ត្បូងឃ្មុំ/កំពង់ចាមៈ ករណីបាក់ច្រាំងទន្លេនៅចំណុចភូមិរកាធំ ឃុំជីរោទ៍ទី ១ ស្រុកត្បូងឃ្មុំបានបង្កឲ្យមានក្ដីបារម្ភយ៉ាងខ្លាំងដល់អាជ្ញាធរមូលដ្ឋាន និងប្រជាពុទ្ធបរិស័ទរួមទាំង ព្រះសង្ឃ និងតាជី យាយជី នៃវត្តឧទុម្ពរវនារាមរកាធំ ខណៈកុដិចំនួន ២ និងសាលាឆាន់ចំនួន ១ ត្រូវបានបាក់ធ្លាក់ដល់ជើងសសរ ដែលការបាក់ច្រាំងទន្លេនេះត្រូវបានមន្ត្រីជំនាញថ្លែងថា គឺជាផ្នែកមួយនៃគ្រោះធម្មជាតិ។
លោក តឹក លាង មេឃុំជីរោទ៍ទី ១ បានប្រាប់ភ្នំពេញប៉ុស្តិ៍ថា ពេលនេះអ្នកភូមិ និងអាជ្ញាធររួមទាំងគណៈកម្មការវត្តកំពុងនាំគ្នារុះរើកុដិ និងសាលាឆាន់ទាំងនោះ ដើម្បីរំកិលចេញទៅកាន់ទីតាំងថ្មី ខណៈទីតាំងចាស់ត្រូវបានបាក់ធ្លាក់ចូលទៅក្នុងទន្លេជិតដល់ជើងសសរកុដិ និងសាលាឆាន់ទៅហើយ។
លោក លាង និយាយថា៖ «ដើម្បីសុវត្ថិភាពរបស់ព្រះសង្ឃ និងតាជីយាយជីនៅក្នុងវត្តនេះ យើងចាំបាច់ត្រូវរុះរើ និងរំកិលសាលាឆាន់ព្រមទាំងកុដិទាំងអស់ចេញពីទីតាំងដែលកំពុងប្រឈមការបាក់ច្រាំងនេះ ព្រោះយើងគ្មានមធ្យោបាយទប់ស្កាត់ករណីបាក់ច្រាំងទន្លេនេះទេ»។
បើតាមលោក លាង វត្តឧទុម្ពរវនារាមរកាធំ កាលពីមុនមានផ្ទៃដីទំហំ ១១០ ម៉ែត្រគុណនឹង ៩៥ ម៉ែត្រ ប៉ុន្តែបច្ចុប្បន្នវត្តនេះនៅសល់ផ្ទៃដីប្រមាណ ៤០ ម៉ែត្រគុណ ៩៥ ម៉ែត្រប៉ុណ្ណោះ។ ការរួមតូចនៃផ្ទៃដីវត្តនេះគឺដោយសារតែករណីទឹកជន់លិច និងហូរច្រោះបាក់ច្រាំងទន្លេជាបន្តបន្ទាប់ ពិសេសនៅក្នុងឆ្នាំនេះការបាក់ច្រាំងមានទំហំធំជាងឆ្នាំមុន និងកើតឡើងចំនួន ៣ ដងរួចមកហើយចាប់តាំងពីខែកក្កដាមក។
អ្នកស្រី ពេជ្រ ស៊ន់ ប្រធានគណៈកម្មការវត្តឧទុម្ពរវនារាមរកាធំ បានប្រាប់ភ្នំពេញប៉ុស្តិ៍ថា ដោយមានការជួយជ្រោមជ្រែងពីប្រជាពលរដ្ឋអាជ្ញាធរមូលដ្ឋាន និងមន្ទីរធម្មការ និងសាសនានៅរសៀលថ្ងៃអង្គារ កុដិរបស់ព្រះគ្រូចៅអធិការវត្តដែលធ្វើពីឈើប្រក់ក្បឿងទំហំ ៦ ម៉ែត្រគុណ ១០ ម៉ែត្រត្រូវបានរំកិលចេញពីកន្លែងគ្រោះថ្នាក់បានជាស្ថាពរហើយ ចំណែកកុដិធំមួយទៀត ដែលធ្វើពីថ្មត្រូវបានរុះរើដំបូល ទ្វារ បង្អួច និងសម្ភារមួយចំនួនចេញជាបណ្ដើរ ខណៈដែលកុដិនេះមានការប្រឈមការបាក់ធ្លាក់ចូលទន្លេធ្ងន់ធ្ងរជាងគេ។
អ្នកស្រី ស៊ន់ និយាយថា៖ «នៅពេលនេះយើងបានធូរស្រាលចិត្តបន្តិច ក្រោយពីកុដិរបស់ព្រះគ្រូចៅអធិការវត្តត្រូវបានរំកិលចេញពីកន្លែងគ្រោះថ្នាក់ ទៅកាន់កន្លែងមានសុវត្ថិភាព គឺជាទីតាំងជាប់នឹងព្រះវិហារ»។ អ្នកស្រីបន្តថា នៅព្រឹកថ្ងៃពុធម្សិលមិញ ប្រជាពលរដ្ឋ និងអាជ្ញាធរនឹងបន្តជួយរំកិលសាលាឆាន់ និងកុដិព្រះសង្ឃមួយខ្នងទៀតចេញពីកន្លែងគ្រោះថ្នាក់មកកាន់ទីសុវត្ថិភាពដែលស្ថិតនៅក្បែរៗគ្នានឹងព្រះវិហារដែរ។
ព្រះតេជគុណ គារ សុគន្ធ ព្រះចៅអធិការវត្តឧទុម្ពរវនារាមរកាធំបានមានដីកាប្រាប់ភ្នំពេញប៉ុស្តិ៍ថា ស្ថិតក្នុងស្ថានភាពដ៏គ្រោះថ្នាក់នៃមហន្តរាយបាក់ច្រាំងទន្លេចូលមកជិតកុដិ និងសាលាឆាន់នេះ ព្រះអង្គសូមបិណ្ឌបាតដល់អាជ្ញាធរគ្រប់លំដាប់ថ្នាក់ សមត្ថកិច្ចពាក់ព័ន្ធ សប្បុរសជនក្នុង និងក្រៅប្រទេស ជួយទប់ស្កាត់ការបាក់ស្រុតច្រាំងទន្លេនេះ ដើម្បីរក្សាដីជាបរិវេណវត្តដែលនៅសល់ឲ្យបានគង់វង្សសម្រាប់ព្រះសង្ឃតាជីយាយជី ទាំងក្នុងពេលបច្ចុប្បន្ន និងតទៅអនាគតបានគង់នៅជាប្រយោជន៍ដល់ប្រជាពលរដ្ឋមកគោរពបូជាក្នុងវិស័យព្រះពុទ្ធសាសនា។
លោក សេង សុខខឿន អភិបាលស្រុកត្បូងឃ្មុំឲ្យដឹងថា ជុំវិញបញ្ហាបាក់ធ្លាក់ច្រាំងទន្លេមេគង្គប៉ះពាល់ដល់វត្តខាងលើនេះ អាជ្ញាធរបានស្នើសុំអន្តរាគមន៍ជួយទប់ស្កាត់ការបាក់ច្រាំងទន្លេបន្ទាន់ទៅក្រសួងធនធានទឹក និងឧតុនិយមដើម្បីជួយសង្គ្រោះច្រាំងទន្លេនៅចំណុចទីតាំងវត្តនេះរួចហើយ។
លោកថ្លែងថា៖ «ជាមួយគ្នានេះយើងក៏បានត្រៀមរកទីតាំងថ្មីរួចហើយដែរ គឺនៅម្ខាងផ្លូវបេតុងឃ្លាតពីទីតាំងវត្តសព្វថ្ងៃប្រហែលពី ៣០០ ម៉ែត្រទៅ ៤០០ ម៉ែត្រក្នុងភូមិរកាធំដដែល»។
មិនចំពោះតែវត្តនេះមួយទេ ដែលកំពុងជួបប្រឈមទៅនឹងករណីបាក់ច្រាំងទន្លេ វត្តធម្មយុត្តិចុងកោះដែលមានទីតាំងស្ថិតនៅតាមដងទន្លេមេគង្គក្នុងភូមិទី ៩ ឃុំកោះសូទិន ស្រុកកោះសូទិន ខេត្តកំពង់ចាមក៏ជួបនូវគ្រោះមហន្តរាយដូចគ្នានេះដែរ។
លោក ឡោ ស៊ាងហ៊ត់ អធិការរងស្រុកកោះសូទិនបានប្រាប់ភ្នំពេញប៉ុស្តិ៍កាលពីថ្ងៃអង្គារថា នៅពេលនេះច្រាំងទន្លេបានបាក់ធ្លាក់ដល់ព្រះវិហារហើយ និងធ្វើឲ្យសសរគ្រឹះនៃព្រះវិហារចំនួន ២ បានបាក់ធ្លាក់ចូលទន្លេ។ ចំពោះករណីនេះគណៈកម្មការ អាចារ្យវត្តព្រះសង្ឃ និង អាជ្ញាធរពាក់ព័ន្ធកំពុងនាំគ្នារុះរើព្រះពុទ្ធបដិមាចេញពីក្នុងព្រះវិហារដែលត្រូវបានបាក់ស្រុតនោះ។
លោកបញ្ជាក់ថា៖ «យើងសោកស្ដាយខ្លាំងណាស់ ដែលយើងគ្មានមធ្យោបាយក្នុងការទប់ស្កាត់ករណីបាក់ច្រាំងទន្លេដែលធ្វើឲ្យប៉ះពាល់ដល់ព្រះវិហារនៃវត្តអារាមរបស់យើងដែលមានអាយុកាលជាង ១០០ ឆ្នាំនេះ។ យើងមានតែនាំគ្នារុះរើ ប្ដូរទីតាំងវត្តរបស់យើងចេញពីទីតាំងមាត់ទន្លេប៉ុណ្ណោះ»។
លោក យិន សាវុធ ប្រធាននាយកដ្ឋានជលសាស្ត្រ និង ការងារទន្លេនៃក្រសួងធនធានទឹក និងឧតុនិយមបានប្រាប់ភ្នំពេញប៉ុស្តិ៍កាលពីម្សិលមិញថា ករណីបាក់ច្រាំងទន្លេគឺជាផ្នែកមួយនៃគ្រោះមហន្តរាយពីធម្មជាតិដែលជាទូទៅគឺបណ្ដាលមកពីចរន្តទឹកហូរបុកយ៉ាងគំហុកពីផ្នែកខាងលើនៃខ្សែទឹក ក្នុងអំឡុងពេលមានទឹកជំនន់ ហើយនៅពេលទឹកចាប់ផ្ដើមស្រកចុះទៅវិញ ស្រទាប់ដីខាងក្រោមនៃច្រាំងទន្លេមានសភាពទន់ជ្រាយខ្លាំងដោយសារទឹកដែលដក់នៅស្រទាប់ដីខាងលើបានហូរច្រោះ ពិសេសច្រាំងទន្លេដែលមានស្ថានភាពចោតខ្ពស់ខ្លាំង។
លោក សាវុធ បញ្ជាក់ថា៖ «ការបាក់ច្រាំងទន្លេមិនបង្កឡើងពីការធ្វើអាជីវកម្មបូមខ្សាច់ស្របច្បាប់នោះទេ»។ ជាមួយគ្នានេះលោកបន្តថា នៅពេលនេះក្រុមមន្ត្រីជំនាញកំពុងសហការជាមួយអាជ្ញាធរមូលដ្ឋាន ចុះត្រួតពិនិត្យទីតាំងដែលមានករណីបាក់ច្រាំងនេះ ដើម្បីរៀបចំផែនការជួសជុលកែលម្អឡើងវិញនារដូវប្រាំងខាងមុខនេះ៕