The Phnom Penh Post Search

Search form




Logo of Phnom Penh Post newspaper Phnom Penh Post - ផ្ទុះ​ឡ​ដុត​អុស​នៅ​ក្នុង​រោងចក្រ​ស្លាប់​ម្នាក់ ​របួស ៧ នាក់

ផ្ទុះ​ឡ​ដុត​អុស​នៅ​ក្នុង​រោងចក្រ​ស្លាប់​ម្នាក់ ​របួស ៧ នាក់

Content image - Phnom Penh Post
កម្មការិនី​ម្នាក់​កំពុង​ត្រូវ​បាន​ព្យាបាល​បន្ទាប់ពី​រងរបួស​ដោយ​ការ​ផ្ទុះ​ឡដុត​អុស​យក​ចំហាយ​នៅ​រោងចក្រ​ សិនតាយហ្គាមេន ពី​ម្សិលមិញ​​​។ ផា លីណា

ផ្ទុះ​ឡ​ដុត​អុស​នៅ​ក្នុង​រោងចក្រ​ស្លាប់​ម្នាក់ ​របួស ៧ នាក់

ភ្នំពេញៈ កម្មការិនី​ម្នាក់​បាន​ស្លាប់ និង ៧ នាក់​ផ្សេង​ទៀត​រងរបួស​ធ្ងន់ ស្រាល ដោយសារ​ការ​ផ្ទុះ​ឡ​ដុត​អុស​យក​ចំហាយ​នៅ​រោងចក្រ​សិនតៃហ្គាមេន​ស្ថិត​នៅ​ក្នុង​ភូមិ​ដំណាក់ សង្កាត់​ភ្នំពេញថ្មី ខណ្ឌ​សែនសុខ ខណៈ​ដែល​ពួកគេ​កំពុង​ហូប​បាយ​ថ្ងៃត្រង់​ក្នុង​បរិវេណ​រោងចក្រ។

ក្រសួង​ការងារ និង​បណ្តុះបណ្តាល​វិជ្ជាជីវៈ​បាន​ចេញ​សេចក្តី​ប្រកាស​ព័ត៌មាន​ក្រោយ​ពី​មាន​ការ​ផ្ទុះ​នេះ​ថា​ឧបទ្ទវហេតុ ផ្ទុះ​ឡ​ដុត​អុស​យក​ចំហាយ​នោះ​បាន​កើតឡើង​កាលពី​វេលា​ម៉ោង ១១ និង ៤០ នាទី​ព្រឹក​ម្សិលមិញ​ដែល​បាន​បណ្តាល​ឲ្យ​កម្មការិនី​ចំនួន​ម្នាក់​ស្លាប់ និង​របួស​ចំនួន ០៧ នាក់​ក្នុង​នោះ​ម្នាក់​របួស​ធ្ងន់ និង ០៦ នាក់​ទៀត​របួស​ស្រាល។

អ្នក​របួស​ទាំង ៧ នាក់​កំពុង​សម្រាក​ព្យាបាល​នៅ​មន្ទីរពេទ្យ​ព្រះកុសុមៈ ចំណែក​សព​របស់​កម្មការិនី​ដែល​ស្លាប់​ត្រូវ​បាន​បញ្ជូន​ទៅ​ស្រុក​កំណើត​នៅ​ខេត្ត​ស្វាយរៀង។

ក្រសួង​ការងារ​បញ្ជាក់​ថា ​ក្រសួង​នឹង​ដោះស្រាយ​ទៅ​តាម​គោល​របប​សន្តិសុខ​សង្គម​របស់​បេឡា​ជាតិ​សន្តិសុខ​សង្គម។

លោក កឹម សុខភេទ ប្រធាន​សហជីព​មូលដ្ឋាន​នៃ​សហព័ន្ធ​សហជីព​ស្មារតី​កម្មករ​ខ្មែរ​បាន​ឲ្យ​ដឹង​ថា​កម្មករ​ទាំងអស់​នៅ​រោងចក្រ ស៊ីនតាយហ្គាមេន មាន​ចំនួន ១៩០០ នាក់​ហើយ​មួយ​ចំនួន​នៅ​ញ៉ាំ​បាយ​ថ្ងៃត្រង់​នៅ​រោងចក្រ។

លោក​ថា​ ជា​ធម្មតា ​កម្មករ​គាត់​ចេញ​នៅ​ម៉ោង ១១ ដើម្បី​ញ៉ាំ​អាហារ​ថ្ងៃត្រង់​ហើយ​ចូល​មក​វិញ​នៅ​ម៉ោង ១២។ កន្លែង​ដែល​កម្មករ​កំពុង​អង្គុយ​ញ៉ាំបាយ​ថ្ងៃត្រង់​នោះ​មាន​ចម្ងាយ ១០០ ម៉ែត្រ​ពី​ឡ​ចំហុយ​ហើយ​នៅ​ម៉ោង​ជិត ១២ ស្រាប់​តែ​ឡ​នោះ​បាន​ផ្ទុះ​ហើយ​បំណែក​របស់​វា​បាន​ខ្ទាត​មក​ត្រូវ​កម្មករ​ដែល​កំពុង​រៀបចំ​ខ្លួន​ចូល​ធ្វើការ​វិញ​បន្ទាប់ពី​ញ៉ាំ​បាយ​រួច។

Content image - Phnom Penh Post
រោងចក្រ ស៊ីនតាយហ្គាមេន​ ដែល​ផ្ទុះ​ឡ​ដុត​អុស​បណ្តាល​ឲ្យ​កម្មករ​ស្លាប់​ម្នាក់ និង​របួស​ ៧ ​នាក់​កាលពី​ម្សិលមិញ​។ ផា លីណា

លោក​បាន​ថ្លែង​ថា៖ «កម្មករ​គាត់​នៅ​ហូប​បាយ​ថ្ងៃត្រង់​នៅ​រោងចក្រ ព្រោះ​ពេល​សម្រាក​តែ​មួយ​ម៉ោង​ពេល​ពួកគាត់​កំពុង​បាយ​ដូច​សព្វ​មួយ​ដង​ឡ​បាន​ផ្ទុះ​ហោះ​ខ្ទាត​បំណែក​មក​ចំ​កម្មករ​បណ្តាល​ឲ្យ​ស្លាប់​ម្នាក់​នៅ​នឹង​កន្លែង និង ៧ នាក់​ទៀត​របួស»។

លោក សុខ ជ័យ អាយុ ៣២ ឆ្នាំ​ជា​អ្នក​លក់ដូរ​ម្ហូប​អាហារ​នៅ​មុខ​រោងចក្រ​បាន​ឲ្យ​ដឹង​ថា​លោក​បាន​ឮ​សំឡេង​ផ្ទុះ​ពី​ក្នុង​រោងចក្រ​បណ្តាល​ឲ្យ​មាន​កម្មករ​ជាច្រើន​រយ​នាក់​ភ័យ​ស្លន់ស្លោ រត់​ប្រសេច​ប្រសាច​ចេញ​ពី​រោងចក្រ។

លោក​ថា៖ «សំឡេង​ផ្ទុះ​ដូច​គ្រាប់​បែក​អ៊ីចឹង ឃើញ​វា​ផ្ទុះ ហក់​ឡើង​ពេល​នោះ​កម្មករ​នាំ​គ្នា​រត់​ចេញ​យ៉ាង​តក់ស្លុត»។

លោក ទី សុផន អាយុ ៤៥ ឆ្នាំ ជា​ស្វាមី​ស្រ្តី​រងគ្រោះ​ដែល​បាន​ស្លាប់​ឈ្មោះ ក សាម៉ន អាយុ ៤៨ ឆ្នាំ​បាន​និយាយ​ទាំង​ទឹកភ្នែក​ថា​លោក​បាន​ឮ​ដំណឹង​ថា​ប្រពន្ធ​ស្លាប់​ពី​មិត្តភក្តិ​ប្រពន្ធ​ស្ទើរ​តែ​មិន​ជឿ។

លោក​បាន​រៀបរាប់​ទាំង​ក្តុកក្តួល​ថា៖ «ខ្ញុំ​កំពុង​ហូប​បាយ​នៅ​កន្លែង​ធ្វើការ​ដែរ​ជា​សន្តិសុខ​យាម គេ​តេ​មក​ថា​ប្រពន្ធ​ស្លាប់ ខ្ញុំ​ស្ទើរ​តែ​មិន​ជឿ ខ្ញុំ​ប្រញាប់​ជិះ​មក​ឃើញ​គាត់​ដេក​ស្លាប់ ដែល​ក្បាល​របស់​គាត់​របួស​ធ្ងន់​ស្ទើរ​មើល​មិន​យល់ ខ្ញុំ​ពិតជា​សោកស្តាយ​គ្មាន​អ្វី​និយាយ​បាន​ទេ»។

លោក យ៉េង ប៊ុនលី អាយុ ២៦ ឆ្នាំ​ជា​ស្វាមី​ស្រ្តី​រងគ្រោះ​របួស​ធ្ងន់​ឈ្មោះ ឃី ស្រីម៉ៅ អាយុ ២៣ ឆ្នាំ​ដែល​មាន​ផ្ទៃពោះ ៤ ខែ​ដែល​បាន​រងរបួស​ធ្ងន់ធ្ងរ​បាន​និយាយ​ថា​ប្រពន្ធ​របស់​លោក​ត្រូវ​របួស​ត្រង់​ជើង​ និង​រលាក​ស្បែកខ្នង។ លោក​ថា៖ «ខ្ញុំ​មិន​ដឹង​ប៉ះពាល់​កូន ៤ ខែ​យ៉ាង​ម៉េច​ទេ ពេទ្យ​កំពុង​ពិនិត្យ​គាត់​ត្រូវ​ខ្លាំង​ត្រង់​បាក់ជើង និង​រលាក​ស្បែក​ខ្នង»។

កម្មការិនី​ឈ្មោះ ចាន់ ធី អាយុ ២៧ ឆ្នាំ​បាន​និយាយ​ថា​នៅ​ពេល​នោះ​មាន​កម្មការិនី​រាប់រយ​នាក់​ស្ថិត​នៅ​ក្នុង​ហេតុការណ៍​នោះ​បាន​នាំ​គ្នា​ផ្អើល​រត់​ទាំង​ភ័យ​តក់ស្លុត​យ៉ាង​ខ្លាំង។

នាង​និយាយ​ថា៖ «ពេល​ហ្នឹង​កម្មករ​រាប់រយ​នាក់​សំណាង​ដែរ​ត្រូវ​តិច​នាក់​តែ​ពិតជា​សោកស្តាយ​គឺ​មាន​អ្នក​ស្លាប់ និង​របួស​ដែល​សុទ្ធ​តែ​ជា​កម្មករ​ធ្វើការ​ជាមួយ​គ្នា»៕

អត្ថបទគួរចាប់អារម្មណ៍