ភ្នំពេញៈ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនកាលពីថ្ងៃទី ៨ ខែមករាបានប្រែក្លាយផ្ទះដែលរឹបអូសពីបទល្មើសគ្រឿងញៀនទៅជាអគារស្នាក់ការអធិការដ្ឋាននគរបាលខណ្ឌបឹងកេងកងដែលទើបនឹងបង្កើតថ្មី ខណៈម៉ូតូជាង ១០០ គ្រឿង និងអចលនទ្រព្យ ៣ កន្លែង ពាក់ព័ន្ធនឹងបទល្មើសគ្រឿងញៀនត្រូវបានលក់។
លោក មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា ថ្មីៗនេះគណៈកម្មការតាមដានការប្រមូល ការគ្រប់គ្រង និងការចាត់ចែងទ្រព្យសម្បត្តិដែលពាក់ព័ន្ធនឹងបទល្មើសគ្រឿងញៀនបានលក់ដេញថ្លៃផលដែលពាក់ព័ន្ធនឹងបទល្មើសគ្រឿងញៀនបានជាង ២ លានដុល្លារ។ ប៉ុន្តែលោកមិនមានតួលេខផ្លូវការទេ។
លោកបានឲ្យដឹងទៀតថា ថវិកាចំនួន ២៩ ភាគរយ ត្រូវបានកាត់ចូលថវិកាជាតិ ហើយថវិកាដែលនៅសេសសល់ត្រូវប្រគល់ជូនអាជ្ញាធរជាតិប្រយុទ្ធប្រឆាំងគ្រឿងញៀន។
លោក មាស វិរិទ្ធ បានថ្លែងប្រាប់កាលពីថ្ងៃព្រហស្បតិ៍ថា អាជ្ញាធរជាតិប្រយុទ្ធប្រឆាំងគ្រឿងញៀនបានសម្រេចប្រគល់ផ្ទះលេខ ២៦AB ស្ថិតនៅលើផ្លូវលេខ ៣៨៤ ក្នុងសង្កាត់ទួលស្វាយព្រៃទី ១ ខណ្ឌបឹងកេងកង ជូនស្នងការរាជធានីភ្នំពេញ ដើម្បីធ្វើជាទីស្នាក់ការអធិការដ្ឋាន។ លោកបញ្ជាក់ថា ផ្ទះនេះគឺជាទ្រព្យសម្បត្តិរបស់ជនពាក់ព័ន្ធបទល្មើសគ្រឿងញៀន។
លោក មាស វិរិទ្ធ បានពន្យល់ថា ក្រុមឧក្រិដ្ឋកម្មគ្រឿងញៀនតែងត្រូវបានបង្ក្រាបដោយសមត្ថកិច្ច ហើយប្រសិនបើសមត្ថកិច្ចស្រាវជ្រាវរកឃើញថា ផលប្រយោជន៍ ឬទ្រព្យសម្បត្តិរបស់ពួកគេកើតចេញពីបទល្មើសគ្រឿងញៀននោះ ទ្រព្យទាំងនោះនឹងត្រូវរឹបអូស ហើយត្រូវប្រគល់ជូនអាជ្ញាធរជាតិប្រយុទ្ធប្រឆាំងគ្រឿងញៀនដើម្បីចាត់ចែងលើកកម្ពស់កិច្ចការបង្ក្រាបបទល្មើសគ្រឿងញៀន ក៏ដូចជាការផ្ដល់រង្វាន់លើកទឹកចិត្តដល់អង្គភាព និងមន្ត្រីសមត្ថកិច្ចដែលមានស្នាដៃក្នុងការបង្ក្រាបបទល្មើសនេះ។
លោកបន្តថា កន្លងមកនេះសមត្ថកិច្ចបានធ្វើការរឹបអូសទ្រព្យសម្បត្តិពីក្រុមឧក្រិដ្ឋជនគ្រឿងញៀនជាច្រើនរួមមានទាំងអចលនទ្រព្យ ដី ចម្ការ និងចលនទ្រព្យផ្សេងៗដូចជាម៉ូតូរថយន្តជាដើម។ បន្ទាប់មកអាជ្ញាធរជាតិប្រយុទ្ធប្រឆាំងគ្រឿងញៀនប្រគល់ទ្រព្យសម្បត្តិទាំងនេះទៅគណៈកម្មការធ្វើការតាមដានការប្រមូល ការគ្រប់គ្រង ការចាត់ចែងទ្រព្យសម្បត្តិរដ្ឋដើម្បីចាត់ចែងទ្រព្យសម្បត្តិទាំងនោះបម្រើដល់ការប្រយុទ្ធប្រឆាំងគ្រឿងញៀននៅទូទាំងប្រទេស។
ចំពោះគេហដ្ឋានខាងលើលោកថ្លែងថា៖ «ដោយសារអធិការដ្ឋានទើបបង្កើតថ្មី ហើយស្នងការដ្ឋានរាជធានីភ្នំពេញក៏មិនទាន់រកស្នាក់ការ ឬក៏ទីកន្លែងដើម្បីរៀបចំជាអធិការដ្ឋាននគរបាលខណ្ឌបឹងកេងកង អាជ្ញាធរជាតិប្រយុទ្ធប្រឆាំងគ្រៀងញៀនក៏បានសម្រេចប្រគល់ផ្ទះ ១ ល្វែងនេះជូនទៅអធិការដ្ឋាននគរបាលខណ្ឌបឹងកេងកងធ្វើជាទីតាំងបំពេញការងារជូនប្រជាពលរដ្ឋ និងជាការលើកទឹកចិត្ត និងបង្ហាញឲ្យឃើញពីការយកចិត្តទុកដាក់ពីសំណាក់ថ្នាក់ដឹកនាំអាជ្ញាធរជាតិប្រយុទ្ធប្រឆាំងគ្រឿងញៀន ដើម្បីធ្វើឲ្យប្រសើរឡើងនូវកិច្ចប្រតិបត្តិការនានា ជាពិសេសការលើកទឹកចិត្ត និងស្មារតី»។
លោក មាស វិរិទ្ធ បន្តថា ការរឹបអូសទ្រព្យសម្បត្តិពាក់ព័ន្ធនឹងគ្រឿងញៀនសម្រេចបានលទ្ធផលជាច្រើនជាក់ស្ដែងកាលពីថ្ងៃទី ៨ ខែមករាលោកបានលក់ឡាយឡុងចលនទ្រព្យគឺទោចក្រយានយន្តដែលកើតចេញពីផលនៃបទល្មើសគ្រឿងញៀនចំនួន ២៣ គ្រឿងនៅខេត្តកោះកុង និងចំនួន ៩៧ គ្រឿងទៀតនៅខេត្តព្រះសីហនុ។ ចំពោះអចលនទ្រព្យ អាជ្ញាធរជាតិប្រយុទ្ធប្រឆាំងគ្រឿងញៀនបានលក់ចំនួន ៣ កន្លែង ហើយក្នុងឆ្នាំកន្លងទៅ។ ទោះយ៉ាងណាលោក មាស វិរិទ្ធ និងសមត្ថកិច្ចមូលដ្ឋានបដិសេធមិនបញ្ជាក់អំពីបទល្មើសគ្រឿងញៀនពាក់ព័ន្ធនឹងទីតាំងផ្ទះលេខ លេខ ២៦AB ខាងលើនេះទេ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាយល់ឃើញថា វាជារឿងល្អហើយដែលសមត្ថកិច្ចប្រែក្លាយការតាំងចិត្តមកជាការអនុវត្តជាក់ស្ដែង។
លោកថ្លែងថា៖ «តែយើងចង់ឃើញមានទិដ្ឋភាពច្បាប់ក្នុងការអនុវត្ត បើទិដ្ឋភាពច្បាប់មានភាពរឹងមាំ ការអនុវត្តនេះមានប្រយោជន៍។ ទិដ្ឋភាពច្បាប់យ៉ាងម៉េច? ការរឹបអូសរបៀបនេះយើងចង់ឃើញមាននៅក្នុងច្បាប់ចេញពីសភា។ កន្លងមកយើងបានត្រឹមតែឮជាគោលការណ៍។ ប៉ុន្តែបទល្មើសគ្រឿងញៀននេះ បើសិនជាពាក់ព័ន្ធនឹងការរំលោភអំណាច វាជាប្រភេទបទល្មើសពុករលួយដូច្នេះការរឹបអូសទ្រព្យសម្បត្តិពីជនពុករលួយក៏ត្រឹមត្រូវដែរ»៕