.jpg)
ផ្ទះបងប្អូនប្រជាពលរដ្ឋរងគ្រោះដោយខ្យល់កន្ត្រាក់ នៅខេត្តបន្ទាយមានជ័យ កាលពីល្ងាចថ្ងៃទី ២១ ខែមេសា ឆ្នាំ ២០២១។ រូបថត រដ្ឋបាលខេត្តបន្ទាយមានជ័យ
ខេត្តបន្ទាយមានជ័យ៖ យ៉ាងហោចណាស់មានផ្ទះពលរដ្ឋ ៥២ ខ្នង និងអគារសាលារៀនចំនួន ២ បានរងការខូចខាត និងសត្វក្របីចំនួន ២ ក្បាលបានងាប់ដោយសារបាតុភូតភ្លៀងលាយឡំខ្យល់កន្ត្រាក់កើតឡើងក្នុងខេត្តចំនួន ៤ រួមមាន ខេត្តបន្ទាយមានជ័យ ព្រះវិហារ សៀមរាប និងមណ្ឌលគិរី កាលពីរសៀលថ្ងៃទី ២១ ខែមេសា។ នេះបើតាមលោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយនៅថ្ងៃ ២២ ខែមេសានេះ។
លោកថ្លែងថា៖ «បាតុភូតខ្យល់កន្ត្រាក់ និងផ្គររន្ទះនៅតែជាក្ដីព្រួយកង្វល់របស់ប្រជាកសិករ នៅតាមទីជនបទដាច់ស្រយាលដែលភាគច្រើនពួកគាត់រស់នៅក្នុងផ្ទះដែលសង់ឡើងពុំបានត្រឹមត្រូវតាមស្ដង់ដាបច្ចេកទេស»។
លោកបានបន្តថាក្នុងចំណោមផ្ទះ ៥២ ខ្នងដែលរងការខូចខាតដោយសារភ្លៀង និងខ្យល់កន្ត្រាក់កាលពីល្ងាចថ្ងៃទី ២១ ខែមេសានោះ ភាគច្រើនជាសំណង់ធ្វើពីឈើប្រក់សង្កសី ដែលសង់ឡើងមិនត្រឹមត្រូវតាមស្ដង់ដាបច្ចេកទេស។ ក្នុងនោះ ៣៣ ខ្នងផ្ទះស្ថិតក្នុងសង្កាត់ទឹកថ្លាក្រុងសិរីសោភណ្ឌ ខេត្តបន្ទាយមានជ័យ,៦ ខ្នងផ្ទះស្ថិតនៅក្នុងភូមិចម្រើន ឃុំច្រាច់ ស្រុកជ័យសែន ខេត្តព្រះវិហារ, ២ ខ្នងផ្ទះ នៅស្រុកបន្ទាយស្រី ខេត្តសៀមរាប និង ១១ ខ្នងផ្ទះ នៅស្រុកកោះញែក ខេត្តមណ្ឌលគិរី។
ជាមួយគ្នានេះដំបូលអគារសាលារៀនចំនួន ២ ក្នុងសង្កាត់ទឹកថ្លាក្រុងសិរីសោភណ្ឌ ខេត្តបន្ទាយមានជ័យក៏បានប៉ើងរបើករងការខូចខាតផងដែរ។
លោក កែវ វី បានបន្តថា ចំណែកផ្គររន្ទះដែលបានកើតឡើងក្នុងពេលមេឃកំពុងភ្លៀងកាលពីល្ងាចថ្ងៃទី ២១ ខែមេសានោះបានបណ្ដាលឲ្យងាប់សត្វក្របីចំនួន ២ ក្បាលរបស់ប្រជាកសិករក្នុងស្រុកបន្ទាយស្រី ខេត្តសៀមរាប ផងដែរ។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមនៅថ្ងៃទី ២១ ខែមេសាបានប្រកាសតាមរយៈសេចក្ដីជូនដំណឹងស្ដីពីការព្យាករអាកាសធាតុលើកទី ២ សម្រាប់ឆ្នាំ ២០២១ នេះថាភ្លៀងលាយឡំខ្យល់កន្ត្រាក់ និងផ្គររន្ទះនឹងកើតមានកាន់តែច្រើនឡើងចាប់ពីដើមរដូវវស្សាដែលនឹងចាប់ផ្ដើមពីសប្ដាហ៍ទី ១ នៃខែឧសភាខាងមុខនេះ។ មិនតែប៉ុណ្ណោះនៅក្នុងឆ្នាំនេះនឹងមានព្យុះកើតឡើងក្នុងរង្វង់ចន្លោះពី ២៨-៣០ នៅក្នុងមហាសមុទ្រប៉ាស៊ីហ្វិក និងអាចមានមួយចំនួនកើតឡើងផ្ទាល់នៅក្នុងសមុទ្រចិនខាងត្បូងដែលអាចមានឥទ្ធិពលដល់កម្ពុជា។
ថ្វីបើមានការជូនដំណឹង និងក្រើនរំឭកអំពីករណីនេះក្ដី ប៉ុន្តែប្រជាកសិករនៅខេត្តភាគពាយព្យ និងឧត្តរនៃប្រទេសកម្ពុជាហាក់ដូចជាមិនសូវយកចិត្តទុកដាក់នោះទេ។ ជាពិសេសក្នុងកាលៈទេសៈដែលប្រទេសកម្ពុជាកំពុងប្រឈមនឹងវិបត្តិរីករាលដាលនៃជំងឺកូវីដ១៩។
លោក ប៉ក់ អិត ប្រជាកសិករនៅភូមិ-ឃុំសឿ ស្រុកមង្គលបូរី ខេត្តបន្ទាយមានជ័យ បានប្រាប់ភ្នំពេញប៉ុស្តិ៍ថា ដោយសារប៉ុន្មានឆ្មាំមុននេះ ដើមរដូវវស្សាពុំមានភ្លៀងធ្លាក់គ្រប់គ្រាន់ គ្រួសាររបស់គាត់ធ្វើស្រែពុំសូវបានផលនោះទេ។
លោកថ្លែងថា៖ «ឥឡូវមានភ្លៀងធ្លាក់គ្រប់គ្រាន់ហើយ អ៊ីចឹងទាំងគ្រួសារខ្ញុំ និងអ្នកភូមិបាននាំគ្នាភ្ជួររាស់ដីស្រែ ធ្វើការសាបព្រោះស្រូវដើមរដូវវស្សានេះ ដោយមិនខ្វល់ និងមិនខ្លាចរឿងរន្ទះបាញ់អីនោះទេ»។
ជាមួយគ្នានេះ លោក លី យឿន ប្រជាកសិករនៅភូមិពាមរមាស ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យក៏បានថ្លែងដែរថា៖ «ការធ្វើស្រែនៅពេលមានភ្លៀងធ្លាក់ធ្វើឲ្យយើងសប្បាយរីករាយនិងមិនសូវមានការនឿយហត់នោះទេ។ រីឯដំណាំក៏លូតលាស់បានល្អដែរព្រោះវាត្រជាក់»៕
