កោះកុង: មន្ទីរបរិស្ថានខេត្តកោះកុងបានឲ្យដឹងកាលពីម្សិលមិញថា ផ្ទៃដីព្រៃលិចទឹកប្រមាណជា ១២ ហិកតាសន្ធឹងនៅតាមតំបន់មាត់សមុទ្រពីមាត់ព្រែកអណ្ដូងទឹករហូតដល់ឃុំអណ្ដូងទឹក និងឃុំថ្មសនៃស្រុកបទុមសាគរកំពុងរងការគំរាមកំហែងដោយសារជនមិនស្គាល់មុខកាប់ទន្ទ្រានយកដោយខុសច្បាប់ ខណៈដែលអាជ្ញាធរពាក់ព័ន្ធកំពុងដាក់កម្លាំងចុះអង្កេតជាក់ស្ដែងដើម្បីស្វែងរកជនល្មើស។
លោក ម៉ន ផល្លារ ប្រធានមន្ទីរបរិស្ថានខេត្ដកោះកុងបានថ្លែងប្រាប់ភ្នំពេញ ប៉ុស្ដិ៍ម្សិលមិញថា៖ «ខ្ញុំចាត់ចែងក្រុមការងារចុះទៅពិនិត្យកិច្ចការងារហើយ ដើម្បីទប់ស្កាត់ការកាប់ទន្ទ្រាន ហើយយើងនឹងពិនិត្យមើលថា តើការកាប់ទន្ទ្រានស្ថិតនៅក្នុងតំបន់ណាខ្លះ ជាតំបន់អាចអាស្រ័យផលបាន ឬក៏តំបន់ដែលយើងត្រូវហាមឃាត់»។
លោក ម៉ន ផល្លារ បានឲ្យដឹងថាការកាប់ទន្ទ្រានយកដីព្រៃលិចទឹកនេះគឺជាការលួចកាប់ជាបុគ្គលម្នាក់ៗ មិនមែនជាការចេញមុខដោយក្រុមហ៊ុនណាមួយទេ។
លោក ផល្លារ ថ្លែងថា៖ «នេះជាការលួចកាប់ដោយក្រុមខិលខូចមួយចំនួន ឬអ្នកខិលខូចខ្លះដែលទទួលបានលុយពីអ្នកផ្សេងៗក៏ចុះមកកាប់អ៊ីចឹងទៅ។ អ៊ីចឹងយើងកំពុងតាមដានរកភ័ស្តុតាងដើម្បីចាត់ការតាមនីតិវិធីច្បាប់»។
លោក ផល្លារ បានអះអាងថារហូតមកដល់ពេលនេះមិនទាន់អាចកំណត់ស្ថិតិបានថា ដីព្រៃលិចទឹកសរុបនៅក្នុងស្រុកបទុមសាគរនេះ មានប៉ុន្មានហិកតានោះទេ ប៉ុន្ដែ បើនិយាយជារួមដីនៃស្រុកបទុមសាគរដែលគ្របដណ្ដប់លើឃុំ អណ្ដូងទឹក និងឃុំថ្មសនេះសរុបមានជាង ១២ ម៉ឺនហិកតាដែលមានប្រជាជនរស់នៅច្រើន។
លោកថ្លែងថា៖ «យើងនឹងស្រាវជ្រាវរកម្ចាស់ ឬរកឈ្មោះអ្នកដែលប្រព្រឹត្ដហ្នឹង តែយើងមិនសង្ឃឹមថា នឹងរកឈ្មោះពួកគាត់ឃើញទេ គ្រាន់តែយើងឃើញទីតាំងដែលកាប់ទន្ទ្រាន ដូច្នេះយើងនឹងកំណត់យន្ដការកសាងផែនទីដី ដើម្បីកសាងសំណុំរឿងជាបណ្ដឹងអញ្ញត្ដិជន»។
លោក ឃៀង យ៉ិន មេឃុំអណ្ដូងទឹកបានអះអាងកាលពីម្សិលថា មិនដឹងចំពោះរឿងនេះទេព្រោះជារឿងគ្រប់គ្រងរបស់ប្រធាននុរក្ស។
តាមប្រភពប្រជាពលរដ្ឋសុំមិនបញ្ចេញឈ្មោះរស់នៅស្រុកបទុមសាគរបានឲ្យដឹងថា ព្រៃលិចទឹក នៅតាមបណ្តោយមាត់ព្រែកកន្ទូត និងព្រែកក្រសាំង ឃុំអណ្តូងទឹក ស្រុកបទុមសាគរ ខេត្ដ កោះកុង បច្ចុប្បន្នកំពុងត្រូវបានជនខិលខូចមួយចំនួនលួចកាប់ទន្ទ្រានយកធ្វើជាកម្មសិទ្ធិផ្ទាល់ខ្លួន ដើម្បីទុកលក់ឲ្យឈ្មួញ និងត្រៀមលក់បន្តទៅក្រុមហ៊ុនឯកជន។
ពលរដ្ឋរូបនេះបន្ថែមថាសកម្មភាពនៃការចូលលួចកាប់ទន្ទ្រានបំផ្លាញយកដីព្រៃលិចទឹកធ្វើកម្មសិទ្ធិរបស់ខ្លួននៅភូមិប្រៃ ភូមិប្រទាល ឃុំអណ្តូងទឹក និងភូមិចំការលើ ឃុំថ្មសបាននិងកំពុងកើតឡើងយ៉ាងអនាធិបតេយ្យជាងកន្លះខែមកហើយ ដោយមិនរំខានដល់អាជ្ញាធរមូលដ្ឋាននោះទេ អ្នកទាំងនោះជាពលរដ្ឋខិលខូចមួយចំនួនដែលជិតស្និទ្ធនឹងអាជ្ញាធរថ្នាក់ក្រោមតែម្តង៕