ភ្នំពេញៈ ភ្លៀងកក់ខែលាយឡំជាមួយខ្យល់កន្ត្រាក់កាលពីថ្ងៃទី ២៨ ខែ មេសា បានធ្វើឱ្យផ្ទះប្រជាពលរដ្ឋចំនួន ១៧០ ខ្នង ស្ថិតក្នុងខេត្តចំនួន ៦ ទទួលរងផលប៉ះពាល់ខូចខាត ដោយក្នុងនោះមាន ១០ ខ្នង បានដួលរលំ ១៥៦ ខ្នងបានប៉ើងដំបូល និង ៤ ខ្នងទៀតបានប៉ើងសំយាប។ នេះបើតាមការចុះផ្សាយរបស់ក្រសួងធនធានទឹក និងឧតុនិយម។
ទំព័រហ្វេសប៊ុករបស់ក្រសួងធនធានទឹក និងឧតុនិយម ដែលបានចេញផ្សាយពីម្សិលមិញ បានឲ្យដឹងថា ខេត្តទាំង ៦ ដែលមានផ្ទះពលរដ្ឋត្រូវរងផលប៉ះពាល់ពីខ្យល់កន្ត្រាក់នោះ គឺមានដូចជាខេត្តឧត្តរមានជ័យ កំពង់ឆ្នាំង កំពង់ធំ កំពង់ចាម ខេត្តកណ្ដាល និងខេត្តព្រះវិហារ ហើយនៅស្រុក ជាំក្សាន្ត ខេត្តព្រះវិហារនេះ គឺផ្ទះគ្រួសារកងទ័ពចំនួន ២៧ ខ្នង និងសាលប្រជុំរបស់កងពលធំលេខ ៣ ចំនួន ១ ខ្នង ត្រូវបានប៉ើងដំបូល។ ក្រៅពីនេះ ខ្យល់កន្ត្រាក់ក៏បានធ្វើឱ្យខ្លោងទ្វារសង្ក្រាន្តនៅក្រុងសៀមរាបខេត្តសៀមរាប បាក់រលំសង្កត់ឡានចំនួន ២ គ្រឿងផងដែរ។
ទោះជាយ៉ាងណាក្រសួងធនធានទឹក និងឧតុនិយម បានបញ្ជាក់ថា ក្នុងចំណោមករណីដួលរលំនិងប៉ើងដំបូលផ្ទះនេះ ពុំបានបង្កឱ្យមានគ្រោះថ្នាក់ដល់ជីវិតមនុស្ស និងរងរបួសទៅដល់មនុស្សឡើយ។
ជុំវិញនឹងបញ្ហានេះ លោក កែវ វី មន្ត្រីនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្ដិ៍ម្សិលមិញថា លោកមិនទាន់ទទួលបានរបាយការណ៍បូកសរុបរយៈពេលប៉ុន្មានថ្ងៃចុងក្រោយនៃការកើតមានខ្យល់កន្ត្រាក់និងផ្គររន្ទះ ដែលបំផ្លាញផ្ទះសំបែងពលរដ្ឋ និងបង្កគ្រោះថ្នាក់ដល់ពលរដ្ឋនៅឡើយទេ។
ប៉ុន្តែលោកនិយាយថា រាល់ករណីពលរដ្ឋរងផលប៉ះពាល់ពីគ្រោះធម្មជាតិទាំងនេះ នឹងទទួលបានជំនួយជាស្បៀងអាហារសង្គ្រោះបន្ទាន់ពីខាងកាកបាទក្រហម និងការជួយជួសជុលផ្ទះឡើងវិញ។
លោកបញ្ជាក់ថា៖ «មានការអំពាវនាវរបស់ប្រមុខរដ្ឋាភិបាលរួចហើយ ហើយនៅក្នុងហ្នឹង យើងមានបទបញ្ជារបស់អគ្គបញ្ជាការកងយោធពលខេមរភូមិន្ទ ដូច្នេះ អង្គភាពទ័ពឈរជើងកន្លែងណា ត្រូវមានភារកិច្ចធ្វើអន្តរាគមន៍ ដើម្បីជួយសង្គ្រោះប្រជាពលរដ្ឋ ដូចជា ជួយជម្លៀស ជួយជួសជុលផ្ទះ ហើយជួយកសាងផ្ទះឡើងវិញ»។
កាលពីថ្ងៃទី ២៨ មេសា ឧបនាយករដ្ឋមន្ត្រី លោក កែ គឹមយ៉ាន នៅពេលចុះសួរសុខទុក្ខប្រជាពលរដ្ឋរងគ្រោះដោយសារខ្យល់កន្ត្រាក់នៅខេត្តបន្ទាយមានជ័យ បានអំពាវនាវមន្ត្រីរាជការ កងកម្លាំងប្រដាប់អាវុធ និងសប្បុរសជន ចូលរួមជួយសង្គ្រោះប្រជាពលរដ្ឋដែលរងគ្រោះពីខ្យល់កន្ត្រាក់ ដោយលោកបានអះអាងថា ការជួយសង្គ្រោះប្រជាពលរដ្ឋរងគ្រោះទាំងនោះ គឺត្រូវធ្វើឡើងគ្រប់ទីកន្លែងដោយមិនប្រកាន់វណ្ណៈ ពណ៌សម្បុរ ជំនឿសាសនា ឬក៏និន្នាការនយោបាយឡើយ។
កាលពីថ្ងៃម្សិលមិញក្រសួងធនធានទឹកបានព្យាករបន្ថែមថា ដោយសារកម្ដៅអប្បបរមាក្នុងឆ្នាំ ២០១៩ កើន ឡើងខុសពីឆ្នាំមុនៗ គឺពី ២,០០ អង្សាដល់ ២,២០ អង្សា នឹងធ្វើឱ្យការប៉ះទង្គិចគ្នារវាងម៉ាស់ត្រជាក់ និងក្ដៅកាន់តែសកម្មថែមទៀត ដែលធ្វើឱ្យអាកាសធាតុមានការប្រែប្រួលឆាប់រហ័ស។ ចាប់ពីថ្ងៃទី ៣០ ខែ មេសា ដល់ថ្ងៃទី ២ ខែ ឧសភា នឹងមានភ្លៀងកក់ខែធ្លាក់តិចតួច នៅខេត្តកំពង់ចាម ត្បូងឃ្មុំ ព្រៃវែង ស្វាយរៀង តាកែវ កំពត ព្រះសីហនុ កណ្ដាល កំពង់ស្ពឹ និងកំពង់ឆ្នាំង។ រាជធានីភ្នំពេញ នឹងមានភ្លៀងកក់ខែធ្លាក់ពីតិចទៅបង្គួរ។
ភ្នំពេញប៉ុស្ដិ៍មិនអាចទាក់ទងសុំការបំភ្លឺបន្ថែមពីលោក ចាន់ យុត្ថា មន្ត្រីនាំពាក្យក្រសួងធនធានទឹកបានទេកាលពីម្សិលមិញ ដោយសារទូរស័ព្ទលោកមិនលើក។
ជុំវិញការធ្លាក់ភ្លៀងកក់ខែរយៈពេលប៉ុន្មានថ្ងៃចុងក្រោយនេះ ក៏បានធ្វើឱ្យខេត្តព្រះសីហនុ ចាប់ផ្ដើមមានការហូរទឹកស្អុយពណ៌ខ្មៅចូលទៅក្នុងសមុទ្រឡើងវិញដែរ គឺស្ថិតនៅឆ្នេរអារីស្ដុន សង្កាត់លេខ ៤ ក្រុង ព្រះសីហនុ និងកំពុងធ្វើឱ្យប៉ះពាល់ភ្ញៀវទេសចរ។ នេះបើតាមការលើកឡើងពីប្រព័ន្ធផ្សព្វផ្សាយក្នុងស្រុក។
លោក អីុ សុខឡេង អភិបាលក្រុងព្រះសីហនុបានបញ្ជាក់ ពីម្សិលមិញ ថា លោកពុំបានដឹងអំពីករណីហូរទឹកស្អុយចូលសមុទ្រនេះឡើយ ហើយលោកបានឱ្យទៅសួរលោក ចេង ស្រុង ប្រធានមន្ទីរដែនដី នគរូបនីយកម្ម និងសំណង់ខេត្ត និងលោក សាមុត សុធារិទ្ធ ប្រធានមន្ទីរបរិស្ថានខេត្ត ប៉ុន្តែប្រធានមន្ទីរទាំង ២ រូបនេះ ពុំអាចទាក់ទងបានឡើយកាលពីថ្ងៃម្សិលមិញ៕