សៀមរាបៈ អ្នកស្រី ស៊ឹម សុផាត អនុប្រធានអង្គភាពចុះបញ្ជី និងផ្តល់បណ្ណបើកបរយានយន្តនៃមន្ទីរសាធារណការ និងដឹកជញ្ជូន ខេត្តសៀមរាបដែលលើកជើងចង្អុលស្លាកលេខរថយន្តភ្ញៀវយកមកត្រួតពិនិត្យលក្ខណៈបច្ចេកទេសកាលពីសប្តាហ៍មុនត្រូវបានដកចេញពីតំណែងដោយដាក់ឲ្យទៅបម្រើការងារនៅការិយាល័យកិច្ចការទូទៅនៃមន្ទីរសាធារណការ និងដឹកជញ្ជូន។
ការសម្រេចផ្ទេរនេះធ្វើឡើងក្រោយពីមានការរិះគន់នៅលើបណ្តាញសង្គមហ្វេសប៊ុកចំពោះអ្នកស្រីថា បានធ្វើអាកប្បកិរិយាមិនគប្បី និងមិនសមរម្យ ដែលអ្នកស្រីបានលើកជើងទៅចង្អុលស្លាកលេខរថយន្តម៉ាក អូឌី ដែលម្ចាស់យកទៅត្រួតពិនិត្យលក្ខណៈបច្ចេកទេស ឆៀករថយន្តនៅកន្លែងចុះបញ្ជីយានយន្តខេត្តសៀមរាប។
បើយោងតាមលិខិតបង្គាប់ការរបស់លោក គី វីរិន្ទ ប្រធានមន្ទីរសាធារណការ និងដឹកជញ្ជូន ខេត្តសៀមរាបដែលបានចុះហត្ថលេខាកាលពីថ្ងៃទី ១៦ សីហា ឆ្នាំ ២០១៩ បានសម្រេចផ្ទេរភារកិច្ចអ្នកស្រី ស៊ឹម សុផាត អនុប្រធានអង្គភាពចុះបញ្ជី និងផ្ដល់បណ្ណបើកបរយានយន្តនៃមន្ទីរសាធារណការ និងដឹកជញ្ជូន ខេត្តសៀមរាបឲ្យទៅបម្រើការងារនៅការិយាល័យកិច្ចការទូទៅនៃមន្ទីរសាធារណការ និងដឹកជញ្ជូនខេត្តសៀមរាប។
លិខិតបង្គាប់ការបញ្ជាក់ថា៖ «សាមីខ្លួនត្រូវបង្ហាញខ្លួននៅការិយាល័យកិច្ចការទូទៅនៅរៀងរាល់ម៉ោងធ្វើការ។ ការិយាល័យកិច្ចការទូទៅ អង្គភាពចុះបញ្ជី និងផ្តល់បណ្ណបើកបរយានយន្ត និងសាមីខ្លួនត្រូវសហការអនុវត្តសេចក្តីសម្រេចនេះឲ្យមានប្រសិទ្ធភាពខ្ពស់»។
បើយោងតាមហ្វេសប៊ុករបស់ក្រសួងសាធារណការ និងដឹកជញ្ជូន បង្ហោះកាលពីថ្ងៃសៅរ៍ ខែសីហានេះបានឲ្យដឹងថា ការផ្ទេរភារកិច្ចមន្ត្រីឈ្មោះ ស៊ីម សុផាត ចេញពីមុខងារជាមន្ត្រីផ្តល់សេវាសាធារណៈផ្ទាល់ទៅជាមន្ត្រីរដ្ឋបាលទូទៅ ដោយសារតែមន្ត្រីរូបនេះបានប្រព្រឹត្តនូវកំហុសឆ្គងតាមរយៈការប្រើប្រាស់អាកប្បកិរិយាមិនសមរម្យក្នុងពេលផ្តល់សេវាជូនប្រជាពលរដ្ឋ។
ក្រសួងសាធារណការ និងដឹកជញ្ជូនបញ្ជាក់ថា៖ «ប្រសិនបើបងប្អូនប្រជាពលរដ្ឋជួបប្រទះនឹងការផ្តល់សេវាសាធារណៈក្នុងវិស័យសាធារណការ និងដឹកជញ្ជូនក្រោមអាកប្បកិរិយាមិនសមរម្យរបស់មន្ត្រីយើងខ្ញុំនោះ សូមមេត្តារាយការណ៍ដោយភ្ជាប់ជាមួយនឹងឈ្មោះមន្ត្រី អត្តលេខ ពេលវេលាកើតហេតុ ទីតាំងផ្តល់សេវា រូបភាព វីដេអូ និងភ័ស្តុតាងផ្សេងៗ ដើម្បីយើងខ្ញុំពិនិត្យចាត់វិធានការតាមនីតិវិធី»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាថ្លែងថា ការផ្ទេរភារកិច្ចរបស់មន្ត្រីឈ្មោះ ស៊ីម សុផាត ធ្វើឡើងទៅតាមការរិះគន់របស់មហាជនដោយសារពុំមានច្បាប់រដ្ឋបាលណាមួយចែងថា ការយកជើងទៅចង្អុលស្លាកលេខរថយន្តគឺខុសច្បាប់នោះទេ។ ការផ្ទេរនេះវាមិនមែនជាការពិន័យធ្ងន់ធ្ងរចំពោះអ្នកស្រី ស៊ីម សុផាត នោះទេ។
លោកបញ្ជាក់ថា៖ «វាមិនមានទិដ្ឋភាពច្បាប់ណាដែលចែងថា ការលើកជើងទៅចង្អុលស្លាកលេខត្រូវមានកំហុសរដ្ឋបាលនោះទេ វាជាកំហុសឆ្គងក្រមសីលធម៌។ វាមិនមែនជាការពិន័យធ្ងន់ធ្ងរ»។
កាលពីចុងខែកក្កដារដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានសម្រេចដកចេញ មន្ត្រីត្រួតពិនិត្យបច្ចេកទេស ៦ រូបពីតួនាទីជាអ្នកត្រួតពិនិត្យ និងគ្រប់គ្រងការងារស្ថាបនាកំណាត់ផ្លូវជាតិលេខ ៧ បន្ទាប់ពីរកឃើញចំណុចខ្វះខាតក្នុងការងារ ខណៈក្រុមហ៊ុនមួយចំនួនត្រូវបានព្រមានដាក់ក្នុងបញ្ជីខ្មៅ ប៉ុន្តែតម្រូវឲ្យដោះស្រាយគុណភាពផ្លូវបន្ទាន់។
លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូនថ្លែងថា ការផ្ទេរភារកិច្ចរបស់អ្នកស្រី ស៊ឹម សុផាត ធ្វើឡើងតាមចំណាត់ការរបស់ផ្នែករដ្ឋបាល។ មន្ទីរសាធារណការ និងដឹកជញ្ជូនខេត្តសៀមរាបនឹងធ្វើការស៊ើបអង្កេតស្វែងរកមូលហេតុ ដែលអ្នកស្រីបានប្រព្រឹត្តបែបនេះ។ បើសិនរកឃើញថាអ្នកស្រីបានប្រព្រឹត្តខុសឆ្គងនោះ មន្ទីរសាធារណការ និងដឹកជញ្ជូន និងសាលាខេត្តសៀមរាបនឹងចាត់វិធានការទៅតាមច្បាប់រដ្ឋបាល។
លោកថា៖ «បន្ទាប់មកទៀតនីតិវិធីរដ្ឋបាល យើងដាក់ការស៊ើបអង្កេត ដោយមន្ទីរសាធារណការ និងដឹកជញ្ជូននឹងធ្វើការស៊ើបអង្កេតបន្តទៅលើករណីហ្នឹង ថាតើមូលហេតុអ្វីបានជាបណ្តាលឲ្យអ្នកស្រីធ្វើអាកប្បកិរិយាបែបនេះហើយក្នុងករណីដែលយើងរកឃើញកំហុសឆ្គង មន្ទីរនឹងធ្វើលិខិតរដ្ឋបាលមួយទៅកាន់សាលាខេត្តសៀមរាបដើម្បីឲ្យសាលាខេត្តអនុវត្តតាមនីតិវិធី និងច្បាប់ថាតើដកហូតមុខតំណែង ឬក៏ផ្ទេរកន្លែងមួយទៅកន្លែងមួយ»៕