ត្រីនគរបាលនៅពុំទាន់ដឹងទេ។
ក៏ប៉ុន្តែបើតាមរបាយការណ៍របស់អគ្គស្នងការនគរបាលជាតិចេញផ្សាយពីម្សិលមិញថា លទ្ធផលបឋមបានរកឃើញថា ករណីនេះមកពី «ធ្លាយស៊ីទែនស្ដុកហ្គាស»។
យ៉ាងណាក្ដីការផ្ទុះឆេះស្ថានីយប្រេងនេះពុំបានរាលដាលដល់ផ្ទះពលរដ្ឋនៅជិតនោះទេ ដោយសារមានការជួយអន្តរាគមន៍បានទាន់ពេលពីអាជ្ញាធរ និងសមត្ថកិច្ចដោយបានប្រើរថយន្តពន្លត់អគ្គិភ័យ ១៩ គ្រឿង និងប្រើទឹកអស់ ២៧ រថយន្ត ឬស្មើជាង ១២០ ម៉ែត្រគុប។
ជុំវិញគ្រោះអគ្គិភ័យនេះដែរលោក នេត វន្ថា ប្រធាននាយកដ្ឋានបង្ការទប់ស្កាត់ និងពន្លត់អគ្គិភ័យនៃអគ្គស្នងការដ្ឋាននគរបាលជាតិបានប្រាប់ភ្នំពេញប៉ុស្តិ៍ពីម្សិលមិញថា ក្នុងខែមករាឆ្នាំនេះ គ្រោះអគ្គិភ័យបានកើតឡើង ៧៧ លើកដោយបានសម្លាប់មនុស្ស ៥ នាក់ និងម្នាក់ទៀតរងរបួសព្រមទាំងបានបំផ្លាញផ្ទះអស់ ៧២ ខ្នង និងតូបលក់ដូរអស់ ២៧ តូប។
បើតាមលោក នេត វន្ថា កត្តាដែលនាំឲ្យកើតមានគ្រោះអគ្គិភ័យ រួមមានទុស្សេចរន្តអគ្គិសនី ៤០ ភាគរយ កត្តាភ្លើងចង្ក្រាន ទៀន ធូប និងការបោះចោលនូវកន្ទុយភ្លើងផ្សេងៗខ្វះការប្រុងប្រយ័ត្ន ៣៩ ភាគរយ និង ២១ ភាគរយទៀតគឺមិនទាន់ដឹងពីមូលហេតុ និងកំពុងស៊ើបអង្កេតនៅឡើយ៕