ក្រចេះ: មន្ត្រីពន្ធនាគារខេត្តក្រចេះបានឱ្យដឹងថា អ្នកជាប់ឃុំចំនួន ៨៧ នាក់ ក្នុងចំណោមជិត ៨០០ នាក់ ត្រូវបានផ្ទេរចេញពីពន្ធនាគារខេត្តក្រចេះទៅកាន់ពន្ធនាគារខេត្តស្ទឹងត្រែងកាលពីថ្ងៃទី ១៧ ខែ មករា ឆ្នាំ ២០២១ ដើម្បីដោះស្រាយភាពចង្អៀតនៅក្នុងពន្ធនាគារ។
លោក ខ្វា សារ៉ន (KvaSaran) ប្រធានពន្ធនាគារខេត្តក្រចេះបានប្រាប់ ភ្នំពេញ ប៉ុស្តិ៍ កាលពីថ្ងៃទី ១៨ មករា ថា អ្នកជាប់ឃុំទាំងនោះ ភាគច្រើនជាប់ចោទក្នុងបទល្មើស «រក្សាទុក និងប្រើប្រាស់គ្រឿងញៀន និងបទចោរកម្ម»។ ការផ្ទេរអ្នកទោសទាំងនោះទៅកាន់ពន្ធនាគារខេត្តស្ទឹងត្រែងធ្វើឡើងក្នុងគោលបំណងកាត់បន្ថយភាពចង្អៀតណែននៅក្នុងពន្ធនាគារខេត្ត ក្រចេះ បន្ទាប់ពីមានការឯកភាពពីអគ្គនាយកដ្ឋានពន្ធនាគារក្រសួងមហាផ្ទៃ។
លោកថ្លែងថា៖ «ពន្ធនាគារយើងមានសភាពតូចចង្អៀត ដែលអាចដាក់អ្នកទោស ឬអ្នកជាប់ឃុំត្រឹមតែ ៤០០ នាក់ប៉ុណ្ណោះ ប៉ុន្តែបច្ចុប្បន្នយើងមានអ្នកទោសរហូតដល់ជិត ៨០០ នាក់ ធ្វើឱ្យបរិស្ថានខ្យល់ក្នុងបន្ទប់ពន្ធនាគារ មានសភាពស្អុះស្អាប់»។
បើតាមលោក សារ៉ន ពេលនេះចំនួនអ្នកទោសក្នុងពន្ធនាគារខេត្តក្រចេះមានសរុប ៧០៩ នាក់ ក្នុងនោះមានស្រី ៦៥ នាក់ និងកុមារអាយុក្រោម ៣ ឆ្នាំ ដែលតាមម្ដាយមាន ៤ នាក់។ ចំនួននេះនៅតែច្រើនលើសលប់ដែលចាំបាច់តម្រូវឱ្យមានផ្ទេរចេញទៅកាន់ពន្ធនាគារផ្សេងទៀត ឬត្រូវសាងសង់បន្ទប់ឃុំឃាំង និងពង្រីកផ្ទៃដីនៃពន្ធនាគារបន្ថែមទៀត។
លោក ឈុន ដារ៉ា ប្រធានពន្ធនាគារខេត្តស្ទឹងត្រែងបានប្រាប់ ភ្នំពេញ ប៉ុស្តិ៍ ថា ពេលនេះជនជាប់ឃុំទាំង ៨៧ នាក់ ដែលទើបដឹកចេញពីពន្ធនាគារខេត្តក្រចេះទៅកាន់ពន្ធនាគារខេត្តស្ទឹងត្រែងនោះកំពុងត្រូវបានឃុំខ្លួននៅក្នុងបន្ទប់ឃុំឃាំងដែលទើបនឹងសង់ថ្មីដោយសុវត្ថិភាពហើយ។
លោកបានថ្លែងថា៖ «ក្នុងចំណោមជនជាប់ឃុំដែលទើបផ្ទេរចេញពីពន្ធនាគារខេត្តក្រចេះមកកាន់ពន្ធនាគារខេត្តស្ទឹងត្រែង យើងខ្ញុំនេះមានមួយចំនួននៅមិនទាន់មានការជំនុំជម្រះទោសនៅឡើយទេ»។
ជុំវិញករណីនេះលោក អំ សំអាត នាយករងអង្គការសិទ្ធិមនុស្សលីកាដូបានប្រាប់ ភ្នំពេញ ប៉ុស្តិ៍ ពីម្សិលមិញថា ការផ្ទេរអ្នកជាប់ឃុំពីពន្ធនាគារមួយទៅពន្ធនាគារមួយមិនអាចកាត់បន្ថយភាពចង្អៀតណែនក្នុងបន្ទប់ឃុំឃាំងនៃពន្ធនាគារបានទេ ព្រោះចំនួនអ្នកត្រូវជាប់ឃុំបានកើនឡើងរាល់ថ្ងៃ។ ម្យ៉ាងទៀត បន្ទប់ឃុំឃាំងនៃពន្ធនាគារភាគច្រើននៅកម្ពុជា មិនសមាមាត្រនឹងចំនួននៃអ្នកជាប់ឃុំទេពោលគឺបន្ទប់តូច អ្នកទោសច្រើនណែនណាន់តាន់តាប់។
លោកថ្លែងថា៖ «បើទោះជាខេត្តក្រចេះ និងខេត្តស្ទឹងត្រែងស្ថិតនៅជាប់ព្រំប្រទល់គ្នាក៏ដោយ ប៉ុន្តែវាក៏នឹងបង្កការលំបាកផងដែរ ចំពោះការដឹកជញ្ជូនជនជាប់ឃុំទាំងនោះទៅសវនាការជំនុំជម្រះទោស ជាពិសេសឱកាសនៃការជួបសួរសុខទុក្ខរបស់ក្រុមគ្រួសារសាច់ញាតិនៃជនជាប់ឃុំ ដែលមានជីវភាពក្រីក្រនឹងជួបការលំបាកកាន់តែខ្លាំង»។
បើតាមលោក សំអាត គ្រប់ពន្ធនាគារទាំងអស់ គប្បីសាងសង់បន្ថែមនូវអគារ និងបន្ទប់ឃុំឃាំងដែលមានលក្ខណៈស្ដង់ដា ដើម្បីឆ្លើយតបនឹងការកើនឡើងនៃចំនួនជនជាប់ឃុំនៅកម្ពុជា ពិសេសចំនួនជនជាប់ឃុំក្នុងបទល្មើសគ្រឿងញៀន និងចោរកម្ម ដែលត្រូវបានចាប់ខ្លួនក្នុង ១ ថ្ងៃៗយ៉ាងតិច ៣០ នាក់៕