សៀមរាបៈ ក្រុមការងារសហគមន៍អាជ្ញាធរជាតិអប្សរាបានអនុញ្ញាតឲ្យប្រជាពលរដ្ឋធ្វើការជួសជុល កែលម្អផ្ទះ ដែលចាស់ទ្រុឌទ្រោមក្នុងតំបន់អង្គរជាង ៦០០ ករណី ដោយការអនុញ្ញាតនេះ ឈរលើគោលការណ៍គ្រប់គ្រងលំនៅឋានស្របតាមលក្ខខណ្ឌនៃកិច្ចអភិរក្សតំបន់រមណីយដ្ឋានបេតិកភណ្ឌពិភពលោក។
យោងតាមរបាយការណ៍របស់លេខាធិការដ្ឋានសហគមន៍ អាជ្ញាធរជាតិអប្សរា ដែលបានផ្សព្វផ្សាយនៅលើទំព័រហ្វេសប៊ុកផ្លូវការរបស់ខ្លួន កាលពីថ្ងៃសុក្រ បានឲ្យដឹងថា នារយៈពេល ៥ ខែដើមឆ្នាំ ២០១៩ នេះ ក្រុមការងារសហគមន៍របស់អាជ្ញាធរជាតិអប្សរាបានចុះផ្តល់ការអនុញ្ញាតជួសជុល កែលម្អផ្ទះរបស់ប្រជាពលរដ្ឋក្នុងរមណីយដ្ឋានអង្គរបានចំនួន ៦៣៨ ករណី។ ដោយក្នុងខែមិថុនា នេះវិញ អាជ្ញាធរអប្សរាបានអនុញ្ញាតឲ្យប្រជាពលរដ្ឋបានសាងសង់ផ្ទះឡើងវិញតាមការស្នើសុំចំនួន ៣៥ ខ្នងផ្ទះ។
អាជ្ញាធរនេះ បានបន្តថា ការអនុញ្ញាតខាងលើបានផ្តល់ជូនប្រជាពលរដ្ឋនៅស្រុកប្រាសាទបាគង ចំនួន ១៣៩ ករណី ស្រុកអង្គរធំចំនួន ៥៦ ករណី ស្រុកពួកចំនួន ១១១ ករណី ស្រុកបន្ទាយស្រីបានចំនួន ១១៥ ករណី និងក្រុងសៀមរាបចំនួន ២១៧ ករណី។
ប្រធានលេខាធិការដ្ឋានសហគមន៍លោក អឿន សំអុន បានបញ្ជាក់ក្នុងរបាយការណ៍នោះថា ក្នុងរយៈពេល ៥ ខែដំបូងនេះ ប្រជាពលរដ្ឋបានដាក់ពាក្យស្នើសុំជួសជុលកែលម្អផ្ទះមកអាជ្ញាធរជាតិអប្សរាចំនួន ៩៨៧ ករណី ក្នុងនោះក្រុមការងារបានផ្តល់ការអនុញ្ញាតតាមសំណូមពរចំនួន ៦៣៨ ករណីប៉ុណ្ណោះ។ លោកបន្តថា ការអនុញ្ញាតនេះ គឺផ្អែកទៅលើគោលការណ៍គ្រប់គ្រងលំនៅឋានស្របតាមលក្ខខណ្ឌនៃកិច្ចអភិរក្សតំបន់រមណីយដ្ឋានបេតិកភណ្ឌពិភពលោក។
លោក ឡុង កុសល អ្នកនាំពាក្យអាជ្ញាធរជាតិអប្សរា បានប្រាប់ភ្នំពេញប៉ុស្តិ៍បន្ថែមពីម្សិលមិញថា ជាទូទៅអាជ្ញាធរជាតិអប្សរា អាចអនុញ្ញាតឲ្យប្រជាពលរដ្ឋដែលគាត់រស់នៅក្នុងតំបន់នេះអចិន្រៃ្តយ៍ ដោយការស្នើសុំ សាងសង់ផ្ទះឡើងវិញទាំងស្រុង និងការស្នើសុំធ្វើការជួសជុល កែលម្អ ដោយត្រូវឈរលើគោលការណ៍ដែលបានដាក់ចេញ ដោយពុំមានការចំណាយជាប្រាក់កាស ដើម្បីស្នើសុំនោះឡើយ ឲ្យតែប្រជាពលរដ្ឋ បានបំពេញលក្ខណៈត្រឹមត្រូវតាមច្បាប់។
លោកបញ្ជាក់ថា៖ «លក្ខខណ្ឌមានដូចជា គាត់ជាប្រជាជនដែលរស់នៅក្នុងតំបន់រមណីយដ្ឋានអង្គរ តាំងពីយូរមកហើយ ហ្នឹងទី១ ចំណែកទី២ គឺយើងប្រៀបធៀបទៅលើផែនទីពីលើអាកាស ជាពិសេសផែនទីមុនឆ្នាំ ២០០០ មក ហើយនឹងឯកសារស្ថិតិដែលយើងកសាងបាន។ ម្យ៉ាងទៀត បើសិនយើងមើលទៅឃើញថាផ្ទះរបស់គាត់ មានតាំងពីមុនមែន ហើយចាស់ទ្រុឌទ្រោម មានការដឹងឮពីអាជ្ញាធរមូលដ្ឋាន គឺយើងអនុញ្ញាតឲ្យគាត់រុះរើផ្ទះចាស់ សាងសង់ផ្ទះថ្មីឡើងវិញ»។
លោក ឡុង កុសល ថ្លែងថា និយាយជាទូទៅប្រជាពលរដ្ឋ ដែលតែងស្នើសុំជួសជុល និងកែលម្អផ្ទះរបស់ពួកគាត់ គឺភាគច្រើន ដូចជាការជួសជុលដំបូង ជញ្ជាំង ធ្វើរបង រៀបការ៉ូ ដែលទទួលបានការអនុញ្ញាតតាមការចុះត្រួតពិនិត្យជាក់ស្តែង។
តែយ៉ាងណាជាមួយនឹងការជុសជុល កែលម្អ និងសាងសង់ផ្ទះក្នុងតំបន់អង្គរនេះ លោក ឡុង កុសល ក៏អះអាងថា កន្លងទៅ ដោយសារតែប្រជាពលរដ្ឋមួយចំនួនមិនសហការ ហើយបានឆ្លៀតឱកាសធ្វើការជួសជុល និងសាងសង់ ដោយគ្មានការអនុញ្ញាត ដែលជាហេតុធ្វើឲ្យការងាររបស់អាជ្ញាធរអប្សរា បានជួបនូវឧបសគ្គ ខណៈដែលធនធានមន្ត្រីចុះអនុវត្ត នៅមានការខ្វះខាត។
លោកបញ្ជាក់ថា៖ «សូមឲ្យបងប្អូនប្រជាពលរដ្ឋទាំងអស់ចូលរួមថែរក្សាក្នុងកិច្ចការងារថែរក្សាបេតិកភណ្ឌពិភពលោកហ្នឹង ព្រោះមិនមែនតែជាការងាររបស់អាជ្ញាធរអប្សរានោះទេ គឺម្នាក់ៗ យើងប្រជាជនខ្មែរទាំងអស់ មានភារកិច្ចចូលរួមទាំងអស់គ្នា ថែរក្សាបេតិកភណ្ឌពិភពលោក ហើយឲ្យប្រជាពលរដ្ឋចូលរួមសហគមន៍ និងទាក់ទងជាមួយអាជ្ញាធរអប្សរា ឬអាជ្ញាធរភូមិឃុំ មក បើចង់មានការជួសជុល ឬកែលម្អអ្វី យើងនឹងសហការ»។
លោក មាស ឃុន មេភូមិអញ្ញាញ សង្កាត់អង្គរធំ បានប្រាប់ភ្នំពេញប៉ុស្តិ៍ពីម្សិលមិញដែរថា ក្នុងភូមិលោក មានការសហការណ៍រវាងអាជ្ញាធរ និងប្រជាពលរដ្ឋបានយ៉ាងល្អ ចំពោះករណីនេះ បើទោះជានៅមានប្រជាពលរដ្ឋតិចតួច ដែលមិនសហការ និងមិនមានការយល់ដឹងពីបញ្ហានេះក៏ដោយ។
លោកបញ្ជាក់ថា៖ «នៅពេលពលរដ្ឋគាត់មានបញ្ហាផ្ទះ ធ្លុះដំបូលធ្លុះអីទៅ គាត់ស្នើមកអាជ្ញាធរ ហើយក៏មានការចុះមកភ្លាមៗ ដើម្បីសិក្សាមើល និងផ្តល់ឲ្យគាត់ភ្លាមៗ តាមស្ថានភាពផ្ទាល់។ វាល្អច្រើនហើយ តែខ្លះទៅក៏លួចធ្វើលួចអីទៅ ខ្លះទៅក៏គោរពច្បាប់ទៅ មិនទៀងទេ ហើយយើងបានអនុញ្ញាតឲ្យច្រើនដែរហើយ»។
បើតាមអាជ្ញាធរជាតិអប្សរា តំបន់រមណីយដ្ឋានអង្គរ ដែលជាតំបន់ការពារ និងហាមការសាងសង់ ជួសជុលដោយគ្មានការអនុញ្ញាត គឺមានប្រមាណ ៤០១ គីឡូម៉ែត្រក្រឡា ដែលស្ថិតក្នុងស្រុក និងក្រុងមួយចំនួនក្នុងខេត្តសៀមរាប មានដូចជា ស្រុកប្រាសាទបាគង ក្រុងសៀមរាប ស្រុកអង្គរធំ និងស្រុកពួកជាដើម៕