The Phnom Penh Post Search

Search form




Logo of Phnom Penh Post newspaper Phnom Penh Post - ផ្ទុះ​គ្រាប់​បែក​ស្លាប់ ១១ នាក់ ប៉ូលិស​ចាប់​ខ្លួន​ជន​សង្ស័យ​ម្នាក់

ផ្ទុះ​គ្រាប់​បែក​ស្លាប់ ១១ នាក់ ប៉ូលិស​ចាប់​ខ្លួន​ជន​សង្ស័យ​ម្នាក់

ផ្ទុះ​គ្រាប់​បែក​ស្លាប់ ១១ នាក់ ប៉ូលិស​ចាប់​ខ្លួន​ជន​សង្ស័យ​ម្នាក់

140127_04
កូនក្រមុំ និងកូនកំលោះនៅព្យាបាលក្នុងមន្ទីរពេទ្យក្រោយការវាយប្រហារដោយគ្រាប់បែក រូប ហុង មិនា

កំពង់ធំៈ បន្ទាប់​ពី​សោកនាដកម្ម​ដ៏​រន្ធត់​កើត​ឡើង​ពី​យប់​ថ្ងៃ​សៅរ៍​កញ្ញា បឿន សុគី អាយុ ១៦ ឆ្នាំ បាន​ឈរ​សម្លឹង​មើល​រូបថត​ក្នុង​ប្លាស្ទិក​នៅ​ផ្ទះ​កើត​ហេតុ​ក្នុង​ស្រុក ប្រាសាទ​សម្បូរណ៍ ខេត្ត កំពង់ធំ។ បុរស​ក្នុង​រូប​ថត​នោះ​គឺជា​គូ​ដណ្តឹង​របស់​នាង​ដែល​គ្រោង​នឹង​រៀបការ​នៅ​ក្នុង​ខែ មីនា ខាង​មុខ។

ប៉ុន្តែ​អ្វីៗ​វា​រលាយ​ទៅ​ហើយ បន្ទាប់​ពី​បុរស​ជា​អនាគត​ស្វាមី​នាង​បាន​ស្លាប់​នៅ​ក្នុង​ការ​បំផ្ទុះ​គ្រាប់​បែក​ក្នុង​ពីធី​រាំ​កម្សាន្ត ថ្ងៃ​ចូល​រោងការ​អ្នក​ជិត​ខាង​ខណៈ​រូប​នាង​និង​គូ​ដណ្តឹង​បាន​ភ្ជាប់​ពាក្យ ១ ឆ្នាំ​មក​ហើយ។

បើ​តាម​បុគ្គលិក​ពេទ្យ​ឲ្យ​ដឹង​ថា មនុស្ស ១១ នាក់​ស្លាប់ ៣៣ នាក់​រង​របួស​ក្នុង​ការ​វាយ​ប្រហារ​ដោយ​គ្រាប់​បែក​កាល​ពី​យប់​ថ្ងៃ​សៅរ៍ ហើយ​នគរបាល អះអាង​ពី​ម្សិលមិញ​ដែរ​ថា សមត្ថកិច្ច​បាន​ចាប់​ខ្លួន​ជន​សង្ស័យ​អាយុ ២៤ឆ្នាំ ម្នាក់​ដែល​មាន​ជម្លោះ​ជាមួយ​កូន​កំលោះ​កាល​ពី​ប៉ុន្មាន​ថ្ងៃ​មុន។

លោក ហាំង ធុល មេ​បញ្ជាការ​កង​រាជ​អាវុធហត្ថ​ខេត្ត កំពង់ធំ ថ្លែង​ថា៖ «វា​ជា​ព្រឹត្តិការណ៍​តក់​ស្លុត​បំផុត​នៅ​ក្នុង​ខេត្ត»។

លោក កេ ខាណារ៉ា ស្នងការ​រង​ខេត្ត ដែល​ស៊ើប​អង្កេត​រឿង​ក្តី​នេះ​បដិសេធ​មិន​ប្រាប់​ឈ្មោះ​ជន​សង្ស័យ​ទេ ប៉ុន្តែ​ថា ជន​នោះ​និង​កូន​កំលោះ​ឈ្លោះ​គ្នា​កាល​ពី​ថ្ងៃ​ទី ២២ ខែ មករា។ អាជ្ញាធរ​ភូមិ​បាន​សម្រុះ​សម្រួល ហើយ​ជន​សង្ស័យ​មិន​ពេញ​ចិត្ត​នឹង​ដំណោះស្រាយ​នោះ​ឡើយ។

លោក​បន្ត​ថា៖ «វា​ជា​ការ​ប៉ុនប៉ង​ធ្វើ​ឃាត​មនុស្ស ព្រោះ​អ្នក​វាយ​ប្រហារ​បាន​រៀបចំ​គម្រោង​ទុក​មុន។ កូន​កំលោះ​និង​កូន​ក្រមុំ ក៏​រង​របួស​ក្នុង​ការ​វាយ​ប្រហារ​នោះ​ផង​ដែរ»។

ដេក​នៅ​លើ​គ្រែ​ក្នុង​មន្ទីរពេទ្យ​នៅ​ថ្ងៃ​ត្រូវ​រៀបការ នាង ភឿន សុផល អាយុ ២០ឆ្នាំ ដែល​នឹង​ក្លាយ​ជា​កូន​ក្រមុំ​នោះ បាន​ប្រាប់​ថា នាង​ភ្ញាក់​ផ្អើល​ចំពោះ​មូលហេតុ​នៅ​ពី​ក្រោយ​ការ​វាយ​ប្រហារ​នេះ។

កញ្ញា​បន្ត​ថា៖ «ខ្ញុំ​មិន​ដឹង​ថា​អ្នក​ណា​ធ្វើ​បែប​នេះ​លើ​ខ្ញុំ​ទេ ព្រោះ​គ្រួសារ​ខ្ញុំ​មិន​ដែល​ឈ្លោះ​ជាមួយ​នឹង​អ្នក​ជិត​ខាង​ទេ»។ ជើង​របស់​នាង​ត្រូវ​ពេទ្យ​ចង​ប្លាស្ទិក និង​មាន​ស្នាម​ឈាម ដោយ​ការ​ថត​កាំរស្មី បង្ហាញ​អំពី​ការ​បែក​ឆ្អឹង​ធ្ងន់​ធ្ងរ។

អង្គុយ​នៅ​ពី​ក្រោយ​គូ​ដណ្តឹង លោក ជា ចក់ អាយុ ២២ឆ្នាំ ដែល​ជា​កូន​កំលោះ​បាន​បន្ទរ​ថា មនុស្ស​ប្រហែល ១០០ នាក់​កំពុង​រាំ​ពេល​គ្រាប់​បែក​ផ្ទុះ។​បន្ទាប់​មក​រូប​គេ​ឃើញ សុផល ក្នុង​ភាព​ច្របូក​ច្របល់​និង​ដឹង​ថា​ខ្លួន​រង​របួស​ក្រោយ​មក។

លោក ជា ចក់ បាន​និយាយ​ថា៖ «បន្ទាប់​ពី​ផ្ទុះ​គ្រាប់​បែក ខ្ញុំ​បាន​រត់​ទៅ​បី​ប្រពន្ធ​ខ្ញុំ ព្រោះ​នាង​របួស​ជើង​ស្តាំ តែ​ខ្ញុំ​មិន​ដឹង​ថា ខ្លួន​ឯង​រង​របួស​ទេ រហូត​ទាល់​តែ​ឃើញ​ឈាម​ហូរ»។

លោក ចក់ ក៏​មិន​បាន​ដឹង​ដែរ​អំពី​មូល​ហេតុ​នៃ​ការ​វាយ​ប្រហារ​នេះ​ដែរ តែ​និយាយ​ថា «គាត់​ខក​ចិត្ត» ប៉ុន្តែ នឹង​ទទួល​ស្គាល់​អាពាហ៍​ពិពាហ៍​នេះ​វិញ «បន្ទាប់​ពី​យើង​បាន​ប្រសើរ​ឡើង»។

ភ្ញៀវ​ម្នាក់​ឈ្មោះ ម៉ន ស៊ីធី អាយុ ២៧ឆ្នាំ បាន​បាត់បង់​ឪពុក​នាង​នៅ​ក្នុង​ការ​វាយ​ប្រហារ​នេះ ហើយ​ម្តាយ​និង​បង​ប្អូន​ស្រី​ពីរ​នាក់ និង​បង​ប្អូន​ប្រុស​ពីរ​នាក់​ទាំង​អស់​សុទ្ធ​តែ​រង​របួស។

អ្នក​នាង​បន្ត​ថា៖ «ខ្ញុំ​សំណាង​ក្នុង​ចំណោម​គ្រួសារ​របស់​ខ្ញុំ​ដែល​មិន​រង​របួស​ដោយ​សារ​នៅ​ពេល​នោះ ខ្ញុំ​គ្រាន់​តែ​ឈរ​មើល​ឪពុក​ខ្ញុំ​រាំ​ក្នុង​វង់»។

អ្នក​នាង ស៊ីធី បាន​បន្ត​ថា ខ្ញុំ​មិន​ដឹង​ថា ត្រូវ​ធ្វើ​ដូចម្តេច​ទេ​ចំពោះ​មហន្តរាយ​នេះ​ព្រោះ​មិន​មាន​ប្រាក់ គ្រាប់​គ្រាន់​ដើម្បី​ធ្វើ​ពិធី​បុណ្យ​បញ្ចុះ​សព​ឪពុក​ឡើយ។

នៅ​ផ្ទះ​រៀបចំ​ពិធី​មង្គលការ​កើត​ហេតុ​នោះ វា​ហាក់​ដូចជា​មិន​មាន​សញ្ញា​ណា​បង្ហាញ​ថា ជា​កន្លែង​គួរ​រង​ការ​វាយប្រហារ​ដោយ​គ្រាប់​បែក​នោះ​ទេ។ ការ​តុប​តែង​រៀបចំ​មាន​លក្ខណៈ​ធម្មតា​នៅ​ឡើយ​នៅ​ក្នុង​រោង។

ខណៈ​កំពុង​ឈរ​នៅ​ក្រោម​ផ្ទះ អ្នក​ស្រី សាន មុំ អាយុ ៤២ឆ្នាំ ជា​ម្តាយ​កញ្ញា សុផល បាន​ប្រាប់​ថា ភាព​ចលាចល​បាន​កើត​ឡើង​បន្ទាប់​ពី​គ្រាប់​បែក​ផ្ទុះ ហើយ​អ្នក​ទៅ​ចូល​រួម​ពិធី​នេះ​បាន​រត់​ប្រសេក​ប្រស្រាច​និង​រត់​រក​សមាជិក​គ្រួសារ​របស់​ខ្លួន។

អ្នក​ស្រី​បន្ត​ថា៖ «បន្ទាប់​ពី​ឮ​សំឡេង​ផ្ទុះ​គ្រាប់​បែក​មនុស្ស​ជាច្រើន​បាន​ដួល​លើ​ដី ហើយ​ជា​ច្រើន​ទៀត​បាន​រង​របួស»។ «ខ្ញុំ​ពិត​ជា​អាណិត​កូន​ស្រី​របស់​ខ្ញុំ​ណាស់ ពីព្រោះ​ខ្ញុំ​មាន​កូន​ស្រី​តែ​ម្នាក់ វា​ជា​លើក​ទី១​ដែល​គ្រួសារ​ខ្ញុំ​រៀបចំ​ពិធី​មង្គលការ​កូន ប៉ុន្តែ​នាង​មិន​អាច​រៀបការ​បាន»។

ស្រ្តី​ជា​ម្តាយ​ជន​រងគ្រោះ​រូប​នេះ​បាន​បន្ត​ថា៖ «គេ​ពិត​ជា​ដឹង​ហើយ​ថា ថ្ងៃ​នេះ​ភ្ញៀវ​ជាច្រើន​នឹង​មក​ចូល​រួម​មង្គលការ​នាង ប៉ុន្តែ​ភ្ញៀវ​ទាំង​អស់​បែរ​ជា​មាន​ទុក្ខ​នៅ​ពេល​ពួក​គេ​មក​ដល់​ផ្ទះ​របស់​ខ្ញុំ ពីព្រោះ​អ្វី​ដែល​ពួក​គេ​បាន​ឃើញ​គឺ​សាកសព ដែល​បាន​ស្លាប់​នៅ​នឹង​ផ្ទះ​ខ្ញុំ​ទៅ​វិញ»៕ PS

អត្ថបទគួរចាប់អារម្មណ៍