ព្រះសីហនុៈ ជនជាប់ឃុំជាស្ត្រីចំនួន ១៤៦ នាក់ ត្រូវបានផ្ទេរពីពន្ធនាគារខេត្តព្រះសីហនុ ទៅពន្ធនាគារខេត្តកំពត ដើម្បីបញ្ចៀសការឆ្លងរាលដាលជំងឺកូវីដ១៩ ក្នុងសហគមន៍ ក្រោយពីជនជាប់ឃុំនៅខេត្តព្រះសីហនុចំនួន ៣៤ នាក់ រកឃើញវិជ្ជមានជំងឺនេះ បន្ទាប់ពីលទ្ធផលនៃការវិភាគសំណាកកាលពីថ្ងៃទី ៨ ឧសភា មានសុខភាពធម្មតា។ នេះបើតាមមន្ត្រីនាំពាក្យអគ្គនាយកដ្ឋានពន្ធនាគារ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃ ប្រាប់ភ្នំពេញប៉ុស្តិ៍នៅថ្ងៃទី ១៦ ឧសភា ថា គិតត្រឹមថ្ងៃទី ១៦ ខែឧសភានេះ ក្រៅពីរកឃើញករណីវិជ្ជមានលើជនជាប់ឃុំចំនួន ៣៤ នាក់កាលពីថ្ងៃទី ៨ ខែឧសភា គឺមិនមានករណីវិជ្ជមានថ្មីទេ។ ចំណែកការយកសំណាកលើកទី ២ គឺនៅរយៈពេលប្រហែល ១ សប្ដាហ៍ទៀតក្រុមគ្រូពេទ្យនឹងមកយក។
លោកបានថ្លែងថា៖ «សុខភាពពួកគាត់ (ជនជាប់ឃុំដែលវិជ្ជមានកូវីដ១៩) អត់មានអីខុសប្រក្រតីទេ។ យើងព្យាបាលធម្មតា ហើយយើងឱ្យពួកគាត់ហាត់ប្រាណ និងហូបចុកពេញលេញ»។
លោក សវនា បានឱ្យដឹងថា ដើម្បីបញ្ចៀសការចម្លងមេរោគកូវីដ១៩ ក្នុងសហគមន៍ក្នុងពន្ធនាគារខេត្ដព្រះសីហនុ ពិសេសចំពោះជនងាយរងគ្រោះជាជនជាប់ឃុំស្ត្រី អគ្គនាយកដ្ឋានពន្ធនាគារបានសម្រេចផ្ទេរជនជាប់ឃុំជាស្ត្រីចំនួន ១៤៦ នាក់ទៅឃុំនៅពន្ធនាគារខេត្ដកំពត រហូតដល់បញ្ចប់ការឆ្លងរីករាលដាលក្នុងពន្ធនាគារខេត្ដព្រះសីហនុ ទើបផ្ទេរត្រឡប់មកវិញ។
លោកថ្លែងថា៖ «យើងសម្រេចចិត្ដផ្ទេរពួកគាត់ទៅពន្ធនាគារខេត្ដកំពត ព្រោះគាត់ជាជនជាប់ឃុំ ដែលងាយរងគ្រោះហើយដោយសារតែពន្ធនាគារខេត្តយើងបាំងតែរបងសុវត្ថិភាព។ យើងអត់មានកំផែង របងថ្មបាំងជិត ដូច្នេះយើងគិតថាបញ្ហាងាយឆ្លង»។
បើតាមលោក សវនា ការផ្ទេរជនជាប់ឃុំស្ត្រីទាំង ១៤៦ នាក់ទៅពន្ធនាគារខេត្ដកំពតនេះ គឺដោយសារតែការធ្វើតេស្ដអវិជ្ជមានជំងឺកូវីដ១៩ទាំងអស់។ ដូច្នេះដើម្បីការពារជនជាប់ឃុំជាស្ត្រីទើបសម្រេចចិត្ដផ្ទេរពួកគាត់ទៅពន្ធនាគារខេត្ដកំពត។
លោកថ្លែងថា៖ «ជម្រើសល្អបំផុតគឺត្រូវយកពួកគាត់ចេញដើម្បីឱ្យទូលាយកន្លែង និងរក្សាសន្តិសុខសុវត្ថិភាព និងសតិអារម្មណ៍របស់ពួកគាត់កុំឱ្យភ័យខ្លាចផង។ យកកន្លែងពួគគាត់នោះ ទុកដាក់ជនជាប់ឃុំដែលមានវ័យចាស់ និងអ្នកដែលមានជំងឺប្រចាំកាយដើម្បីការពារកុំឱ្យពួកគាត់ឡូកឡំជាមួយអ្នកដែលយើងគិតថាអាចមានហានិភ័យ»។
យោងតាមរដ្ឋបាលខេត្តព្រះសីហនុបានផ្សាយរបាយការណ៍ស្ដីពីលទ្ធផលនៃការវិភាគវត្ថុសំណាករកមេរោគកូវីដ១៩សម្រាប់ថ្ងៃទី ៨ ឧសភា ដោយបានរកឃើញមានករណីវិជ្ជមានថ្មីនៅក្នុងសហគមន៍ចំនួន ១២៦ នាក់ ក្នុងនោះ ៣៤ នាក់រកឃើញនៅក្នុងពន្ធនាគារខេត្ត។
ដើម្បីទប់ស្កាត់ការឆ្លងរីករាលដាលជំងឺកូវីដ១៩ អគ្គនាយកដ្ឋានពន្ធនាគារ បានស្នើទៅលោកនាយករដ្ឋមន្ដ្រី ហ៊ុន សែន សុំគោលការណ៍ចាក់វ៉ាក់សាំងដល់ជនជាប់ឃុំនៅតាមតំបន់ ដែលមានហានិភ័យនៃការឆ្លងវីរុសនេះខ្លាំងក្នុងរាជធានីភ្នំពេញ ខេត្ដកណ្ដាល ខេត្ដព្រះសីហនុ និងខេត្ដសៀមរាប ជាដើម។
ក្រោយពីទទួលបានគោលការណ៍ពីលោក ហ៊ុន សែន មន្ដ្រីអគ្គនាយកដ្ឋានពន្ធនាគារនៅរាជធានីភ្នំពេញសហការជាមួយក្រុមការងារចាក់វ៉ាក់សាំងនៃមន្ទីរពេទ្យ១៦ ឧសភា ប្រើរយៈពេល ៣ ថ្ងៃ ចាប់ផ្ដើមចាក់ថ្ងៃទី ៧ ដល់ថ្ងៃទី ៩ ខែឧសភា បានបញ្ចប់ការចាក់វ៉ាក់សាំងដល់ជនជាប់ឃុំក្នុងពន្ធនាគារនៅរាជធានីភ្នំពេញរួចរាល់ជាង ១ ម៉ឺននាក់៕