សៀមរាបៈ ករណីផ្ទុះហ្គាសនៅក្រុងសៀមរាបកាលពីថ្ងៃទី ១៤ សីហា បានធ្វើឱ្យមនុស្ស ១៣ នាក់រងរបួស ក្នុងនោះមានជនជាតិអាមេរិកម្នាក់ និងអង់គ្លេសម្នាក់ ខណៈ ៧ នាក់ ក្នុងចំណោមនោះ រួមទាំងមន្ត្រីនគរបាលនៃស្នងការដ្ឋានខេត្តម្នាក់ផង ត្រូវបានអាជ្ញាធរ និងក្រុមគ្រួសារសហការគ្នាបញ្ជូនទៅសង្គ្រោះនៅប្រទេស ថៃ រីឯ ៦ នាក់ផ្សេងទៀត កំពុងសម្រាកព្យាបាលតាមមន្ទីរពេទ្យក្នុងប្រទេស កម្ពុជា។
តាមរបាយការណ៍របស់នគរបាលបានឲ្យដឹងថា ករណីផ្ទុះកន្លែងបញ្ចូលហ្គាសនេះ គឺស្ថិតក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប ដែលមានម្ចាស់ឈ្មោះ ឈុក ឈុនលី ប្រកបមុខរបរលក់ហ្គាស។
ករណីនេះកើតឡើងកាលពីម៉ោង ១ រសៀលថ្ងៃទី ១៤ សីហា ដោយបានធ្វើឱ្យមនុស្ស ១៣ នាក់រងរបួស តែគ្មានអ្នកស្លាប់ទេ។ រីឯសម្ភារខូចខាតរួមមាន ម៉ូតូ ២ គ្រឿង និងរថយន្ត ១ គ្រឿង ត្រូវឆេះខ្ទេច ខណៈរថយន្ត ១ គ្រឿងទៀត រងការខូចខាតដោយសារបែកកញ្ចក់ ព្រមទាំងមានឧបករណ៍ខូចខាតផ្សេងមួយចំនួនទៀត។
លោក ណុប សារ៉ាក់ អធិការក្រុងសៀមរាបប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា អាជ្ញាធរមិនទាន់រកឃើញមូលហេតុនាំឱ្យមានគ្រោះថ្នាក់ផ្ទុះហ្គាសនេះនៅឡើយទេ ប៉ុន្តែតាមចម្លើយសាក្សីនៅកន្លែងកើតហេតុបានលើកឡើងថា ដំបូងឡើយគឺមានការផ្អើលឆោឡោអំពីការធ្លាយហ្គាស និងបានធ្វើឱ្យមនុស្សមួយចំនួនដែលជាអ្នកជិតខាងចូលរួមអន្តរាគមន៍ទប់ស្កាត់កុំឱ្យហ្គាសនោះធ្លាយ។
លោកបន្តថា នៅពេលឆោឡោនោះ ក៏មានមន្ត្រីនគរបាលម្នាក់ឈ្មោះ ហួត មុន្នីពិសាខ ដែលបម្រើការនៅការិយាល័យបង្ក្រាប និងការពារនៃស្នងការដ្ឋាននគរបាលខេត្តសៀមរាបចូលរួមអន្តរាគមន៍ទប់ស្កាត់ក្នុងនាមលោកជាមន្ត្រីនគរបាលផង និងជាអ្នករស់នៅជិតខាងគ្នាផង ដើម្បីជួយជម្លៀសពលរដ្ឋពីកន្លែងកើតហេតុ និងជួយផ្ដល់ដំណឹងទៅមន្ត្រីនគរបាលពន្លត់អគ្គិភ័យ។ ប៉ុន្តែនៅពេលកំពុងជួយនោះ ស្រាប់តែហ្គាសបានផ្ទុះឡើងតែម្ដងបណ្ដាលឲ្យលោករងរបួស។
លោកថា៖ «ករណីហ្នឹងវាមានតែការឆេះរោលដងខ្លួន ដូចជា ដៃជើង និងមុខប៉ុណ្ណឹងទេ វាមិនមានបែកក្បាល ឬរបួសអីផ្សេងៗទៀតទេ។ បើតាមសាក្សី ហ្គាសហ្នឹងធ្លាយចេញពីធុង ហើយប្រហែលធ្លាយខ្លាំងពេក ទើបបណ្ដាលឱ្យផ្ទុះតែម្ដង ប៉ុន្តែក្នុងករណីនេះ ស្ដ្រីម្នាក់ដែលជាបុគ្គលិកនៅកន្លែងលក់ហ្គាសហ្នឹង កុំតែបានមន្ត្រីរបស់យើងដែលរងរបួសម្នាក់ហ្នឹង បានហៅឱ្យចេញ កុំអីគាត់អាចគ្រោះថ្នាក់បាត់បង់ជីវិត»។
បើតាមអធិការរូបនេះ ក្រុមមន្ត្រីជំនាញពន្លត់អគ្គិភ័យ បានចេញប្រតិបត្តិការភ្លាម ដោយបាញ់ទឹកពន្លត់ភ្លើង និងការពារកុំឱ្យឆេះរាលដាលទៅផ្ទះជិតខាង គឺនៅអំឡុងពេលប្រហែល ៣០ នាទី បន្ទាប់ពីការផ្ទុះឆេះ។ លោកថា ចំណែកអ្នករបួស ៧ នាក់ ដែលបញ្ជូនទៅថៃ គឺមានមន្ត្រីនគរបាល និងជនជាតិអង់គ្លេស រីឯជនជាតិអាមេរិកត្រូវបញ្ជូនទៅព្យាបាលនៅភ្នំពេញ ហើយ ៥ នាក់ទៀត ព្យាបាលនៅមន្ទីរពេទ្យខេត្ត។
លោក ណុប សារ៉ាក់ បន្ថែមថា ចំណែកខាងម្ចាស់កន្លែងលក់ហ្គាសនោះ បានសន្យាថានឹងចូលខ្លួនមកដោះស្រាយចំពោះមុខសមត្ថកិច្ចដើម្បីទូទាត់សំណង ចំពោះជនរងគ្រោះថ្នាក់ទាំងអស់។ ប៉ុន្តែលោកបញ្ជាក់ថា អាជ្ញាធរ មិនទាន់មានវិធានការណាមួយចំពោះម្ចាស់ទីតាំងនេះនៅឡើយទេ ដោយសារកំពុងស្ថិតក្រោមការស៊ើបអង្កេតនៅឡើយ។
លោកថា៖ «យើងអត់ទាន់អាចចោទប្រកាន់គាត់បានទេ ដោយសារតែគាត់អត់បាននៅទីតាំងហ្នឹងទេ ព្រោះគាត់រវល់ទៅបុណ្យ និងទុកឱ្យបុគ្គលិកនៅមើលអានេះ (ព័ត៌មាន) ដែលខ្ញុំទទួលបានភ្លាមៗ នៅពេលដែលខ្ញុំចុះទៅផ្ទាល់»។
ទោះជាយ៉ាងណា ក្រសួងរ៉ែ និងថាមពល កាលពីម្សិលមិញបានចេញសេចក្ដីប្រកាសមួយបញ្ជាក់ថា ស្ថានីយបញ្ចូលឧស្ម័នឥន្ធនៈដែលកើតមានករណីផ្ទុះហ្គាសនេះ គឺពុំមានច្បាប់អនុញ្ញាតឡើយ ហើយក្រសួងកំពុងបន្តនីតិវិធីស្រាវជ្រាវលើករណីនេះបន្ថែមទៀត។
ក្រសួងរ៉ែក៏បានណែនាំឱ្យអ្នកប្រកបអាជីវកម្មបើកដំណើរការស្ថានីយប្រេង ជាពិសេសឧស្ម័នឥន្ធនៈ ត្រូវតែមានវិជ្ជាជីវៈ និងបច្ចេកទេសសុវត្ថិភាពឱ្យបានច្បាស់លាស់ហើយតម្រូវឱ្យមានច្បាប់អនុញ្ញាតពីក្រសួងជំនាញ និងស្ថាប័នពាក់ព័ន្ធ ដើម្បីចៀសវាងការបង្កឱ្យមានហានិភ័យគ្រោះថ្នាក់ដល់ខ្លួន និងអ្នកដទៃបែបនេះ។
ជាមួយគ្នានេះ លោក នួន ពុទ្ធារ៉ា អភិបាលក្រុងសៀមរាបបានប្រាប់ភ្នំពេញប៉ុស្ដិ៍កាលពីម្សិលមិញដែរថា អភិបាលខេត្តលោក ទៀ សីហា បានសម្រេចជួយផ្ដល់ប្រាក់ឧបត្ថម្ភមួយចំនួនសម្រាប់អ្នករងរបួសទាំងអស់ រួមទាំងការចុះទៅសួរសុខទុក្ខផ្ទាល់ដល់អ្នករងរបួសដែលកំពុងព្យាបាលនៅមន្ទីរពេទ្យខេត្តផងដែរ។
លោកបន្តថា៖ «បើតាមខ្ញុំដឹង ប៉ុន្តែមិនច្បាស់ ១០០ ភាគរយទេ ឯកឧត្តមអភិបាលគាត់ថានឹងជួយថ្លៃព្យាបាលទាំងស្រុងសម្រាប់មន្ត្រីប៉ូលិស»៕