ភ្នំពេញៈ អគ្គនាយកដ្ឋានពន្ធដារប្រាប់ទៅម្ចាស់អចលនទ្រព្យទាំងអស់ឱ្យបង់ប្រាក់ពន្ធលើអចលនទ្រព្យតាមទូរស័ព្ទដៃក្នុងកម្មវិធី «GDT Taxpayer App» ដោយមិនចាំបាច់មកដោយផ្ទាល់ ដោយសារថា ការបង់ប្រាក់ពន្ធលើអចលនទ្រព្យតាមកម្មវិធីទូរស័ព្ទដៃនេះនឹងបង្កលក្ខណៈងាយស្រួល និងតម្លាភាពក្នុងការប្រមូលពន្ធ។
សេចក្តីជូនដំណឹងរបស់អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុឱ្យដឹងកាលពីថ្ងៃទី ១១ មីនា ថា ក្នុងបរិបទនៃការធ្វើទំនើបកម្មប្រព័ន្ធបច្ចេកវិទ្យាព័ត៌មានក្នុងវិស័យពន្ធដារ ស្របតាមគោលនយោបាយកែទម្រង់របស់រាជរដ្ឋាភិបាល អគ្គនាយកដ្ឋានពន្ធដារបានអភិវឌ្ឍមុខងារ សម្រាប់បង់ប្រាក់ពន្ធលើអចលនទ្រព្យតាមកម្មវិធីថ្មីក្នុងទូរស័ព្ទដៃ។
សេចក្តីជូនដំណឹងនេះអះអាងថា ការអភិវឌ្ឍមុខងារថ្មី គឺដើម្បីធានានូវប្រសិទ្ធភាព និងតម្លាភាពលើការគ្រប់គ្រងការប្រមូលចំណូលក៏ដូចជាដើម្បីបង្កលក្ខណៈងាយស្រួល ហើយឆាប់រហ័សជូនដល់ម្ចាស់អចលនទ្រព្យដោយមិនចាំបាច់ទៅបង់ប្រាក់ពន្ធនៅតាមសាខាពន្ធដារខេត្ត ខណ្ឌណាមួយនោះទេ។
សេចក្តីជូនដំណឹងបញ្ជាក់ថា៖ «កម្មវិធីនេះនឹងបង្កលក្ខណៈងាយស្រួលដល់ម្ចាស់អចលនទ្រព្យ ជាអ្នកជាប់ពន្ធក្នុងការពិនិត្យមើលព័ត៌មានស្តីពីអចលនទ្រព្យដែលបានចុះបញ្ជី និងបានធ្វើបច្ចុប្បន្នភាពរួចរាល់នៅក្នុងប្រព័ន្ធគ្រប់គ្រង ទិន្នន័យអចលនទ្រព្យរបស់អគ្គនាយកដ្ឋានពន្ធដារ។ បង់ពន្ធលើអចលនទ្រព្យប្រចាំឆ្នាំរបស់ខ្លួនដោយមិនចាំបាច់បំពេញព័ត៌មានក្នុងទម្រង់លិខិតប្រកាសពន្ធ»។
អគ្គនាយកដ្ឋានពន្ធដារបន្ថែមថា៖ «វាក៏ចំណេញពេលវេលា ហើយមិនចាំបាច់ទៅកាន់សាខាពន្ធដារខេត្ត-ខណ្ឌ ដែលអចលនទ្រព្យនោះស្ថិតនៅ ដើម្បីធ្វើការផ្ទៀងផ្ទាត់បង្កាន់ដៃបញ្ជាក់ការបង់ប្រាក់ពន្ធ។ ទទួលបាននូវសេចក្តីជូនដំណឹងផ្សេងៗ [តាមប្រព័ន្ធនេះ] ដូចជាកាលបរិច្ឆេទនៃការប្រកាសបង់ពន្ធ កាលបរិច្ឆេទនៃការផុតកំណត់ការបង់ប្រាក់ពន្ធ ការប្រកាសបង់ប្រាក់ពន្ធខ្លះ ក្នុងការិយបរិច្ឆេទជាប់ពន្ធណាមួយ និងសេចក្តីជូនដំណឹងផ្សេងៗទៀត ពាក់ព័ន្ធនឹងប្រភេទពន្ធនេះ»។
លោក គង់ វិបុល អគ្គនាយកនៃអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុបានណែនាំក្នុងសេចក្តីជូនដំណឹងដែរថា ដើម្បីអាចប្រើប្រាស់កម្មវិធីបង់ប្រាក់ពន្ធលើអចលនទ្រព្យតាមទូរស័ព្ទនេះម្ចាស់អចលនទ្រព្យអាចទាញយក និងដំឡើងកម្មវិធីក្នុងទូរស័ព្ទដោយផ្ទាល់ ដោយវាយពាក្យ GDT Taxpayer App។
បើតាមលោក វិបុល បន្ទាប់ពីដំឡើងកម្មវិធីនេះហើយ ម្ចាស់អចលនទ្រព្យថ្មីត្រូវបង្កើតគណនីប្រើប្រាស់ ដោយភ្ជាប់ជាមួយលេខអត្តសញ្ញាណប័ណ្ណ ឬលិខិតឆ្លងដែន ឬសារអេឡិចត្រូនិក ឬលេខទូរស័ព្ទ ឬលេខអត្តសញ្ញាណកម្មពន្ធរូបវន្តបុគ្គលណាមួយក៏បាន និងពាក្យសម្ងាត់ ដើម្បីចូលប្រើប្រាស់កម្មវិធី។
លោកបញ្ជាក់ថា៖ «ម្ចាស់អចលនទ្រព្យត្រូវបញ្ចូលព័ត៌មានអចលនទ្រព្យរបស់ខ្លួនដោយប្រើប្រាស់លេខអត្តសញ្ញាណកម្មអចលនទ្រព្យនោះ និងលេខទូរស័ព្ទរបស់ម្ចាស់អចលនទ្រព្យដែលបានចុះបញ្ជី ឬបច្ចុប្បន្នភាពព័ត៌មានក្នុងប្រព័ន្ធគ្រប់គ្រងទិន្នន័យអចលនទ្រព្យរបស់អគ្គនាយកដ្ឋានពន្ធដារ។ ម្ចាស់អចលនទ្រព្យអាចធ្វើការបង់ប្រាក់តាមអនឡាញតាមរយៈធនាគារពាណិជ្ជជាដៃគូរបស់អគ្គនាយកដ្ឋានពន្ធដារ»។
បន្ថែមពីនេះលោក គង់ វិបុល សង្កត់ធ្ងន់ថា កម្មវិធីនេះអាចប្រើប្រាស់សម្រាប់តែអចលនទ្រព្យដែលបានចុះបញ្ជី និងធ្វើបច្ចុប្បន្នភាពព័ត៌មានរួចរាល់ក្នុងប្រព័ន្ធគ្រប់គ្រងទិន្នន័យអចលនទ្រព្យរបស់អគ្គនាយកពន្ធដារតែប៉ុណ្ណោះ។ ក្នុងករណីមិនអាចចូលប្រើប្រាស់បានម្ចាស់អចលនទ្រព្យត្រូវមកទទួលព័ត៌មាន ឬធ្វើបច្ចុប្បន្នភាពនៅតាមអគ្គនាយកដ្ឋានពន្ធដារ ឬសាខាពន្ធដារ ខេត្ត ខណ្ឌ ដែលអចលនទ្រព្យស្ថិតនៅ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា លើកឡើងថា ការដែលស្ថាប័ននេះបានវិវឌ្ឍខ្លួនឱ្យមានការបង់ប្រាក់ពន្ធធ្វើឡើងតាមរយៈអនឡាញ គឺជារឿងមួយដែលប្រសើរ ស្របពេលដែលប្រជាជនកម្ពុជាកំពុងប្រឈមខ្លាំងនឹងការធ្វើដំណើរដោយសារជំងឺកូវីដ១៩។
ទោះយ៉ាងណាលោកចង់ឃើញឱ្យមានការបង់ពន្ធបែបនេះ ដោយលោកស្នើថា៖ «យើងក៏សំណូមពរឱ្យមាននីតិវិធីក្នុងការចុះឈ្មោះ [ចុះបញ្ជីលើអចលនទ្រព្យ] ហើយនិងការបង់ពន្ធនេះធ្វើឡើងដំណាលគ្នា។ តាមខ្ញុំដឹង រហូតមកដល់ពេលនេះ នីតិវិធីនៃការចុះបញ្ជីលើអចលនទ្រព្យនេះគឺមិនបើកច្រកឱ្យមានការចុះបញ្ជីតាមអនឡាញហើយឬនៅទេ? បើសិនជាមិនទាន់ យើងចង់ឱ្យដំណើរការនៃការចុះបញ្ជីលើអចលនទ្រព្យ និងការបង់ពន្ធនេះជាដំណើរការមួយព្រមគ្នា»។
បើតាមលោក សន ជ័យ ការចង់ឃើញយ៉ាងដូច្នេះ ដោយសារតែបច្ចុប្បន្នកំណើននៃការចុះបញ្ជីលើអចលនទ្រព្យ មានការកើនឡើងខ្លាំង។ ការចុះបញ្ជីអចលនទ្រព្យ និងការបង់ពន្ធលើអចលនទ្រព្យដំណើរការតាមអនឡាញទាំងអស់ព្រមគ្នានេះនឹងជួយឱ្យចំណេញពេលវេលា និងបង្កភាពងាយស្រួលដល់ពលរដ្ឋដែលអាចប្រើសេវានេះបាន ជាពិសេសនៅពេលដែលមានការរាតត្បាតដោយមេរោគកូវីដ ១៩៕