ទណ្ឌិតចំនួន ១១៧៧ នាក់ក្នុងនោះមានស្រី ៦៧ នាក់ ដែលត្រូវបានឃុំខ្លួនក្នុងពន្ធនាគារចាស់ស្ថិតនៅក្នុងភូមិទូលវិហារ ឃុំជីរោទី២ ស្រុកត្បូងឃ្មុំ ខេត្តត្បូងឃ្មុំនាពេលកន្លងមកនេះ ត្រូវបានផ្ទេរចេញទៅកាន់ពន្ធនាគារខេត្តកំពង់ចាម ដែលទើបសាងសង់ថ្មី ក្នុងទឹកដីខេត្តកំពង់ចាមវិញហើយ។ នេះបើតាមប្រសាសន៍លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៅព្រឹកថ្ងៃទី ២៤ ខែមេសានេះ។
លោកបានថ្លែងថា ពិធីផ្ទេរ និងដឹកជញ្ជូនទណ្ឌិតទាំងនោះទៅកាន់ពន្ធនាគារក្នុងខេត្តកំពង់ចាម ដែលទើបសង់ថ្មីនោះត្រូវបានប្រព្រឹត្តទៅប្រកបដោយជោគជ័យកាលពីថ្ងៃទី ២៣ ខែមេសា ឆ្នាំ ២០២១ តាមមធ្យោបាយរថយន្តក្រុងចំនួន ២ គ្រឿង អមដោយរថយន្តសឺរ៉ែននគរបាលចំនួន ៣ គ្រឿង និងមានការជួយអន្តរាគមន៍ការពារសុវត្ថិភាព សណ្ដាប់ធ្នាប់សន្តិសុខពីកម្លាំងស្នងការដ្ឋាននគរបាលខេត្តកំពង់ចាម និងកម្លាំងនៃអធិការដ្ឋាននគរបាលស្រុក-ក្រុងពាក់ព័ន្ធសរុប ១៦២ នាក់។
លោកបានបញ្ជាក់ថា៖ «នៅពេលនេះ ទណ្ឌិតទាំង ១១៧៧ នាក់ កំពុងត្រូវបានឃុំខ្លួនដោយសុវត្ថិភាពនៅក្នុងពន្ធនាគារថ្មីនៃខេត្តកំពង់ចាមហើយ»។
បើតាមលោក សវនា ពន្ធនាគារថ្មីរបស់ខេត្តកំពង់ចាមមានអគារសរុបចំនួន ៧ ស្ថិតនៅលើផ្ទៃដីជាង ៤ ហិកតាក្នុងភូមិផ្កាយព្រឹក ឃុំមៀន ស្រុកព្រៃឈរ ខេត្តកំពង់ចាម និងមានចម្ងាយប្រមាណ ២០ គីឡូម៉ែត្រពីសាលាដំបូងខេត្តកំពង់ចាម ក្បែរផ្លូវជាតិលេខ ៧ ជាប់សាលាភូមិភាគទី ២ របស់នគរបាលជាតិ ៕