ព្រះវិហារៈ មន្ទីរសាធារណការ និងដឹកជញ្ជូនខេត្តព្រះវិហារបានចាប់ផ្ដើមជួសជុលផ្លូវដែលរងការខូចខាតដោយគ្រោះទឹកជំនន់កន្លងមកនេះ ខណៈខេត្តផ្សេងមន្ត្រីកំពុងចុះស្រាវជ្រាវពីផលប៉ះពាល់ ស្របពេលដែលគណៈកម្មាធិការគ្រប់គ្រងគ្រោះមហន្តរាយទើបតែបង្ហាញផ្នែកមួយចំនួននៃផលប៉ះពាល់ដោយទឹកជំនន់នេះ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារបានប្រាប់ភ្នំពេញប៉ុស្តិ៍ពីម្សិលមិញថា ទឹកជំនន់នៅឆ្នាំនេះបានបង្កការខូចខាតផ្លូវក្នុងខេត្តនេះប្រវែង ៨ គីឡូម៉ែត្រ។ ក្នុងនោះរួមមានផ្លូវជាតិលេខ ៩,ផ្លូវជាតិលេខ ៩៥ និងផ្លូវលំមួយចំនួនទៀតនៅក្នុងស្រុកត្បែងមានជ័យ ស្រុកឆែប និងស្រុកជាំក្សាន្ត។
លោកបានបន្តថា កំណាត់ផ្លូវដែលខូចខាតមានកន្លែងខ្លះទំហំធំ កន្លែងខ្លះតូច ប៉ុន្តែបើសិនមិនជួសជុលឡើងវិញភ្លាមៗទេ វានឹងរីកធំជាងនេះ ហើយនឹងបង្កការលំបាកកាន់តែខ្លាំងឡើងដល់ការធ្វើដំណើរ។
លោកបានបញ្ជាក់ថា៖ «ពេលនេះទឹកបានស្រកទៅវិញអស់ហើយ។ ដូច្នេះដើម្បីសម្រួលដល់ការដឹកជញ្ជូន និងការធ្វើដំណើរក្រុមការងារនៃមន្ទីរសាធារណការយើង បានចុះជួសជុលផ្លូវទាំងនោះឡើងវិញ ៣ ថ្ងៃកន្លងមកនេះសម្រេចបានជាង ៣០ ភាគរយហើយ»។
តាមទិន្នន័យរបស់គណៈកម្មាធិការជាតិគ្រប់គ្រងគ្រោះមហន្តរាយ គ្រោះទឹកជំនន់ទន្លេមេគង្គបានបង្កផលប៉ះពាល់ផ្លូវជាតិ និងផ្លូវខេត្ត (ផ្លូវកៅស៊ូ) រួមទាំងផ្លូវជនបទ (ផ្លូវបេតុង,ផ្លូវក្រួសក្រហ និងផ្លូវដី) សរុបប្រវែង ១០០២ គីឡូម៉ែត្រ។ ក្នុងនោះផ្លូវជាតិ និងផ្លូវខេត្តមានប្រវែង ៧៤ គីឡូម៉ែត្រ និងផ្លូវជនបទប្រវែង ៩២៦ គីឡូម៉ែត្រ។
ទោះជាយ៉ាងណាលោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្តិ៍ពីម្សិលមិញថា ទិន្នន័យខាងលើនេះគ្រាន់តែជាផ្នែកមួយនៃផលប៉ះពាល់ដោយគ្រោះទឹកជំនន់នៅក្នុងឆ្នាំនេះប៉ុណ្ណោះ។
លោកបានឲ្យដឹងថា ជំនន់ទន្លេមេគង្គ និងជំនន់ទឹកភ្លៀងក្នុងឆ្នាំនេះបានបង្កឲ្យស្លាប់មនុស្សយ៉ាងតិច ២០ នាក់ និង ១១ នាក់ទៀតរងរបួស។ រីឯដំណាំស្រូវខូចខាតជាង ១៣-០០០ ហិកតា និងដំណាំរួមផ្សំជាច្រើនពាន់ហិកតាទៀត។
លោកបានបញ្ជាក់ថា៖ «យ៉ាងណាក៏ដោយ ទំហំនៃការខូចខាតជារួមនៅមិនទាន់មានការវាយតម្លៃនៅឡើយទេ ដោយសារនៅតំបន់មួយចំនួនទឹកទើបតែចាប់ផ្ដើមស្រក»។
លោក ប៉ាល់ ចន្ទតារា រដ្ឋលេខាធិការ និងជាអ្នកនាំពាក្យនៃក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍ពីម្សិលមិញថា ពេលនេះមន្ត្រីជំនាញកំពុងចុះស្រាវជ្រាវពីផលប៉ះពាល់ផ្លូវដោយទឹកជំនន់ផង និងកំពុងចុះយុទ្ធនាការជួសជុលកែលម្អផ្លូវជាតិសំខាន់ៗផង។
លោកថា៖ «ពេលនេះមន្ត្រីជំនាញយើងនៅមិនទាន់បញ្ចប់ការចុះសិក្សាវាយតម្លៃផលប៉ះពាល់ហេដ្ឋារចនាសម្ព័ន្ធផ្លូវថ្នល់ដែលបង្កឡើងដោយទឹកជំនន់នៅឡើយទេ ដោយសារខេត្តមួយចំនួនទឹកមិនទាន់ស្រកអស់»។
ប៉ុន្តែលោកថានៅតាមបណ្ដាខេត្តមួយចំនួនមន្ត្រីជំនាញនៃមន្ទីសាធារណការ និងដឹកជញ្ជូនព្រមទាំងអាជ្ញាធរមូលដ្ឋានបានចាប់ផ្ដើមចុះជួសជុលផ្លូវដែលខូចខាតដោយទឹកជំនន់នោះជាបណ្ដើរៗហើយ៕