.jpg)
ព្រះរាជអាជ្ញារងខេត្តកោះកុងដែលទើបផ្ទេរភារកិច្ច។ ហ្វេសប៊ុក
កោះកុងៈ ព្រះរាជអាជ្ញារងនៃអយ្យការអមសាលាដំបូងខេត្តកោះកុង លោក អ៊ង រី ត្រូវបានផ្ទេរភារកិច្ចឱ្យមកបំពេញការងារនៅក្រសួងយុត្តិធម៌ជាបណ្ដោះអាសន្នកាលពីថ្ងៃពុធទី ២៤ កក្កដា បន្ទាប់ពីរងការចោទថាមានរឿងអាស្រូវពាក់ព័ន្ធនឹងការនាំស្រីកំណាន់ចូលផ្ទះសំណាក់ ហើយត្រូវបានភរិយាតាមទាន់។
យោងតាមវីដេអូដែលបង្ហោះតាមហ្វេសប៊ុកដោយ TVFB កាលពីយប់ថ្ងៃទី ១៨ កក្កដា បានបង្ហាញថា មានស្ត្រីម្នាក់បានតាមទាន់បុរសម្នាក់ ខណៈកំពុងនាំនារីកំណាន់ម្នាក់ចូលផ្ទះសំណាក់មួយកន្លែង។ ស្ត្រីរូបនោះបានអះអាងថា គាត់គឺជាភរិយារបស់បុរសរូបនោះហើយថា គាត់មានឈ្មោះ អ៊ង រី ជាព្រះរាជអាជ្ញារងនៃអយ្យការអមសាលាដំបូងខេត្តកោះកុង។
ហេតុការណ៍នេះបានបង្កឱ្យមានការភ្ញាក់ផ្អើលនៅក្នុងហ្វេសប៊ុក ហើយវីដេអូនេះត្រូវបានចែករំលែកតៗគ្នាដល់ទៅជាង ៣៥ ០០០ (Share) និងមានការបញ្ចេញមតិយោបល់ (Comment) ជិត ២ ពាន់ណនី គិតត្រឹមថ្ងៃទី ២៤ ខែកក្កដា។
លិខិតបង្គាប់ការដោយមិនមានបញ្ជាក់ពីមូលហេតុរបស់ក្រសួងយុត្តិធម៌ដែលចុះហត្ថលេខាដោយលោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ កាលពីថ្ងៃទី ២៤ ខែ កក្កដា បានបញ្ជាក់ថា៖ «សាមីខ្លួនត្រូវមានវត្តមាននៅក្រសួងយុត្តិធម៌រៀងរាល់ម៉ោងធ្វើការ»។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានប្រាប់ភ្នំពេញប៉ុស្តិ៍កាលពីថ្ងៃពុធថា លោក អ៊ង រី នឹងបំពេញតួនាទីតាមការចាត់តាំងរបស់រដ្ឋមន្ត្រីក្រសួងយុត្តិធម៌ទៅតាមការជាក់ស្តែង។
លោកបានបញ្ជាក់ថា៖ «មែនទែន ការផ្ទេរនេះផ្ទេរមកក្រសួងជាបណ្តោះអាសន្ន មិនមែនជាការដកតំណែង មិនមែនជាការដាក់ទណ្ឌកម្ម។ គ្រាន់តែមកបំពេញភារកិច្ចជាបណ្តោះអាសន្ន។ នេះជាវិធានការរដ្ឋបាលធម្មតាទេក្នុងការផ្ទេរមន្ត្រីពីកន្លែងមួយមកកន្លែងមួយ»។
លោក ជិន ម៉ាលីន បន្ថែមថា ការនេះគឺដោយសារតាមបណ្តាញសារព័ត៌មាន លោក អ៊ង រី មានបញ្ហាជាមួយភរិយារបស់គាត់ហើយផ្ទេរមកក្រសួងមួយរយៈដើម្បីឱ្យគាត់ដោះស្រាយរឿងរ៉ាវជាមួយភរិយារបស់គាត់។ នៅពេលដែលវិវាទក្នុងគ្រួសាររបស់គាត់ត្រូវបានដោះស្រាយចប់សព្វគ្រប់ក្រសួងនឹងពិចារណាថា តើនឹងត្រូវមានវិធានការរដ្ឋបាលបន្តទៀតយ៉ាងម៉េចខ្លះ? ថាតើអាចបញ្ជូនគាត់ទៅបម្រើការនៅអយ្យការអមសាលាដំបូងខេត្តវិញឬមួយក៏មានវិធានការផ្សេងទៀត?
លោក ជិន ម៉ាលីន បញ្ជាក់បន្ថែមថា៖ «នេះជាវិវាទបុគ្គលរវាងគាត់ និងភរិយាគាត់។ អ៊ីចឹងបានទុកឱ្យគាត់ដោះស្រាយគ្នាតាមផ្លូវច្បាប់ហ្នឹងទៅ ប្រសិនបើរកឃើញគាត់បានប្រព្រឹត្តនូវកំហុសឬក៏បំពាននូវក្រមវិន័យសីលធម៌ វិជ្ជាជីវៈ ឬក៏បំពាននូវបទល្មើសផ្សេងៗ អាចនឹងមានជាវិធានការផ្លូវច្បាប់តាមជាក់ស្តែងទៀត។ ក្រសួងនឹងមានវិធានការរដ្ឋបាលបន្តផ្សេងទៀត»។
លោក សុក សំអឿន នាយកអង្គការក្រុមអ្នកច្បាប់ការពារសិទ្ធិកម្ពុជា បានប្រាប់ភ្នំពេញប៉ុស្តិ៍ថា ការផ្ទេរតួនាទីនេះដូចជាទណ្ឌកម្មមួយដែរ។ តែការដាក់ទណ្ឌកម្មដោយសារមូលហេតុអ្វីនោះ លោកមិនបានដឹងនោះទេ។ លោកថា ប្រសិនជាមន្ត្រីរាជការណាមួយប្រព្រឹត្តនូវកំហុស ហើយមានការដាក់ទណ្ឌកម្មនោះគឺជាការល្អ។
លោក សុក សំអឿន បន្ថែមថា ការមានតែក្រមសីលធម៌របស់មន្ត្រីរាជការទាំងអស់ដូចជា មិនទាន់គ្រប់ជ្រុងជ្រោយនៅឡើយទេ តែត្រូវមានយន្តការអនុវត្តក្រមសីលធម៌នេះឱ្យបានត្រឹមត្រូវល្អ។
លោកបានបញ្ជាក់ថា៖ «ខ្ញុំសង្កេតឃើញថា តាមក្រសួង មន្ទីរនានាកុំថាឡើយដល់ក្រសួងយុត្តិធម៌ សូម្បីតែមន្ទីរក្រសួងនានាហាក់ដូចជាមិនទាន់ [មាន] យន្តការអនុវត្តនៃការដាក់វិន័យហ្នឹងបានល្អនៅឡើយទេ»៕
